Ke Dag Jesus e Kanawo’ u Rogon ni I Sobut’nag Ir
Ke Dag Jesus e Kanawo’ u Rogon ni I Sobut’nag Ir
“Ya kug dag ngomed e n’en ni nguum rin’ed ngomed, ya nge yog ni mrin’ed nri bod rogon e n’en ni ka fini gu rin’ ngomed.”—JOHN 13:15.
UW ROGON NI GA RA FULWEG?
Uw rogon ni i sobut’nag faen ni Fak Got ir u nap’an ndawori yib nib girdi’?
Nap’an ni ke yib Jesus nib girdi’, ma uw rogon ni i sobut’nag ir?
Bochan ni i sobut’nag Jesus ir, ma mang angin ni ke yib ngak?
1, 2. Nap’an e bin tomur e nep’ rok Jesus u fayleng, ma mang e ke fil ngak e pi apostal rok?
NAP’AN e bin tomur e nep’ rok Jesus u fayleng, ma Jesus nge pi apostal rok e ur moyed u lan reb e naun u Jerusalem u lan e singgil ko thal ni lang. Nap’an ni yad be abich, me luf e thal ni wuru’ e mad rok, me bachiy e tawol nga lukngun. Ma tomur riy, me puog e ran nga lan baraba’ i ban’en ni yima maluknag ayiy ngay me tabab i maluknag e rifrif u ay pi gachalpen me faley e rifrif u ayrad ko fa gi tawol. Ma aram me yon’ fa thal ni wuru’ e mad rok. Mang fan ni ke rin’ Jesus e re n’em?—John 13:3-5.
2 Ke weliy Jesus fan ni gaar: “Kam nanged fan e n’en ni ka fini gu rin’ ngomed? . . . I gag e Somol romed nge Tamachib romed, ma ka fini gu mu’ i luknag e rifrif u aymed. Ere nge bigimed mi i luknag e rifrif u ay bigimed. Ya kug dag ngomed e n’en ni nguum rin’ed ngomed, ya nge yog ni mrin’ed nri bod rogon e n’en ni ka fini gu rin’ ngomed.” (John 13:12-15) Bochan e n’en ni ke rin’, me fil ban’en ngak e pi apostal rok ndabiyog ni ngar paged talin, me pi’ e athamgil nga lanin’rad ni ngar sobut’niged yad boch nga m’on.
3. (a) Uw rogon ni tamilangnag Jesus ni l’agruw yay feni ga’ fan ni ngan sobut’nigey? (b) Mang e yira weliy ko re article ney?
3 Nap’an ni luknag Jesus rifrif u ay e pi apostal rok, ma gathi ireray e yay nsom’on ni ke dag ngorad feni ga’ fan ni ngar sobut’niged yad. Ba’ bayay u m’on riy, me i maluagthin pi gachalpen ko mini’ e arorad ni ir e th’abi tolang u fithik’rad, me fek Jesus reb e bitir me yog ngorad ni gaar: “En nra ayuweg e re tir ney ni bochag, e ke ayuwegeg; ma en nra ayuwegeg, e ke ayuweg e en ni ir e ke l’ugeg ku gub, Ya en ni ir e th’abi sobut’ u fithik’med ni gimed gubin, e ir e th’abi tolang.” (Luke 9:46-48) Ma pi Farise e ur lemnaged ni kab ga’ farad ngak boch e girdi’, ere ke yog Jesus ngorad ni gaar: “En nra tolangnag ir e yira sobut’nag, ma en nra sobut’nag ir e yira tolangnag.” (Luke 14:11) Ba tamilang ni baadag ni nga i par nib sobut’an’ pi gachalpen. Dabun ni ngar uf gad, ngar lemnaged ni kab ga farad ngak boch e girdi’, ara ngar lemnaged ni ka yad ba cheg ngak boch e girdi’. Ere ngad filed rogon ni i sobut’nag Jesus ir nge yag ni ngad folwokgad rok. Maku gad ra fil ni gathi kemus ni be’ ni ma sobut’nag ir e ra fel’ rogon ya ku er rogon boch e girdi’.
“DAWOR GU TOGOPLUW NGAK ARA GU PI’ KERUUG NGAK”
4. Uw rogon ni i sobut’nag e en Fak Got ir ni kari maagirag rok u nap’an ndawori yib nib girdi’?
4 Faen Fak Got ni kari maagirag rok e i sobut’nag ir ni ki mada’ ko ngiyal’ ndawori yib nga fayleng. Nap’an ndawori yib Jesus nib girdi’, ma i par rok e Chitamangin u tharmiy u lan bokum biyu’ e duw. Fare babyor u Bible rok Isaiah e be tamilangnag feni fel’ e tha’ u thilin Fak nge Chitamangin, ni gaar: “Somol ni Got e ke tay nga l’ugunag e thin ni nggog, ya nge yog ni gu pi’ e athamgil nga laniyan’ e piin ni ke mulan’rad. Gubin e kadbul ni ma gagiyegnigeg nge pasigan’ug ni nggu motoyil ko n’en ni nge weliy ngog. Somol e ke tamilangnag an’ug, ma dawor gu togopluw ngak ara gu pi’ keruug ngak.” (Isa. 50:4, 5) Faen Fak Got e i sobut’nag ir me tiyan’ ko n’en ni ke fil Jehovah ngak. Ri baadag ni nge fil ban’en rok fa bin riyul’ e Got. Ma susun ni ki guy u rogon ni i dag Jehovah e runguy ngak e girdi’ ni tadenen.
5. Uw rogon ni i sobut’nag Jesus ir, me dag ni manang e gin ni nge mus riy u nap’an ni kar maluagthingow fare Moonyan’, nyugu aram rogon ni ir pilungen urngin e engel?
5 Gathi urngin e engel u tharmiy ni yad ma sobut’niged yad ni bod rogon Jesus. Fare engel ni ke mang Satan ni fare Moonyan’ e dabun ni nge fil ban’en rok Jehovah. Me tolangan’ me tabab ni nge lemnag ni kab ga’ fan ngak boch e engel. De sobut’nag ir, ma arfan ni ke togopuluw ngak Jehovah. Machane, Jesus e ba thil ya ke gaman u wan’ e liw ni ke pi’ Got ngak. Ma dabun ni nge fanay mat’awun nib pag rogon. Bod ni, be yog e Bible ni immoy ba ngiyal’ ni ke maluagthin Jesus nge fare Moonyan’ u murung’agen downgin Moses. Ma nap’an ni buch e re n’em ma de rin’ ban’en ndariy mat’awun riy ni nge rin’ nyugu aram rogon ni ir Mikael, ni aram e ir pilungen urngin e engel. I sobut’nag ir ma manang e gin ni nge mus riy. Ba m’agan’ ngay ni nga i sonnag Jehovah ni ir e En Tapuf Oloboch u palpalth’ib ni th’abi tolang ni nge pithig e pi magawon u kanawoen nib mat’aw ngu ngal’an nib puluw.—Mu beeg e Jude 9.
6. Nap’an ni ke m’ag u wan’ Jesus ni nge mang Messiah, ma uw rogon ni ke m’ug riy ni ir be’ nib sobut’an’?
6 Nap’an ndawori yib Jesus nib girdi’, ma dariy e maruwar riy ni ke nang u murung’agen urngin ban’en nra buch rok u nap’an nra yib ni ke mang Messiah. Ere dabisiy ni ke nang ni yira gafgownag. Yugu aram rogon, ma ke m’agan’ ngay ni nge par u fayleng me yim’ ni ir fare Messiah ni kan micheg. Mang fan? Ke yog Paul ni ke yag rok Jesus ni nge rin’ e re n’em ya bochan ni ir be’ nib sobut’an’. Ke yoloy Paul ni gaar: “Gubin ngiyal’ ni immoy rok rarogon Got, machane de guy rogon ni nge gelnag ir nge yan i par nib taareb rogon ngak Got. Ya ir e lem rok me pag e flaab rok ni gubin, nge yib i ngal’ nib tapigpig. Mi ni gargeleg ni bod e girdi’, me m’ug ni bod rogon e girdi’.”—Fil. 2:6, 7.
MI I “PAR NIB SOBUT’AN’”
7, 8. Mang boch e kanawo’ ni dag Jesus riy ni ir be’ nib sobut’an’ u nap’an ni kab bitir ngu nap’an ni be machib?
7 Ke yog Paul nnap’an ni ke yib Jesus nib girdi’ “mi i par nib sobut’an’ ma be fol rok Got nge yan i mada’ ko ngiyal’ ni yim’ riy ni yam’” ni tay u daken e baley i gek’iy. (Fil. 2:8) Nap’an ni kab bitir i yan ngaram ma i dag ni ir be’ nib sobut’an’. Yugu aram rogon ni gallabthir rok e Josef nge Maria e dar flontgow “mi i par ni be fol rorow.” (Luke 2:51) N’en ni ke rin’ Jesus e rib fel’ ni nge fol e piin fel’ yangaren riy. Faanra ngar folgad ko gallabthir rorad ma ra tow’athnagrad Jehovah.
8 Nap’an ni ke ilal Jesus, ma i dag ni ir be’ nib sobut’an’. N’en nth’abi ga’ fan u wan’ e nge rin’ e tin nib m’agan’ Got ngay. (John 4:34) Nap’an ni be machib, ma i fanay Jesus fithingan Got me fil ngak e girdi’ u murung’agen e tin nib m’agan’ Got ngay nge miti mang Got e Chitamangin. Miki dag ko ngongol rok ni ma fol ko pi n’en ni ke fil ngak e girdi’ u murung’agen Jehovah. Bod nnap’an ni fil Jesus ngak pi gachalpen rogon ni ngan meybil, ma bin som’on ni ke yog e gaar: “Chitamangimad ni ga bay u tharmiy: Ngan tay fan fithingam nib thothup.” (Matt. 6:9) Ere ke fil Jesus ngak pi gachalpen ni n’en th’abi ga’ fan ni ngaur lemnaged e ngar thothupnaged fithingan Jehovah. Ma ireray e n’en ni i rin’. U nap’an ni ke chugur ni nge mu’nag e machib rok u fayleng, me meybil ngak Jehovah ni gaar: “Kug weliy murung’agem [“fithingam,” NW] ngorad [pi apostal] kar nanged gur, ma bay kug rin’ i yan ni ara’ rogon.” (John 17:26) Maku, boor yay ni ke yog Jesus ndabiyog ni nge rin’ ban’en nfaanra dabi ayuweg Jehovah.—John 5:19.
9. Mang e ke yiiynag Zekariah u murung’agen fare Messiah, ma uw rogon ni ke lebguy Jesus?
9 Ke yoloy Zekariah u murung’agen fare Messiah ni gaar: “Gimed e girdi’ nu Zion, mfelfelan’gad, mfelfelan’gad! Gimed e girdi’ nu Jerusalem, mu tolulniged e felfelan’! Mu sapgad, pilung romed e be yib ngomed! Be yib nib felfelan’ ya ma gel ko pi toogor rok, machane ba sobut’an’, ma ke yib ni ke af nga daken ba donkey, ke af nga daken ba fak e donkey.” (Zek. 9:9) Ke lebug e re n’em u nap’an ni yan Jesus nga Jerusalem u m’on ko Paluk’af ko duw ni 33 C.E. Me filath e girdi’ ni pire’ ni pire’ wuru’ e mad rorad nge pa’ngin e gek’iy nga daken e kanawo’. Ma ga’ngin yang u lan fare binaw ni yibe tolul riy. Yugu aram rogon ni pi cha’nem e kar pininged e sorok ngak Jesus, ka rogned ni ir e Pilung, me par ni be sobut’nag ir.—Matt. 21:4-11.
10. Bochan ni ke fol Jesus rok Got nge mada’ ko yam’, ma mang e be dag e re n’em?
10 Nap’an ni immoy Jesus Kristus u fayleng nge mada’ ko ngiyal’ ni ke yim’ u daken baley i gek’iy, ma i par nib sobut’an’, ma be fol rok Got. Ere, ba mutrug ni n’en ni rin’ e be dag ni girdi’ e rayog ni ngar pared nib yul’yul’ ngak Jehovah u nap’an nra yib e skeng nib gel ngorad. Miki dag nde riyul’ e n’en ni ke yog Satan ni be pigpig e girdi’ ngak Jehovah ya yad baadag ni nge pi’ boch ban’en ngorad. (Job 1:9-11; 2:4) Maku bochan ni ke par Kristus nib yul’yul’ ma ke gagiyelnag ni Jehovah e ir e ta gagiyeg u palpalth’ib nth’abi tolang mab mat’aw. Dariy e maruwar riy ni kari felfelan’ Jehovah ni be guy ni Fak ni kari maagirag rok e ke par nrib yul’yul’.—Mu beeg e Proverbs 27:11.
11. Mang athap e ke yag ngak e girdi’ ya bochan ni ke pi’ Jesus Kristus e yafas rok ni maligach?
11 Maku bochan ni ke yim’ Jesus u daken baley i gek’iy, ma ke ayuweg e girdi’ ndab ku u ra pared ni yad e sib ko yam’ nge denen. (Matt. 20:28) Bochan ni ke pi’ Jesus e yafas ni maligach, ma aram e rayog ni nge n’ag Jehovah fan e denen rodad nib puluw ko motochiyel rok nib mat’aw, me bing e kanawo’ ngak e girdi’ nge yag ngorad e yafas ndariy n’umngin nap’an. Ke yoloy Paul ni gaar: “Taareb e ngongol nib mat’aw e ke pithig urngin e girdi’ ko kireb ke pi’ e yafos ngorad.” (Rom. 5:18) Bochan fare yam’ ni tay Jesus, ma pi Kristiano ni kan dugliyrad e bay e athap rorad ni nga ranod nga tharmiy ndab kur m’ad, ma fare “yugu boch e saf” e rayog ni nge yag ngorad e yafas ndariy n’umngin nap’an u fayleng.—John 10:16; Rom. 8:16, 17.
“GUB SOBUT’AN’”
12. Uw rogon ni dag Jesus ngak e girdi’ ni ir be’ nib munguy mab sobut’an’?
12 Ke pining Jesus e piin ni ‘ke aw parowrad’ ni ngar bad ngak. Yog ni gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan.” (Matt. 11:28, 29) Bochan ni Jesus e ir be’ nib sobut’an’ mab munguy, ma ke ayuweg e girdi’ u fithik’ e gol ma de laniyan’. De yog ngak pi gachalpen ni ngar rin’ed e tin dabiyog rorad. I yog e thin nib fel’ u murung’agrad me pi’ e athamgil nga lanin’rad. De yog ban’en ngorad nra k’aringrad ni ngar lemnaged ndariy farad. Dariy e maruwar riy ni gathi ir be’ ndariy e runguy rok ara be’ ni ma gafgownagey. Ke micheg ngak pi gachalpen nfaanra ngar chugurgad ngak mi yad fol ko thin ni ke fil ngorad mi yad pirieg e toffan, ya ba mom e mat’ rok ma tomalngin e n’en nra tay nga porad e bbaud. Ere, pumoon nge ppin ndemtrug yangarrad e yad baadag ni ngar nonad ngak.—Matt. 11:30.
13. Uw rogon ni dag Jesus e runguy ngak e piin kar gafgowgad?
13 Ke runguy Jesus e girdi’ nu Israel ni kar gafgowgad, me rin’ urngin ban’en nrayog rok ni nge ayuwegrad. Nap’an ni immoy ko gin nib chugur nga Jeriko, me mada’nag l’agruw e pumoon ni yow malmit ni yow be man salpiy ma bagayow e Bartimaeus fithingan. Yow be ning e ayuw ngak Jesus, machane pi girdi’ u toobrad e ka rogned ngorow ni ngar th’abew gulungrow. Susun ba mom rok Jesus ni nge fek yathinrow, machane de rin’. Ke runguyrow, ere ke piningrow ni ngar bow ngak me golnag e m’ar rorow ya nge yag ni ngar guyew ban’en bayay. Ere ke folwok Jesus rok Jehovah ni Chitamangin, me dag ni ir be’ nib sobut’an’ mab tarunguy e girdi’ ndawori flont.—Matt. 20:29-34; Mark 10:46-52.
“EN NRA SOBUT’NAG IR E YIRA TOLANGNAG”
14. Bochan ni i sobut’nag Jesus ir, ma uw rogon ni ke fel’ rogon boor e girdi’ riy?
14 I sobut’nag Jesus ir u nap’an ni immoy u fayleng, ma re n’em e ke yibnag e tow’ath nge felfelan’ ngak boor e girdi’. Ke felfelan’ Jehovah u nap’an ni be guy Fak nib t’uf rok ni be fol ko tin nib m’agan’ ngay. Bochan ni Jesus e ir be’ nib munguy mab sobut’an’, ma re n’ey e ke fal’eg laniyan’ e pi apostal rok nge pi gachalpen. Ngongol rok nib fel’ nge pi n’en ni ke fil ngorad, nge thin nib fel’ ni ke yog u murung’agrad e ke ayuwegrad kar manged e pi tapigpig rok Got nib fel’. Miki ayuweg Jesus boor e girdi’ ya ke fil ban’en ngorad, me pi’ e athamgil nga lanin’rad, me pi’ ngorad e tin nib t’uf rorad. Ma urngin e piin ni ke mich Jesus u wan’rad e yira tow’athnagrad ni bochan fare biyul ni ke pi’ Jesus ngorad.
15. Bochan ni i sobut’nag Jesus ir, ma uw rogon ni ke fel’ rogon riy?
15 Ma uw rogon Jesus? Bochan ni i sobut’nag ir, ma ke fel’ rogon riy? Ke yog Jesus ngak pi gachalpen ni gaar: “En nra sobut’nag ir e yira tolangnag.” (Matt. 23:12) Rogon ni yog Paul, ireray e n’en ni buch rok Jesus ya gaar: “Ereray fan me fek Got Jesus nge tay ni ir e th’abi tolang u tharmiy, me pi’ fare ngochol ngak ndariy reb e ngochol ni ba ga’ ngay, ya nge urngin e piin ni yad bay u tharmiy, nge piin ni yad bay u daken e fayleng, nge piin ni yad bay ko bin u ar e tamilang ni ngar ragbuggad, ngar tiyed fan fithingan Jesus, ma yad gubin ni bay rogned u fithik’ e girdi’ ni Jesus Kristus e ir e Somol, mi nog e sorok riy ngak Got ni Chitamangiy.” Bochan ni i sobut’nag Jesus ir miki par nib yul’yul’ u nap’an ni immoy u fayleng, ma aram me tolangnag Got Fak, me pi’ mat’awun ni nge gagiyegnag urngin e piin ni ke sunmiy u tharmiy ngu fayleng.—Fil. 2:9-11.
NGE GEL JESUS NI “FAN KO TIN RIYUL’ NGE SOBUT’AN’”
16. Uw rogon ni nge ulul Fak Got ni nga i dag nib sobut’an’ ko gabul nge langlath?
16 Ra ulul Jesus i dag ni ir be’ nib sobut’an’. Reb e psalm e ke weliy murung’agen e n’en nra rin’ Jesus ni ir e Pilung nu tharmiy ngak e pi toogor rok Got. Be gaar: “Mman u fanam falu’ ngam gel ni fan ko tin riyul’ nge sobut’an’ nge tin nib mat’aw.” (Ps. 45:4, NW) Nap’an e Armageddon, ma ra cham Jesus ko pi toogor rok ya nge ayuweg e piin ni yad ba sobut’an’ mab mat’aw mab t’uf e tin riyul’ rorad. Ma mang e ra buch u nap’an ni ke m’ay e gagiyeg rok Kristus u lan biyu’ e duw u nap’an ni ke gel ngak “e piin ni yad be tay murung’agen ban’en nge piin ni yad be yog e thin”? Gur, ku ra sobut’nag ir? Er rogon, ya ra “pi’ Kristus urngin ban’en ni be gagiyegnag ngak Got ni Chitamangiy.”—Mu beeg e 1 Korinth 15:24-28.
17, 18. (a) Mang nrib ga’ fan ni pi tapigpig rok Jehovah e ngaur folwokgad rok Jesus nrogon ni i sobut’nag ir? (b) Mang e yira weliy ko bin migid e article?
17 Ma uw rogodad? Gad ra sobut’niged gadad ni bod rogon e n’en ni i rin’ Jesus, fa? Nap’an e Armageddon, ma kemus ni girdi’ ni yad ba sobut’an’ ma yad ba mat’aw e ra ayuwegrad Jesus Kristus ni Pilung. Ere ba t’uf ni ngad sobut’niged gadad nfaanra gad baadag ni ngad mageygad nib fas. Maku, faanra ngad sobut’niged gadad ma ra fel’ rogodad riy nge boch e girdi’ ni bod ni ke fel’ rogon Jesus.
18 Mang e rayog ni nge ayuwegdad nge yag ni ngad folwokgad rok Jesus ni ir be’ nib sobut’an’? Uw rogon ni ngad athamgilgad nge yag ni ngad sobut’niged gadad nyugu aram rogon nib mo’maw’ ni ngan rin’ e re n’ey? Bin migid e article e ra pi’ e fulweg ko gali deer ney.
[Study Questions]
[Sasing ko page 15]
Bochan ni i sobut’nag Jesus ir, ma uw rogon ni ke fel’ rogodad riy?
[Sasing ko page 16]
Thingar da folgad rok Jesus u rogon ni i runguy e girdi’
