1, 2. Ki les practico Hesus a siña su apostelnan riba su ultimo anochi aki riba tera?

TA HESUS su ultimo anochi aki riba tera. E cu su apostelnan ta comiendo den un camber ariba den un cas na Jerusalem. Durante e cena aki, Hesus ta lanta, kita su paña di ariba, pon’e un banda y ta mara un serbete na su cintura. Despues, e ta basha awa den un punchero y ta cuminsa laba pia di su discipelnan y seca nan cu e serbete. Ora e caba, e ta bolbe bisti su paña di ariba. Dicon Hesus a haci e trabou humilde aki?​—Juan 13:3-5.

² Hesus mes a splica: “Boso ta compronde kico mi a haci cu boso? . . . Si ami, aunke mi ta Señor y Maestro, a laba boso pia, boso tambe mester laba pia di otro. Pasobra mi a duna boso un ehempel, pa boso tambe haci manera mi a haci cu boso.” (Juan 13:12-15) Si, labando pia di su apostelnan, Hesus a siña nan un les practico cu nunca mas nan lo a lubida y cu lo a anima nan pa despues nan tambe mustra humildad.

3. (a) Con Hesus a ilustra e importancia di humildad na dos ocasion? (b) Kico nos lo trata den e articulo aki?

³ Ora Hesus a laba pia di su apostelnan, no tabata e prome biaha cu el a siña nan e importancia di humildad. Poco tempo prome, algun di su apostelnan tabata discuti encuanto ken tabata mas grandi entre nan. Hesus a laga un mucha chikito para banda di dje y a bisa su apostelnan: “Ken cu ricibi e mucha aki den mi nomber ta ricibi mi tambe, y ken cu ricibi mi, ta ricibi tambe Esun cu a manda mi. Pasobra esun cu ta comporta su mes como esun di mas chikito meymey di boso tur, esey ta esun cu ta grandi.” (Luc. 9:46-48) Poco tempo despues, ora Hesus tabata papia  cu e fariseonan, kendenan a pensa cu nan tabata mas importante cu otro hende, el a bisa: “Tur hende cu halsa nan mes, lo keda humilia, y esun cu humilia su mes, lo keda halsa.” (Luc. 14:11) Ta bisto anto cu Hesus kier pa su siguidornan ta humilde y no orguyoso of arogante. Pesey, laga nos wak ki ehempel di humildad Hesus a pone pa nos imita. Ademas, nos lo mira con e cualidad aki ta beneficia tanto esun cu ta mustra humildad como otro hende.

4. Con e Yiu unigenito di Dios a desplega humildad prome cu el a bin na tera?

⁴ E Yiu unigenito di Dios a desplega humildad hasta prome cu el a bin na tera. El a pasa miles di miyones di aña hunto cu su Tata den cielo. E buki biblico di Isaias ta describi e relacion intimo cu e tabatin cu su Tata cu e siguiente palabranan: “Señor DIOS a duna mi un lenga cu a wordo siña, pa mi sa con pa sostene cu palabra esun cu ta cansa. E ta spierta mi mainta tras mainta; e ta spierta mi horea pa tende manera un cu ta wordo siña. Señor DIOS a habri mi horea; mi no tabata desobedecido, ni mi no a hala atras.” (Isa. 50:4, 5) E Yiu di Dios tabata humilde y a presta bon atencion na loke Jehova tabata siñ’e. E tabata ansioso y dispuesto pa siña di e Dios berdadero. Y siguramente, el a observa con Jehova tabata desplega humildad, mustrando misericordia na hende pecaminoso.

5. Como Miguel e arcangel, con Hesus a demostra humildad y modestia ora e tabatin un desacuerdo cu Diabel?

⁵ No ta tur criatura celestial tabatin e mesun actitud cu e Yiu unigenito di Dios. E angel cu a bira Satanas e Diabel, por ehempel, no kier a siña di Jehova. El a bira orguyoso y a cuminsa sintie mas importante cu otronan; el a desplega un actitud contrario na humildad. En realidad, el a rebela contra Jehova. Pero Hesus tabata diferente: Nunca el a haci mal uzo di su autoridad ni e no tabata malcontento cu su posicion den cielo. Aunke Hesus tabata Miguel e arcangel, e no a haci nada cu e no tabata autorisa pa haci. Por ehempel, ora e tabatin ‘un desacuerdo cu Diabel tocante e curpa di Moises’, el a demostra humildad y modestia y a warda pa Jehova, e Hues Supremo di universo, atende e asunto na Su manera y na Su debido tempo.​—Lesa Judas 9.

6. Con Hesus a desplega humildad ora el a acepta pa bira e Mesias?

⁶ Prome cu Hesus a bin na tera, sin duda, e tabata sa di e profecianan cu a describi su bida como Mesias aki riba tera. Pues, lo e mester tabata sa di e cosnan desagradabel cu tabata sper’e. Toch el a acepta pa bin na tera y muri como e Mesias priminti. Con bin? Apostel Pablo a mustra cu loke a yuda Hesus tabata humildad. El a skirbi: “Aunke e tabata existi den forma di Dios, [e] no a pensa mes cu e mester a gara un puesto, esta, cu lo e mester tabata igual cu Dios. No, mas bien el a entrega tur loke e tabatin y a tuma un condicion di esclavo y a bira hende.”​—Flp. 2:6, 7.

7, 8. Con Hesus a demostra humildad durante su infancia y durante su sirbishi aki riba tera?

⁷ Pablo a skirbi: “Ora [Hesus] a presenta como hende, el a humilia su mes y a bira obediente te na morto, si, morto riba un staca di tormento.” (Flp. 2:8) For di chikito, Hesus a pone un excelente ehempel den humildad. Maske su mayornan cu a lant’e, esta, Jose y Maria, tabata  imperfecto, Hesus semper “a keda sumiso na nan.” (Luc. 2:51) Hesus ta un excelente ehempel pa hobennan. Si nan tambe obedece nan mayornan, Jehova lo bendiciona nan.

⁸ Tempo cu Hesus tabata adulto tambe el a demostra cu e ta humilde. P’e, e cos di mas importante tabata haci e boluntad di Jehova. (Juan 4:34) Durante su sirbishi aki riba tera, Hesucristo a uza e nomber di Dios y a siña hende sincero ki clase di Dios su Tata ta y kico ta Su proposito pa humanidad. Ademas, Hesus mes a biba di acuerdo cu loke e tabata siña hende tocante Jehova. Ata aki un ehempel: Ora Hesus a siña su discipelnan haci oracion, e prome cos cu el a enfatisa tabata Dios su nomber. El a bisa: “Nos Tata cu ta den cielo, bo nomber sea santifica.” (Mat. 6:9) Asina Hesus a laga su siguidornan compronde cu santificacion di Jehova su nomber mester ta e cos di mas importante den nan bida. Y e mes a pone un bon ehempel den esaki. Pesey, na final di Hesus su sirbishi aki riba tera, e por a bisa su Tata: “Mi a haci bo nomber conoci na nan [e apostelnan] y lo mi sigui hacie conoci.” (Juan 17:26) Durante henter su bida riba tera, Hesus a duna Jehova merito pa tur loke el a logra riba tera.​—Juan 5:19.

9. Kico Zacarias a profetisa encuanto e Mesias, y con Hesus a cumpli cu e profecia aki?

⁹ Relaciona cu e Mesias, Zacarias a profetisa: “Regociha grandemente, o yiu muher di Sion! Grita cu hubilo, o yiu muher di Jerusalem! Ata bo Rey ta bin cerca bo; e ta husto y ta trece salbacion, humilde y sinta riba un burico, riba un burico jong, yiu di un burico muher.” (Zac. 9:9) E profecia aki a cumpli na aña 33 di nos era ora Hesus a drenta Jerusalem prome cu e Fiesta di Pasco Hudiu. Mayoria di e multitud a habri nan pañanan riba caminda y otronan a pone rama di mata. Si, henter e stad a emociona ora Hesus a drenta Jerusalem. Pero hasta ora e hendenan aki a alaba Hesus como Rey, el a keda humilde.​—Mat. 21:4-11.

10. Kico Hesus a proba kedando obediente te na morto?

 ¹⁰ Si, Hesucristo a keda humilde y obedecido te na su morto riba un staca di tormento. Asina el a demostra cu hende por keda fiel na Jehova hasta bou di prueba severo. Ademas, Hesus a proba cu loke Satanas a pretende, esta, cu hende ta sirbi Jehova pa motibonan egoista, ta mentira. (Job 1:9-11; 2:4) E echo cu Cristo a keda fiel te na morto ta un prueba tambe cu ta Jehova so tin derecho di goberna y cu su manera di goberna ta esun mihor. Sin duda, Jehova a sintie contento ora el a mira e humildad y lealtad inkebrantabel di su Yiu.​—Lesa Proverbionan 27:11.

11. Ki speransa e sacrificio di rescate di Hesucristo ta duna esnan cu pone fe den dje?

¹¹ Mediante su morto riba staca di tormento, Hesus a paga tambe e prijs di rescate pa humanidad. (Mat. 20:28) Esaki a haci posibel pa Jehova pordona nos picanan di acuerdo cu su rekisitonan husto y duna nos e speransa di biba pa semper. Apostel Pablo a skirbi: “Mediante un acto di hustificacion e resultado ta cu Dios ta declara tur sorto di hende husto pa bida.” (Rom. 5:18) Si, Hesus su morto a haci posibel cu cristiannan ungi cu spirito santo por haya bida inmortal den cielo mientras cu ‘e otro carnenan’ por haya bida eterno aki riba tera.​—Juan 10:16; Rom. 8:16, 17.

12. Con Hesus a demostra suavidad y humildad den su trato cu hende imperfecto?

¹² Hesus a invita tur hende cu ta “traha duro y cu ta carga” pa bin cerca dje. El a bisa nan: “Tuma mi yugo riba boso schouder y siña di mi, pasobra mi tin un genio suave y un curason humilde, y boso alma lo keda refresca.” (Mat. 11:28, 29) Debi cu Hesus tabata humilde y tabatin un genio suave, el a trata tur hende mescos y cu bondad aunke nan tabata imperfecto. E no a spera pa su discipelnan haci mas di loke nan tabata por. El a elogia y encurasha nan. E no a laga nan sinti cu nan ta bobo of incapaz. Hesus no a trata su discipelnan bruto ni no a oprimi nan. Al contrario, el a duna su siguidornan e siguransa cu si nan hala cerca dje y cumpli cu su siñansanan, nan lo keda refresca, pasobra su yugo ta suave y su carga no ta pisa. Hende di tur edad, tanto homber como muher, a sinti nan bon den su compania.​—Mat. 11:30.

13. Con Hesus a mustra compasion na hende cu tabatin un bida duro?

¹³ Hesus tabatin duele di hende na Israel cu tabatin un bida duro. Pesey, el a haci tur loke e tabata por pa yuda nan. Por ehempel, cerca di Jerico, el a topa dos limosnero ciego, Bartimeo y su amigo, kendenan tabata insisti pa e yuda  nan. Ma e multitud a zundra nan y manda nan keda keto. Tabata facil pa Hesus ignora e hombernan ciego aki. Pero como cu el a sinti duele di nan, el a pidi e hendenan pa trece nan cerca dje y a duna nan nan bista bek. Asina Hesus a desplega humildad y a mustra misericordia na pecador humilde, mescos cu su Tata, Jehova, a haci.​—Mat. 20:29-34; Mar. 10:46-52.

14. Kico ta resultado di Hesus su humildad?

¹⁴ Hesucristo su actitud humilde a resulta den goso y hopi beneficio. Jehova a keda contento ora el a mira cu su Yiu stima tabata obedec’e den tur cos. E manera tierno y humilde cu Hesus tabata trata su apostel- y discipelnan tabata un consuelo pa nan y a pone nan sinti nan anima. El a yuda nan progresa spiritualmente pasobra el a siña nan, elogia nan y pone un bon ehempel pa nan. No ta Hesus su discipelnan so a beneficia di su humildad; tabatin hopi otro hende mas cu el a yuda, siña y anima. En realidad, ta tur hende cu pone fe den Hesus lo beneficia eternamente di su sacrificio di rescate.

15. Con Hesus su humildad a benefici’e?

¹⁵ Pero kico di Hesus mes? Su humildad a benefici’e? Claro cu si, pasobra el a bisa su discipelnan: “Ken cu humilia su mes, lo keda halsa.” (Mat. 23:12) Y e promesa ey a cumpli den Hesus su caso tambe. Pablo ta laga nos compronde esey ora el a bisa: “Dios a hals’e [esta, Hesus] na un puesto mas halto y bondadosamente a dun’e e nomber cu ta riba tur otro nomber, di manera cu den nomber di Hesus tur rudia mester dobla​—di esnan den cielo, di esnan riba tera y di esnan bou di tera​—y tur lenga mester reconoce publicamente cu Hesucristo ta Señor pa gloria di Dios, e Tata.” Si, Jehova a recompensa Hesus pa e humildad y fieldad cu el a desplega tempo cu e tabata riba tera: Jehova a hals’e, dunando e autoridad riba tur criatura, tanto den cielo como riba tera.​—Flp. 2:9-11.

16. Con nos por sa cu e Yiu di Dios lo sigui desplega humildad pa semper?

¹⁶ E Yiu di Dios lo sigui desplega humildad pa semper. Un salmista ta describi con Hesus, como Rey den cielo, lo sali pa enfrenta enemigonan di Dios. E ta bisa: ‘Den bo mahestad sali bay victoriosamente pa causa di berdad, humildad y husticia.’ (Sal. 45:4) Na Armagedon, Hesucristo lo sali na defensa di hende humilde, husto y cu ta stima loke ta berdad. Awor, kico lo pasa na final di e Reinado di Mil Aña ora e Rey Mesianico “caba cu tur gobierno y tur autoridad y poder”? Lo e sigui desplega humildad? Si, pasobra Bijbel ta bisa cu “lo e entrega e Reino na su Dios y Tata.”​—Lesa 1 Corintionan 15:24-28.

17, 18. (a) Dicon ta importante pa sirbidornan di Jehova imita Hesus su ehempel di humildad? (b) Ki preguntanan e siguiente articulo lo contesta?

¹⁷ Awor kico di nos? Nos lo imita e ehempel di Hesus y desplega humildad? Corda cu na Armagedon, ta hende humilde y husto so e Rey Hesucristo lo salba. Pues, si nos kier sobrevivi, nos mester ta humilde. Ademas, mescos cu Hesucristo su humildad a beneficia tanto e mes como otronan, si nos ta humilde, nos tambe lo ricibi hopi beneficio.

¹⁸ Kico por yuda nos imita Hesus su ehempel di humildad? Con nos por ta humilde, hasta ora esey no ta facil? E siguiente articulo lo contesta e preguntanan aki.