1, 2. Ka larufudahabei Hesusu houn lani apostolugu, ani ka uagu?

LIDAN irumu 32, dan le aniha lan Hesusu Galiléa, aba hagumeserun apostolugu asigeneha hámagua. Afuranguagüda lumuti Éwanheliu le labürüdübei Lúkasi ka lan asuseredubei: “Ábati hagumeserun disipulugu asigeneha hámagua luagu ka lan wéirigutimabei hadan; kei lasubudiruni Hesusu hasaminan, aba lanügün aban irahü lubadun, aba lariñagun houn: ‘Le eresibiruti aban irahü keisi irahü le lidan niri, resibi lumutina; le eresibirutina, resibi lumuti giñe le óunahabalina. Le lubeiti ǘnabugutimabei hidan, ligía wéirigutimabei’” (Luk. 9:46-48). Gaguraasunti meha Hesusu lun líderaguniña apostolugu gunfurandei mosu lan meha ǘnabugu hamá ani adüga lumuti meha lau furangu.

² Úarati meha san igaburi le larufudahabei Hesusu houn lani apostolugu luma igaburi le meha kamanibei hadan huríu lánina furumiñeti sígulu? Ariñagatu aban líburu subudiwatu libügürü hasaminan huríu ha lánina dan ligía: “Lidan meha furumiñeguarügü dan, asigenehatiña meha gürigia luagu ka lan súdinitimabei hadan, ani aba meha katei súdiniti lichugúniwa uéiriguni lun kada gürigia ani adügati meha katei le lun hadiheridun gürigia estodi” (Theological Dictionary of the New Testament [Lila dimurei to ayanuhaboun luagu Bungiu lánina Iseri Daradu]). Ligía lubeiti lariñagunbei Hesusu houn lani apostolugu lunti lan amu lan ligaburi hóuserun hawéi gürigia ha hadaaniwagubaña.

3. a) Ka mini lubéi lóuserun aban gürigia kei le “ǘnabugutimabei”, ani ka uagu anihein lubéi dan hénrengu lan? b) Kaba burí álügüdahani wóunaba?

³ Dimurei güriegu le ásügüragüdüwabei kei “ǘnabugutimabei” yúsuati meha lun ladimurehóun luagu aban gürigia le ǘnabugubei, manaagunti lungua, úati súdini lan, le manarimebei laganbahóun luagu ani ua ligía ubafu luma. Yúsuti meha Hesusu aban irahü lun larufudahan houn lani  apostolugu mosu lan ǘnabugu hamá ani manaagun hagíame houngua, huuti eweridihani le líchugubei houn kristiánugu inarünitiña uguñe weyu, ítara kei meha lahuudun houn kristiánugu ha meha awinwandubaña lidan furumiñeti sígulu. Gama lumoun, anihein dan hénrengu lan woun lun wóuserun kei le “ǘnabugutimabei”. Kei gafigoun wabéi gayarati lanügüniwa anaaguni unguaü lun busén wamá lun súdinitima wamá hawéi ha híbiri. Anhein wáyeiha igaburi le harufudubei gürigia lánina hásügüragun hámagua, gayarabei ladügün lun íñugu lan wanaagun woungua, hínsiñe lan woun werederun ageindagua o lun busén wamá hadügüni gürigia sun le wariñagubei. Kaba íderaguawa lun wóuserun kei le “ǘnabugutimabei”? Ka idan ‘wéirigutima’ lan gürigia le óuserubei kei le “ǘnabugutimabei”? Ka burí katei lidan wabagari ídanbei mosu lan wáfaagun lun ǘnabugu wamá? Ariha waméi.

4, 5. Ka katei gayarabei líderaguniwa lun ǘnabugutima wamá? Ru humá aban hénpulu.

⁴ Líderagubadiwa wasaminarun luagu ni kata lan wagía dan le konpararügua wamá woungua lumoun luéirigun Heowá lun ǘnabugu wamá. Arufudatu Bíbülia luagu ‘magumuchadi lan lichú lau’ (Isa. 40:28). Afuranguagüda lumuti Pábulu luéirigun Heowá lau burí dimurei le: “Lueirin lareini Bungiu, [‘lisubudin’, NM] luma lichú lau! Siñati wasubudiruni lisaminan, siñá gunfuranda wamani lémeri” (Rom. 11:33). Inarünimémegili le lariñagubei apostolu Pábulu, íbini furendeihaña lan gürigia saragu katei lidan bián-milu irumu le ásügürübei lúmagiñe labürüdǘn dimurei le. Meberesenga átirihali lan katei wasubudirun, ǘnabuguti wasandiragun woungua dan le gunfuranda wamani luagu anihagua lan saragu katei lun wafurendeiruni luagu Heowá, luagu sun le adüga láalibei luma luagu ligaburi lóuserun.

⁵ Dan le gabaroun wamani luagu siñabei lan gunfuranda wamani lémeri Heowá sunsuinagubei, íderagua lumutiwa lun waríagun woungua kei le “ǘnabugutimabei”. Ligía asuseredubei lun Leo, * wéiriti meha línsiñe lun lakutihan luagu siensiasi dan le meha nibureingili. Kei meha weiri lubéi labusenrun lakutihani katei burí le siélubei luma le ubouagubei, aba laturiahani siensiasi le aturiahabalin sun burí katei le siélurugubei ábati lariñagun: “Aba níchugun fe luagu siñabei lan gunfuranda wamani sun katei le siélurugubei luma le ubouagubei sunsuinagubei láurügü afuranguagüdüni le híchugubei aturiahatiña siensiasi uguñe weyu”. Ligíati desidírü lubéi laturiahan lun awogóu lan. Ani chülüti lun aban lan awogóu ani nadagimein ligía kei aguseragüdüti. Lau lásügürün dan, aba laturiahanu Leo tuma lani weiriou Bíbülia hama gefentiña luagu Heowá, ánharatiña lun inarüni ani aba hederegeruni habagari lun Bungiu. Lau sun katei le winwan láalibei Leo, ka íderagubalin lun  lóuserun kei le “ǘnabugutimabei”? Óunabati lau ichouruni: “Níchugun fe luagu meberesenga lan átiriñein lan wakutihan luagu Heowá luma luagu katei le siélubei luma le ubouagubei súnwandan gíbebei lan lunti wasubudiruni”.

6, 7. a) Ka lubuidun hénpulu lánina ǘnabuguni larufudubei Heowá woun? b) Ida liña ladügün lǘnabugun Heowá lun wéirigu wamá?

⁶ Wasubudiruni luagu íbini lan Heowá ǘnabuguti, íderagua lumutiwa giñe lun ǘnabugu wamá. Haritagua waméi luagu wawadigimariduña lan “kei ídehatiña luma Bungiu” (1 Ko. 3:9, NM). Lau sun hanarime lan luéirigun Heowá, arufudati inebe wamá lun lau líchugun chansi woun lun wayusurunu Bíbülia, to Lererun lun wagunfulirun lau wani ministeriu. Íbini Bungiu lan aweiridagüdübalin nadü le wábunagubei ani túgua waméi, ru lumuti lubuidun chansi woun lun wawadigimaridun luma (1 Ko. 3:6, 7). Ma lubuidun hénpulu! Chóuruti ínchaha lániwa wasubudiruni luagu ǘnabugu lan Bungiu lun wóuserun kei le “ǘnabugutimabei”.

⁷ Gániti lǘnabugun Heowá aban óunwenbu efekütu luagu Dawidi. Ligía leremuhanbei: “Bóunigirubadina lun nasalbarun, ani adügati bǘnabugun lun wéirigu nan” (2 Sam. 22:36, NM). Gunfuranda lumuti meha abürühati Sálumu le, seremei lan lǘnabudaguagüdün Bungiu lungua libihinbei furumiñeguarügü uéiriguni Ísüraeli, ladüga lélemuchun Bungiu lun larihin luagun (Sal. 113:5-7). Ligiaméme asuseredubei woun. Anihein funagia somu igaburi, iarani o buligasion súdiniti wama le meresibirun wabéi lúmagiñe Heowá? (1 Ko. 4:7.) Kati uagu ‘wéirigutima’ lubéi gürigia le óuserubei kei le “ǘnabugutimabei”? Ladüga húutimati lan lidan leseriwidun lun Heowá (Luk. 9:48). Ráramagua wamá asaminara luagu katei le.

8. Ida liña gani lan ǘnabuguni efekütu lidan ligaburi wóuserun lidan lóundarun Heowá?

⁸ Súdiniti ǘnabugu wamá lun gunda wamá lidan lóundarun Bungiu luma lun wídehan lidan damuriguaü. Ítara liña larufuduni tásügürün Petra, aban nibureintu to aweiriduboun haganagua tiduheñu ha gefentiña luagu Heowá. Kei meha le busén tubéi tadügüni katei luagu tigaburi aba tadisedun luéi damuriguaü kristiánu. Lau lásügürün dan, ábaya tabasihan lidoun adamuridaguni, guentó gúndaatu lau lílanayaaru lan damuriguaü ani ídeha tuguya lidan. Ka idan tasansira? Ariñagatu: “Lun gunda nan lidan lóundarun Bungiu, mégeitina meha gunfuranda nan luma narufuduntima bián igaburi: ǘnabuguni luma nasubudiruni lébeha niyarati adüga”.

9. Ida liña larihinu kristiánu le ǘnabugubei agumeiraguagüdüni to leresibiruboun, ani ka uagu adüga lubéi igaburi le lun húutima lan lun Bungiu?

⁹ Aban kristiánu le ǘnabuguti teinki lumuti Heowá tídangiñe sun lanigi luagu sun le líchugubei lun kéiburi ídemuei le leresibirubei lúmagiñe lun lafurendeirun luagu. Aturiaha lumutu giñe Bíbülia estodi ani aliihaloun Garüdia Atalaya tuma ¡Despertad! Ítara kei hadüga amu lubúeingu Bungiu ha úaraguatiña, lubaragiñe lareidunu agumeiraguagüdüni to iseri aliiha lumutu furumiñe. Dan lurufudun geteingiradi lan ani ǘnabugu ligía lau laliihanu ani aturiahaloun agumeiraguagüdüni tídangiñetu Bíbülia, awanseti lidan leseriwidun lun Bungiu, ábati layusurunitima Heowá gürigia le lidan leseriwidúniwa lun (Ebü. 5:13, 14).

10. Ida luba wóuserun kei le “ǘnabugutimabei” lidan damuriguaü?

¹⁰ Ariha wamá ámuya manera le ídanbei larihúa aban gürigia kei le “wéirigutimabei” ladüga óuseragua lan lungua kei le “ǘnabugutimabei”. Iridúatiña wéiyaaña lidan afiñeni ha lídanbaña sun damuriguaü lau ladundehan sífiri sandu. Hagía adügübaña aransehani lun ladügǘn adamuridaguni, lun lapurichihóuniwa luma lun habisidahóun íbirigu hábiñe lun lichugún dǘgüdaguaü houn. Dan le ǘnabugu wamá ani ídeha wagía hama lun hagunfuliruni hawadigimari, ídehatiwa lun ñein lan ugundani, darangilaü  luma úarani lidan damuriguaü (aliihoualá Ebüréu 13:7, 17). Ánheinti ru laali lubéi Heowá chansi woun lun weseriwidun kei wéiyaaña lidan afiñeni o kei ídehatiña lidan damuriguaü, lunti ǘnabugu wamá ani geteingiradi wagíame.

11, 12. Kaba adüga lun gebegitima wamá lidan lóundarun Heowá, ani ka uagu?

¹¹ ‘Wéirigutimati’ gürigia le óuserubei kei le “ǘnabugutimabei” —mini lan lira, gebegitimati lan lidan lóundarun Heowá— lugundun adügati ǘnabuguni le larufudubei lun buidu lan ani hu ligía keisi lubúein Bungiu. Mosu meha láguyuguagüdüni Hesusu saragu wéiyaasu houn lani disipulugu lunti lan ǘnabugu hamá ladüga aba meha háyeihani fiú hádangiñe anaaguni unguaü le meha hawagubei gürigia lidan dan ligía. Según larufuduni Lúkasi 9:46, gumesetiña disipulugu “asigeneha hámagua luagu ka lan wéirigutimabei hadan”. Agia san wagía? Gayarati hamuga san wagumeserun asaminara luagu buídutima wamá hawéi wíbirigu lidan afiñeni o hawéi amu gürigia? Hibe-agei gürigia ha lídanbaña ubóu le óuseratiña lau anaaguni unguaü luma lau gimugaü. Lunti amu lan ligaburi wóuserun hawéi hawuyeri gürigia ha lau ǘnabugu wamá. Anhein wadüga ítara, ru wameime le labusenrubei Heowá lidan furumiñeti lúgaaru, buídubei lani wamadagua efekütu hawagu wíbirigu.

¹² Eweridihani le líchugubei Hesusu luáguti wóuserun kei le “ǘnabugutimabei” ínchaha lumutiwa saragu lun wáfaagun lun ǘnabugu wamá lidan sun le wadügübei lidan wabagari. Adimureha wamá luagu ǘrüwa lídangiñe.

13, 14. Ida luba hóuserun maríeitiña kei le “ǘnabugutimabei”, ani kaba resultóu lanüga igaburi le lidan hamarieidun?

¹³ Lidan hibagari kei maríeiti. Uguñe weyu, hanarimeti hadiheridun saragu gürigia lun habihini le yuubei houn ani meberesentiña anhein mosu lubéi hasufuriragüdün amu lun habihini. Ánheinti gürigia le ǘnabugubei, áyeiha lumuti igaburi le lariñagubei Pábulu lunti lan wáyeihani: “Ítarameme wamá lubeiti áluaha lun lidan lan darangilaü sun katei, lun gayara lan wíderagun woungua lun wederebugudun lidan wafiñen” (Rom. 14:19). Áfaaguatiña gürigia ha óuserubaña kei le “ǘnabugutimabei” lun ñein lan darangilaü lidan ligaburi hanaagun houngua hama sun gürigia, túmatima o lúmatima gürigia le hínsiñebei houn, le úmabei hamarieida.

¹⁴ Aban hénpulu, másiñati ámuñegueinarügüti lan isebáhari le hínsiñebei houn kada aban hádangiñe maríeitiña. Másiñati himei lan maríeiti lerederun múnada aliiha aban líburu, ánhounti lani weiriou másiñati himei tan táfuridun eiga o ebeluha hamoun hamadagu. Ménrengutimabei tun lun inebehabu tan lun tani weiriei anhein tariha luagu arufuda lan ǘnabuguni, ani anhein asaminara luagu le hínsiñetimabei tun lubaragiñe lerederun asaminara luágurügü le hínsiñetimabei lun. Ani hínsiñetimaboun lun inebetima tuguyame lun anhein lariha luagu mafuudun tan lun tibihini le tabusenrubei, lubaragiñe lira, saminatu luagu le hínsiñebei lun. Dan le áfaagua hamá hagía biángubei lun hóuserun kei le “ǘnabugutimabei”, aba lederebugudun hamarieidun (aliihoualá Filipuna 2:1-4).

15, 16. Ka lariñagubei Dawidi lidan Sálumu 131 lunti lan wadügüni, ani kaba lani katei le efekütu lidan ligaburi wóuserun lidan damuriguaü?

¹⁵ Lidan damuriguaü. Lidan ubóu gíbetiña gürigia ha asaminarubaña luágunrügü habihini le habusenrubei ani busén hamuti lau lóufudagun. Fureseti heferidiruni haguraasun ani siñaguatiña houngua hagurabahan. Ánheinti wagía, íderagua lumutiwa wóuserun kei le “ǘnabugutimabei”, lun wagurabahani le lunbei ladügüni Heowá (aliihoualá Sálumu 131:1-3). Ánhawa ǘnabugu ani gaguraasun wagíame, weresibiruba saragu buiti: ichouruni, dǘgüdaguaü, ugundani luma abinirúni lúmagiñeti Heowá. Ligía gayara lubéi gunfuranda wamani ka lan meha  uagu lariñaga Dawidi houn ísüraelina lun hagurabahani líchuguni Heowá lúhabu.

¹⁶ Gayarati giñe hibihin dǘgüdaguaü lídangiñe hagurabahani le lunbei ladügüni Heowá (Sal. 42:5). Másiñati ayumaha humá haganwoundagüdüni heseriwidun lidan damuriguaü, ligíati aünha lubéi áfaagua lun heseriwidun lidan damuriguaü kei wéiyaali lidan afiñeni o kei ídehati (1 Tim. 3:1-7). Menefánti, mosu lan hadügüni sun le hiyaraati lun líderagunün sífiri sandu arufudeitima igaburi le mégeiwabei. Gama lumoun, ánheinti mosu lubéi hagurabahan sügǘ hau amu? Anhein ítara hiña lubéi kei le “ǘnabugutimabei”, hagurabahaba lau gurasu ani hasigiruba eseriwida lau ugundani lun Heowá, ani lauba sun hugundan hadügei furumiñeguarügü wadagimanu le ichugúti hun.

17, 18. a) Ka buiti asagarúbei lídangiñe lamuriahóuniwa ferudun luma dan le aranseñu wamá lun feruduna wamaniña amu? b) Según Ariñawagúni 6:1-5 ka lunbei wadügüni?

¹⁷ Lidan ligaburi hanaagun hungua hama amu. Güreweiti houn besafu gürigia hamuriahan ferudun. Ánhañati lubúeingu Bungiu arufudatiña ǘnabugu hamá lau hánharun luagu chara hamá ani amuriaha hagía ferudun. Aranseñuhaña giñe lun feruduna hamaniña amu dan le hachararun houn. Adügati anaaguni unguaü lun hafanreinragun gürigia luma lun hageindagun hámagua, gama lumoun dan le feruduna wamaniña amu adügati lun ñein lan darangilaü hama sun wíbirigu.

¹⁸ Arufudatiwa giñe wagía kristiánugu ǘnabuguni dan le lunti lan wamuriahan ferudun tídangiñe sun wanigi ladüga siñá lan wagunfulirun lau somu füramasei le wadügübei o somu katei le uágubei wariñaga wadügübei lan. Íbini anhein mámarügüñadiwa lubéi wagía gadurun, ánhawa ǘnabugu, mamahanbadiwa luagu gadurun wamá lidan (aliihoualá Ariñawagúni 6:1-5).

19. Ka uagu teinki wabalin amisuraha tániwa Lererun Bungiu lun wóuserun kei le “ǘnabugutimabei”?

¹⁹ Ma lueirin eteingiruni le wawagubei luagu tamisurahaniwa Lererun Bungiu lun wóuserun kei le “ǘnabugutimabei”! Íbini anihein lan dan hénrengu lan, anhein gabaroun wamá ni kata wamá dan le konpararügua wamá woungua luma luéirigun Bungiu le adügübalin sun katei ani gebegi ligía ǘnabuguni le larufudubei woun, gayarabei warufuduni lubuidun igaburi le. Ítarati húutimabadiwa ani gebegitimabadiwa giñe lun Heowá. Ligía lubeiti, óusera wamá súnwandan kei le “ǘnabugutimabei”.