1, 2. Yecu omiyo tira bot lukwenane me timo gin ango, dok pingo en omiyo tira man?

 OBEDO i mwaka 32 K.M., Yecu onongo tye ki lukwenane i Galilaya. Lukwenane mogo gubedo ka pyem i kingi pi laro dito. Luka ocoyo gin mutimme-ni kit man: “Pyem yam ocakke i kingi, ni anga ma i kingi ma loyo ki dit. Yecu ka ongeyo pyem ma i cwinygi, okwanyo latin matidi, omiye ocung i ngete, owaco botgi ni, ‘Dano ducu ma jolo latin man i nyinga, nongo ojolo an, dano ducu ma jolo an, nongo ojolo ngat ma oora; pien ngat matidi twatwal i kinwu ducu, en aye ngat madit.’” (Luka 9:46-48) Kun diyo cwinye i komgi, Yecu okonyo lukwenane me niang ni myero gubed jo mamwol.

² Tika tira man ma Yecu omiyo me bedo ngat matidi-ni rwatte ki kwo pa Lujudaya i cencwari me acel? Pe. Onongo pe rwatte wacel. Kun loko i kom kit ma dano onongo gikwo kwede i kare ca, buk me Theological Dictionary of the New Testament owacci: “I jami ducu ma gitimo, onongo pire tek bot Lujudaya me ngeyo anga ma myero kimiye woro madit loyo, dok onongo nino ducu gibedo ka paro ka ce gimiyo woro bot ngat acel acel.” I tira ma en omiyo-ni, Yecu onongo tye ka wacci lukwenane myero gubed pat ki jo mukene-ni.

3. (a) Bedo ngat matidi tutwal te lokke ngo, dok pingo tek me timo meno? (b) Lapeny mene ma wabigamogi ipwony man?

³ Nyig lok me leb Grik ma kigonyo ni “ngat matidi tutwal[-li]” tere ni ngat ma lakica, mwol, rwomme lapiny, pire pe tek, ki dong pe kitwero. Yecu otiyo ki latin matidi me konyo lukwenane me  niang kit ma pire tek kwede me bedo ngat mamwol. Tira man pire tek bot Lukricitayo me ada i kare-ni calo i cencwari me acel. Twero bedo tek tutwal me tere calo ngat matidi i kabedo mogo i kwowa. Cwiny me awaka romo weko wayenyo dito. Lobo pa Catan-ni kacel ki cwiny ma tye iye romo weko waparo piwa kenwa, wabedo ger, ki dong watero jo mukene kit ma wamito. Ngo ma romo konyowa me dongo cwiny me bedo ngat matidi? Ento ‘ngat matidi tutwal i kinwa romo bedo ngat madit’ nining? I kabedo macalo mene i kwowa ma myero wanyut ni wamwol?

4, 5. Gin ango ma romo konyowa me dongo kit me mwolo? Mi lapor.

⁴ Yo acel me dongo mwolo aye obedo ka walwodo lok i kom kit ma Jehovah dit loyowa kwede. I kom lok, “ngecce tut ma pe wacce, kadi tato tere bene pe twerre.” (Ic. 40:28) Kun loko i kom dit pa Jehovah, lakwena Paulo ocoyo ni: “Lonyo pa Lubanga dwong ma okato kare! Ryekone kacel ki ngecce tut twatwal! Lok ma en ngolo tere pe tatte, niang i kite tek!” (Rom. 11:33) Kadi bed ni ngec pa dano omedde matek adada i kom jami mapol nicakke ma Paulo oco kwede lok man mwaki ma romo 2,000 angec, ento gin ma en ocoyo-ni pud tye ada wa i kare-ni. Kadi bed wangeyo jami mapol, ento man myero omi wabed mwol pien tye jami mapol ma pud myero wapwony madok i kom Jehovah, ticce ki dong kit ma en timo ki jami.

⁵ Bedo ma waniang ni pe waromo ngeyo jami ducu ma Lubanga ocweyo okonyo Leo * me nene kekene ni engat matidi tutwal. I kare ma pud tye bulu, Leo onongo tye ki miti madit me kwano cayan. Pien onongo mito niang jami mapol ma lubbe ki cwec mapat pat, en okwano lok i kom jami ma tye i dan polo ki dong i lobo dok man omiyo en oniang gin mo ma pire tek adada. En owacci: “Ma lubbe ki kwanna, aniang ni jami ma kipwonyo i cayan-ni pe giromo konyo dano me niang jami ducu ma i dan polo ki dong i lobo.” En omedde ni, “Man omiyo aloko tamma me kwano bedo langolkop.” Lacen, Leo odoko lapilida ki langolkop. I ngeye, Lucaden pa Jehovah gukwano Baibul kwede kacel ki dakone, gujolo lok me ada, ci gunongo batija. Ngo ma okonyo Leo me bedo ngat matidi tutwal kadi bed ni en okwano matut?  En ogamo ki yomcwiny ni, “Aniang ni kadi bed watute me kwano lok i kom Jehovah kacel ki cwecce me dan polo ki ma i lobo, pe waromo niang jami ducu.”

6, 7. (a) Jehovah oweko lanen maber ango me mwolo? (b) Mwolo pa Lubanga romo weko dano moni doko “ngat madit” nining?

⁶ Gin mukene ma konyowa me dongo kit me mwolo aye ni Jehovah nyuto kit me mwolo. Nen gin ma tyeng man wacciwa: “Wan lutic kacel ki Lubanga.” (1 Kor. 3:9) Tam kong lok meno! Jehovah, Lubanga ma ditte pe pore ki mewa-ni, terowa calo jo ma watiyo kacel kwede. En keto deyo i komwa dok miniwa kare me tiyo ticwa me pwony-nyi kun watiyo ki Lokke Baibul. Kadi bed Jehovah aye weko kodi dongo, en weko wapito kodi dok waonyo pii itere. (1 Kor. 3:6, 7) Meno mono pe nyuto mwolo madit ma Lubanga tye kwede? Ada, lanen maber me mwolo ma Jehovah onyuto-ni myero ocuk cwinywa adada me bedo ngat matidi tutwal.

⁷ Lanen maber me mwolo pa Lubanga ogudo kwo pa Daudi matek adada. En owero bot Jehovah ni: “Dong ityeko miya kwot me larri, kony [“mwolo,” NW] ma imiya omiyo adoko dit.” (2 Cam. 22:36) Daudi onongo ngeyo ni mwolo pa Jehovah aye okonye me doko dit i Icrael pien En kule piny me konye. (Jab. 113:5-7) Man rom aroma ki wan bene. Jami ducu ma watye kwede Jehovah ‘omiyowa amiya’ bedi kit mabeco ma watye kwede, kerowa, ki dong mot me tic pire. (1 Kor. 4:7) Dano ma pire tek i wang Jehovah tere kene ni engat matidi tutwal ento kun nongo “dit.” (Luka 9:48) Kong wanenu kit ma man twere kwede.

8. Mwolo gudo kit ma waneno kwede dul pa Jehovah nining?

⁸ Mwolo pire tek ka wamito ni wabed ki yomcwiny i dul pa Lubanga kun wateno kor yub me kacokke. Me laporre, tam kong i kom Petra, ma odongo i paco ma jone Lucaden. Pien onongo mito timo jami i yo mamege, en oa woko ki i kacokke. I nge mwaki mapol, en dok ocako ribbe kacel ki kacokke. Kombeddi en tye ma cwinye yom i dul pa Jehovah dok teno kor yub me kacokke. Gin ango ma oloko tamme? En ocoyo ni: “Awinyo ni atye paco i dul pa Lubanga, pien amito dongo kit aryo ma pigi tego ma gin aye mwolo ki kica.”

9. Dano mamwol tero cam me cwiny ma Jehovah miyo nining, dok pingo man weko en pire bedo tek?

⁹ Ngat mamwol nyuto pwoc pi mic ducu ma a ki bot Jehovah, dok man kwako cam me cwiny ma en miniwa. Pi meno, ngat ma kumeno keto cwinye i kwano Baibul kun bene kwano Watchtower ki Awake! Calo lutic mukene mapol pa Jehovah, ngat ma kit meno romo loko doko kite me kwano cutcut bukke ducu ma pud kicwalogi woko nyen. Ka wanyuto ni wamwol dok bene wakwano Baibul kacel ki bukkewa ma gijenge i Baibul, ci wadongo i yo me cwiny dok Jehovah bitic kwedwa me tiyo tic mapol i ticce.​—Ibru 5:13, 14.

10. Wan watwero nyuto cwiny me bedo ngat matidi i kacokke nining?

¹⁰ Ngat moni bedo “dit” i yo mukene bene ka en kwo calo ngat matidi tutwal. Kacokke acel acel tye ki co ma kicimogi pi teko pa cwiny maleng me tic calo luelda. Gin gigoyo pulan pi yub  me cwiny calo cokke, wot woko i ticwa me pwony, ki dong limo omege ki lumege. Ka wanyuto cwiny me mwolo kun walubo gin ma luelda giwacciwa, ci wakonyo kacokke me bedo ki yomcwiny, kuc ki dong note. (Kwan Jo Ibru 13:7, 17.) Ka ce itye ka tic macalo laelda nyo lakony kor tic i kacokke, tika inyuto mwolo pi mot me tic ma Jehovah omini-ni?

11, 12. Kodi cwiny mene ma weko piwa bedo tek i dul pa Jehovah, dok pingo man mitte?

¹¹ Ngat ma kwo calo dano matidi en aye “dit,” nyo pire tek i dul pa Jehovah pien mwolone weko en tiyo pi Lubanga. Yecu ociko lupwonnyene me kwo calo ngat matidi pien jo mogo i kingi onongo gitye ki cwiny me awaka. Luka 9:46 wacci: “Pyem yam ocakke i kingi, ni anga ma i kingi ma loyo ki dit.” Mono wan bene waromo cako tamone ni luye luwotwa gitye oregedeng ka wapore kwedgi nyo ni rwomwa dit kato pa jo mukene ma pe gubedo luye? Jo mapol i lobo ni gitye ki cwiny me awaka ki dok giparo pigi kengi. Ma ka lubo kor jo ma gitye ki cwiny me awaka, omyero wabed jo mamwol. Ka watimo kumeno kun waketo timo miti pa Jehovah bedo mukwongo i kwowa, ci wacuko cwiny omegiwa ki lumegiwa.

¹² Tira ma Yecu omiyo ni myero wabed calo ngat matidi-ni konyowa me dongo kit me mwolo i yo ducu me kwowa nining? Kong dong wanenu kabedo adek ma pigi tego.

13, 14. Laco nyo dako twero mine me bedo ngat matidi nining, dok man kelo adwogi ango i nyomgi?

¹³ Inyom. Dano mapol i kare-ni gitamo pi twerogi keken dok gimito ni kilubi kadi bed ni turo twero pa jo mukene. Ngat ma mine ni etidi jolo tira ma Paulo omiyo ma lubbe ki cwiny ma myero wabed kwede. I waragane ma ocoyo bot Luroma, en owacci: “Myero dong watamu pi gin ma kelo kuc ki gin ma dongo niyewa i kinwa kekenwa.” (Rom. 14:19) Dano ma tere calo ngat matidi tute me timo gin ma kelo kuc i kin en ki ngat mo keken, makatone ngat ma en onyomme kwede.

¹⁴ Tam kong dok lok i kom galowang. Luot moni tamgi twero pokke ka odok i lok me galowang. Twero bedo ni laco maro bedo mere mot gang i cawa me yweyo kun kwano buk. Ento kitungcel dako maro cito ka cam i otel nyo limo luwote. Mono pe bedo ber pi dako me bedo ki woro ka cware tye ka nyuto mwolo kun miyo bot en dako kare me timo gin ma cwinye mito ma ka diyo cware me lubo mitine? Laco ma maro dakone kun keto deyo i kome pe pwoyo keken ka dakone tute matek me timo gin matir ento bene lubo mitine. Man biweko wat i kin luot moni doko matek adada ka ngat acel acel mine me bedo ngat matidi.​—Kwan Jo Pilipi 2:1-4.

15, 16. I Jabuli 131, Daudi ocuko cwiny Luicrael me timo gin ango?

¹⁵ I kacokke. I lobo pa Catan-ni, pol pa dano gikwo kwo man me acam cutu wek ocob mitigi. Ki botgi, diyo cwiny obedo balo kare dok gidag lok me kuro jami. Dongo cwiny me bedo ngat matidi konyowa me geno Jehovah. (Kwan Jabuli 131:1-3.) Adwogi maber ma bino pi mwolo kacel ki geno Jehovah miyo wawinyo agonya, kweyo cwinywa dok miniwa yomcwiny. Man aye oweko Daudi ocuko cwiny Luicrael  luwote me diyo cwinygi kun gikuro Lubangagi!

¹⁶ In bene iromo nongo kwe cwiny ka ibedo mwol kun i geno Jehovah. (Jab. 42:5) Oromo bedo ni imito tic macalo laelda wek i kony kacokke kun itiyo tic mapol. (1 Tem. 3:1-7) Me cobo man, mitte ni myero itim jami ducu ma twere wek cwiny maleng okonyi me dongo kit mabeco ma laelda myero obedo kwede. Ento ka cimo in me bedo laelda tye ka galle ka iporo ki pa jo mukene kono? Ngat matidi, ma diyo cwinye kun kuro mot me tic, bimedde ki tic pi Jehovah ki yomcwiny dok cwinye bibedo yom pi mot me tic mo keken ma kimiye.

17, 18. (a) Adwogi maber ango ma wanongo ka kitimiwa kica dok bene watimo kica bot jo mukene? (b) Tam ango ma kimiyo i Carolok 6:1-5?

¹⁷ Watwa ki jo mukene. Jo mukene ginongo kwayo kica tek adada. Ento, lutic pa Lubanga gidongo cwiny me bedo ngat matidi ka giye balgi dok gikwayo kica. Gin bene gitimo kica ka jo mukene gutimo bal i komgi. Kitungcel, awaka kelo apokapoka ki tele ento timo kica kelo kuc i kacokke.

¹⁸ Mitte bene ni myero wamwolle kun wakwayo kica ki cwinywa ducu ki bene wabako dogwa. Me laporre, oromo bedo ni wuwinye wun ki ngat mo, ento pi angola ngola mogo omiyo pe dong i cobo winyewu. Kadi bed ni waromo kok i kom ngat mukene ca, ento Lakricitayo ma tye ki cwiny me mwolo neno balle dok yeni ebalo.​—Kwan Carolok 6:1-5.

19. Pingo omyero wabed ki pwoc ni Baibul cuko cwinywa ni myero wadong cwiny me bedo ngat matidi?

¹⁹ Watye ki pwoc madit atika ni Ginacoya cuko cwinywa me dongo cwiny me bedo ngat matidi! Kadi bed ni i kine mukene tek tutwal me dongo kodi cwiny man, ento ka watamo i kom kit ma Jehovah dit katowa kwede dok ni en nyuto cwiny me mwolo, ci wan bene wabinyuto kit man mwonya tutwal-li. Ka watimo kumeno, ci wabibedo lutic ma pigi tek bot Jehovah. Pi meno, wan ducu myero watute wunu me kwo calo ngat matidi.