Jesús nga ejemplu stinu purtiʼ qué rudxiibaʼ laca laa
Jesús nga ejemplu stinu purtiʼ qué rudxiibaʼ laca laa
«Ma bilué laatu xi guni tu, ti casi bine laatu ca, zacaca guni tu.» (JUAN 13:15)
XI NICÁBILUʼ.
Ximodo maca bisihuinni Xiiñiʼ Dios qué rudxiibaʼ laca laa ante gueeda lu Guidxilayú.
Ximodo bisihuinni Jesús qué nudxiibaʼ laca laa dxi bibani lu Guidxilayú.
Xi ndaayaʼ maʼ gucuaa binni pur qué nudxiibaʼ Jesús laca laa.
1, 2. Xi bisiidiʼ Jesús ca apóstol stiʼ últimu gueelaʼ biuunebe laacaʼ ndaaniʼ Guidxilayú.
GUIDÚʼYANU xi guca últimu gueelaʼ bibani Jesús ndaaniʼ Guidxilayú, dxi nuunebe ca apóstol stibe ndaaniʼ ti cuartu huiiniʼ nuu ra guiropa pisu ndaani guidxi Jerusalén. Laga cayoxhícabe, biasa Jesús, gulee xhaba ne gucuaa ti tualla bindiibi ndaaniʼ. Óraque gudaabe nisa ndaaniʼ ti bandeja ne bizulú gudiibibe ñee ca discípulo stibe ne bicuiidxibe ñeecaʼ né tualla que, oraqueruʼ gúcube xhábabe. Xiñee biʼniʼ Jesús dxiiñaʼ huaxiéʼ risaca riʼ yaʼ (Juan 13:3-5).
2 Laca laabe bisiénebe: «Ñee biene tu ni bine laatu ca la? [...] Inque naa, naca Señor ne Maistru stitu ne gudiibe ñee tu la? lágaxa laatu qué quiʼbi saa tu ñee tu. Purti ma bilué laatu xi guni tu, ti casi bine laatu ca, zacaca guni tu» (Juan 13:12-15). Ra bíʼnibe dxiiñaʼ ni qué risácapeʼ riʼ, bidiibe ti ejemplu ni qué ziuu dxi guiaandaʼ ca apóstol stibe ne zucaani laacaʼ gúnicaʼ zaqueca biaʼ dxi guibánicaʼ.
3. 1) Ximodo bisihuinni Jesús chupa biaje pabiáʼ risaca cadi gudxiibaʼ binni laca laa. 2) Xi zadúʼyanu lu tema riʼ.
3 Cadi deruʼ primé biaje ngue gusiidiʼ Jesús ca apósotl stiʼ cadi gudxiibacaʼ laca laacaʼ. Ti biaje, dxi bíʼyabe cadindediidxaʼ caadxi de laacaʼ purtiʼ caniʼcaʼ tuu nga jma risaca ládecaʼ, gucuaabe ti baʼduhuiiniʼ ne gúdxibe laacaʼ sicaríʼ: «Tutiica acané baʼdu ri pur naa la? casi ñaca cayuni ni naa. Ne tu guni ni naa la? cayuni ni ni Biseenda naa. Purti ni jma huaxiéʼ risaca lade tu la? nga nga ni jma risaca» (Luc. 9:46-48). Ne cumu nanna Jesús riuulaʼdxiʼ ca fariseu gusisaca binni laacaʼ la? guniʼbe ca diidxaʼ riʼ despué: «Tutiica uyubi isaca la? qué zusisaca iruti laa, ne tu na qué risaca la? zusisaca binni laa» (Luc. 14:11). Racá ridúʼyanu qué racalaʼdxiʼ Jesús gaca ca xpinni tuuxa ni rudxiibaʼ laca laa, o guiníʼ íquecaʼ jma risácacaʼ que stobi o gusihuínnicaʼ jma nuu xpiaanicaʼ. Para ganda gúninu casi bíʼnibe, guidúʼyanu ximodo bibánibe ne xi zabeendunu pa qué gudxíʼbanu laca laanu ne ximodo zanda gacanenu binni casi biʼniʼ Jesús.
«QUÉ ÑUNEDIÁʼ STI COSA NI QUÉ ÑÁBIBE NAA»
4. Ximodo maca bisihuinni Tobi lucha Xiiñiʼ Dios qué rudxiibaʼ laca laa ante gueeda lu Guidxilayú.
4 Tobi lucha Xiiñiʼ Dios maca bisihuinni qué rudxiibaʼ laca laa ante gueeda lu Guidxilayú, bisihuínnibe ni guiráʼ ca millón de iza bibaninebe Bixhózebe guibáʼ. Guidúʼyanu xi guníʼ Isaías ora cuzeeteʼ pabiáʼ guca xhamigu Xiiñi Dios Bixhoze. Isaías cusiene: «Jiobá, Señor ni jma nandxóʼ maʼ bisiidiʼ naa xi guiniéʼ para gusiecheʼ ladxidóʼ cani maʼ bidxaga. Jiobá, Señor ni jma nandxóʼ bixheleʼ diagaʼ, ne naa bizuubaʼ stiidxabe. Ne qué ñunediáʼ sti cosa ni qué ñábibe naa» (Is. 50:4, 5). Cumu nabé racalaʼdxiʼ Jesús guiziidiʼ la? bicaadiaga guiráʼ ni bisiidiʼ Dios ni dxandíʼ laa. Ne laaca biziidibe ra bíʼyabe ximodo bilaselaʼdxiʼ Dios binni ruchee.
5. Ximodo bisihuinni Jesús qué rudxiibaʼ laca laa ora gudindené Binidxabaʼ.
5 Peru cadi guiráʼ ca xiiñiʼ Dios ni nuu guibáʼ guca casi Jesús, purtiʼ guyuu tu bidxiibaʼ laca laa. Tobi de laacabe nga ángel ni beeda gaca Binidxabaʼ, laa qué nudii lugar nusiidiʼ Jiobá laa. Bidxiibabe laca laabe ne guníʼ íquebe jma risácabe que xcaadxi, ngue runi bicaalube Jiobá. Peru Jesús qué nicá lú ñapa jma poder que biaʼ bidii Dios laa ne qué ñuu dxi niquiiñebe poder stibe para ñúnibe ni cadi jneza. Casi «dxi udinde né ángel Miguel [o Jesús], binidxabaʼ runi xcuerpu gueʼtu Moisés», qué niná Jesús ñuni xiixa ni cadi nuu lu náʼ guni. Bisaanabe ni lu náʼ Jiobá, Juez ni jma nandxóʼ, purtiʼ laa zuni chaahuiʼ guendanagana que tiempu maʼ gudixhe guni ni ne modo racalaʼdxiʼ gaca ni (biindaʼ Judas 9).
6. Ximodo bisihuinni Jesús qué rudxiibaʼ laca laa ora gucuaa dxiiñaʼ de gaca Mesías.
6 Dede dxi guyuu Jesús guibáʼ maca nanna xi zazaaca ora guibani lu Guidxilayú, purtiʼ maca cá ni lu caadxi diidxaʼ riguixhená. Nga runi, maca nánnabe xi guiráʼ yuubaʼ zadíʼdibe ne ximodo guuticabe laabe, purtiʼ laabe nga Mesías ni maca nexheʼ gueeda. Neca zaqué, beedabe lu guidxilayú para gátibe casi Mesías. Xiñee yaʼ. Purtiʼ qué rudxiibabe laca laabe. Pablu bisihuinni dxandíʼ ni ora guníʼ: «Neca [casi] Dios laabe peru qué ña be tu naca be, sínuque bisaana [de gácabe casi] Dios que para beda gaca be casi ti mozo ra gule be ndaani guidxilayú» (Filip. 2:6, 7).
«UCA BE BIAʼ RI TIʼ» DXI BIBÁNIBE LU GUIDXILAYÚ
7, 8. Ximodo bisihuinni Jesús qué nudxiibaʼ laca laa dxi guca xcuidi ne dxi bicheeche diidxaʼ.
7 Guidúʼyanu xi guníʼ Pablu de Jesús dxi bibani ndaaniʼ Guidxilayú riʼ: «Bidii be lugar uca be biaʼ ri tiʼ, ne bizuuba be diidxa dede uná be guti be lu [yaga] casi rati cani qué iquiiñeʼ» (Filip. 2:8). Maca dede xcuidi laabe bisihuínnibe qué rudxiibabe laca laabe. Neca binni ruchee José ne María, ca binni bisiniisi laabe, «bizuuba be stiidxa caʼ» (Luc.2:51). Zanda guiziidiʼ cani nahuiiniʼ stale de laabe. Pa chinándacaʼ ejemplu stibe ne guzuubacaʼ stiidxaʼ bixhózecaʼ ne jñaacaʼ la? zaguu Jiobá ndaayaʼ laacaʼ.
8 Dxi maʼ huaniisi Jesús laaca bisihuinni qué rudxiibaʼ laca laa, purtiʼ jma gucuá íquebe gúnibe xhiiñaʼ Jiobá primeru (Juan 4:34). Dxi bicheechebe diidxaʼ biquiiñebe lá Dios ne gucanebe binni ni nayá ladxidóʼ gunibiaʼcaʼ Jiobá ne gánnacaʼ xi cá ique Dios para binni guidxilayú. Ne bíʼnibe guiráʼ ni bisiidibe binni. Casi dxi cusiidibe ca discípulo stibe guni orar guniʼbe: «Bixhózedu ni nuu guibáʼ guisácapeʼ laluʼ» (Mat. 6:9, TNM). Zaqué bisihínnibe jma naquiiñeʼ gusisaca binni lá Jiobá. Ne laapebe bíʼnibe zaqué. Ngue runi dxi mayaca guilúxebe xhiiñabe lu Guidxilayú riʼ gúdxibe Bixhózebe: «Ma bisiideʼ [ca apóstol stinneʼ] tu laluʼ, ne zusiideruáʼ ni» (Juan 17:26, TNM). Ne laaca guniʼbe Jiobá nga gucané laabe para bíʼnibe guiráʼ dxiiñaʼ stibe.
9. Xi guníʼ Zacarías de Mesías, ne ximodo biʼniʼ Jesús ni na ca diidxaʼ que.
9 Sicaríʼ guníʼ Zacarías de Mesías que: «Guyuu nayecheʼ, xhiiñiʼ Sión. Biguáʼ ridxi purtiʼ nabé cayécheluʼ, xhiiñiʼ Jerusalén. ¡Biiyaʼ! Zeeda rey stiluʼ ra nuuluʼ. Laabe rúnibe ni jneza, dxandíʼ zulabe binni; qué rudxiibabe laca laabe, ne dxíʼbabe ti burruhuiiniʼ, deche ti burru ni maʼ zanda guni dxiiñaʼ, xiiñiʼ ti burra» (Zac. 9:9). Guca ni na ca diidxaʼ riʼ lu iza 33, dxi guyuu Jesús Jerusalén ante gaca saa stiʼ Pascua. Stale binni bichiaa xhaba lu neza ra chitídibe, gudíxhecaʼ rama ziña ne biecheʼ guiráʼ ca binni que ora biuube ndaaniʼ guidxi que. Peru Jesús qué nudxiibaʼ laca laa neca caníʼ ca binni que laabe nga Rey (Mat. 21:4-11).
10. Xi bisihuinni Jesús ora bizuubaʼ diidxaʼ dede dxi biiticabe laa.
10 Dxi bibani Jesús ndaaniʼ Guidxilayú, qué nudxiibaʼ laca laa ne bizuubaʼ diidxaʼ dede ora bicaacabe laa lu yaga. Zacá bisihuínnibe zanda guzuubaʼ binni stiidxaʼ Jiobá neca tiidiʼ ra jma nagana. Laaca bisihuínnibe rusiguii Binidxabaʼ, purtiʼ laa guníʼ runi binni ni na Dios pur guiráʼ ni rudii Dios laacaʼ (Job 1:9-11; 2:4). Ra bizuubaʼ Cristu stiidxaʼ Bixhoze sin guchee, bisihuinni napa Jiobá derechu para guni mandar ne zanda guni crenu jneza modo rúnibe ni. Nabé biecheʼ Jiobá ora biʼyaʼ qué nixeleʼ Xiiñiʼ de laa ne qué nudxiibaʼ laca laa. Biblia na: «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cucaalú ne cuxidxi naa» (Proverbios 27:11).
11. Xi ndaaya zacaa ca binni ni gapa fe lu guendaguti stiʼ Jesucristu.
11 Guendaguti stiʼ Jesús laaca biquiiñeʼ ni para guilá binni de donda ne guendaguti (Mat. 20:28). Pur laani maʼ zanda guxhiá Jiobá ca donda stinu ti ganda guibáninu sin gátinu, ne cadi cucheené Jiobá ca ley stiʼ ora runi zacá. Pablu bicaa: «Pur tobi hombre ni biʼni jneza, zaxá stonda caʼ, ne zapa ca enda nabani» (Rom. 5:18). Pur guendaguti stiʼ Jesús zanda guibani ca xpinni Cristu ni bibí guibáʼ sin gáticaʼ, ne «xcaadxi dendxu» zanda guibánicaʼ ndaaniʼ Guidxilayú sin gáticaʼ (Juan 10:16; Rom. 8:16, 17).
«QUÉ ZADINDE NIA LAATU»
12. Ximodo bisihuinni Jesús qué nudxiibaʼ laca laa ne guca nadóʼ ora guniʼné binni.
12 Guidúʼyanu xi invitación bidii Jesús «irá ni ma bidxaga de cuyubi modo guia ladxidóʼ». Guniʼbe: «Laudxiiba ayubu stinne xa yanni tu purti nasisi ni, cadi nanaa ni casi ni nua tu ca. Laudii lugar usiide laatu purti qué zaca nia laatu naduxhuʼ ne qué zadinde nia laatu» (Mat. 11:28, 29). Cumu qué rudxiibabe laca laabe ne nadoʼbe la? gúcabe nachaʼhuiʼ né binni ne qué ñúnibe jma pur tuuxa. Qué ninábabe ca discípulo stibe ñúnicaʼ xiixa ni qué zanda, sínuque guluube ganna ne bisisácabe laacaʼ. Qué nucaabe laacaʼ niníʼ íquecaʼ qué gánnacaʼ gúnicaʼ dxiiñaʼ. Ne qué ñuu dxi ñácabe naduxhuʼ o nuquiichinabe laacaʼ. Gúdxibe laacaʼ zatadxí ladxidoʼcaʼ pa chuʼcaʼ gaxha de laabe ne chinándacaʼ ni cusiidibe, purtiʼ nasisi ayubu stibe. Nabé guyuulaʼdxiʼ binni chuʼ gaxha de Jesús, cásica hombre ne gunaa, zaqueca ni nahuiiniʼ ne ni huaniisi (Mat. 11:30).
13. Ximodo bisihuinni Jesús riá binni huará.
13 Nabé biá Jesús ca binni ni huaxiéʼ risaca de Israel, purtiʼ nabé triste modo nabánicaʼ, ngue runi gucanebe laacaʼ né guendarannaxhii. Ti biaje bidxaagabe chupa ciegu ni canabaʼ ni gó gaxha de Jericó, Bartimeo ne xhamigu. Ca hombre riʼ qué nusaana de ninábacaʼ ñacané Jesús laacaʼ. Peru gudindené ca binni que laacabe ne gúdxicaʼ laacabe gusaana de gúnicabe ridxi. Ñanda nidiʼdiʼ Jesús raqué sin nulabi ca ciegu que. Peru cumu biabe ca binni huará riʼ la?gunábabe guedané binni laacaʼ ra nuube ne bisiándabe laacaʼ. Raca ridúʼyanu yenanda Jesús ejemplu stiʼ Bixhoze, Jiobá, ra gúcabe nachaʼhuiʼ ne ca binni huará (Mat. 20:29-34; Mar. 10:46-52).
«NI QUÉ GUDXIIBA LACA LAA LA? NGUE ZUSISACA DIOS LAA»
14. Xi ndaayaʼ maʼ gucuaa binni pur qué nudxiibaʼ Jesús laca laa dxi bibani lu Guidxilayú.
14 Biaʼ tiempu ziné Jesucristu de nabani maʼ bisihuinni qué rudxiibaʼ laca laa, pur nga randa riuu binni nayecheʼ ne ricaa stale ndaayaʼ. Ne nabé biecheʼ Jiobá ora biʼyaʼ bizuubaʼ Xiiñiʼ diidxaʼ de guidubi ladxidóʼ. Ca apóstol ne ca discípulo stiʼ Jesús gutadxí ladxidoʼcaʼ purtiʼ guca Jesús nachaʼhuiʼ né laacaʼ. Ejemplu stibe, cani bisiidibe ne modo guluube gana laacaʼ gucaneni para gúnicaʼ ni na Dios. Laaca gucanebe xcaadxi binni purtiʼ bisiidibe laacaʼ, guluube gana laacaʼ ne bidiibe ni caquiiñecaʼ. Guiráʼ binni ni guzuubaʼ diidxaʼ zacaa stale ndaayaʼ ni qué ziuu dxi guiluxe pur guendaguti stiʼ Jesús.
15. Xi guleendú Jesús pur qué nudxiibaʼ laca laa.
15 Ñee guleendú Jesús xiixa pur qué nudxiibaʼ laca laa la? Guleendú, purtiʼ gúdxibe ca discípulo stibe ca diidxaʼ riʼ: «Ni qué gudxiiba laca laa la? ngue zusisaca Dios laa» (Mat. 23:12). Guca ni na ca diidxaʼ riʼ luguiabe, pur ni bicaa Pablu: «Bisisaca [Dios] laabe jma que irá xixé, ti ora guiete lá be guzuxibi irá cani nuu ibáʼ ne irá cani nuu ndaani guidxilayú ne irá cani nuu xaguete guidxilayú, ne iníʼ ca nezalú iráʼ: “Jesucristu nga Señor”, ne zacá usisaca ca Dios Bixhoze be». Cumu bizuubabe diidxaʼ ne qué nudxiibabe laca laabe dxi bibánibe lu Guidxilayú la? bidii Jiobá poder laabe para guni mandarbe guiráʼ ángel ne guiráʼ binni ne bidii laabe ti puestu jma risaca (Filip. 2:9-11).
CAYUUYAʼ JESÚS GUIHUINNI NI DXANDÍʼ NE CADI GUDXIIBAʼ BINNI LACA LAA
16. Ximodo nánnanu zusihuinniruʼ Xiiñiʼ Dios qué zudxiibaʼ laca laa.
16 Zácaruʼ Xiiñiʼ Dios ti binni ni qué rudxiibaʼ laca laa despué. Guidúʼyanu xi guníʼ salmista que modo gudxiilú Jesús ca xhenemigu ora maʼ naca Rey guibáʼ: «Né guendarisaca stiluʼ biʼniʼ seguir dede ra guni ganarluʼ; casi ñaca dxíʼbaluʼ ti maniʼ ne cuyuuyaluʼ guihuinni gunáʼ nga ni dxandíʼ, cayuuyaluʼ cadi gudxiibaʼ binni laca laa ne cayuuyaluʼ gúnicaʼ jneza» (Sal. 45:4). Ora maʼ guzulú Armagedón, zadinde Jesucristu para gacané ca binni ni qué rudxiibaʼ laca laa, cani runi ni jneza ne cani riuulaʼdxi guiziidiʼ ni dxandíʼ. Xi zazaaca ora maʼ bizaa ti mil iza de cayuni mandar Jesús ne ora maʼ gudixhedxibe «irá xixé ni runi mandar ndaani guidxilayú» yaʼ. Zusihuínnibe qué rudxiibabe laca laabe purtiʼ «zudii be ca xpinni be Dios Bixhoze be» (biindaʼ 1 Corintios 15:24-28).
17, 18. 1) Xiñee risaca chinanda ca xpinni Jiobá ejemplu stiʼ Jesús. 2) Xi zacábinu lu sti tema ca.
17 Yanna laanu yaʼ. Ñee zinándanu ejemplu ni bisaanané Jesús laanu la? Pa racaláʼdxinu guilanu ora gunitilú Jesús guiráʼ binni malu lu Armagedón la? naquiiñeʼ gúninu ni jneza ne cadi gudxíʼbanu laca laanu. Ne cásica guleendú Jesús stale cosa pur qué nudxiibaʼ laca laa ne gucuaa binni ndaayaʼ pur laani la? laaca zabeendunu stale cosa galán pa gúninu zaqueca.
18 Xi zanda gacané laanu para cadi gudxíʼbanu laca laanu cásica qué nudxiibaʼ Jesús laca laa ya. Ximodo zanda gúninu stipa para cadi gudxíʼbanu laca laanu neca gácani nagana para laanu yaʼ. Zacábinu ca guendarinabadiidxaʼ riʼ lu sti tema ca.
[Guendarinabadiidxaʼ stiʼ párrafo]
[Imagen ni zeeda lu yaza 12]
Ximodo zanda cueendunu ni galán pur qué nudxiibaʼ Jesús laca laa
[Imagen ni zeeda lu yaza 13]
Naquiiñeʼ guianu binni cásica biʼniʼ Jesús ni
