Ámááraatá Óm Eáni Ekiekin Emén mi Kis
Ámááraatá Óm Eáni Ekiekin Emén mi Kis
“Iö a kis me leimi meinisin, ina i ätewe a lap mwemi meinisin.”—LUK. 9:48.
KA TONGENI KÚNA PÉLÚWER?
Met epwe tongeni álisikich ach sipwe tipetekison?
Lón met sókkun napanap emén mi kis epwe “lap”?
Ifa usun sipwe pwáraatá tipetekison lón pwúpwúlú, mwichefel, me lón ach riri ngeni ekkewe ekkóch?
1, 2. Met Jesus a áiti ngeni ekkewe aposel? Pwata?
IEI met a fis lón ewe ier 32. Jesus me néún kewe aposel ra nóm lón ewe fénú Kalili. Ekkewe aposel ra poputá le ánini ika ié a lap me leir. Lukas ewe chón makkeei eú me lein ekkewe Puken Kapas Allim a apwóróusa met a fis: “Iwe, a fis eu aninifengen lefilen ekewe chon kaiö won iö epwe lap me leir meinisin. Jesus a silei met ra eäni ekiek, iei mine a angei eman semirit o aütai lepekin. Iwe, a üreniir, ‘Iö a etiwa ei semirit fän itei, a etiwaei. Nge iö a etiwaei a pwal etiwa ewe eman a tiniei. Pun iö a kis me leimi meinisin, ina i ätewe a lap mwemi meinisin.’” (Luk. 9:46-48) Jesus a mosonottam le ákkálisi ekkewe aposel le weweiti lamoten ar repwe tipetekison.
2 Itá ewe mettóch tipetekison Jesus a ereni néún kewe aposel repwe eáni, a tipeeú ngeni ekiekin lape ngeni ekkewe chón Jus lón ena fansoun? Aapw. A unusen sókkofesen. Eú puk itan Theological Dictionary of the New Testament, a apasa pwe a fókkun lamot ngeni ekkewe chón Jus ar repwe silei ié a tekia me leir, me ra kan ekkekieki ika ewe súfél ra pwári a fichiiti tekian ewe emén. Jesus a mochen pwe néún kewe chón káé repwe sókkóló seni ekkewe aramas.
3. (a) Met weween ach sipwe eáni féfférún emén mi kis, me pwata a tongeni weires ngenikich? (b) Ikkefa ekkewe kapas eis repwe pélú me lón ei lesen?
3 Lón kapasen Krik ewe kapas “kis” a weneiti emén mi lamot kisikis are emén ese wor wisan are an nemenem. Ena sókkun aramas a tipetekison me ese ekieki pwe pwisin i a wor lamotan. Jesus a áiti ngeni néún kewe aposel lamoten ar repwe tipetekison me eáni ekiek tekison usun semirit. A lamot ekkewe Chón Kraist mi enlet ikenái ar repwe lefareni ena lesen Jesus a áiti ngeni néún kewe aposel. Eli epwe weires ngenikich ach sipwe pwári tipetekison, nge ákkáeúin lón ekkóch fansoun. Ach sise unuséch a efisi ach sipwe lamalam tekia me ach kútta itetekiach. Pwal eú, án Satan ei ótót a etipetipakich ach sipwe ekieki chék pwisin kich, sou efisi fitikoko, me mochen nemenaló mettóch. Met epwe álisikich ach sipwe tipetekison? Met weween alon Jesus atun a erá pwe emén mi kis “ina i ätewe a lap”? Ineet atun a lamot sipwe pwáraatá tipetekison?
“A IFAN ME WATTEN WÖÜN KOT . . . ME ALOLOLUN AN TIPACHEM ME SILELAP!”
4, 5. Met epwe tongeni amwékútúkich le tipetekisonóló? Áweweei.
4 Eú mettóch epwe álisikich ach sipwe tipetekisonóló, ina ach chechchemeni pwe Jiowa a kon tekia senikich. Ren enletin, ese wor emén a tongeni silei meinisin minne Jiowa a silei. (Ais. 40:28) Iei met ewe aposel Paulus a makkeei usun amwararen tekian Jiowa: “A ifan me watten wöün Kot! A ifan me alololun an tipachem me silelap! Iö a tongeni awewei an apwüng? Iö a tongeni weweiti an kewe föför?” (Rom 11:33) Seni ewe atun Paulus a makkeei ekkena kapas 2,000 ier lóóm, aramas ra fen káé chómmóng mettóch. Nge a chúen pwúng minne a makkeei. Ese lifilifil ifa úkúkún met sia silei, nge sisap fókkun úkútiw le káé usun Jiowa, férian kewe, me ekiekin kewe.
5 Áwewe chék, ren pwóróusen Leo, an mirititi pwe ese tongeni unusen silei usun férien Kot kewe, ina met a álisi an epwe tipetekisonóló. * Lealúwélún Leo a fókkun sani le káé pekin science. A mochen epwe weweiti mettóchun fán láng ren úkúkún an tufich. Iwe a káé usun lón sukul. Nge seni minne a káé, a mirititi pwe science ese tongeni álisi aramas le unusen weweiti mettóchun fán láng me ei fénúfan. Iwe a ekkesiwili an káé pekin science ngeni pekin allúk. Ló, ló, ló, a wiliti emén lawyer, mwirin emén sou kapwúng. Iwe mwirin, i me pwúlúwan we ra káé Paipel ren Chón Pwáraatá Jiowa, etiwa ewe enlet me papataiseló. Ikaamwo Leo a fiti sukul tekia, nge met a álisi le pwáraatá tipetekison? A erá pwe an “mirititi pwe ese lifilifil ifa úkúkún ach silei usun Jiowa me mettóchun fán láng nge mi chúen chómmóng met sipwe káé.”
6, 7. (a) Ifa ewe leenien áppirú mi fókkun múrinné usun tipetekison Jiowa a ngenikich? (b) Ifa usun án Kot tipetekison a tongeni efisi án emén “lap”?
6 Ach chechchemeni pwe pwisin Jiowa a pwári tipetekison, ina met epwe pwal álisikich le tipetekison. Ekieki usun ei mettóch: “Kich sia akkangangfengen me Kot.” (1 Kor. 3:9, NW) Anchangei ena! Jiowa Kot ewe mi Unusen Tekia a asamolukich ren an mut ngenikich ach sipwe néúnéú an we Kapas ewe Paipel lón ewe angangen afalafal. Ikaamwo Jiowa i ewe a efisi mááritáán ewe pwikil, nge a mut ngenikich ach sipwe wisen fótukatiw me achéchénú. (1 Kor. 3:6, 7) Ren ei, Kot a isetiw eú leenien áppirú mi fókkun múrinné usun tipetekison fán itach. Pwúngún, án Jiowa leenien áppirú epwe álisi emén me emén leich le pwári tipetekison!
7 Án Kot tipetekison a kkúú letipen Tafit. A kél ngeni Jiowa: “Ai Samol mi Lapalap, ka amanauaei o epeti seniei feiengau, om alilis [“tipetekison,” NW] a atekiaeitä.” (2 Sam. 22:36) Tafit a silei pwe an itetekia lón Israel a chék fis pokiten án Jiowa pwisin átekisonatiw pwe epwe netiw me álisi i. (Kölf. 113:5-7) Pwal ina usuch. Ese lifilifil napanapach kewe, tufichich kewe, me wisach mi aúchea nge ra feito seni Jiowa. (1 Kor. 4:7) Emén mi tipetekison i mi “lap,” pún a lapóló aúchean lón an angang ngeni Jiowa. (Luk. 9:48) Sipwe ppii ifa usun.
‘IÖ A KIS ME LEIMI INA I A LAP’
8. Pwata a lamot chókkewe lón án Jiowa mwicheich repwe tipetekison?
8 Chókkewe mi tipetekison ra pwapwa lón án Kot we mwicheich me álisatá angangen lón ewe mwichefel. Áwewe chék, ren pwóróusen emén fépwúl itan Petra a mááritá lón eú familien Chón Pwáraatá Jiowa. Nge a kan féfféri mettóch lón pwisin mochenin me ló seni ewe mwichefel. Fitu ier mwirin, a pwal liwinsefáliti ewe mwichefel. Iei, i a pwapwa le nónnóm lón án Jiowa we mwicheich me álisatá mwékútúkútún ewe mwichefel. Ifa usun a siwil napanapan? A apasa, “Ekkewe ruu napanap a kon lamot upwe weweiti me ámááraatá, ai tipetekison me ekiek tekison.”
9. Met meefien emén mi tipetekison usun ewe Paipel me néúch kewe puk? Pwata a lapóló aúchean ena emén pokiten an tipetekison?
9 Emén aramas mi tipetekison a enletin kilisou ren ekkewe mettóch Jiowa a awora, pachelong ekkewe mwéngé lón pekin lúkú. Ina popun emén mi tipetekison a káéfichi Paipel me ákkálleani ekkewe Leenien Mas. Chómmóng néún Jiowa kewe chón angang ra álleani eú me eú ekkewe mineféén puk me mwen repwe waalong lón ar kewe kapetin puk. Ika sia pwáraatá pwe kich aramas mi tipetekison me kilisou ren ach ákkálleani me kákkáé néúch kewe puk, iwe, epwe péchékkúleló ach riri ngeni Kot, me i epwe pwal tongeni néúnéú kich lón pwal ekkóch an angang.—Ipru 5:13, 14.
10. Ifa usun sipwe tongeni pwáraatá tipetekison lón ewe mwichefel?
10 Iei pwal eú weween án emén mi tipetekison epwe emén mi “lap.” Jiowa a áeá an we manaman mi fel le filatá ekkewe mwán lón iteiten eú me eú mwichefel pwe repwe wiseni ewe wis elter. Ekkeei mwán ra wisen akkóta ekkewe mwich me ewe angangen afalafal me túmúnú ewe mwichefel. Lupwen sia pwáraatá tipetekison ren ach tipemecheres le angangfengen me ekkewe elter, sia álisatá pwapwaan, kinamween me tipeeúin unusen ewe mwichefel. (Álleani Ipru 13:7, 17, TF.) Ika en emén elter are chón álillis lón ewe mwichefel (ministerial servant) ka kilisou fán tipetekison ren wisom we me ren Jiowa?
11, 12. Menni napanap epwe alapaaló aúcheach ngeni án Jiowa we mwicheich, me pwata?
11 Emén mi tipetekison i emén chón angang ngeni Kot mi múrinné me aúchea, iwe, a lapóló aúchean lón án Jiowa we mwicheich. Pokiten ekkóch me lein néún Jesus kewe chón káé ra eáni ekiekin ekkewe aramas mi lamalam tekia lón ena fansoun, iwe, a lamot Jesus epwe ákkáchema ngeniir ar repwe pwári tipetekison. Lón Lukas 9:46, a apasa: “A fis eu aninifengen lefilen ekewe chon kaiö won iö epwe lap me leir meinisin.” Sap pwe sia pwal tongeni eáni ena esin ekiek pwe sia múrinné seni pwiich kewe are ekkewe ekkóch? A lamot napanapach epwe sókkóló seni napanapen ekkewe chón fénúfan mi lamalam tekia me ekieki chék pwisin iir. Ika sia tipetekison me akkomwa letipen Jiowa, pwiich kewe repwe péchékkúletá ren ar chiechi ngenikich.
12 Án Jesus kapasen fén pwe sipwe eáni féfférún emén mi kis, a wesewesen tongeni achchúngúkich le pwári tipetekison lón kinikinin manawach meinisin. Iei sipwele pwóróus wóón úlúngát me leir.
ACHOCHO ÚKÚKÚN ÓM TUFICH LE PWÁRI TIPETEKISON
13, 14. Ifa usun emén mwán pwúpwúlú are fin pwúpwúlú epwe pwári tipetekison? Ifa usun ena mettóch a tongeni álisi ar ririfengen?
13 Lón pwúpwúlú. Chómmóng aramas ikenái ra chék ekieki pwisin ar pwúúng. Rese pwal ekieki án ekkewe ekkóch pwúúng. Nge emén mi tipetekison a eáni ewe sókkun napanap Paulus a pese ngeni ekkewe Chón Kraist lón Rom ar repwe eáni. A apasa: “Iei mine sipwe fokun achocho ngeni mine epwe afisätä kinamwe o alilisfengen le apöchökülafengenikich lefilach.” (Rom 14:19) Emén mi pwári tipetekison a achocho le akkamwéchú an kinamwe ngeni aramas meinisin nge lapólóón ngeni pwisin pwúlúwan we.
14 Áwewe chék, met ewe mwán a sani le féri lón pekin kukkunou eli epwe sókko seni met pwúlúwan we a sani. Neman ewe mwán a sani le nóm leimw me állea puk, nge ewe fefin a sani le ló mwéngé ekis are kunou ren chienan kewe. Epwe mecheres ngeni ewe fefin an epwe súféliti pwúlúwan we ika ena mwán a tipetekison me ekieki met pwúlúwan we a sani are oput nge esap chék ekieki pwisin mochenin. Epwe ifa me alóllóólun án ewe mwán tongei me aúcheani neminnewe ika neminna a pwal ekieki met mochenin pwúlúwan we nge esap chék pwisin mochenin! Ewe riri lefilen ekkewe pwúpwúlú epwe péchékkúleló ika pwe iir me rúúemén ra tipetekison.—Álleani Filipi 2:1-4.
15, 16. Me ren Kölfel 131, met Tafit a pesei ngeni ekkewe chón Israel ar repwe féri? Ifa usun sia pwal tongeni féri lón ewe mwichefel?
15 Lón ewe mwichefel. Lón ei fénúfan, chómmóng ra mochen angei mocheniir iei chék. Ese chúen wor ar mosonottam me ra oput witiwit. Ika a wor ach tipetekison epwe mecheres ngenikich le witiwiti are ápilúkúlúkú Jiowa. (Álleani Kölfel 131:1-3.) Ika sia tipetekison me witiwiti Jiowa, iwe, sipwe kúna feiéch. Sipwe meefi núkúnúkéch, ouruur me pwapwa. Iwe, sia tongeni weweiti ika pwata iwe Tafit a pesei ekkewe chón Israel le witiwiti ar we Kot fán mosonottam!
16 Ka tongeni meefi ouruur usun Tafit atun ka witiwiti Jiowa fán mosonottam. (Kölf. 42:5) Neman ka “tipeni eu angang mi aüchea” lón ewe mwichefel, iwe, ka mochen wiseni ewe wis elter. (1 Tim. 3:1-7) Pwúngún, ren álillisin ewe manaman mi fel, kopwe akkomw achocho úkúkún óm tufich le ámááraatá ekkewe napanap mi lamot ngeni wisen emén elter. Nge epwe ifa usun ika kopwe witiwit ren och fansoun lap seni ekkewe ekkóch? Emén mi pwári an tipetekison a witiwit fán mosonottam pwe epwe eáni ekkóch wis lón ewe mwichefel. Iwe, epwe sópweló le angang ngeni Jiowa me ewe mwichefel fán pwapwa ese lifilifil menni wis a wiseni.
17, 18. (a) Met epwe fis ika sia omusaaló tipisin ekkewe ekkóch me tingor omusomusen ach tipis? (b) Met Än Salomon Fos 6:1-5 a pesekich le féri ika sise tongeni apwénúetá ach etipeeú pokiten weiweitáán och mettóch?
17 Lón ach riri ngeni ekkewe ekkóch. A weires ngeni lape ngeni aramas ar repwe omusomus. Nge néún Kot kewe chón angang ra achocho le pwári tipetekison ren ar meefi tipisiir me tingor omusomus. Ra pwal tipemecheres le omusaaló tipisin ekkewe ekkóch. Lamalam tekia a efisi fitikoko, nge omusaaló tipis, a álisatá kinamwe lón ewe mwichefel.
18 A lamot sipwe tipetekison me omusomus seni wenecharen letipach. Áwewe chék, eli sia féri eú etipeeú lefilach me emén, nge ese chúen tongeni pwénúetá pokiten weiweitáán och mettóch mi lamot. Ika ina, sipwe ekieki úkúkún tipisich me pwári inaamwo ika minne a fis esap tipisich chék.—Än Salomon Fos 6:1-5.
19. Pwata sia kilisou ren án Paipel pesekich le eáni tipetekison?
19 Sia fókkun kilisou ren ewe Paipel pún a pesekich ach sipwe eáni tipetekison. Neman fán ekkóch a weires ach sipwe tipetekison. Nge ika sipwe ekieki úkúkún tettekian Jiowa senikich me chechchemeni pwisin án Jiowa pwári tipetekison, iwe, sipwe pwal mochen eáni ena napanap mi echipwér. Ren ach féri ena, epwe lapóló aúcheach usun néún Jiowa chón angang. Amwo kich meinisin sipwe achocho úkúkún ach tongeni le eáni féfférún emén mi kis.
^ A siwil iter.
[Sasing lon pekin taropwe 19]
Jiowa a asamolukich ren an ewisa ngenikich ewe angangen afalafala ewe kapas allim
[Sasing lon pekin taropwe 22]
Ineet atun a suuk ngonuk óm kopwe pwári tipetekison?
