1, 2. Sortu sani Yesus leri den apostel fu en a lasti neti di a ben de na grontapu?

A LASTI neti di Yesus ben de na grontapu, a ben de nanga den apostel fu en na ini wan sodrokamra na ini Yerusalem. Di den ben e nyan a neti nyanyan, Yesus opo, a puru en dyakti, dan a tai wan duku na en mindri. Ne a poti watra na ini wan komki, a wasi den futu fu den apostel èn a drei den nanga wan duku. Baka dati a weri en dyakti baka. Fu san ede Yesus du so wan lagi wroko?​—Yoh. 13:3-5.

² Yesus srefi taki fu san ede a du disi. A taki: „Unu frustan san mi du gi unu? . . . Efu mi wasi un futu aladi mi na Masra nanga Leriman, dan un musu wasi den futu fu makandra tu, bika mi gi unu na eksempre, so taki unu kan du tu san mi du gi unu” (Yoh. 13:12-15). Yesus du a lagi wroko disi fu leri den apostel fu en wan sani di den no ben o frigiti èn di ben o leri den fu abi sakafasi bakaten.

3. (a) Kari tu okasi pe Yesus sori o prenspari a de fu abi sakafasi. (b) San wi o leri na ini na artikel disi?

³ Yesus wasi den futu fu den apostel fu sori den taki den musu abi sakafasi, ma disi no ben de a fosi leisi di a sori den o prenspari a de fu abi sakafasi. Wan leisi den apostel ben e haritaki nanga makandra suma fu den ben de moro prenspari. Ne Yesus meki wan pikin kon na en sei, dan a taigi den: „Efu wan sma e teki a yongu pikin disi na ini mi nen, dan a sma dati e teki mi tu. A sma di e teki mi, e teki sosrefi a sma di seni mi kon. Bika a sma di e tyari ensrefi leki a moro lagiwan fu un alamala, na a sma dati bigi” (Luk. 9:46-48). Sosrefi, di Yesus ben e taki wan leisi nanga den Fariseiman di ben e denki taki den prenspari moro tra sma, a taki: „Ibriwan sma di e hei ensrefi, den o saka en èn a sma di e saka ensrefi, den o hei en” (Luk.  14:11). Sobun, a de krin taki Yesus wani taki den bakaman fu en musu abi sakafasi. A no wani taki den abi bigimemre, taki den e denki taki den prenspari moro trawan, noso taki den bun moro trawan. Meki wi luku moro fini now fa Yesus sori taki a abi sakafasi, so taki wi kan du leki en. Wi o luku tu sortu wini wan sma kan kisi te a e sori sakafasi èn sortu wini trawan kan kisi fu dati.

4. Fa a wan-enkri Manpikin fu Gado sori sakafasi fosi a kon na grontapu?

⁴ A wan-enkri Manpikin fu Gado sori sakafasi, srefi fosi a kon na grontapu. Fosi Yesus kon na grontapu, a ben de bun langa kaba nanga en Papa na hemel. A Bijbel buku Yesaya e taki fu a matifasi di a Manpikin ben abi nanga en Papa: „A Moro Hei Masra Yehovah srefi gi mi wan tongo fu den wan di kisi leri, so taki mi kan sabi san mi musu taigi den sma di weri. Ibri mamanten a e wiki mi, so taki mi kan opo mi yesi arki den leri di a e gi. A Moro Hei Masra Yehovah srefi opo mi yesi meki mi arki en èn mi no opo misrefi teige en. Mi no du sani tra fasi leki fa a taigi mi fu du” (Yes. 50:4, 5). Yesus ben e angri fu kisi leri fu a tru Gado. A ben e sori sakafasi èn a ben e arki finifini san Yehovah ben e leri en. A ben si tu fa sakafasi meki taki Yehovah sori sari-ati gi sondu libisma.

5. Di Yesus ben haritaki nanga Didibri, fa a sori taki a sabi en presi èn taki a abi sakafasi?

⁵ A no ala engel ben abi sakafasi neleki Yesus. Na engel di tron Satan Didibri bakaten no ben wani teki leri fu Yehovah. A kisi heimemre èn a bigin denki taki a prenspari moro trawan. A no ben sori sakafasi kwetikweti. Dati meki a opo ensrefi teige Yehovah. Ma Yesus ben de heri tra fasi. Na hemel a no ben wani abi moro makti leki san Gado ben gi en èn noiti a ben wani gebroiki en makti na wan fasi di no bun. Fu eksempre, Bijbel e taki dati wan leisi Yesus ben e haritaki nanga Didibri fu a dedeskin fu Moses. Ma toku Yesus no du nowan sani di a no ben abi a reti fu du, aladi en na Mikael, a moro makti engel na hemel. Gado Manpikin ben sabi en presi èn a tan sori sakafasi. A ben breiti fu wakti teleki Yehovah, a Moro Hei Krutuman fu hemel nanga grontapu, ben o seti a tori disi na en eigi fasi èn na en eigi ten.​—Leisi Yudas 9.

6. Fa Yesus sori sakafasi di a teki a wroko na en tapu fu tron a Mesias?

⁶ Wan tu fu den sani di Yesus leri fosi a tron wan libisma, ben de den profeititori di ben e sori san ben o pasa nanga en leki Mesias na grontapu. Sobun, a ben sabi taki a ben o nyan pina. Toku a teki a wroko na en tapu fu kon libi na grontapu èn fu dede leki a Mesias soleki fa den profeititori ben taki. Fu san ede a du disi? Na apostel Paulus sori taki na sakafasi meki taki Yesus du disi. Paulus ben skrifi: „Aladi a ben de leki fa Gado de, toku a no prakseri fu teki a makti fu en abra nanga tranga fu kan de a srefi leki Gado. Nôno, ma a gowe libi ala san a ben abi. A kon de leki fa wan srafu de èn a tron wan libisma.”​—Fil. 2:6, 7.

7, 8. Fa Yesus sori sakafasi di a ben de wan pikin-nengre èn di a ben e du en diniwroko na grontapu?

⁷ Paulus skrifi: „Di [Yesus] tron wan libisma, a saka ensrefi èn a gi yesi na ini ala sani. Iya, a gi yesi srefi di a ben musu dede na wan pinapostu” (Fil. 2:8). Sensi di Yesus ben de wan pikin-nengre a sori taki wi musu abi sakafasi. Yesus ben gi yesi na en papa nanga mama, Yosef nanga Maria, aladi den ben de sondu libisma  (Luk. 2:51). Disi na wan moi eksempre gi yonguwan. Efu den gi yesi na den papa nanga mama, dan Gado o blesi den.

⁸ Di Yesus ben de wan bigisma, a sori na furu fasi taki a abi sakafasi. A moro prenspari sani gi en no ben de fu du san en wani, ma a ben de fu du san Yehovah wani (Yoh. 4:34). Di Yesus Krestes ben e du en diniwroko na grontapu, a ben e gebroiki Gado nen èn a ben e leri reti-ati sma sortu Gado Yehovah de. A ben e leri sma tu san Yehovah abi na prakseri fu du gi libisma. Yesus no ben e leri sma nomo taki den ben musu libi na wan fasi di e plisi Yehovah, ma ensrefi ben e libi na a fasi dati tu. Fu eksempre, di a leri den disipel fu en fu begi, a fosi sani di a taki na: „Wi Tata na hemel, meki yu nen de santa” (Mat. 6:9). Na so a leri den bakaman fu en taki a moro prenspari sani, na fu gi Yehovah nen glori. En srefi ben e du dati tu. Na a kaba fu en libi na grontapu, Yesus ben man taki: „Mi meki den [apostel] kon sabi yu nen èn mi o tan fruteri den fu yu nen” (Yoh. 17:26). Na ini en heri libi na grontapu, Yesus ben sori tu taki na Yehovah ben e yepi en fu du sani.​—Yoh. 5:19.

9. Sortu profeititori Sakaria ben taki fu a Mesias èn fa Yesus meki disi kon tru?

⁹ Sakaria ben taki a profeititori disi fu a Mesias: „Prisiri srefisrefi, umapikin fu Sion. Bari fu prisiri, umapikin fu Yerusalem. Luku! A kownu fu yu e kon na yu. A e du san reti èn a wini den feanti fu en. A abi sakafasi èn a e sidon na tapu wan buriki, a pikin fu wan umaburiki” (Sak. 9:9). A profeititori disi kon tru di Yesus kon na ini Yerusalem, fosi a Paskafesa fu a yari 33. Wan bigi grupu sma ben e bradi den krosi nanga taki fu bon na strati. Fu taki en leti, heri Yerusalem ben e prisiri di den yere taki Yesus ben e kon na ini a foto. Ma srefi di den sma ben e prèise en leki a Kownu fu den, Yesus tan sori sakafasi.​—Mat. 21:4-11.

10. San Yesus sori di a tan dini Yehovah teleki a dede?

¹⁰ Di Yesus Krestes ben de na grontapu, a sori sakafasi teleki a dede na wan pinapostu. Na so a  sori moro leki iniwan tra sma taki libisma man tan dini Yehovah, srefi na ini den moro ogri situwâsi. Yesus sori tu taki Satan no ben abi leti di a taki dati libisma e dini Yehovah soso fu di den man feni bun na en (Yob 1:9-11; 2:4). Di Krestes gi yesi dorodoro na en Papa, a sori tu taki na Yehovah abi a reti fu tiri hemel nanga grontapu èn taki en na a moro bun Tiriman di de. A no de fu taki dati Yehovah ben prisiri srefisrefi di a si fa en manpikin di abi sakafasi, sori taki a tan dini en awinsi san pasa.​—Leisi Odo 27:11.

11. Sortu howpu den wan di e bribi ini Yesus abi, fu di Yesus gi en libi leki srakti-ofrandi?

¹¹ A dede fu Yesus na a pinapostu meki taki libisma kan kon fri fu sondu nanga dede (Mat. 20:28). Fu di Yesus gi en libi leki srakti-ofrandi, meki Yehovah kan gi wi pardon fu wi sondu. Na so ala sani pasa na wan reti fasi soleki fa Gado wèt e sori èn libisma kisi na okasi fu man libi fu têgo. Paulus skrifi: „Wán reti sani di wán sma du meki taki Gado e si ala sortu sma leki reti-ati sma, so taki den kan kisi libi” (Rom. 5:18). A dede fu Yesus meki taki den salfu Kresten man libi na hemel pe den no o man dede noiti èn den „tra skapu” o man libi na grontapu fu têgo.​—Yoh. 10:16; Rom. 8:16, 17.

12. Fa Yesus sori taki a abi sakafasi nanga switifasi di a ben de nanga sondu libisma?

¹² Yesus ben gi ala sma „di musu wroko hebi èn di musu tyari hebi lai” a kari fu kon na en. A taki: „Teki mi tyatyari na un tapu èn leri fu mi, bika mi abi safri-ati nanga sakafasi èn unu o kisi krakti baka” (Mat. 11:28, 29). Fu di Yesus abi safri-ati nanga sakafasi, meki a ben e sori switifasi gi sondu libisma èn a no ben feni a wan sma prenspari moro a trawan. A no ben wani den disipel fu du moro leki san den ben man du. Yesus ben e prèise den èn a ben e gi den deki-ati. A no ben gi den a firi taki den don noso taki den no bun nofo fu du son sani. Yesus no ben abi takru-ati èn a no ben e dwengi sma fu du sani. Na presi fu dati, a taki: „A tyatyari fu mi switi fu tyari èn mi lai lekti.” Nanga den wortu disi a ben wani sori sma taki den sani di den musu du fu tron wan bakaman fu en no muilek. Efu den sma ben e teki leri fu en èn efu den ben e du san a leri den, dan den ben o firi bun. Dati meki so furu mansma nanga umasma èn yonguwan nanga owruwan ben lobi fu de nanga Yesus.​—Mat. 11:30.

13. Fa Yesus sori sari-ati gi den sma di ben e pina?

¹³ Yesus ben e sari den Israelsma di ben e pina èn a ben e du ala san a man fu yepi den. Wan leisi di a ben de krosibei fu Yerikow, a miti tu breniman di ben e begi sma sani. Wan fu den ben nen Bartimeyus. Doronomo den man disi ben e bari aksi Yesus  fu yepi den, ma den sma di ben de drape bari den taki den musu tapu den mofo. Yesus no ben abi fu poti prakseri na den breniman disi, ma toku a du dati. Fu di a ben e sari den, a taigi den sma meki den tyari den breniman kon, so taki a kan dresi den. Iya, fu di Yesus de leki en Papa Yehovah, meki a sori taki a abi sakafasi èn dati meki a sori sari-ati gi sondu libisma.​—Mat. 20:29-34; Mark. 10:46-52.

14. Sortu moi sani pasa fu di Yesus abi sakafasi?

¹⁴ A fasi fa Yesus sori sakafasi meki taki furu sma prisiri èn den kisi blesi tu. Yehovah ben prisiri fu si fa en lobi-ati Manpikin saka ensrefi èn fa a du ala san a ben aksi en fu du. Den apostel nanga disipel ben firi bun fu de nanga en fu di a ben abi switifasi èn sakafasi. Na eksempre di Yesus gi, den sani di a leri sma èn a prèise di a ben e prèise den, meki taki den ben man dini Gado moro bun. Yesus yepi furu tra sma tu fu di a ben e gi den leri, a ben e gi den deki-ati èn a ben e gi den san den abi fanowdu. Fu taki en leti, ala libisma di e bribi na ini Yesus o kisi wini fu ala ten, fu di Yesus gi en libi leki srakti-ofrandi.

15. Sortu wini Yesus kisi fu di a abi sakafasi?

¹⁵ Fa a de nanga Yesus? A sakafasi fu en meki taki a kisi wini tu? Iya, bika a ben taigi den disipel fu en: „Gado . . . o hei a sma di e saka ensrefi” (Mat. 23:12). Na disi pasa nanga Yesus tu. Paulus taki: „Gado poti [Yesus] moro hei tu leki fa a ben de kaba èn a gi en wan nen di bigi moro ibri tra nen. Na so ala den wan di de na hemel, den wan di de na grontapu, nanga den wan di de na ondro gron, ben o boigi den kindi na ini a nen fu Yesus. Ala sma ben o taki krin dati Yesus Krestes na Masra èn na so Gado a Tata o kisi glori.” Fu di Yesus ben abi sakafasi èn a tan dini Yehovah Gado a heri pisi ten di a ben de na grontapu, meki Yehovah meki Yesus kon „hei” noso a gi en grani. A gi Yesus moro makti leki iniwan sma na hemel nanga grontapu.​—Fil. 2:9-11.

16. Fa a Manpikin fu Gado o tan sori taki a abi sakafasi na ini a ten di e kon?

¹⁶ Na ini a ten di e kon, a Manpikin fu Gado o tan sori taki a abi sakafasi. Wan fu den psalm di e fruteri fa Yesus o feti leki Kownu nanga den feanti fu Gado, e taki: „Yu abi glori. Sobun, go wini den feanti fu yu. Rèi yu asi èn feti gi sani di tru, gi den sma di abi sakafasi èn gi retidu” (Ps. 45:4). Na Armagedon Yesus Krestes o feti gi den sma di abi sakafasi, di lobi san reti èn di lobi san tru. Baka dati Krestes o tiri dusun yari èn „a o tyari wan kaba kon na ala tirimakti, na ala makti, èn na ala krakti”. San o pasa baka dati dan? Yesus o tan sori taki a abi sakafasi? Iya, bika Bijbel e taki dati „a o gi a Kownukondre abra na en Gado èn Tata”.​—Leisi 1 Korentesma 15:24-28.

17, 18. (a) Fu san ede a prenspari gi den futuboi fu Yehovah fu sori sakafasi neleki Yesus? (b) Sortu aksi wi o luku na ini a tra artikel?

¹⁷ Fa a de nanga wi? Wi o teki na eksempre fu Yesus èn sori sakafasi tu? San o pasa nanga wi te Kownu Yesus Krestes o krutu sma na ini Armagedon? Wi si kaba taki a o kibri soso den sma di abi sakafasi èn di lobi san reti. Sobun, efu wi wani tan na libi wi musu sori taki wi abi sakafasi. A sakafasi di Yesus Krestes sori di a ben de na grontapu, tyari furu wini gi en nanga tra sma. Na so a sakafasi fu wi kan tyari wini kon gi wi èn gi tra sma tu.

¹⁸ San o yepi wi fu sori sakafasi neleki Yesus? Fa wi kan sori taki wi abi sakafasi aladi disi no makriki fu du? Wi o luku den aksi disi na ini a tra artikel.