1, 2. Ki lès práktiko Hesus a siña su apòstelnan riba su último anochi aki riba tera?

TA HESUS su último anochi aki riba tera. E ku su apòstelnan ta komiendo den un kamber ariba den un kas na Herúsalèm. Durante e sena akí, Hesus ta lanta, kita su paña djariba, pon’é un banda i ta mara un sèrbètè na su sintura. Despues, e ta basha awa den un ponchera i ta kuminsá laba pia di su disipelnan i seka nan ku e sèrbètè. Ora e kaba, e ta bolbe bisti su paña djariba. Dikon Hesus a hasi e tarea humilde akí?—Huan 13:3-5.

² Hesus mes a splika: “Boso ta komprondé kiko mi a hasi ku boso? . . . Si ami, aunke mi ta Señor i Maestro, a laba boso pia, boso tambe mester laba pia di otro. Pasobra mi a duna boso un ehèmpel, pa boso tambe hasi manera mi a hasi ku boso.” (Huan 13:12-15) Sí, labando pia di su apòstelnan, Hesus a siña nan un lès práktiko ku nunka mas nan lo a lubidá i ku lo a animá nan pa despues nan tambe mustra humildat.

3. (a) Kon Hesus a ilustrá e importansia di humildat na dos okashon? (b) Kiko nos lo trata den e artíkulo akí?

³ Ora Hesus a laba pia di su apòstelnan, no tabata e promé biaha ku el a siña nan e importansia di humildat. Poko tempu promé, algun di su apòstelnan tabata diskutí enkuanto ken tabata mas grandi entre nan. Hesus a laga un mucha chikitu para banda di dje i a bisa su apòstelnan: “Ken ku risibí e mucha akí den mi nòmber ta risibí mi tambe, i ken ku risibí mi, ta risibí tambe Esun ku a manda mi. Pasobra esun ku ta komportá su mes komo esun di mas chikitu meimei di boso tur, esei ta esun ku ta grandi.” (Luk. 9:46-48) Poko tempu despues,  ora Hesus tabata papia ku e fariseonan, kendenan a pensa ku nan tabata mas importante ku otro hende, el a bisa: “Tur hende ku halsa nan mes, lo keda humiá, i esun ku humiá su mes, lo keda halsá.” (Luk. 14:11) Ta bisto anto ku Hesus ke pa su siguidónan ta humilde i no orguyoso òf arogante. P’esei, laga nos wak ki ehèmpel di humildat Hesus a pone pa nos imitá. Ademas, nos lo mira kon e kualidat akí ta benefisiá tantu esun ku ta mustra humildat komo otro hende.

4. Kon e Yu unigénito di Dios a desplegá humildat promé ku el a bini na tera?

⁴ E Yu unigénito di Dios a desplegá humildat asta promé ku el a bini na tera. El a pasa míles di miónes di aña huntu ku su Tata den shelu. E buki bíbliko di Isaías ta deskribí e relashon íntimo ku e tabatin ku su Tata ku e siguiente palabranan: “Señor DIOS a duna mi un lenga ku a wòrdu siñá, pa mi sa kon pa sostené ku palabra esun ku ta kansá. E ta spièrta mi mainta tras mainta; e ta spièrta mi orea pa tende manera un ku ta wòrdu siñá. Señor DIOS a habri mi orea; mi no tabata desobedesidu, ni mi no a hala atras.” (Isa. 50:4, 5) E Yu di Dios tabata humilde i a presta bon atenshon na loke Yehova tabata siñ’é. E tabata ansioso i dispuesto pa siña di e Dios berdadero. I siguramente, el a opservá kon Yehova tabata desplegá humildat, mustrando miserikòrdia na hende pekaminoso.

5. Komo Miguel e arkangel, kon Hesus a demostrá humildat i modestia ora e tabatin un desakuerdo ku Diabel?

⁵ No ta tur kriatura selestial tabatin e mesun aktitut ku e Yu unigénito di Dios. E angel ku a bira Satanas e Diabel, por ehèmpel, no kier a siña di Yehova. El a bira orguyoso i a kuminsá sintié mas importante ku otronan; el a desplegá un aktitut kontrario na humildat. De echo, el a rebeldiá kontra Yehova. Pero Hesus tabata diferente: Nunka el a hasi mal uso di su outoridat ni e no tabata malkontentu ku su posishon den shelu. Aunke Hesus tabata Miguel e arkangel, e no a hasi nada ku e no tabata outorisá pa hasi. Por ehèmpel, ora e tabatin ‘un desakuerdo ku Diabel tokante e kurpa di Moises,’ el a demostrá humildat i modestia i a warda pa Yehova, e Hues Supremo di universo, atendé e asuntu na Su manera i na Su debido tempu.—Lesa Hudas 9.

6. Kon Hesus a desplegá humildat ora el a aseptá pa bira e Mesías?

⁶ Promé ku Hesus a bini na tera, sin duda, e tabata sa di e profesianan ku a deskribí su bida komo Mesías aki riba tera. Pues, lo e mester tabata sa di e kosnan desagradabel ku tabata sper’é. Tòg el a aseptá pa bini na tera i muri komo e Mesías primintí. Kon bini? Apòstel Pablo a mustra ku loke a yuda Hesus tabata humildat. El a skirbi: “Aunke e tabata eksistí den forma di Dios, [e] no a pensa mes ku e mester a gara un puesto, esta, ku lo e mester tabata igual ku Dios. Nò, mas bien el a entregá tur loke e tabatin i a tuma un kondishon di esklabo i a bira hende.”—Flp. 2:6, 7.

7, 8. Kon Hesus a demostrá humildat durante su infansia i durante su sirbishi aki riba tera?

⁷ Pablo a skirbi: “Ora [Hesus] a presentá komo hende, el a humiá su mes i a bira obediente te na morto, sí, morto riba un staka di tormento.” (Flp. 2:8) For di chikitu, Hesus a pone un ekselente ehèmpel den humildat. Maske su mayornan ku a lant’é, esta, Hose i Maria, tabata imperfekto,  Hesus semper “a keda sumiso na nan.” (Luk. 2:51) Hesus tabata un ekselente ehèmpel pa hóbennan. Si nan tambe obedesé nan mayornan, Yehova lo bendishoná nan.

⁸ Tempu ku Hesus tabata adulto tambe el a demostrá ku e ta humilde. P’e, e kos di mas importante tabata hasi e boluntat di Yehova. (Huan 4:34) Durante su sirbishi aki riba tera, Hesukristu a usa e nòmber di Dios i a siña hende sinsero ki klase di Dios su Tata ta i kiko ta Su propósito pa humanidat. Ademas, Hesus mes a biba di akuerdo ku loke e tabata siña hende tokante Yehova. At’akí un ehèmpel: Ora Hesus a siña su disipelnan hasi orashon, e promé kos ku el a enfatisá tabata Dios su nòmber. El a bisa: “Nos Tata ku ta den shelu, bo nòmber sea santifiká.” (Mat. 6:9) Asina Hesus a laga su siguidónan komprondé ku santifikashon di Yehova su nòmber mester ta e kos di mas importante den nan bida. I e mes a pone un bon ehèmpel den esaki. Na final di Hesus su sirbishi aki riba tera, ku rason e por a bisa su Tata: “Mi a hasi bo nòmber konosí na nan [e apòstelnan] i lo mi sigui hasié konosí.” (Huan 17:26) Durante henter su bida riba tera, Hesus a duna Yehova mérito pa tur loke el a logra riba tera.—Huan 5:19.

9. Kiko Zakarías a profetisá enkuanto e Mesías, i kon Hesus a kumpli ku e profesia akí?

⁹ Relashoná ku e Mesías, Zakarías a profetisá: “Regosihá grandemente, o yu muhé di Sion! Grita ku húbilo, o yu muhé di Herúsalèm! Ata bo Rei ta bini serka bo; e ta hustu i ta trese salbashon, humilde i sintá riba un buriku, riba un buriku yòn, yu di un buriku muhé.” (Zak. 9:9) E profesia akí a kumpli na aña 33 di nos era ora Hesus a drenta Herúsalèm promé ku e Fiesta di Pasku Hudiu. Mayoria di e multitut a habri nan pañanan riba kaminda i otronan a pone rama di palu. Sí, henter e stat a bira aribabou ora Hesus a drenta Herúsalèm. Pero asta ora e hendenan akí a alabá Hesus  komo Rei, el a keda humilde.—Mat. 21:4-11.

10. Kiko Hesus a proba kedando obediente te na morto?

¹⁰ Sí, Hesukristu a keda humilde i obedesidu te na su morto riba un staka di tormento. Asina el a demostrá ku hende por keda fiel na Yehova asta bou di prueba severo. Ademas, Hesus a proba ku loke Satanas a pretendé, esta, ku hende ta sirbi Yehova pa motibunan egoista, ta mentira. (Yòb 1:9-11; 2:4) E echo ku Kristu a keda fiel te na morto ta un prueba tambe ku ta Yehova so tin derecho di goberná i ku su manera di goberná ta esun mihó. Sin duda, Yehova a sintié kontentu ora el a mira e humildat i lealtat inkebrantabel di su Yu.—Lesa Proverbionan 27:11.

11. Ki prospekto e sakrifisio di reskate di Hesukristu ta duna esnan ku pone fe den dje?

¹¹ Mediante su morto riba staka di tormento, Hesus a paga tambe e preis di reskate pa humanidat. (Mat. 20:28) Esaki a hasi posibel pa Yehova pordoná nos pikánan di akuerdo ku su rekisitonan hustu i duna nos e prospekto di biba pa semper. Apòstel Pablo a skirbi: “Mediante ún akto di hustifikashon e resultado ta ku Dios ta deklará tur sorto di hende hustu pa bida.” (Rom. 5:18) Sí, Hesus su morto a hasi posibel ku kristiannan ungí ku spiritu santu por haña bida inmortal den shelu miéntras ku ‘e otro karnénan’ por haña bida eterno aki riba tera.—Huan 10:16; Rom. 8:16, 17.

12. Kon Hesus a demostrá suavedat i humildat den su trato ku hende imperfekto?

¹² Hesus a invitá tur hende ku ta “traha duru i ku ta kargá” pa bini serka dje. El a bisa nan: “Tuma mi yugo riba boso skouder i siña di mi, pasobra mi tin un genio suave i un kurason humilde, i boso alma lo keda refreská.” (Mat. 11:28, 29) Debí ku Hesus tabata humilde i tabatin un genio suave, el a trata tur hende meskos i ku bondat aunke nan tabata imperfekto. E no a spera pa su disipelnan hasi mas di loke nan tabata por. El a elogiá i enkurashá nan. E no a laga nan sinti ku nan ta bobo òf inkapas. Hesus no a trata su disipelnan brutu ni no a oprimí nan. Al kontrario, el a duna su siguidónan e siguransa ku si nan hala serka dje i kumpli ku su siñansanan, nan lo keda refreská, pasobra su yugo ta suave i su karga no ta pisá. Hende di tur edat, tantu hòmber komo muhé, a sinti nan bon den su kompania.—Mat. 11:30.

13. Kon Hesus a mustra kompashon na hende ku tabatin un bida duru?

¹³ Hesus tabatin duele di hende den Israel ku tabatin un bida duru. P’esei, el a hasi tur loke e tabata por pa yuda nan. Por ehèmpel, serka di Yériko, el a topa  dos limosnero siegu, Bartimeo i su amigu, kendenan tabata insistí pa e yuda nan. Ma e multitut a manda nan keda ketu na mal òrdu. Tabata fásil pa Hesus ignorá e hòmbernan siegu akí. Pero komo ku el a sinti duele di nan, el a pidi e hendenan pa trese nan serka dje i a duna nan nan bista bèk. Asina Hesus a desplegá humildat i a mustra miserikòrdia na pekadónan humilde, meskos ku su Tata, Yehova, a hasi.—Mat. 20:29-34; Mar. 10:46-52.

14. Kiko ta resultado di Hesus su humildat?

¹⁴ Hesukristu su aktitut humilde a resultá den goso i hopi benefisio. Yehova a keda kontentu ora el a mira ku su Yu stimá tabata obedes’é den tur kos. E manera tierno i humilde ku Hesus tabata trata su apòstel- i disipelnan tabata un konsuelo pa nan i a pone nan sinti nan animá. El a yuda nan progresá spiritualmente pasobra el a siña nan, elogiá nan i pone un bon ehèmpel pa nan. No ta Hesus su disipelnan so a benefisiá di su humildat; tabatin hopi otro hende mas ku el a yuda, siña i animá. Bon mirá, ta tur hende ku pone fe den Hesus lo benefisiá eternamente di su sakrifisio di reskate.

15. Kon Hesus su humildat a benefisiá e mes?

¹⁵ Pero kiko di Hesus mes? Su humildat a benefisi’é? Sigur ku sí, pasobra el a bisa su disipelnan: “Ken ku humiá su mes, lo keda halsá.” (Mat. 23:12) I e promesa ei a kumpli den Hesus su kaso tambe. Pablo ta laga nos komprondé esei ora el a bisa: “Dios a hals’é [esta, Hesus] na un puesto mas haltu i bondadosamente a dun’é e nòmber ku ta riba tur otro nòmber, di manera ku den nòmber di Hesus tur rudia mester dobla—di esnan den shelu, di esnan riba tera i di esnan bou di tera—i tur lenga mester rekonosé públikamente ku Hesukristu ta Señor pa gloria di Dios, e Tata.” Sí, Yehova a rekompensá Hesus pa e humildat i fieldat ku el a desplegá tempu ku e tabata riba tera: Yehova a hals’é, dunando e outoridat riba tur kriatura, tantu den shelu komo riba tera.—Flp. 2:9-11.

16. Kon nos por sa ku e Yu di Dios lo sigui desplegá humildat pa semper?

¹⁶ E Yu di Dios lo sigui desplegá humildat pa semper. Un salmista ta deskribí kon Hesus, komo Rei den shelu, lo sali pa enfrentá enemigunan di Dios. E ta bisa: ‘Den bo mahestat sali bai viktoriosamente pa kousa di bèrdat, humildat i hustisia.’ (Sal. 45:4) Na Armagedon, Hesukristu lo sali na defensa di hende humilde, hustu i ku ta stima loke ta bèrdat. Awor, kiko lo pasa na final di e Reinado di Mil Aña ora e Rei Mesiániko “kaba ku tur gobièrnu i tur outoridat i poder”? Lo e sigui desplegá humildat? Sí, pasobra Beibel ta bisa ku “lo e entregá e Reino na su Dios i Tata.”—Lesa 1 Korintionan 15:24-28.

17, 18. (a) Dikon ta importante pa sirbidónan di Yehova imitá Hesus su ehèmpel di humildat? (b) Ki preguntanan e siguiente artíkulo lo kontestá?

¹⁷ Awor kiko di nos? Nos lo imitá e ehèmpel di Hesus i desplegá humildat? Kòrda ku na Armagedon, ta hende humilde i hustu so e Rei Hesukristu lo salba. Pues, si nos ke sobrebibí, nos mester ta humilde. Es mas, meskos ku Hesukristu su humildat a benefisiá tantu e mes komo otronan, si nos ta humilde, esei lo resultá den hopi benefisio.

¹⁸ Kiko por yuda nos imitá Hesus su ehèmpel di humildat? Kon nos por ta humilde, asta ora esei no ta fásil? E siguiente artíkulo lo kontestá e preguntanan akí.