Jesuseʼ tu yeʼesaj bix unaj k-eʼesik kabal óolal
Jesuseʼ tu yeʼesaj bix unaj k-eʼesik kabal óolal
«Tsʼoʼok in weʼesikteʼex bix u beetaʼal, utiaʼal ka a beeteʼex jeʼel bix tsʼoʼok in beetik tiʼ teʼexoʼ.» (JUAN 13:15)
¿BAʼAX JEʼEL A NÚUKIKEʼ?
¿Bix tu yeʼesil kabal u yóol u Hijo Dios táanil tiʼ u taal way Luʼumeʼ?
¿Bix tu yeʼesil kabal u yóol Jesús ka kuxlaj way Luʼumeʼ?
¿Baʼax utsiloʼob tsʼoʼok u taasik le kabal óolal tu yeʼesaj Jesusoʼ?
1, 2. ¿Baʼax tu kaʼansaj Jesús tiʼ u disipuloʼob le u tsʼook áakʼab kuxlaj way Luʼumeʼ?
LE U tsʼook áakʼab kuxlaj Jesús way Luʼumeʼ muchʼlaj yéetel u apostoloʼob tiʼ junpʼéel cuarto yaan tu kaʼanlil junpʼéel naj yaan Jerusalén. Le táan u cenaroʼoboʼ líikʼ Jesuseʼ ka tu tsʼáaj juntséelil u yáal u nookʼ yéetel tu chʼaʼaj junpʼéel toallaeʼ ka tu jéepʼkʼaxtaj u nakʼ tu yéetel. Tsʼoʼoleʼ tu láalaj jaʼ tiʼ junpʼéel palanganaeʼ ka joʼopʼ u pʼoʼik u yook le disipuloʼoboʼ yéetel u choʼik u jaʼil yéetel le toallaoʼ. Tu tsʼookeʼ tu kaʼa búukintaj le u yáal u nookʼ tu luʼsoʼ. ¿Baʼaxten tu pʼoʼaj u yookoʼob? (Juan 13:3-5.)
2 Letiʼeʼ tu yaʼalaj: «¿Ka naʼatkeʼex baʼax tsʼoʼok in beetik tiʼ teʼexaʼ? [...] Bey túunoʼ, wa teen kex j-Kaʼansajen yéetel Yuumtsilen tsʼoʼok in pʼoʼik a wookeʼexeʼ, bey xan teʼex unaj a pʼoʼik a wookeʼex ta baatsileʼex. Tumen tsʼoʼok in weʼesikteʼex bix u beetaʼal, utiaʼal ka a beeteʼex jeʼel bix tsʼoʼok in beetik tiʼ teʼexoʼ» (Juan 13:12-15). Úuchik u beetik junpʼéel meyaj maʼ jeʼel máaxak jeʼel u beetkeʼ, tu kaʼansajtiʼob junpʼéel baʼal maʼ ken u tuʼubsoʼob, le oʼolal yaan u taaktal u yeʼeskoʼob kabal óolal ichil tuláakal u kuxtaloʼob.
3. 1) ¿Bix tu yeʼesil Jesús jach kʼaʼanaʼan le kabal óolaloʼ? 2) ¿Baʼax ken k-il teʼ xookaʼ?
3 Maʼ yáax u kaʼansik Jesús tiʼ u apostoloʼob unaj u yantal kabal óolal tiʼobiʼ. Juntéenjeakeʼ ka tu yilaj yaan tiʼ letiʼob táan u baʼateltʼantikoʼob máax u maas nojchil ichiloʼobeʼ, tu tsʼáaj juntúul chan xiʼipal tu tséeleʼ ka tu yaʼalaj: «Le máax kʼamik le chan xiʼipal tin kʼaabaʼaʼ teen ku kʼamken. Le máax ku kʼamkeneʼ ku kʼamik xan le máax túuxtenoʼ. Tumen le máax maas chichan ichil tuláakleʼexeʼ, letiʼ u maas nojchil» (Luc. 9:46-48). Tsʼoʼoleʼ ka máan kʼiineʼ tumen u yojel jach ku tsʼíiboltik nojbeʼenil le fariseoʼoboʼ, tu yaʼalaj: «Le máax ku nojbeʼenkúuntikubaeʼ bíin mixbaʼalkúuntaʼak, le máax xan ku mixbaʼalkúuntikubaeʼ bíin nojbeʼenkúuntaʼak» (Luc. 14:11). Jeʼex k-ilkoʼ Jesuseʼ u kʼáat ka eʼesaʼak kabal óolal tumen le máaxoʼob tsaypachtikoʼ, le modosaʼ minaʼan mix baʼal u yil yéetel le kaʼanal ichiloʼ mix yéetel u nojbaʼalkúuntikuba máakoʼ. Utiaʼal u páajtal k-beetik jeʼex letiʼoʼ, koʼoneʼex ilik bix tu yeʼesil kabal óolal yéetel baʼax utsil ku kʼamik le máax eʼesikoʼ bey xan le u maasiloʼ.
MAʼ TIN «SUT IN PAACH TIʼIʼ»
4. Tak táanil tiʼ u taal way Luʼumeʼ, ¿bix tu yeʼesil u juntúuliliʼ Paal Dios kabal u yóol?
4 Táanil tiʼ u taal way Luʼumeʼ u juntúuliliʼ Paal Dioseʼ tsʼokaʼaniliʼ u yeʼesik kabal u yóol ichil u millonesil jaʼaboʼob tu máansaj yéetel u Taata teʼ kaʼanoʼ. Yoʼolal le bix u biskuba tu yéetel u Taataoʼ u libroil Isaíaseʼ, ku yaʼalik: «Yuumtsileʼ tsʼoʼok u tsolxikintik tiʼ teen utiaʼal ka xiʼiken in [líiʼs u yóol] le máaxoʼob kaʼanaʼanoʼob yéetel u tʼaaniloʼob tsʼaa óolal. Sáamsamal jaʼatskab kʼiin ku beetik in chʼenxikin utiaʼal ka chinlaken in wuʼuy u tʼaan. Yuumtsileʼ tsʼoʼok u tsʼáaik in naʼat, teen [...] xaneʼ maʼ in pechinba tiʼ u tʼaaniʼ mix in sut in paach tiʼiʼ» (Isa. 50:4, 5). Tumen ku tsʼíiboltik u kaanbaleʼ, Jesuseʼ yéetel kabal óolal tu chʼenxikintaj le baʼax ku kaʼansaʼaltiʼ tumen u jaajil Diosoʼ. Yéetel tu jach ilaj bix tu yeʼesil kabal óolal Jéeoba úuchik u chʼaʼik óotsilil tiʼ j-kʼeban wíinikoʼob.
5. Arcángel Miguel wa Jesuseʼ, ¿bix tu yeʼesil kabal óolal ka baʼateltʼaanaj yéetel le Kʼaasilbaʼaloʼ?
5 Baʼaleʼ maʼ tuláakal u angeloʼob Dios eʼes le kabal óolal beyoʼ. Juntúul angeleʼ maʼ tu chaʼaj u kaʼansaʼaliʼ, baʼaxeʼ kaʼanchaj u yich yéetel tu taasuba nojbaʼalil. Le oʼolal líikʼ tu contra Jéeoba yéetel tu kʼaabaʼtaj Satanás, le Kʼaasilbaʼaloʼ. Baʼaleʼ Jesuseʼ mix juntéen pʼáat maʼ kiʼimak u yóol yéetel le baʼax tsʼaʼan u beet teʼ kaʼanoʼ yéetel maʼ tu tuklaj u píitmáan yéetel le páajtalil yaantiʼoʼ. «Ka baʼatel[tʼaanaj yéetel] Kʼaasilbaʼal» le Arcángel Miguel wa Jesús, «tu yoʼolal u wíinklil Moiseseʼ», maʼ píitmáan yéetel le páajtalil yaantiʼoʼ, baʼaxeʼ tu yeʼesaj kabal óolal yéetel maʼ tu taasuba nojbaʼaliliʼ. Tumen u yojel Jéeoba, u Nojoch Juezil tuláakal baʼaleʼ, yéetel kiʼimak óolal tu páaʼtaj u yutskíintik teʼ kʼiin ku tuklik maas maʼaloboʼ yéetel le bix uts tu tʼaanoʼ (xokaʼak Judas 9).
6. ¿Bix tu yeʼesil kabal u yóol Jesús ka tu yóotaj u beet u Mesíasil?
6 Ichil le baʼaxoʼob tu kanaj Jesús teʼ kaʼanoʼ tiaʼan le profecíaʼob yoʼolal u kuxtal way Luʼumeʼ. Le oʼolal maʼ xaaneʼ táanil tiʼ u taal way Luʼum yéetel u kíimil bey Mesíaseʼ u yojliliʼ le baʼaloʼob ken u sen muʼyajtoʼ. Kex beyoʼ le u juntúuliliʼ Paal Diosoʼ tu yaʼalaj jeʼel u beetkeʼ. ¿Baʼaxten? Tumen kabal u yóol. Lelaʼ bey tu yeʼesil le apóstol Pablo le ka tu tsʼíibtaj: «Kex beyiliʼ Jajal Dioseʼ, maʼ tu tuklaj u [...] ketkuba yéetel Jajal Dios[iʼ]; baʼaleʼ tu juunal yóoleʼ tu mixbaʼalkúuntuba, ka tu beetuba palitsil, ka tu [beetuba] jeʼel bix wíinikoʼob[eʼ]» (Fili. 2:6, 7, Le Tumben Nuptʼan).
«TU MIXBAʼALKÚUNTUBA» KA KUXLAJ WAY LUʼUMEʼ
7, 8. ¿Bix tu yeʼesil Jesús kabal óolal tu chan paalil bey xan le táan u kʼaʼaytajoʼ?
7 Pabloeʼ tu yaʼaleʼ ka kuxlaj Jesús way Luʼumeʼ «tu mixbaʼalkúuntubaeʼ ka tu yuʼubaj tʼaan kex yanchaj tak u kíimil tiʼ junpʼéel u cheʼil muʼyaj» (Fili. 2:8, NM). Desde tu chan paalil tu yeʼesaj kabal óolal. Kex José yéetel María j-kʼebanoʼobeʼ, Jesuseʼ «láayliʼ ku sen uʼuy[ik]» u tʼaanoʼob kaʼacheʼ (Luc. 2:51). Yaʼab baʼal jeʼel u kanik le táankelmoʼob yéetel le x-lóoʼbayanoʼob tiʼ letiʼoʼ. Wa ku yuʼubikoʼob u tʼaan u taataʼob xaneʼ yaan u kiʼikiʼtʼantaʼaloʼob tumen Jéeoba.
8 Ka nojochchajeʼ Jesuseʼ tu yeʼesaj kabal u yóol tumen yáax tu beetaj baʼax uts tu tʼaan Jéeoba, maʼ baʼax u kʼáat letiʼiʼ (Juan 4:34). Le táan u kʼaʼaytajoʼ tu chʼaʼchiʼitaj u kʼaabaʼ Dios; tsʼoʼoleʼ tu yáantaj le máaxoʼob uts u puksiʼikʼaloʼob u kʼaj óoltoʼob u jatsʼuts modos Jéeoba yéetel le baʼax ku tuklik u beetik utiaʼal wíinikoʼ. Tsʼoʼoleʼ tu tsʼáaj ichil u kuxtal le baʼaxoʼob ku kaʼansikoʼ. Jeʼex le ka tu kaʼansaj bix unaj u orar máakeʼ, tu yaʼalaj: «K-Yuum yanech teʼ kaʼanoʼ, kiliʼichkúuntaʼak a kʼaabaʼ» (Mat. 6:9). Beyoʼ tu yeʼesaj maas kʼaʼabéet u kiliʼichkúuntaʼal u kʼaabaʼ Jéeoba. Letiʼ xaneʼ bey tu beetiloʼ. Le oʼolal tu tsʼoʼokbal u kʼaʼaytaj way luʼumeʼ béeychaj u yaʼalik tiʼ u Taata: «Tin tsʼáa u yojéelt [le apostoloʼob] máaxech[oʼ], láayliʼ yaan in tsʼáaikech kʼaj óoltbileʼ» (Juan 17:26). Tsʼoʼoleʼ mantatsʼ tu tsʼáaj nojbeʼenil tiʼ Jéeoba yoʼolal le baʼaxoʼob tu beetaj way Luʼumeʼ (Juan 5:19).
9. ¿Baʼax tu yaʼalaj Zacarías yoʼolal le Mesíasoʼ, yéetel bix tu béeykuntil Jesús?
9 Zacaríaseʼ tu yaʼalaj yoʼolal le Mesíasoʼ: «¡U kaajil Sión sen kiʼimakchajak a wóol! ¡U kaajil Jerusalén kʼaaynen tu yéetel kiʼimak óolal! A [reyeʼ] táan u taal tuʼux yanech, [toj baʼax ku beetik] yéetel j-paʼa muukʼ, baʼaleʼ j-kabal óol u natʼmaj [...] juntúul chan burro u yaal juntúul x-burra» (Zac. 9:9). Lelaʼ béeychaj le ka ook Jesús Jerusalén tu jaʼabil 33, táanil tiʼ u kʼiinbesajil le Pascuaoʼ. Yaʼab máakoʼob tu jayláantaj u nookʼoʼob teʼ bejoʼ yéetel uláakʼoʼobeʼ tu jayoʼob u kʼab cheʼob, tuláakal le kaaj jach kiʼimakchaj u yóoloʼ. Baʼaleʼ kex kʼaʼam bey Reyeʼ Jesuseʼ maʼ kaʼanchaj u yichiʼ (Mat. 21:4-11).
10. ¿Baʼax tu yeʼesaj Jesús úuchik u chúukpajal u yóol tak ka kíimi?
10 Tak ka kíim teʼ cheʼoʼ Jesuseʼ tu yeʼesaj kabal óolal yéetel ku yuʼubik tʼaan. Beyoʼ tu yeʼeseʼ wíinikeʼ jeʼel u chúukpajal u yóol tiʼ Jéeoba kex jeʼel baʼaxak ka u muʼyajteʼ. Tu yeʼesaj xaneʼ maʼ jaaj wa wíinikeʼ chéen ku meyajtik Dios tumen yaan baʼax ku kʼamik, jeʼex u yaʼalmil Satanasoʼ (Job 1:9-11; 2:4). Úuchik u chúukpajal u yóoleʼ tu yeʼesaj chéen tiʼ Jéeoba yaan u derechoil u gobernar yéetel toj baʼax ku beetik. Tumen chúukpaj u yóol u Hijoeʼ Jéeobaeʼ jach kiʼimakchaj u yóol (xokaʼak Proverbios 27:11).
11. Úuchik u kʼubik u kuxtal Jesucristoeʼ, ¿baʼax kaʼapʼéel esperanza yaan utiaʼal le ku chúukpajal u yóoloʼoboʼ?
11 Jesuseʼ tu tsʼáaj xan u kuxtal bey junpʼéel boʼol utiaʼal u salvarkuba wíinikeʼ (Mat. 20:28). Lelaʼ tu tsʼáaj u páajtalil u perdonartik Jéeoba le j-kʼeban wíinikoʼoboʼ yéetel u kuxtaloʼob mantatsʼ, baʼaleʼ maʼ tu mixbaʼalkúuntaj u justiciaiʼ. Pabloeʼ tu yaʼalaj: «Le toj meyaj tu beetaj Jesucristo[oʼ] tu taasaj tiʼ tuláakal máakoʼobeʼ junpʼéel kuxtal tselaʼan tiʼ [kíimil]» (Rom. 5:18). U kuxtal Jesús tu kʼuboʼ tu tsʼáaj u páajtalil u bin kaʼan le sukuʼunoʼob yéeyaʼanoʼob yéetel kiliʼich muukʼoʼ yéetel u kʼamkoʼob le kuxtal minaʼan xuʼulsajil tiʼoʼ, yéetel le «uláakʼ tamanoʼob[oʼ]» ku béeytal u kuxtaloʼob mantatsʼ way Luʼumeʼ (Juan 10:16; Rom. 8:16, 17).
«KABAL U YÓOL [U] PUKSIʼIKʼAL»
12. ¿Bix tu yeʼesil Jesús kabal óolal yéetel utsil tiʼ tuláakal wíinik?
12 Jesuseʼ tu yaʼalaj: «Koʼoteneʼex tiʼ teen tuláakleʼex máaxeʼex kaʼananeʼex tiʼ a meyajeʼex yéetel aal a kuucheʼex». Ka tsʼoʼokeʼ tu yaʼalaj: «Biseʼex in kuuch ta wóokʼoleʼex, yéetel kaanbalneneʼex tiʼ teen, tumen teneʼ chúukaʼan in wóol yéetel kabal u yóol in puksiʼikʼal; beyoʼ bíin a kaxteʼex jeʼelel» (Mat. 11:28, 29). Tumen kabal u yóol yéetel utseʼ, tu yeʼesaj u yutsil tiʼ tuláakal wíinik. Maʼ tu yaʼalaj tiʼ u disipuloʼob ka u beetoʼob junpʼéel baʼax maʼ tu páajtal u beetkoʼobiʼ, baʼaxeʼ tu líiʼsaj u yóoloʼob. Maʼ tu beetaj u yuʼubikoʼob minaʼan u biilaloʼobiʼ. Maʼ tu beetaj u kʼasaʼanil tiʼobiʼ yéetel maʼ jelaʼan bix tu tratartiloʼobiʼ. Baʼaxeʼ tu yaʼalajtiʼobeʼ wa ku natsʼkubaʼob tiʼ letiʼ yéetel ku beetkoʼob baʼax ku kaʼansikeʼ, yaan u líikʼil u yóoloʼob, tumen u cheʼil u kuucheʼ maʼ talam u bisaʼaliʼ yéetel sáal. Tuláakal máak kaʼach kiʼimak u yóol yanil tu yiknal kex jeʼel jaypʼéel u jaʼabileʼ (Mat. 11:30).
13. ¿Bix tu yeʼesil Jesús ku chʼaʼik óotsilil tiʼ le máaxoʼob maas ku muʼyajoʼoboʼ?
13 Ka tu yilaj Jesús bix u muʼyaj u kajnáaliloʼob Israeleʼ tu chʼaʼaj óotsilil tiʼob yéetel tu yáantoʼob yéetel yaabilaj. Le ka náatsʼ tu kaajil Jericoeʼ tu yilaj kaʼatúul j-chʼóopoʼob ku kʼáatkoʼob caridad, juntúul tiʼ letiʼobeʼ Bartimeo, letiʼobeʼ maʼ xuʼul u kʼáatkoʼob áantaj tiʼ Jesusiʼ. Baʼaleʼ kʼeʼeyoʼob tumen le máakoʼoboʼ ka aʼalaʼabtiʼob ka u mak u chiʼob. Wa ka u yóot Jesús kaʼacheʼ jeʼel u pʼáatal maʼ u beetik u cuentailoʼobeʼ. Baʼaleʼ yoʼolal u chʼaʼ óotsilaleʼ tu yaʼalaj ka taasaʼakoʼob tu yiknal yéetel tu sutaj u sáasil u yichoʼob. Jeʼex k-ilkoʼ Jesuseʼ tu yeʼesaj kabal óolal yéetel tu chʼaʼaj óotsilil tiʼ le máaxoʼob maas ku muʼyajoʼob jeʼex u beetik Jéeoba, u Taataoʼ (Mat. 20:29-34; Mar. 10:46-52).
«LE MÁAX KU KABALKÚUNTIK U YÓOLEʼ BÍIN KAʼANALKUNTAʼAK»
14. ¿Baʼax utsiloʼob tu taasaj le úuchik u yeʼesik kabal óolal Jesús le tiaʼan way Luʼumeʼ?
14 Le kabal óolal tsʼoʼok u yeʼesik Jesús ichil tuláakal u kuxtaloʼ ku taasik kiʼimak óolal yéetel nukuch utsiloʼob. Jéeobaeʼ jach kiʼimakchaj u yóol ka tu yilaj yéetel kiʼimak óolal ku beetaʼal baʼax u kʼáat tumen u Hijo. Le apostoloʼob yéetel le disipuloʼoboʼ jach líikʼ u yóoloʼob ka tu yiloʼob u jatsʼuts modos Jesús. Le baʼax tu beetaj, tu kaʼansaj yéetel le bix u líiʼsik u yóoloʼoboʼ tu beetaj u tsʼáaik u yóoloʼob u meyajtoʼob Dios. Tsʼoʼoleʼ tak u maasil máakoʼob ku kʼamkoʼob u yutsil le kabal óolal yaan tiʼ Jesusoʼ, ku yáantaʼaloʼob, ku kaʼansaʼaloʼob yéetel ku líiʼsaʼal u yóoloʼob. Yéetel tuláakal le máaxoʼob ku yuʼubikoʼob tʼaanoʼ yaan u kʼamkoʼob yaʼab utsiloʼob utiaʼal minaʼan u xuul.
15. ¿Baʼax utsil tu kʼamaj Jesús tumen tu yeʼesaj kabal óolal?
15 ¿Yaan wa utsiloʼob tu kʼamaj xan Jesús úuchik u yeʼesik kabal óolal? Yaan, letiʼeʼ tu yaʼalaj tiʼ u disipuloʼob: «Le máax ku kabalkúuntik u yóoleʼ bíin kaʼanalkuntaʼak» (Mat. 23:12). Béeychaj tiʼ letiʼ le baʼax tu yaʼaloʼ, Pabloeʼ ku yaʼalik: «Jajal Dioseʼ tu tsʼáaj le maas kaʼanal nojbeʼenil tiʼoʼ, yéetel junpʼéel kʼaabaʼ yaan tu yóokʼol tuláakal kʼaabaʼ. Utiaʼal beyoʼ le ken uʼuyaʼak u kʼaabaʼ Jesuseʼ, ka xolak tuláakal le máaxoʼob yanoʼob teʼ kaʼanoʼ, teʼ luʼumoʼ yéetel yáanal luʼum, yéetel utiaʼal ka kʼaj óoltaʼak tumen tuláakal máak yéetel ka u yaʼaloʼobeʼ Jesucristoeʼ letiʼ Yuumtsil, utiaʼal u nojbeʼenil Jajal Dios le Taataoʼ». Tumen chúukpaj u yóol yéetel tu yeʼesaj kabal óolal ka kuxlaj way Luʼumeʼ, Jéeobaeʼ tu tsʼáaj páajtalil tiʼ tu yóokʼol angeloʼob yéetel tu yóokʼol wíinik (Fili. 2:9-11).
JESUSEʼ YAAN U «BAʼATEʼEL TU YOʼOLAL LE JAAJ» YÉETEL «LE KABAL [ÓOLALOʼ]»
16. ¿Bix k-ojéeltik Jesuseʼ maʼ kun xuʼulul u yeʼesik kabal óolal?
16 U Hijo Dioseʼ maʼ kun xuʼulul u yeʼesik kabal óolal. Juntúul salmistaeʼ tu yaʼalaj baʼax ken u beet Jesús tu contra u enemigoʼob desde teʼ kaʼanoʼ: «A tsiikileʼ a bin táanil tiʼ tsʼáancheʼetajil, táan a baʼateʼel tu yoʼolal le jaajoʼ yéetel táan a beetik maʼalob pʼis óol tiʼ le kabal [óolaloʼ]» (Sal. 45:4). Tu kʼiinil Armagedoneʼ, Jesucristoeʼ yaan u baʼateʼel tu yoʼolal le jaajoʼ, le tojiloʼ, bey xan tu yoʼolal le kabal óolaloʼ. ¿Baʼax kun úuchul ken tsʼoʼokok le Mil Jaʼaboʼob ken u beet u Reyil le Mesías yéetel ken tsʼoʼokok u xuʼulsik «tuláakal yuumtsiloʼob, jalaʼachiloʼob yéetel páajtaliloʼob[oʼ]»? Tumen kabal u yóoleʼ, Jesuseʼ yaan u «kʼub[ik] le [reino] tiʼ Jajal Dios[oʼ]» (xokaʼak 1 Corintoiloʼob 15:24-28).
17, 18. 1) ¿Baʼaxten le máaxoʼob meyajtik Jéeobaoʼ unaj u yeʼeskoʼob kabal óolal jeʼex Jesuseʼ? 2) ¿Baʼax kʼáatchiʼiloʼob kun núukbil teʼ tuláakʼ xookoʼ?
17 ¿Kux túun toʼon? ¿Yaan wa k-eʼesik kabal óolal jeʼex Jesuseʼ? ¿Baʼax kun úuchultoʼon ken taalak Jesús bey Rey utiaʼal u tsʼoʼokbesik le baʼax u kʼáat Dios teʼ Armagedonoʼ? Ken taalakeʼ chéen yaan u salvarkuba le máaxoʼob toj u kuxtaloʼob yéetel ku yeʼeskoʼob kabal óolaloʼ. Le oʼolal le kabal óolaloʼ jach kʼaʼabéet utiaʼal k-salvartikba. Tsʼoʼoleʼ le kabal óolal tu yeʼesaj Jesusoʼ tu taasaj utsiloʼob tiʼ letiʼ bey xan tiʼ u maasil, toʼon xaneʼ wa k-eʼesikeʼ jeʼel u taasik yaʼab utsileʼ.
18 ¿Baʼax jeʼel u yáantkoʼon k-eʼes kabal óolal jeʼex Jesuseʼ? ¿Bix jeʼel k-tsʼáaik k-óol k-eʼes kabal óolal kex maʼ chéen chʼaʼabileʼ? Le kʼáatchiʼobaʼ yaan u núukaʼal teʼ tuláakʼ xookoʼ.
[U kʼáatchiʼiloʼob le xookoʼ]
[Fotoʼob yaan teʼ táan juʼun 12]
¿Baʼax utsil jeʼel u taasiktoʼon le kabal óolal tu yeʼesaj Jesusoʼ?
[Foto yaan teʼ táan juʼun 13]
Jesuseʼ jach tu yeʼesaj bix unaj k-chʼaʼik óotsilil
