Iesu—Faaa‘oa‘oga o le Lotomaulalo
Iesu—Faaaʻoaʻoga o le Lotomaulalo
“Ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea.”—IOA. 13:15.
O LE Ā LAU TALI?
Na faapefea ona faaalia e Iesu le lotomaulalo a o leʻi afio mai i le lalolagi?
Na faapefea ona faaalia e Iesu le lotomaulalo a o iai i le lalolagi?
O ā aogā o le lotomaulalo o Iesu?
1, 2. O le ā le faaaʻoaʻoga na faataatia e Iesu i lona pō mulimuli i le lalolagi?
I LE pō mulimuli o Iesu i le lalolagi, na faatasi ai ma ona soo i le potu pito i luga o se fale i Ierusalema. A o faia la latou tausamiga, ua tulaʻi, ma tuu ese lona ofu tele. Ua tago i le solo ma fusi ai lona puimanava. Ona ia tuu lea o ni vai i le tanoa, ma amata ona mulumulu ai vae o ona soo, ma soloi i le solo lea sa fusi ai o ia, ona toe fai ai lea o lona ofu tele. Aiseā na faia ai e Iesu nei gaoioiga lotomaulalo?—Ioa. 13:3-5.
2 Na fetalai Iesu i le Ioane 13:12-15 e faapea, ʻpo ua outou iloa le mea ua ou faia iā te outou? E ui o aʻu o le Alii, ma o le Aʻoaʻo, a ua ou mulumulu i o outou vae, e tatau foʻi ona outou femulumuluaʻi i o outou vae. Auā ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea.’ Na faagalogatā i le ʻausoo le gaoioiga lotomaulalo na faia e Iesu, ma na faalaeiauina ai i latou ina ia faaalia lea uiga.
3. (i) Na faapefea ona faamatilatila e Iesu le tāua o le lotomaulalo? (ii) O le ā o le a iloiloina i lenei mataupu?
3 Ina ua mulumulu e Iesu vae o ona soo, e lē o le taimi muamua lea na ia faamatilatila ai le tāua o le lotomaulalo. Auā muamua atu, ina ua faaalia e le ʻausoo le uiga fiasili, na faatū ai e Iesu se tamaitiiti i ona autafa ma fetalai atu iā i latou e faapea: “O sē e na te taliaina lenei tamaitiiti ona o loʻu igoa, ua ia taliaina aʻu, ma o sē e na te taliaina aʻu, ua ia taliaina foʻi lē na auina mai aʻu. O lē e fai o ia lava ma tagata faatauvaa iā te outou uma, e sili lava o ia.” (Luka 9:46-48) Na silafia lelei e Iesu le uiga fiasili na iai i le ʻau Faresaio. I se isi mea na tupu, na ia fetalai ai i le Luka 14:11 e faapea, “o sē e faaeaina o ia lava e faamaulaloina lea, a o sē e faamaulalo o ia iā te ia, e faaeaina lea.” Na atagia mai ai le naunau o Iesu e faaalia e ona soo le lotomaulalo nai lo o uiga faamaualuga. O lea, ina ia mafai ona tatou faaalia lenā uiga, seʻi o tatou iloilo totoʻa le faaaʻoaʻoga a Iesu o le lotomaulalo. E lē gata i lea, pe e faapefea foʻi ona aogā lea uiga iā i latou e faaalia, faapea foʻi i isi.
“OU TE LEʻI LILIU I LE ISI ITULAGI”
4. Na faapefea ona faaalia e Iesu le lotomaulalo a o leʻi afio mai i le lalolagi?
4 Na faaalia e Iesu le uiga lotomaulalo a o leʻi afio mai i le lalolagi, i le taimi sa ia faatasi ai ma lona Tamā i le lagi mo le tele o tausaga. O loo faamatalaina i le tusi o Isaia le faiā vavalalata a Iesu ma lona Tamā e faapea: “Ua foaʻi mai iā te aʻu e le Alii Pule Silisili Ese o Ieova le laulaufaiva o ē ua aʻoaʻoina, ina ia ou iloa le tala e fai atu i lē ua vaivai. E na te fafagu iā te aʻu i lea taeao ma lea taeao; e na te fafagu iā te aʻu ina ia faalogo oʻu taliga e pei o ē ua aʻoaʻoina. Ua tuuina mai le malamalama e le Alii Pule Silisili Ese o Ieova iā te aʻu, ae o aʻu, ou te leʻi tetee i ai. Ou te leʻi liliu i le isi itulagi.” (Isa. 50:4, 5) Na lotomaulalo Iesu ma naunau e uaʻi atu i lona Tamā a o Ia aʻoaʻoina o ia. Na vaaitino Iesu i le lotomaulalo o Ieova, i le auala na ia faaalia ai le alofa mutimutivale i le fanau a tagata.
5. Na faapefea ona faaalia e Iesu le lotomaulalo ma le faamaulalo ina ua ia finau ma le Tiapolo?
5 E leʻi faaalia e agelu uma i le lagi le lotomaulalo e pei o Iesu. E leʻi naunau le agelu na avea mulimuli ane ma Satani e aʻoaʻoina o ia e Ieova. Nai lo o lea, na uunaʻia o ia e le uiga fiamatamuamua ma le faamaualuga ina ia fouvale ai iā Ieova. Ae i sona faaeseesega, na lotomalie Iesu i lona tulaga i le lagi ma e leʻi taumafai e faaaogā sesē lana pule. O se faataʻitaʻiga, i se tasi taimi na la finau ai ma le ʻTiapolo i le tino oti o Mose.’ E ui o ia o Mikaele le agelu sili, ae na faaalia pea e Iesu le lotomaulalo ma le faamaulalo. Na ia lotomalie o le a taulima e Ieova o le Faamasino Sili, lea mataupu i lana auala ma lana taimi atofaina.—Faitau le Iuta 9.
6. Na faapefea ona faaalia e Iesu le lotomaulalo i lona talia o le faaeaga e avea ai ma Mesia?
6 A o leʻi afio mai Iesu i le lalolagi, e mautinoa na ia aʻoaʻoina valoaga e faatatau i le avea ai o ia ma Mesia. E foliga mai na ia malamalama lelei i faigatā o le a ia fesagaʻia. E ui i lea, na ia talia lona tofiga e afio mai o se Mesia e soifua ma maliu i le lalolagi. Aiseā? Na faaaogā e Paulo le faaaʻoaʻoga a Iesu o le lotomaulalo, e faamatilatila ai le tāua o lea uiga. E ui o Iesu o le agelu sili, ae na tusi Paulo, e leʻi manatu o ia ʻina ia tutusa ma le Atua.’ Nai lo lea, ʻna ia tuua o mea uma lava ma fai o ia ma pologa, ma avea ai o ia e pei o se tagata.’—Fili. 2:6, 7.
NA IA LOTOMAULALO INA UA AVEA MA TAGATA
7, 8. Na faaalia faapefea e Iesu le lotomaulalo a o iai i le lalolagi?
7 Na faapea atili mai Paulo, ʻina ua iloa e Iesu ua foliga o ia o se tagata, ona ia faamaulalo lea iā te ia lava, ma iʻu ai ina usiusitaʻi e oo i le oti, ioe, o le oti lea i le laau na faapuapuagatia ai o ia.’ (Fili. 2:8) Na faataatia e Iesu se faaaʻoaʻoga o le lotomaulalo mai lava i lona laʻitiiti. E ui ina tausia aʻe o ia e ni mātua lē lelei atoatoa, ae ʻna ia gauaʻi atu pea iā i laʻua.’ (Luka 2:51) O se faaaʻoaʻoga lelei lea mo talavou, o le a faamanuia e Ieova i latou, pe a naunau e gauaʻi i o latou mātua.
8 Na faaalia pea e Iesu le lotomaulalo ina ua avea o ia ma tagata matua, e ala i lona faamuamua o le faia o le finagalo o Ieova nai lo o lona lava loto. (Ioa. 4:34) Na fesoasoani Iesu i tagata faamaoni e malamalama i uiga o le Atua, faapea lana fuafuaga mo le fanau a tagata. Na ia faaaogā foʻi le suafa o Ieova i lana faiva. I lana tatalo faaaʻoaʻo, na muamua lava ona ia faapea mai, “lo matou Tamā e o i le lagi, ia faapaiaina lou suafa.” (Mata. 6:9) E lē gata i lea, o lona ola e ōgatusa ma mea na ia aʻoaʻo atu, na ia faamamaluina ai le suafa o Ieova. Na ia poloaʻia foʻi ona soo ina ia avea le faamamaluina o le suafa o Ieova, ma mea e sili ona tāua i o latou olaga. A o lata ina faaiʻu lana faiva i le lalolagi, na ia tatalo atu ai iā Ieova e faapea: “Ua ou faailoa atu lou suafa iā i latou, ma saga faailoa atu.” (Ioa. 17:26) Na avatu e Iesu le viiga i lona Tamā, ona o galuega sa mafai ona ia faataunuuina i le lalolagi.—Ioa. 5:19.
9. O le ā na valoia e Sakaria e faatatau i le Mesia, ma na faapefea ona faataunuuina iā Iesu?
9 Na valoia e Sakaria le Mesia e faapea: “Ia e matuā olioli oe le tama fafine a Siona. Ia e alaga i le manumalo oe le tama fafine a Ierusalema. Faauta! ua afio mai lou tupu iā te oe. E amiotonu o ia ma ua faaolaina; e lotomaulalo o ia, ma o loo tiʻetiʻe i le asini, i luga o se manu ua matua, o le tama foʻi a le asini fafine.” (Saka. 9:9) Na faataunuuina lea valoaga ina ua ulufale Iesu i Ierusalema, a o leʻi oo i le Paseka i le 33 T.A. Na vavaō le aai a o fola e tagata le auala i o latou ofu tele ma lālā o laau. E ui ina alalaga tagata o ia o le Tupu, ae na ia faaalia pea le lotomaulalo.—Mata. 21:4-11.
10. O le ā na faamaonia e Iesu e ala i le usiusitaʻi seʻia oo i lona maliu?
10 Na lotomaulalo ma usiusitaʻi pea Iesu, seʻia oo ina maliu i le laau e faapuapuagatia ai. Na faamaonia ai e Iesu e mafai e le tagata ona faamaoni iā Ieova, e ui i tofotofoga e sili ona faigatā. Na faamaonia ai foʻi le sesē o le tuuaʻiga a Satani e faapea, e auauna tagata iā Ieova ona o māfuaaga manatu faapito. (Iopu 1:9-11; 2:4) O le faamaoni atoatoa o Iesu na faamaonia ai le aiā a Ieova e pule ai, faapea le tonu o lana pule silisili ese. E mautinoa le fiafia o le finagalo o Ieova, a o mātauina le tumau faamaoni ma le lotomaulalo o lona Alo.—Faitau le Faataoto 27:11.
11. O ā avanoa ua mafai ona maua e tagata ona o le togiola a Iesu?
11 O le maliu o Iesu i le laau e faapuapuagatia ai, na togiolaina ai le fanau a tagata. (Mata. 20:28) Ona o le taulaga a Iesu, ua mafai ai ona faamagaloina e Ieova a tatou agasala e tusa ma ana tapulaa amiotonu. O lea, ua maua e le fanau a tagata le avanoa e ola ai e faavavau. Na taʻua e Paulo i le Roma 5:18, ʻna taʻuamiotonuina mo le ola ituaiga uma o tagata, ona o le amiotonu a le tagata e toʻatasi.’ Na saunia e le maliu o Iesu se faamoemoe e lē mafai ona oti i le lagi mo Kerisiano faauuina, faapea le ola e faavavau i le lalolagi mo “isi mamoe.”—Ioa. 10:16; Roma 8:16, 17.
ʻO AʻU O LĒ LOTOMAULALO’
12. Na faaalia faapefea e Iesu le agalelei ma le lotomaulalo i le auala na ia feutagaʻi ai ma tagata?
12 Na valaaulia e Iesu i latou na “tigāina ma mafatia i avega,” ina ia ō atu iā te ia. Na ia fetalai i le Mataio 11:28, 29: “Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou.” O le lotomaulalo ma le agamalu o Iesu, na uunaʻia ai o ia e agalelei ma lē faailoga tagata. Na magafagafa Iesu i mea e gafatia e ona soo, ma na ia faalaeiauina i latou i le tele o taimi. E leʻi faaalia e Iesu ni uiga sauā, pe gaoioi foʻi i se auala e lagona ai e le ʻausoo e leai so latou aogā. Peitaʻi, na ia faamautinoa i ona soo o le ola e tusa ma ana aʻoaʻoga, o le a faafouina ai i latou, auā e māmā lana avega. Na lagona e tagata uma le toʻafilemu, a o faatasi ma Iesu.—Mata. 11:30.
13. Na faapefea ona faaalia e Iesu le agalelei i ē lē taualoa?
13 Na manatu mamafa Iesu i manaʻoga o tagata lautele. Sa ia faaalia le alofa mutimutivale iā i latou, ona o lo latou tulaga lē taualoa. A o latalata atu Iesu i Ieriko, na ʻaiʻoi ane iā te ia se tagata ʻaisi tauaso e igoa iā Patimaio ma lana uō tauaso. Na la faatauanau ane pea iā Iesu mo se fesoasoani, e ui na taumafai tagata e taofia i laʻua. Na ono faigofie ona ʻalofia e Iesu i laʻua ona o lo la tulaga. Peitaʻi, o lona alofa mutimutivale, na ia faamālōlōina ai i laʻua. Na faataʻitaʻi Iesu i lona Tamā, i le faaalia o le lotomaulalo ma le agalelei i tagata agasala.—Mata. 20:29-34; Mare. 10:46-52.
ʻE FAAEAINA Ē LOTOMAULALO’
14. O ā aogā o le lotomaulalo o Iesu?
14 O le lotomaulalo o Iesu, na maua ai ni iʻuga lelei. E mautinoa le fiafia o Ieova a o ia mātauina le gauaʻi o lona Alo e faia lona finagalo. Na faafouina ona soo i le lotomaulalo ma le agamalu o Iesu. Na fesoasoani ana faaaʻoaʻoga, aʻoaʻoga, ma faalaeiauga, i le agaʻigaʻi i luma faaleagaga o ona soo. Na maua foʻi e tagata lautele aogā o lona lotomaulalo mai ana galuega, aʻoaʻoga ma faalaeiauga. O le mea moni, o le a maua e le fanau a tagata i le lumanaʻi aogā tumau o le taulaga togiola a Iesu.
15. Na faapefea ona aogā iā Iesu lona faaalia o le lotomaulalo?
15 Na maua foʻi e Iesu lava ia aogā o lona lotomaulalo. Na ia fetalai i ona soo i le Mataio 23:12 e faapea, “o sē e faamaulalo iā te ia lava, e faaeaina o ia.” Na faamaonia e Iesu lava ia le moni o na upu. Na faapea mai Paulo: ʻUa faaeaina Iesu e le Atua i se tulaga e sili ona maualuga, ma avatu ma le agalelei iā te ia le suafa e sili i isi igoa uma, ina ia tootutuli tulivae uma lava i le suafa o Iesu, o i latou o i le lagi, ma i latou o i le lalolagi, ma i latou o i lalo ifo o le eleele, ma ia taʻutaʻu atu e laulaufaiva uma o Iesu Keriso o le Alii, ina ia faamamaluina ai le Atua le Tamā.’ O le lotomaulalo ma le faamaoni o Iesu, na tuuina atu ai e lona Tamā iā te ia le pule i foafoaga i le lagi ma le lalolagi.—Fili. 2:9-11.
O LE A GAOIOI IESU MA LE TONU MA LE LOTOMAULALO
16. O le a faapefea ona faaalia pea e Iesu le lotomaulalo?
16 O le a faaauau pea ona mātaulia gaoioiga a Iesu i lona uiga lotomaulalo. Na valoia e le faisalamo le auala o le a tau ai Iesu ma fili o le Atua e faapea: “O lou matagofie e te alu atu ai ma le manuia; inā tiʻetiʻe ia i le ala o le upu moni ma le lotomaulalo ma le amiotonu.” (Sala. 45:4) Iā Amaketo, o le a tau ai Iesu mo ē e lotomaulalo, amiotonu, ma naunau i le upu moni. O le ā e tupu i le iʻuga o le Afe Tausaga, pe a māeʻa ona faaumatia e Keriso “malo uma, ma pule, ma ē malolosi”? Pe o le a faaauau pea ona faaalia e Iesu le lotomaulalo? O le tulaga moni lenā, auā o le a ia toe ʻtuuina atu le malo i le Atua lona Tamā.’—Faitau le 1 Korinito 15:24-28.
17, 18. (i) Aiseā e tāua ai ona tatou faataʻitaʻi i le faaaʻoaʻoga a Iesu o le lotomaulalo? (ii) O ā fesili o le a iloiloina i le mataupu o le a sosoo mai?
17 Po o le a tatou mulimuli i le faaaʻoaʻoga na faataatia e Iesu o le lotomaulalo? O le ā e tupu pe a afio mai Iesu iā Amaketo e aumaia le faamasinoga? E na o ē amiotonu ma lotomaulalo, o le a faasaoina e Iesu pe a oo mai le iʻuga. O lea, e tāua ona atiaʻe le lotomaulalo mo lo tatou faaolataga. O le faaalia e Iesu o le lotomaulalo, e lē gata na ia maua ai aogā, ae faapea foʻi i isi tagata. O le a tele foʻi aogā e selesele i ai pe a tatou faaalia le lotomaulalo.
18 E faapefea ona tatou mulimuli i le faaaʻoaʻoga a Iesu o le lotomaulalo? E faapefea ona tatou taumafai e faaalia le lotomaulalo e tusa po o ā faigatā e tatou te fesagaʻia? O fesili na o le a iloiloina i le mataupu o le a sosoo mai.
[Fesili mo le Suʻesuʻega]
[Ata i le itulau 12]
E faapefea ona tatou maua aogā ona o le lotomaulalo o Iesu?
[Ata i le itulau 13]
O Iesu le faaaʻoaʻoga sili o le tigā alofa
