Jesús, masiyalh ni tlankajwa nawanaw
Jesús, masiyalh ni tlankajwa nawanaw
«Xampi xaliʼukxilhtit kkamakgaxtakgninitan, lakimpi lantla nkit ktlawanit, na chuna wixin natlawayatit.» (JUAN 13:15)
¿LA XKGALHTINANTI?
¿La limasiyalh xKgawasa Dios pi ni tlankajwa xwanit akxni xlama kʼakgapun?
Akxni Jesús latamalh kKatiyatni, ¿la limasiyalh pi ni tlankajwa xwanit?
¿Tuku tlan kitaxtulh xlakata Jesús ni tlankajwa likatsilh?
1, 2. Kilhtamaku akxni xʼamaja niy Jesús, ¿tuku lu tlan liʼakxilhtit kamasiyanilh xʼapóstoles?
XAWATIYA katsisni akxni Jesús latamalh unu kKatiyatni, chu xkatawi xʼapóstoles xlikilhmakti chiki kJerusalén. Akxni xwayamakgolh katsisni, smililh xlhakgat. Litampachika akgtum toalla. Alistalh wililh chuchut kʼakgtum bandeja chu tsukulh kachakgani xtantunkan xʼapóstoles chu limaklakaskilh toalla xlakata nakalituxaka. Chu alistalh wilipa xlhakgat. ¿Tuku xlakata chuna tlawalh Jesús? (Juan 13:3-5.)
2 Jesús kinkawaniyan: «¿Pi akgatakgsatit xatu luwa xpalakata kkalitantuchakganitan? [...] Pus lapi kit, wa mimPuchinakan, chu na miMakgalhtawakganakan, [...] katantuchakganitan, wixin wanti kaj kilimakgalhtawakgat, pus chu na chuna chu wixin luwa kamininiyan nalaliskujapitit chatunu amakgapitsin kalatantuchakgapitit. Xampi xaliʼukxilhtit kkamakgaxtakgninitan, lakimpi lantla kit ktlawanit, na chuna wixin natlawayapitit» (Juan 13:12-15). Xlakata tlawalh uma taskujut, kamasiyanilh kstalaninanin lu tlan liʼakxilhtit nema putum alistalh xʼamakgo lakapastakkgo, chu xkamakgtayalh ni tlankajwa xlikatsikgolh xliputum xlatamatkan.
3. 1) ¿La pulaktiy limasiyalh Jesús pi lu xlakaskinka ni tlankajwa nawanaw? 2) ¿Tuku naʼakxilhaw kʼuma artículo?
3 Akxni Jesús katantuchakgelh xʼapóstoles, ni kajku xlimakgtum xkamasiyanima pi nataktujukgo. Xapulana wa akxni kamasiyanilh xʼapóstoles ni lanka xlitaxtuputunkgolh, Jesús tiyalh chatum aktsu kgawasa chu wililh kxlakʼitatkan chu kawanilh: «Kaxati kawa nti xmakgamakglhtinalh xtachuna na yuma aktsu kgawasa kkintukuwini, kit nkimakgamakglhtinan; na kaxati kawa nti nkit xkimakgamakglhtinalh, wa makgamakglhtinan wanti nkimalakgachalh; xampi wanti ntlakg xtaktujulh lantla xlipaks wixin, wa xapuxku nawan» (Luc. 9:46-48). Xlakata Jesús xkatsi pi fariseos xlakaskinkgo pi lhuwa xkalakgapaska, alistalh wa: «Xampi kaxatikawa wanti ntlanka makgkatsikan, nataktujuy; chi nchu nti ntaktujuy, namatalhmanikan» (Luc. 14:11). Liwana tasiya pi Jesús xlakaskin pi kstalaninanin xtaktujukgolh, ni lanka xkamakgkatsika. Xlakata na natlawayaw la xla, kuenta katlawaw xliʼakxilhtit chu kaʼakxilhwi la uma tayat kamakgtaya tiku ni tlankajwa chu na kamakgtaya amakgapitsin.
«NI ALAKATANU NIKU KKALH»
4. ¿La limasiyalh xKgawasa Dios pi ni tlankajwa xwanit akxni nina xmin kKatiyatni?
4 Xkgawasa Dios limasiyalh pi ni tlankajwa xwanit akglhuwa kata akxni xtawi xTlat kʼakgapun chu nina xminit kKatiyatni. Libro xla Isaías lichuwinan la talalinkgo Kgawasa chu xaTlat akxni wan: «Xalanka Malana Jehová kimasiyaninit, xlakata tlan nakmakgtaya tiku xlajwananit. Xla chali chali staknan; tlawa pi nakgaxmata la tiku xla kamasiyaninit. Xalanka Malana Jehová tlawa pi nakkgalhakgaxmata la tiku kamasiyaninit, chu akit kkgalhakgaxmatli. Ni alakatanu niku kkalh» (Is. 50:4, 5). Taktujulh chu kuentajtlawalh tuku xmasiyani Jehová. Jesús liwana akxilhli pi Jehová ni lanka xmakgkatsikan chu akxilhli la tlan kalikatsini latamanin maski lakgalhinanin.
5. Xlakata Jesús arcángel litaxtu, ¿la limasiyalh pi ni tlankajwa likatsilh akxni takgalhilh taʼakglhuwit Akgskgawini?
5 Ni putum ángeles xlikatsikgo la uma xKgawasa Dios. Chatum ángel ni mastalh talakaskin xlakata Jehová xmasiyanilh, lanka makgkatsika chu tatlankanilh. Satanás chu Akgskgawini litaxtulh xlakata ni kgalhakgaxmatli Jehová. Jesús putum kilhtamaku lipaxuwalh xlakata tuku xlakgaya kʼakgapun chu nikxni malakatsalilh xlimapakgsin. «Akxni xapuxku ángel Miguel, [uma kilhchanima Jesús] [«wi tuku xlitatakglhuwima», NM] akgskgawini, xlaliʼakgslokgomakgo xtiyatliwa Moisés», ni lanka makgkatsika chu taktujulh. Jesús lipawa Jehová, Juez Tiku tlakg xapuxku kkakilhtamaku, xlakata xlakkaxtlawalh uma taʼakglhuwit akxni tlan xʼakxilhli chu la xla xlakaskilh (kalikgalhtawakga Judas 9).
6. ¿La limasiyalh Jesús pi ni tlankajwa xwanit akxni lakgayawaka Mesías nalitaxtu?
6 Xlikana, tuku Jesús na katsinilh akxni xlama kʼakgapun wa tuku xlichuwinankanit pi xʼama titaxtu akxni xlatamalh kkatiyatni. Wa xlakata xkatsi pi akxni xmilh kKatiyatni chu xnilh la Mesías tiku xwankanit pi xʼama min xkatsiya tuku nitlan xʼama titaxtu. Maski chuna xKgawasa Dios milh kkatiyatni. ¿Tuku xlakata? Xlakata ni tlankajwa xwanit. Apóstol Pablo tsokgli: «Wa nti maski lantlata Dios xwanit, ni wa lakgkatsalh yuma lantla xliDios xwanit, mpala fuerzaj nakgalhiy, niʼukxni namakgaxtakga. Chi wampi wata akstu taktujulh, wa ntiyalh xlatamat lantla nti nkaj xachunata, xtachuna tiwa lantlata chixkuwin» (Filip. 2:6, 7).
«AKSTU TAKTUJULH» AKXNI LATAMALH KKATIYATNI
7, 8. ¿La limasiyalh Jesús pi ni tlankajwa xwanit akxni aktsinajku chu akxni lichuwinalh Dios kKatiyatni?
7 Pablo tsokgli pi «akxni [Jesús] ntatakgsli lantla xtachuna chixku, akstu taktujulh, lakgachixkuwina waj klinin» (Filip. 2:8). Chu akxni aktsinajku xwanit, ni tlankajwa xwanit. Maski xnatlatni José chu María lakgalhinanin xwankgonit, Jesús tataktujulh chu «ankgalhin xlakgachixkuwikgoy» (Luc. 2:51). Lakgkgawasan lhuwa tuku tlan nakatsinikgoy xlakata Jesús. Komo nachuna natlawakgo chu kgalhakgaxmatkgo xnatlatnikan, Dios nakasikulunatlawa.
8 Chu akxni lankata xwanit, Jesús limasiyalh pi ni tlankajwa xwanit xlakata tlakg xlakaskinka xakxilha tuku xla Jehová chu ni tuku xlakaskin (Juan 4:34). Jesús xlimaklakaskin xtukuwani akxni xlichuwinan Dios chu xkamasiyani tiku xlikana xkatsiputunkgo la likatsi Jehová chu tuku lakapastaknit natlawa xpalakata latamanin. Jesús na xlilatama tuku xmasiya xlakata Jehová. Akgtum liʼakxilhtit, kʼoración xla Padre nuestro, wa uma tuku pulana lichuwinalh: «KinTlatikan nti wilapi nkʼakgapun, katamasantujilh mintukuwini» (Mat. 6:9). Jesús kamasiyanilh kstalaninanin pi tuku tlakg xlakaskinka xtlawakgolh wa nasantujtlawakgo xtukuwani Jehová. Chu Jesús chuna tlawalh kxlatamat. Akxni xmasputumaja xtaskujut kkatiyatni Jesús uma tuku wanilh Jehová: «Kmasiyunikgolh [apóstoles] mintukuwini, na chunaku naktimasiyunikgoy» (Juan 17:26). Chu xliputum kilhtamaku akxni latamalh kKatiyatni, Jesús malankilh Jehová xlakata tuku xtlawa (Juan 5:19).
9. ¿Tuku lichuwinalh Zacarías xlakata Mesías, chu la makgantaxtilh Jesús?
9 Zacarías xlichuwinanit xlakata Mesías: «Lu kapaxuwa, oh xtsumat Zión. Kapaxuwa xlakata tlajananti, oh xtsumat Jerusalén. ¡Kaʼakxilhti! Mi mapakgsina lakgmiman. Tlawa tuku xalakatitum, chuna, lakgmaxtuka, ni tlankajwa, chu kgawi tantum burro, o tantum animal nema liwana staknit, xkgawasa tantum burra» (Zac. 9:9). Uma kgantaxtulh akxni Jesús tanulh kJerusalén chu xtitaxtunita Pascua xla kata 33. Latamanin wilikgolh xlhakgatkan chu xwakgkgolh xtuwan mokgot chu wilikgolh ktiji chu putum xalak kachikin lu lipaxuwakgolh akxni tanulh. Maski limapakuwikgolh mapakgsina, chuntiya ni tlankajwa likatsilh (Mat. 21:4-11).
10. ¿Tuku limasiyalh Jesús akxni kgalhakgaxmatninalh asta akxni nilh?
10 Jesús ni tlankajwa wa chu kgalhakgaxmatninalh asta akxni nilh kʼakgatum kiwi. Xla limasiyalh pi latamanin tlan ni namakgxtakgkgo Jehová maski lu tuwa tuku natitaxtukgo. Jesús limasiyalh pi ni xlikana tuku wan Satanás xlakata latamanin skujnikgo Dios kaj xlakata wi tuku lakaskinkgo (Job 1:9-11; 2:4). Xlakata Cristo nikxni makgxtakgli limasiyalh pi Jehová lakgchan namapakgsinan xlikalanka kakilhtamaku chu xaʼakgstitum, xlikana Jehová lu lipaxuwalh akxni akxilhli pi xKgawasa nikxni makgxtakgli chu ni tlankajwa likatsilh (kalikgalhtawakga Proverbios 27:11).
11. Xlakata xtalakgmaxtut Jesucristo, ¿tuku pulaktiy tlan makglhtinankgo latamanin?
11 Xlakata Jesús nilh na xokgolh tuku xtalakaskin xlakata xkalakgmaxtuka latamanin (Mat. 20:28). Chuna Jehová tlan katapati latamanin tiku lakgalhinanin chu xliputum kilhtamaku nalatamakgo pero talakaskin nakgalhakgaxmatkgo xlimapakgsin Dios. Pablo tsokgli: «Xpalakata ntu ntlawalh nchatum nalimalulokgninan, liʼananikgolh xlipaks nchixkuwin ntamalulokgni, chu latamat» (Rom. 5:18). Nachuna xlakata Cristo nilh tlawalh pi makgapitsi nalatamakgo kʼakgapun chu nikxni nanikgo, chu «amakgapitsi borregos» namakglhtinankgo latamat nema ni kgalhi xlisputni kKatiyatni (Juan 10:16, NM; Rom. 8:16, 17).
«TSATATA NKINAKU»
12. ¿La kalikamasiyanilh Jesús latamanin pi xkalakgalhaman chu pi ni tlankajwa xwanit?
12 Jesús kawanilh latamanin “nti skujtamakgankgonit” xlakata xlakgminkgolh. Xla wa: «Kalipitit nkimukiwi kmiokgspunkan, chu na kakinkatsinitit, mpi luwa xasmalhwa nkit, chu na tsatata nkinaku. Na natakgsniyatit ntajaxni milistaknakan» (Mat. 11:28, 29). Xlakata ni tlankajwa xwanit chu xalakgalhmana, tlan kalikatsinilh putum latamanin maski xkgalhikgo talakgalhin. Ni kaskinilh tuku nila xtlawakgo kstalaninanin wata tlan kalichuwinalh chu kamatliwakglhli. Ni tlawalh tuku xkalimamakgkatsilh pi nitu la tlawakgo chu nitu kalakgchan. Jesús tlan xlikatsi chu ni xkaʼakgchipa latamanin. Wata kawanilh pi komo xtalakatsuwinikgolh chu xlilatamakgolh xtamasiy, tlan xmakgkatsikgolh xlakata xmukiwi lu tlan xwanit chu xtakuka ni tsinka. Putum tiku laklanka chu laktsina tlan xmakgkatsikgo akxni akxtum xkatawi (Mat. 11:30).
13. ¿La limasiyalh Jesús pi xkalakgalhaman tiku niti xkamakgtaya?
13 Jesús kalakgalhamalh akxni akxilhli latamanin xalak Israel pi xpatinamakgo, chu xla kamakgtayalh. Lakatsu kJericó, xla tekgsli chatiy tiku ni xlakawanankgo chu skiwayananin xwankgonit, chatum xwanikan Bartimeo, makglhuwa skinikgolh Jesús kakamakgtayalh. Pero latamanin kakilhnikgolh chu kawanikgolh pi kgalhtsekg xtawilakgolh. Jesús tlan ni kuenta xkatlawanilh uma lakchixkuwin tiku ni xlakawanankgo. Pero Jesús kalakgalhamalh, skilh xkaliminka niku xwi chu tlawalh pi xlakawanankgolh. Chuna la akxilhaw, Jesús tlawalh la xTlat, Jehová, chu limasiyalh pi xtaktuju chu kalakgalhamalh tiku xpatinamakgolh (Mat. 20:29-34; Mar. 10:46-52).
«NTI XTAKTUJULH, NAMATALHMANIKAN»
14. ¿Tuku tlan kitaxtulh xlakata Jesús ni tlankajwa xwanit akxni latamalh kKatiyatni?
14 Xlakata Jesús ni tlankajwa xlikatsi kxlatamat tlawalh pi lhuwa xpaxuwakgolh chu xmakglhtinankgolh tasikulunalin. Jehová lu lipaxuwalh xlakata xKgawasa xatapaxuwan kgalhakgaxmatli. Xʼapóstoles chu kstalaninanin lu tlan xlimakgkatsikgo chu xtatliwakglhkgo xlakata la tlan xlikatsi chu ni tlankajwa xwanit. Xliʼakxilhtit, tuku xmasiya chu la tlan xlikatsi kamakgtayalh xlakata tlakg xtatliwakglhli xtakanajlakan. Latamanin litamakgtayakgolh xlakata Jesús ni tlankajwa xwanit, xkamakgtaya, xkamasiyani chu xkastakyawa. Chu putum tiku kgalhakgaxmatnankgo tlan lhuwa tuku namakglhtinankgo xlakata xtalakgmaxtut Jesús.
15. ¿Tuku makglhtinalh Jesús xlakata ni tlankajwa likatsilh?
15 ¿Chu Jesús? ¿Litamakgtayalh xlakata ni tlankajwa likatsilh? Chuna. Jesús kawanilh kstalaninanin: «Na wa nti xtaktujulh, namatalhmanikan» (Mat. 23:12). Uma tachuwin kgantaxtulh kxlatamat xlakata Pablo wa: «Dios, na maxkilh akgtum ntapakuwit wa cha ntu ntlakg tlanka ni xawa amakgapitsin tapakuwit. Lakimpi xpalakata xtukuwini Jesús, kalilakatatsokgostakgolh lantla xlipakskan nti wilakgo nkakgapun, chu nti xala katiyatna, chu nti xala kxtampin katiyatna, chu xlipaks simakgat, kalikgalhapalakgolh mpi Jesucristo wa mPuchina, lakimpi chuna nalitamaxkiy nkakni Dios xaTlat». Xlakata Jesús ni tlankajwa likatsilh chu ni makgxtakgli Dios akxni xlama unu kKatiyatni, Jehová malankilh, maxkilh talakaskin nakamapakgsi ángeles chu latamanin (Filip. 2:9-11).
JESÚS NAMAPAKGSINAN XLAKATA «KALHTUTSU NAKU Y TANKSWA LATAMAT»
16. ¿La likatsiyaw pi xKgawasa Dios chuntiyaku ni tlankajwa nalikatsi?
16 Chu xKgawasa Dios chuntiyaku ni tlankajwa nalikatsi akxni wi tuku natlawa. Akxni lichuwinanka tuku Jesús xʼama katlawani xtalamakgasitsin xlakata tuku xʼama lakgataya kʼakgapun, salmista kilhtlilh: «Kun milikaknit natlajaya nak guerra; namapakgsinana y natlajaya kun tankswa tachiwin, kun kalhtutsu naku y tankswa latamat» (Sal. 45:4). Anta kʼArmagedón Jesucristo natataya tuku xaʼakgstitum chu xaxlikana chu na ni tlankajwa nalikatsi. ¿Chu tuku nala akxni nasputa xTamapakgsin xʼAkgtum Mil Kata «akxni laktlawanit nawan xlipaks ntamalan, chu limapakgsin, chu litliwakga»? Xlakata ni tlankajwa likatsi, «namakamastay nCristo ntapakgsin kxmakan Dios wa cha xaTlat» (kalikgalhtawakga 1 Corintios 15:24-28).
17, 18. 1) ¿Tuku xlakata lu xlakaskinka pi xlakskujnin Jehová nataktujukgo la Jesús? 2) ¿Tuku takgalhskinin namastayaw xtakgalhtin kʼatanu artículo?
17 ¿Chu la nalikatsiyaw akinin? ¿Natlawayaw chuna la lu xatlan kiliʼakxilhtitkan chu ni tlanka nalikatsiyaw? ¿La nakitaxtuyaw akxni Mapakgsina Jesucristo namalakgaxokgenan kʼArmagedón? Kaj nakalakgmaxtukan tiku ni tlankajwa chu tiku akgstitum. Wa xlakata talakaskin nalimasiyayaw pi ni tlankajwa akinin chu tlan nalakgtaxtuyaw. Nachuna, xlakata Jesús ni tlankajwa likatsilh litamakgtayalh chu kamakgtayalh amakgapitsin, chu akxni limasiyayaw pi ni tlankajwa akinin na pulaklhuwa la tamakgtayayaw.
18 ¿Tuku nakinkamakgtayayan ni tlankajwa nalikatsiyaw chuna la Jesús? ¿La tlan ni tlankajwa nalikatsiyaw maski nakgalhiyaw lhuwa taʼakglhuwit? Xtakgalhtin umakgolh takgalhskinin naʼakxilhaw kʼatanu artículo.
[Takgalhskinin]
[Dibujo xla página 12]
¿La kinkamakgtayayan xlakata Jesús ni tlankajwa likatsilh?
[Dibujo xla página 13]
Jesús lu xalakgalhamana xwanit chu akinin nachuna kilitlawatkan
