A Zezi kõo mak-sõng sik-m-mengã wɛɛngẽ
A Zezi kõo mak-sõng sik-m-mengã wɛɛngẽ
“Mam kõo yãmb mamsg tɩ y maan wa mam me sẽn maan yãmbã.”—ZÃ 13:15.
Y NA N LEOKAME TƖ BÕE?
Nand tɩ Wẽnnaam Bi-riblã wa tẽngã zugu, wãn to la a wilg t’a yaa sik-m-meng soaba?
Wãn to la a Zezi wilg tẽngã zug t’a yaa sik-m-meng soaba?
A Zezi sik-m-mengã waa ne nafa bʋse?
1, 2. Yʋng ning b sẽn yõk a Zezi wã, bõe la a maan n sagl a tʋm-tʋmdbã?
YƲNG ning b sẽn yõk a Zezi wã, a zĩnda Zerizalɛm ne a tʋm-tʋmdbã. B rʋʋ yĩngr doogẽ n naag taab n dɩ. A Zezi wa n yikame n yãk a zugẽ fuugã, n dɩk peend n sẽb a sɛɛga, n yãk koom n sɩng a karen-biisã nao waasgo, la a yẽesd ne peendã. Rẽ poore, a lebs n ninga a fuugã. Bõe yĩng t’a Zezi sik a meng n maan woto?—Zã 13:3-5.
2 A meng wilga rẽ võore, n yeel woto: “Yãmb bãnga bũmb ning mam sẽn maan yãmbã võor bɩ? . . . Mam sẽn yaa yãmb Zusoab la y karen-saamb n waas yãmb naoã, yãmb me tog n waasa taab naoa. Tɩ bõe, mam kõo yãmb mamsg tɩ y maan wa mam me sẽn maan yãmbã.” (Zã 13:12-15) A Zezi sẽn sik a meng n waas a tʋm-tʋmdbã naoã, a wilg-b-la bũmb b sẽn pa na n yĩmi, la sẽn na n sõng tɩ bãmb me yɩ sik-m-mens rãmba.
3. a) Wãn to la a Zezi wilg naoor a yiib tɩ sik-m-meng tara yõodo? b) Bõe yell la d na n gom sõs-kãngã pʋgẽ?
3 Pa a Zezi sẽn waas a tʋm-tʋmdbã naoã n yɩ pipi a sẽn wilg tɩ sik-m-meng yaa sõma ye. Sẽn deng rẽ, daar a yembre, a tʋm-tʋmdbã wẽe no-koeemd n dat n bãng bãmb sʋkã ned ning sẽn yaa-a kãseng n yɩɩda. A Zezi zĩniga bi-bilf a sɛɛgẽ, n yeel woto: “Ned sã n deeg bi-kãngã mam yĩnga, a reegda maam. La sẽn deeg-a maam, a reegda sẽn tʋm-a maamã. Tɩ bõe, ned ning sẽn yaa bilf yãmb fãa sʋkã, yaa yẽ n yaa kãsenga.” (Luk 9:46-48) Rẽ zugẽ, a Zezi wa n sõsda ne fariziẽ-rãmbã sẽn nong naamã, n yeel woto: “Ned ning fãa sẽn waoogd a menga, a na paam paoogre, la ned ning fãa sẽn sikd a menga, a na paam waoogre.” (Luk 14:11) Rẽnd yaa vẽeneg t’a Zezi ratame t’a karen-biisã yɩ sik-m-mens rãmba. A pa rat tɩ b yɩ wuk-m-mens rãmb la neb sẽn baood n lʋɩ b taabã taoor ye. Bɩ d gom mak-sõng ning a Zezi sẽn kõ tõnd sik-m-mengã wɛɛngẽ wã yelle, n bãng d sẽn tõe n dɩk a togs-n-taar to-to. D na n yãame me tɩ ned sã n yaa sik-m-meng soaba, nafd-a lame, la nafd a taaba.
“MAM KA LEB POORẼ YE”
4. Nand t’a Zezi wa tẽngã zugu, wãn to la a wilg t’a yaa sik-m-meng soaba?
4 Nand tɩ Wẽnnaam Bi-riblã wa tẽngã zugu, a sɩng n yaa sik-m-meng soaba. A zĩnda ne a Ba wã saasẽ n maan yʋʋm ka tɛka. A Ezai sebrã pʋgẽ, b bilga Biigã sẽn gom yẽ sẽn wa n be ne a Ba wã yelle, n yeel woto: “Zusoab a Wẽnnaam kõo maam gom-minim zɩlemd tɩ m tõe n bãng goam nins mam sẽn tog n leok ned ning pãng sẽn sɛ wã. Yibeoog fãa, bãmb yokda mam tʋbr tɩ m kelg wa karen-biiga. Zusoab a Wẽnnaam yoka mam tʋbre, la mam ka tõdg ye. Mam ka leb poorẽ ye.” (Ezai 50:4, 5) A Zezi ra nonga Wẽnnaam zãmsgã ne a sũur fãa. A ra sikda a meng n kelgdẽ. Sẽn paase, a ra ne a Zeova sẽn sik a meng n get ninsaalbã sẽn yaa koangdbã yell to-to wã.
5. A Zezi ne a Sʋɩtãan sẽn wa n wẽed no-koeemdã, wãn to la a wilg t’a yaa sik-m-meng soaba?
5 La pa malɛgsã fãa n da yaa sik-m-mens rãmb wa a Zezi ye. Wala makre, malɛk ning sẽn wa n lebg a Sʋɩtãanã ra pa nong a Zeova zãmsgã ye. A lebga wuk-m-meng soaba, n tagsdẽ t’a yɩɩda a taabã. Woto yaa toor fasɩ ne sik-m-menga. A Sʋɩtãan wuk-m-mengã kɩtame t’a kɩɩs a Zeova. A Zezi yẽ pa woto ye. A ra maanda sũ-noog ne tʋʋmd ning Wẽnnaam sẽn da bobl-a wã. A zɩ n tũnug ne a tõogã n maan sẽn pa zems me ye. Biiblã wilgame tɩ daar a yembre, a Zezi sẽn yaa malɛgsã naab a Misɛllã ne a Sʋɩtãan ‘wẽe no-koeemd a Moiiz kũumã poorẽ.’ La a Zezi sika a menga, n pa maan bũmb a sẽn pa tar sor n na n maan ye. A basame t’a Zeova sẽn yaa ãndũniyã fãa Bʋ-kaoodã welg yellã tɩ zems ne a raabã.—Karm-y Ziid 9.
6. Wãn to la a Zezi sẽn sak n lebg Mesi wã wilg t’a yaa sik-m-meng soaba?
6 Sãmbg sẽn ka be, nand t’a Zezi wa tẽngã zugu, a ra mii bãngr-goam nins sẽn wilgd Mesi wã vɩɩm sẽn na n yɩ to-to wã. Dẽnd tõe t’a sɩng n miime tɩ namsg n gũud-a. La a saka Wẽnnaam daabã, n wa tẽngã zug n lebg Mesi wã, n sak n ki menga. Bõe n sõng-a? Tʋm-tʋmd a Poll wilgame tɩ yaa a sik-m-mengã, n yeele: “Baa a sẽn da wõnd Wẽnnaamã, a pa tags n na n deeg a zĩiga, sẽn dat n yeel tɩ n bao n zeng Wẽnnaam ye. Ayo, a sak n basa a ziirã, n lebg wa yamba, n puk ninsaalb wõneg pʋgẽ.”—Fil. 2:6, 7, MN.
A SẼN LEBG NINSAALÃ, A KELL N “SIKA A MENGA”
7, 8. A Zezi yãadmẽ la a koe-moonegã sasa, wãn to la a wilg t’a yaa sik-m-meng soaba?
7 A Poll yeelame t’a Zezi sẽn wa n lebg ninsaalã, “a sika a meng n sak n ki, hali n ki kũum [da-luk zugu, MN].” (Fil. 2:8) A Zezi yãadmẽ me, a kõo mak-sõng sik-m-mengã wɛɛngẽ. Baa a ba-wubdg a Zozɛf la a ma a Maari sẽn da pa zems zãngã, a sika a meng n sak-ba. (Luk 2:51) A sẽn maan woto wã, a kõo kambã mak-sõngo. Wẽnnaam ningda kamb nins sẽn dɩkd a naoorã barka.
8 A Zezi sẽn wa n lebg kãsmã, a kell n wilgame t’a yaa sik-m-meng soaba, n da lʋɩɩsd a Zeova raabã taoore. (Zã 4:34) A koe-moonegã sasa, a ra pʋta Wẽnnaam yʋ-peellã. A sõnga neb nins sẽn dat sɩdã tɩ b bãng a Zeova raabã la a sẽn yaa Wẽnnaam ning buudã. A Zezi leb n da tũuda bũmb nins a sẽn da zãmsd nebã. Wala makre, a sẽn wa n na n zãms a karen-biisã pʋʋsgã, a yeela woto: ‘Tõnd Ba sẽn be [saasẽ, MN] tɩ yãmb yʋʋr yɩ ne waoogre.’ (Mat. 6:9) Rẽnd a Zezi wilga a karen-biisã t’a Zeova yʋʋrã waoogr n segd n pak-b n yɩɩda. Yaa woto la yẽ mengã maan-yã. A Zezi kũumã sẽn wa n kolgã, a pʋʋsa a Zeova n yeel woto: “Mam wilga bãmb [a tʋm-tʋmdbã] yãmb yʋʋre, la mam na n le wilga bãmba.” (Zã 17:26) Sẽn paase, a Zezi ra wae n yetame tɩ yẽ sẽn maand bũmb ninsã fãa tũuda ne a Zeova sõngre.—Zã 5:19.
9. Bõe la a Zakari reng n togs Mesi wã zugu, la wãn to la rẽ pids-yã?
9 No-rɛɛs a Zakari togsa bãngr-gomd Mesi wã zugu, n yeel woto: “Siõ neba, kɩdm-y-yã! Zerizalɛm neba, kaas-y-yã! Gese, yãmb dĩmã wata y nengẽ. Bãmb yaa tɩrga, bãmb yaa tõogr soaba. Bãmb zomba bõn-bil sẽn yaa bõn-yãang biig ne sik-m-meng n watẽ.” (Zak. 9:9) Bãngr-gom-kãngã pidsa yʋʋmd 33 soabã Pakã sasa. A Zezi sẽn wa n kẽed Zerizalɛmmã, neb wʋsg yɛɛda b fut sorã zugu, tɩ sãnda kɛ tiis vãad n gãnege. Kibarã wilgame tɩ tẽngã fãa rãmbame. La baa nebã sẽn kils a Zezi wã, a ra yaa sik-m-meng soaba.—Mat. 21:4-11.
10. A Zezi sẽn sak Wẽnnaam n tãag kũumã wilga bõe?
10 A Zezi Kirist rogmã tɛk n tãag a sẽn ki kũum da-lukã zugã, a wilgame t’a yaa sik-m-meng soab la sakda. A sẽn maan woto wã, a wilgame tɩ ninsaal tõe n kell n saka a Zeova baa zu-loe-kɛgems taoore. Wilgame me t’a Sʋɩtãan sẽn yeel tɩ ãdem-biisã tũuda a Zeova rẽ sẽn nafd-b yĩng balã yaa ziri. (Zoob 1:9-11; 2:4) Kiristã sẽn sak a Zeova zãng-zãngã wilgame me t’a Zeova n tar sor n na n yɩ yĩngr la tẽng naaba, la t’a sẽn dɩt a naamã to-to wã zemsame. Sãmbg sẽn ka be, a Zeova sũur yɩɩ noog ne a Bi-riblã sẽn sik a meng n sak-a woto wã.—Karm-y Yelbũn 27:11.
11. A Zezi kũumã kɩtame tɩ neb nins sẽn tẽed-a wã na n paam bõe?
11 A Zezi sẽn ki kũum da-lukã zugã kɩtame tɩ ãdem-biisã tõe n paam b mens ne yel-wẽndã la kũumã. (Mat. 20:28) Kɩtame t’a Zeova tõe n kõ nebã yel-wẽn sugr la a kõ-b vɩɩm sẽn pa sɛtã n pa kɩɩs a noyã sẽn yaa tɩrsã ye. A Poll yeela woto: “Tɩrlem tʋʋmd a yembr waa ne zemsg sẽn wat ne vɩɩm nebã fãa yĩnga.” (Rom 5:18) A Zezi kũumã paka sor tɩ neb paam vʋʋsem sõng zaeeb n na n wa tɩ vɩɩmd saasẽ n pa le tõe n ki, tɩ neb nins a sẽn boond t’a “piis a taabã” na n paam vɩɩm sẽn kõn sa tẽngã zugu.—Zã 10:16; Rom 8:16, 17.
MAM ‘PA MI ZẼK-M-MENG YE’
12. Wãn to la a Zezi sẽn tall manesem ning ne nebã wilg t’a yaa sik-m-meng soab la nin-nana?
12 A Zezi boola neb nins fãa sẽn ya la sẽn koms raoodã tɩ b wa yẽ nengẽ, tɩ rẽ la b na n paam yolsgo. A yeelame tɩ d rɩk yẽ nao n zãms bũmb ning a sẽn na n wilg tõndã tɩ bala, yẽ “yaa ned sẽn ka mi sũ-toog la zẽk-m-meng” ye. (Mat. 11:28, 29, Sebr Sõngo) A Zezi sẽn da yaa sik-m-meng soab la nin-nana wã, a ra bʋkda a meng ne nebã fãa, n pa bakd ned ye. Wala makre, a ra pa baood t’a tʋm-tʋmdbã maan bũmb b sẽn pa tõe ye. A ra pẽgd-b lame la a kengd b raoodo, n pa maand wa b pa tar yõod wall minim ye. Vẽenega, a Zezi ra pa zãad a tʋm-tʋmdbã ne toolem ye. A meng yeela woto: “Mam yɛlã yaa naana, la mam zɩɩb yaa faasga.” Woto rat n yeelame tɩ bũmb nins a sẽn dat t’a karen-biisã maanã pa toog wʋsg ye. B sã n dɩkd a togs-n-taar la b tũud a zãmsgã, b na n paama yolsgo. Yaa rẽ la neb buud fãa sẽn da nong a zĩigẽ wã.—Mat. 11:30.
13. Wãn to la a Zezi zoe neb nins sẽn namsdã nimbãanega?
13 A Zezi ra zoeta Israyɛll neb nins sẽn namsdã nimbãanega, n da maand a sẽn tõe fãa n sõngd-ba. Daar a ye, a sega zoang yʋʋr sẽn boond t’a Bartime ne a zon-taag Zeriko noore. B ra kaasdame n kot a Zezi sõngre, tɩ kʋʋngã yeel-b tɩ b sĩndi. A Zezi ra tõe n maana wa a pa wʋmd zoensã goama, la a pa maan woto ye. A zoee b nimbãanega, n kɩt tɩ b bool-ba, t’a puk b ninã. Hakɩka, a Zezi sẽn wilg t’a yaa sik-m-meng soab la nimbãan-zoɛtã, a rɩka a Zeova sẽn yaa a Ba wã togs-n-taare.—Mat. 20:29-34; Mark 10:46-52.
“NED SÃ N SIK A MENGA, A NA N PAAMA WAOOGRE”
14. A Zezi sik-m-mengã waa ne nafa bʋse?
14 A Zezi sẽn wilg t’a yaa sik-m-meng soabã waa ne bark wʋsgo. A Zeova sũur yɩɩ noog ne a Bi-riblã sẽn sak-a wã. A Zezi tʋm-tʋmdbã ne a karen-biisã ra paamda yolsg a sɛɛgẽ. A mak-sõngã, a zãmsgã la a saglsã sõng-b lame tɩ b bãng Wẽnnaam raabã sõma. A Zezi sik-m-mengã nafa neb a taab me. A zãms-b lame, a kenga b raood la a sõng-ba. Sẽn paase, a Zezi maoongã maasem yĩnga, ned ning fãa sẽn tẽed-a na n paama bark wakat sẽn kõn sa yĩnga.
15. Wãn to la a Zezi sik-m-mengã naf-a?
15 La rẽ yĩnga a Zezi sik-m-mengã nafa yẽ mengã bɩ? N-ye. Bala, a Zezi yeela a karen-biisã woto: “Ned sã n waoog a menga, a na n paama paoogre, la ned sã n sik a menga, a na n paama waoogre.” (Mat. 23:12) A Poll wilgame tɩ sɩd yɩɩ woto ne a Zezi, n yeele: “Wẽnnaam waooga [a Zezi] ne waoogr sẽn yaa kãsenga, n kõ bãmb yʋʋr sẽn yɩɩd yʋyã fãa, hal tɩ ne a Zezi yʋʋre, dũmã fãa sẽn be yĩngrã ne sẽn be tẽngã zugu, la sẽn be tẽngã pʋgẽ wã na n yĩgimdame, la tɩ zɛlmã fãa na n kɩsa kaset t’a Zezi Kirist yaa Zusoaba, tɩ yɩ tõnd Ba a Wẽnnaam waoogre.” A Zezi sẽn wilg t’a yaa sik-m-meng soab la sakd tẽngã zugã, a Zeova waoog-a lame, n kõ-a ziir sẽn yɩɩd saasẽ la tẽng zug bõn-naandsã fãa rẽndã.—Fil. 2:9-11.
A ZEZI NA N ‘KẼNGA SƖD NE SIK-M-MENG YĨNGA’
16. Wãn to la Wẽnnaam Biigã na n kell wilg t’a yaa sik-m-meng soaba?
16 Wẽnnaam Bi-riblã na n ket n wilgdame t’a yaa sik-m-meng soaba. Yɩɩll Sõamyã sebrã bilga a Zezi sẽn na n zab ne Wẽnnaam bɛɛbã to-to a sã n wa reeg a naamã saasẽ, n yeel woto: “Zomb f weefã f naamã pʋgẽ n kẽng tõogr yĩnga. Kẽng sɩd ne sik-m-meng la tɩrlem yĩnga.” (Yɩɩl 45:4, MN) Armagedõ sasa, a Zezi Kirist na n kẽnga ne sɩd la tɩrlem, n zab sik-m-mengã yĩnga. La Kiristã naamã sẽn na n kaoos yʋʋm tusrã saabẽ, bõe n na n maane? Rẽ t’a “tõoga pãn-soaadbã fãa, la noyã fãa la pãens fãa.” A na n kell n yɩɩ sik-m-meng soab bɩ? N-ye. Biiblã wilgame t’a na n ‘lebsa soolmã a Ba a Wẽnnaam nugẽ.’—Karm-y 1 Korẽnt dãmb 15:24-28.
17, 18. a) Bõe yĩng tɩ d segd n dɩk a Zezi togs-n-taar sik-m-mengã wɛɛngẽ? b) Sogs-bʋs la sõsg ning sẽn pʋgdã na n leoke?
17 La tõnd yẽ? D na n dɩka a Zezi togs-n-taar sik-m-mengã wɛɛngẽ bɩ? A Zezi Kirist sã n wa na n kao bʋʋdã Armagedõ, na n yɩɩ wãn ne tõndo? A sẽn yik bũmb ning yĩngã na n kɩtame t’a fãag sik-m-mens rãmbã la nin-tɩrsã bala. Rẽnd yɩl n paam n põse, sik-m-meng yaa tɩlae. Sẽn paase, d sã n yaa sik-m-mens rãmba, na n nafa tõnd mensã la neb a taab wa a Zezi sik-m-mengã sẽn naf yẽ la neb a taabã.
18 Bõe n tõe n sõng-d tɩ d rɩk a Zezi togs-n-taar sik-m-mengã wɛɛngẽ? Wãn to la d tõe n yɩ sik-m-mens rãmb baa rẽ sẽn pa nana wã? Sõsg ning sẽn pʋgdã na n leoka sogs-kãensã.
[Zãmsgã sogsgã]
[Foto seb-neng 15]
Yam bʋg la d tõe n dɩk a Zezi sik-m-mengã pʋgẽ?
[Foto seb-neng 16]
A Zezi kõo mak-sõng nimbãan-zoeerã wɛɛngẽ
