Yumi Mas Wokem Fasin Ya Blong Stap Daon
Yumi Mas Wokem Fasin Ya Blong Stap Daon
“Man we i daon moa long yufala evriwan, hem i hae moa long yufala.”—LUK 9:48.
YU TRAEM FAENEM ANSA BLONG OL KWESTIN YA
?Wanem i save givhan long yumi blong yumi wokem fasin ya blong stap daon?
?Man we i daon moa, hem i “hae moa” olsem wanem?
?Yumi soemaot olsem wanem se tingting blong yumi i stap daon, insaed long mared, insaed long kongregesen, mo wetem ol fren blong yumi?
1, 2. ?Jisas i tijim ol aposol blong hem long wanem samting? ?Hem i mekem olsem from wanem?
LONG yia 32, Jisas mo ol aposol blong hem oli stap long Galili. Ale, ol aposol oli stat blong rao se hu long olgeta i hae moa. Gospel blong Luk i tokbaot samting ya, i se: “Ol man blong Jisas oli stap rao se hu long olgeta i hae moa. Be taem Jisas i luksave tingting blong olgeta, hem i tekem wan pikinini, i mekem hem i stanap long saed blong hem. Nao hem i talem long olgeta se, ‘Man we i wantem ona long mi, nao i tekem pikinini ya, i stap lukaot gud long hem, i olsem we hem i tekem mi, i stap lukaot gud long mi. Mo man we i tekem mi, i stap lukaot gud long mi, hem i mekem long man ya we i sanem mi mi kam. Long fasin ya nao, man we i daon moa long yufala evriwan, hem i hae moa long yufala.’” (Luk 9:46-48) Jisas i mekem tingting blong hem i longfala blong givhan long ol aposol blong hem. Hem i wantem we oli kasem save se oli mas mekem tingting blong olgeta i stap daon.
2 ?Olsem wanem? ?Bighaf blong ol man Isrel long taem ya oli stap daon long narafala? Nogat. Wan buk i talem se, ol man Isrel oli ting se i impoten tumas blong save hu man we oli mas ona moa long hem. Mo tu, oltaem oli wari se maet oli no stap ona gud long man ya olsem we oli mas mekem. (Theological Dictionary of the New Testament) Jisas i wantem se ol man blong hem oli defren long ol narafala man ya.
3. (1) ?Man we i daon moa, hem i olsem wanem? ?From wanem i no isi blong gat fasin ya? (2) ?Wanem ol kwestin we bambae yumi tokbaot long stadi ya?
3 Grik tok we Baebol i tanem i kam “man we i daon moa,” i minim man we i no ting se hem i impoten, i no gat paoa, mo i no gat haenem. Man olsem, tingting blong hem i stap daon, hem i no leftemap hem wan. Jisas i talem long ol aposol blong hem se oli mas mekem tingting blong olgeta i stap daon olsem ol pikinini, mo oli no mas ting se oli save evri samting. Samting we Jisas i mekem long ol aposol long taem ya, i mas tijim yumi tu. Maet i had blong yumi mekem tingting blong yumi i stap daon, antap moa, taem samting i hapen we i traem yumi bigwan. Sin i mekem se yumi gat flas tingting, mo yumi traem winim narafala. Wol blong Setan tu i stap pulum yumi blong tingbaot yumi nomo, mo blong faet from samting we yumi wantem, mo blong bos long narafala. ?Wanem i save givhan long yumi blong yumi stap daon long narafala? ?Jisas i minim wanem taem hem i talem se man we i daon moa long narafala, “hem i hae moa”? ?Wetaem yumi mas soemaot se tingting blong yumi i stap daon?
‘WAES MO SAVE BLONG GOD I BIGFALA TUMAS’
4, 5. ?Wanem i save givhan long yumi blong yumi mekem tingting blong yumi i stap daon? Yu save tokbaot wan eksampol.
4 Sipos yumi tingbaot oltaem se Jehova i hae we i hae moa i bitim yumi, samting ya i save givhan long yumi blong yumi mekem tingting blong yumi i stap daon. Neva bambae yumi save evri samting we Jehova i save. (Aesea 40:28) Aposol Pol i tokbaot olsem wanem Jehova i hae we i hae, i talem se: “!Fasin blong God blong givhan long ol man, i gud tumas! !Waes blong hem, mo save blong hem i bigfala tumas, i bitim mak! Yumi no save talemaot olsem wanem hem i jusumaot ol rod blong hem. Yumi no naf blong save ol plan blong hem, se bambae oli kamtru olsem wanem.” (Rom 11:33) Pol i raetem ol tok ya 2,000 yia finis. Stat long taem ya kam kasem naoia, save blong yumi ol man i kam antap bigwan. Nating se i olsem, ol tok ya i tru yet. Nomata se save blong yumi i bigwan olsem wanem, be neva bambae yumi kasem save long olgeta wok mo tingting blong Jehova.
5 Yu traem tingbaot man ya Leo. * Hem i luksave se neva bambae hem i naf blong kasem save long evri samting we God i mekem raonabaot long yumi. Samting ya i givhan long hem blong i mekem tingting blong hem i stap daon. Taem Leo i yangfala, hem i laekem stadi long ol samting long skae mo wol, ale hem i tekem kos blong saens long skul. Be hem i luksave se ol saentis oli no naf blong kasem save long evri samting long skae mo wol. Ale, hem i tekem kos blong loa, mo hem i kam wan loea mo jaj. Biaen, Leo mo woman blong hem, tufala i stadi Baebol wetem ol Witnes blong Jehova. Tufala i bilif long trutok mo tufala i baptaes. Nating se Leo i skul gud, ?be wanem i givhan long hem blong i mekem tingting blong hem i stap daon? Hem i talem se: “Mi mi luksave se nomata hamas save yumi kasem long Jehova mo ol samting long skae mo wol, be i gat plante samting yet we yumi no save.”
6, 7. (1) ?Jehova i soemaot wanem nambawan eksampol blong tingting we i stap daon? (2) ?Tingting blong God we i stap daon i save mekem man i “hae moa” olsem wanem?
6 Sipos yumi tingbaot tu se tingting blong Jehova i stap daon, hemia i save givhan long yumi blong yumi mekem tingting blong yumi i stap daon. Yu traem tingbaot: Yumi “stap joen wetem God blong mekem wok blong hem.” (1 Kor. 3:9) Yes, Jehova, God ya we i hae we i hae, i wantem we yumi wok wetem hem. Hem i tinghae long yumi, taswe hem i givim janis long yumi blong yusum Tok blong hem, Baebol, blong talemaot gud nius long ol man. I tru se, Jehova nao i mekem ol sid blong trutok oli gru. Be hem i letem yumi blong yumi planem ol sid ya mo yumi putum wota long olgeta. (1 Kor. 3:6, 7) Taem Jehova i mekem olsem, hem i soemaot se tingting blong hem i stap daon. !Tru ya, eksampol blong hem i mas pulum yumi evriwan blong yumi stap daon!
7 Deved i luksave se tingting blong Jehova i stap daon, nao samting ya i gat bigfala paoa long hem. Hem i singsing long Jehova, se: “Hae God. Yu yu stap blokemgud mi, yu stap sevem mi. Fasin blong yu we yu stap givhan long mi [“we tingting blong yu i stap daon,” NW], hem i stap leftemap nem blong mi.” (2 Saml. 22:36) Deved i mekem ol bigbigfala wok long Isrel. Be hem i save se hem i naf blong mekem ol wok ya nomo, from we Jehova i glad blong lukluk hem mo givhan long hem. Jehova i mekem olsem from we tingting blong hem i stap daon. (Sam 113:5-7) Samting ya i sem mak long yumi. Ol gudfala fasin mo save we yumi gat, mo ol spesel wok we yumi mekem, Jehova nomo i givim long yumi. (1 Kor. 4:7) Taem Jisas i talem se man we i stap daon i “hae moa,” hem i min se Jehova i save yusum hem moa blong mekem wok blong hem. (Luk 9:48) Yumi traem tingbaot samting ya moa.
MAN WE I DAON MOA, HEM I “HAE MOA”
8. ?Blong wanem olgeta long ogenaesesen blong God oli mas gat tingting we i stap daon?
8 Ol man we tingting blong olgeta i stap daon, oli glad tumas blong stap long ogenaesesen blong Jehova mo blong sapotem kongregesen. Yu traem tingbaot yangfala woman ya Petra, we hem i gruap long wan famle we oli Witnes blong Jehova. Taem Petra i kam bigwan, hem i wantem folem prapa tingting blong hem, ale hem i lego kongregesen. Sam yia i pas nao hem i joen bakegen long kongregesen. Naoia, hem i glad blong stap long ogenaesesen blong Jehova mo blong sapotem kongregesen. ?Wanem i mekem se tingting blong hem i jenis? Hem i talem se: “Mi mi luksave se mi mas wokem tu bigfala fasin. Faswan, mi mas mekem tingting blong mi i stap daon, mo sekenwan, mi mas luksave se mi mi no save evri samting.”
9. ?Man we tingting blong hem i stap daon, i tingting olsem wanem long Baebol mo ol buk blong yumi? ?Jehova i tingbaot man ya olsem wanem?
9 Man we tingting blong hem i stap daon, i glad tumas long ol gudfala samting we Jehova i givim long ol man blong hem, wetem ol save we Jehova i givim long hem tu. Taswe, man olsem i ridim Baebol oltaem, i stadi long hem, mo i ridim ol Wajtaoa mo Wekap! Plante man blong Jehova oli ridim evri niufala buk we i kamaot, bifo we oli putum long kabod wetem ol narafala buk blong olgeta. Taem man i rid mo i stadi olsem, hem i soemaot se tingting blong hem i stap daon. Nao bambae hem i fren moa wetem God, mo God i save yusum hem moa long wok blong hem.—Hib. 5:13, 14.
10. Long kongregesen, ?yumi soemaot olsem wanem se yumi stap daon?
10 Man we i daon moa, hem i “hae moa” long wan narafala rod bakegen, i min se God i save yusum hem moa. Jehova i yusum tabu spirit blong putumap ol man oli kam elda long ol kongregesen. Ol man ya oli mekem plan blong ol miting mo wok blong prij, mo oli lukaot gud long kongregesen. Sipos yumi wok gud wetem ol elda, yumi soemaot se yumi stap daon. Nao yumi mekem se glad mo pis i stap long kongregesen, mo evriwan oli joen gud. (Ridim Hibrus 13:7, 17.) ?Olsem wanem? ?Yu yu stap mekem wok blong elda no man blong givhan? ?Yu yu glad long wok ya we Jehova i givim long yu? Sipos yes, hemia i soemaot se tingting blong yu i stap daon.
11, 12. ?Wanem fasin i save givhan long man blong i mekem wok we i gud moa long ogenaesesen blong Jehova? ?From wanem?
11 Man we i stap daon i save mekem wok we i gud moa long ogenaesesen blong Jehova, from we fasin ya i mekem se hem i wan gudfala man we God i save yusum long wok blong hem. Jisas i talem long ol disaepol blong hem blong oli stap daon long narafala, from we sam long olgeta oli gat tingting olsem ol flas man long taem blong olgeta. Luk 9:46 i talem se: “Ol man blong Jisas oli stap rao se hu long olgeta i hae moa.” ?Olsem wanem long yumi? ?Yumi tu yumi save stat blong ting se yumi gud moa long ol brata mo sista blong yumi mo ol narafala? Ol man blong wol oli flas mo oli tingbaot olgeta nomo. Be yumi mas defren long olgeta. Sipos tingting blong yumi i stap daon mo yumi mekem samting we Jehova i wantem fastaem long laef blong yumi, taem ol brata mo sista oli kampani wetem yumi bambae oli wantem traehad moa.
12 Taem yumi kasem save long advaes blong Jisas se yumi mas stap daon long ol narafala, yumi traehad blong soemaot tingting we i stap daon long evri samting long laef blong yumi. Bambae yumi tokbaot tri samting.
YUMI MAS TRAEHAD BLONG STAP DAON
13, 14. Man mo woman we tufala i mared, ?tufala i mekem olsem wanem blong stap daon? ?Fasin ya bambae i mekem wanem long mared blong tufala?
13 Insaed long mared. Plante man oli tingbaot olgeta nomo, oli no tingbaot narafala. Oli strong blong mekem samting we oli gat raet blong mekem, nating sipos oli spolem narafala. Be man we i stap daon, hem i defren. Hem i gat sem fasin we Pol i tokbaot long ol Kristin long Rom, taem i talem se: “Oltaem yumi mas strong blong folem ol fasin we i save mekem pis, mo we i save givhan long yumi, blong leftemap yumi.” (Rom 14:19) Man we i stap daon i traehad blong gat pis wetem olgeta man, antap moa, wetem man no woman blong hem.
14 Yu traem tingbaot samting we man mo woman i mekem blong spel. Ating samting we man i laekem blong mekem i defren long samting we woman blong hem i laekem. Maet man i laekem blong stap long haos mo ridim wan buk. Be maet woman blong hem i laekem blong go kakae long restoron no visitim ol fren. Man we tingting blong hem i stap daon, i tingbaot samting we woman blong hem i laekem, i no tingbaot samting we hem nomo i laekem. I isi moa blong woman i respektem wan man olsem. Woman we tingting blong hem i stap daon, i tingbaot samting we man blong hem i wantem, i no stap traem kasem samting we hem nomo i wantem. Woman olsem i gud tumas long tingting blong man blong hem, mo bambae man ya i lavem hem. Taem tufala tugeta i stap daon, tufala i lavlavem tufala moa.—Ridim Filipae 2:3, 4.
15, 16. ?Maeka i talem se yumi mas mekem wanem? ?Yumi save mekem samting ya olsem wanem long kongregesen?
15 Insaed long kongregesen. Plante man blong wol oli ting se oli mas kasem samting we oli wantem naoia nomo. Oli no mekem tingting blong olgeta i longfala, mo oli no wantem wet nating. Taem yumi stap daon, i isi moa blong wet long Jehova mo blong trastem hem. (Ridim Maeka 7:7.) Sipos yumi mekem tingting blong yumi i stap daon mo yumi wet long Jehova, bambae yumi kasem blesing. Bambae yumi no fraet mo wari, be bambae yumi harem gud nomo. Olsem Maeka, yumi mas mekem tingting blong yumi i longfala mo wet long God.
16 Yes, yu save harem gud sipos yu mekem tingting blong yu i stap daon blong wet long Jehova. (Sam 42:5) Maet yu wantem mekem wok blong elda, blong yu save givhan moa long kongregesen. (1 Tim. 3:1-7) Fastaem, i gud yu traehad blong wokem ol fasin we elda i nidim. Tabu spirit i save givhan long yu blong yu gat ol fasin ya. ?Be olsem wanem sipos yu mas wet longtaem moa i bitim sam narafala? Man we i stap daon, hem i mekem tingting blong hem i longfala, mo i glad blong wet blong kasem wok long kongregesen. Man olsem i glad blong gohed nomo blong mekem wanem we hem i naf blong mekem long wok blong Jehova mo insaed long kongregesen.
17, 18. (1) Sipos yu fogivim narafala mo yu askem long narafala blong i fogivim yu, ?wanem gudfala samting i save kamaot? (2) ?Ol Proveb 6:1-5 i givim wanem advaes?
17 Wetem ol fren blong yumi. Plante man oli harem se i had blong oli talem sore long narafala. Be ol man blong God we oli traehad blong stap daon, oli talemaot mastik blong olgeta mo oli askem narafala blong i fogivim olgeta. Mo tu, oli rere blong fogivim narafala taem i mestem. Taem ol man oli gat flas tingting, i gat plante bigfala trabol i kamaot long medel blong olgeta. Be taem oli rere blong fogivim narafala, i gat pis long kongregesen.
18 Samtaem, yumi mas mekem tingting blong yumi i stap daon blong talem sore wetem fulhat blong yumi. Maet yu mekem wan promes long narafala, nao wan samting i hapen we yu no save blokem, nao yu no moa save holem promes ya. Nating se narafala i gat fol tu long bisnes ya, be bambae yu no blemem hem. Sipos tingting blong yu i stap daon, bambae yu tingbaot mastik blong yu nomo, mo bambae yu talem sore from.—Ridim Ol Proveb 6:1-5.
19. ?From wanem yumi glad blong folem advaes blong Baebol se yumi mas stap daon?
19 Yumi glad tumas we Baebol i talem se yumi mas wokem fasin ya blong stap daon. Samtaem i no isi blong mekem tingting blong yumi i stap daon. Yumi mas tingbaot se Jehova i hae we i hae moa bitim yumi. Mo yumi mas tingbaot tu se tingting blong hem i stap daon. Nao bambae yumi tu yumi wantem soemaot nambawan fasin ya. Olsem nao, Jehova i save yusum yumi moa blong mekem wok blong hem. Taswe, yumi evriwan i mas mekem bes blong yumi blong stap daon.
[Futnot]
^ par. 5 Mifala i jenisim sam long ol nem ya.
[Kwestin]
[Tok blong pija long pej 19]
Jehova i soemaot se hem i tinghae long yumi, taem hem i givim janis long yumi blong talemaot gud nius
[Tok blong pija long pej 22]
?Wanem ol janis we yu yu gat blong stap daon?
