Devlop leta lespri enn ki pli pti
Devlop leta lespri enn ki pli pti
“Sa ki pli pti parmi zot, limenm ki pli enportan.”—LIK 9:48.
ESKI OU KAPAB REPONN?
Kwa ki kapab ed nou devlop leta lespri enn ki pli pti?
Dan ki fason sa enn ki pli pti i “pli enportan”?
Ki mannyer nou kapab demontre limilite dan maryaz, kongregasyon, e dan nou relasyon avek lezot?
1, 2. Ki Zezi ti ankouraz son bann zapot pour fer, e akoz?
DAN lannen 32 N.L. kan Zezi ti dan distrik Galile, en dispit ti leve. Detrwa son bann zapot ti pe argimante lo lekel ki pli enportan parmi zot. Lik, en ekriven Levanzil i rakonte: “En diskisyon ti’n leve ant bann disip lo size lekel parmi zot ki ti pli enportan. Me ler Zezi ti realize sa ki zot ti pe mazinen, i ti pran en zanfan e i ti met obor li. E i ti dir zot, ‘Sa ki resevwar sa zanfan an mon non, i resevwar mwanmenm, e sa ki resevwar mwan, i resevwar sa enn ki’n anvoy mwan. Sa ki pli pti parmi zot, limenm ki pli enportan.’” (Lik 9:46-48) Zezi ti ferm, e avek pasyans i ti ed son bann zapot vwar lenportans limilite.
2 Eski konsey Zezi pour azir konman enn ki pli pti ti annakor avek latitid laplipar Zwif dan premye syek, oubyen i ti tou lekontrer? Theological Dictionary of the New Testament i dir sa konsernan mantalite bann dimoun sa letan: “Dan tou sa ki zot ti fer, souvan zot ti pe rode lekel ki pli enportan e sakenn ti toultan konsernen avek loner ki zot ti sipoze gannyen.” Zezi ti pe ankouraz son bann zapot pour annan en leta lespri diferan avek lezot dimoun otour zot.
3. (a) Ki savedir vin pli pti, e akoz i kapab en defi? (b) Ki kestyon ki ganny souleve konsernan devlop leta lespri enn ki pli pti?
3 Sa mo Grek ki’n ganny tradwir “pli pti,” i vedir en dimoun ki modes, annan limilite, abes li, napa en gran lopinyon lo li menm. I en dimoun ki napa pouvwar oubyen lotorite. Zezi ti servi en pti zanfan pour fer kler avek son bann zapot ki zot bezwen annan limilite ek modesti. Sa konsey i osi aplikab pour bann vre Kretyen ozordi parey dan premye syek. Dan serten sirkonstans, i kapab en defi pour azir konman enn ki pli pti. Sa tandans orgeye ki imen i annan i kapab pous zot pour rod pozisyon dan lasosyete. Nou pe viv dan en lanvironnman kot dimoun i kontan fer konpetisyon avek lezot, e lespri dapre sa lemonn i kapab ankouraz nou pour devlop en latitid egois, agresif, e otoriter. Kwa ki kapab ed nou devlop sa leta lespri enn ki pli pti? Ki mannyer ‘sa ki pli pti parmi nou, li menm ki pli enportan’? Dan ki sityasyon dan lavi nou kapab demontre limilite?
“LARISES BONDYE I VREMAN GRAN, SON KONNESANS EK SON LASAZES I VREMAN PROFON”
4, 5. Kwa ki kapab ed nou devlop limilite? Donn en legzanp.
4 En fason pour devlop limilite i kan nou reflesir seryezman lo grander Zeova an konparezon avek nou. An realite, “personn pa kapab konpran son konprenezon.” (Iza. 40:28) Pol ti koz lo serten laspe ekstraordiner grander Zeova. I ti ekrir: “Larises Bondye i vreman gran, son konnesans ek son lasazes i vreman profon. Lekel ki kapab eksplik son bann desizyon? Lekel ki kapab konpran son bann plan?” (Rom. 11:33) Sa ki Pol ti ekrir anviron 2,000 an pase i ankor vre menm si imen ozordi i annan bokou plis konnesans. Nenport ki kantite konnesans nou annan, avek limilite nou devret realize ki zanmen nou pou kapab fini konn tou lo Zeova, son travay ek fason azir.
5 Annou pran legzanp Leo. * Lefet ki i ti realize ki nou pa kapab aprann tou keksoz lo Bondye, sa ti ed li pour azir konman enn ki pli pti. Letan i ti ankor en zenn garson, i ti enterese avek lasyans e i ti anvi aprann kantite ki i ti kapab lo liniver. Alor i ti deside fer en letid lo liniver, e i ti tonm lo sa konklizyon: “Baze lo mon bann letid, mon’n realize ki bann teori lasyans pa ase pour imen konpran tou keksoz lo liniver. Alor mon ti deside etidye lalwa.” Avek letan Leo ti vin en avoka e plitar en ziz. Apre, li ek son madanm ti etidye Labib avek Temwen Zeova, aksepte laverite, e dedye zot lavi avek Bondye. Malgre letid o nivo ki Leo ti fer, kwa ki ti ed li pour azir konman enn ki pli pti? I ti reponn san okenn ezitasyon: “Mon’n realize ki nenport ki kantite nou aprann lo Zeova ek liniver, i annan ankor bokou pour dekouver.”
6, 7. (a) Ki legzanp limilite remarkab Zeova i demontre? (b) Ki mannyer limilite Bondye i kapab fer nou “pli enportan”?
6 En lot fakter ki kapab ed nou devlop limilite se ki Zeova li menm i demontre limilite. Annou egzamin sa pwen: “Nou pe travay ansanm [avek] Bondye.” (1 Kor. 3:9) Zis mazinen, Zeova sa Bondye ki son grander pa kapab ganny konpare, i onor nou par donn nou sa loportinite pour anons sa bon nouvel an servan son Parol Labib! Kantmenm Zeova ki fer pouse sa lagrenn ki nou plante e aroze, i donn nou sa privilez pour travay ansanm avek li. (1 Kor. 3:6, 7) Pa sa i en legzanp limilite remarkab ki Bondye i demontre? San dout, legzanp limilite Zeova i devret ankouraz sakenn de nou pour azir konman sa enn ki pli pti.
7 Legzanp limilite Bondye ti annan en gran lefe lo psalmis David. I ti sante: “Ou [Zeova] pou donn mwan ou boukliye delivrans, e se ou limilite ki fer mwan gran.” (2 Sam. 22:36) David ti konpran ki okenn pozisyon i ti annan Izrael ti akoz Zeova ti demontre limilite par port latansyon lo li e ed li. (Ps. 113:5-7) Eski i diferan pour nou? Ki kalite atiran, abilite, ek privilez ki nou annan ki nou “pa ti resevwar” avek Zeova? (1 Kor. 4:7) En dimoun ki azir konman enn ki pli pti i vin “pli enportan” kan i vin en serviter Zeova ki annan bokou valer. (Lik 9:48) Annou vwar ki mannyer sa i posib.
‘SA KI PLI PTI PARMI ZOT I PLI ENPORTAN’
8. Ki lefe limilite i annan lo nou latitid anver lorganizasyon Zeova?
8 Pour nou ere dan lorganizasyon Bondye e siport fason ki keksoz i ganny fer dan kongregasyon, i esansyel pour annan limilite. Pran par egzanp Petra, en zenn fiy ki ti ganny elve dan en fanmir Temwen Zeova. I ti anvi fer keksoz dan son fason e i ti konmans elwannyen avek kongregasyon. Detrwa lannen plitar i ti rekonmans asosye avek kongregasyon. Aprezan i kontan ki i dan lorganizasyon Zeova e i vreman anvi siport laranzman kongregasyon. Kwa ki’n fer li sanz son latitid? I ti ekrir: “Pour mwan santi mwan alez dan kongregasyon, mon ti realize ki mon ti bezwen konpran e devlop de kalite enportan, limilite ek modesti.”
9. Ki latitid en dimoun ki annan limilite i demontre anver nouritir spirityel, e akoz sa i fer li annan plis valer?
9 En dimoun ki annan limilite i vreman rekonesan pour provizyon ki Zeova i donn li, enkli nouritir spirityel. Sa dimoun i etidye Labib regilyerman e seryezman. I osi lir Latour Veyer ek Awake! Parey plizyer lezot serviter Bondye, i kapab fer li vin en labitid pour lir sak nouvo magazin avan ki i met zot lo letazer. Kan nou demontre limilite ek lapresyasyon par par lir e etidye sa bann piblikasyon baze lo Labib, nou pou progrese spirityelman e Zeova pou kapab servi nou pli byen dan son lorganizasyon.—Ebr. 5:13, 14.
10. Ki mannyer nou kapab azir konman enn ki pli pti dan kongregasyon?
10 Sa ki azir konman enn ki pli pti i osi “pli enportan” dan en lot fason. Dan tou kongregasyon i annan bann zonm kalifye ki’n ganny apwente anba gidans lespri sen Zeova pour servi konman ansyen. Zot organiz renyon, predikasyon, e pran swen avek troupo Bondye. Kan nou demontre sa leta lespri enn ki pli pti par volonterman siport sa bann laranzman, nou ede pour ki i annan lazwa, lape, ek linite dan kongregasyon. (Lir Ebre 13:7, 17.) Si ou en ansyen oubyen asistan ministeryel, eski ou demontre limilite par apresye sa responsabilite ki Zeova in konfye ou?
11, 12. Ki latitid ki pou fer nou annan plis valer dan lorganizasyon Zeova, e akoz?
11 Sa ki azir konman enn ki pli pti i sa enn “pli enportan” oubyen annan plis valer dan lorganizasyon Zeova, akoz son limilite i fer li en serviter Zeova ki itil. Zezi ti bezwen konsey son bann disip pour azir konman enn ki pli pti akoz serten parmi zot ti pe ganny enfliyanse avek sa leta lespri orgeye ki ti komen dan sa letan. Lik 9:46 i dir: “En diskisyon ti’n leve ant bann disip lo size lekel parmi zot ki ti pli enportan.” Eski nou osi dan en fason ou en lot nou’n konmans annan sa pwennvi ki nou pli enportan ki nou bann frer ek ser oubyen lezot dimoun? Bokou ozordi dan lemonn i orgeye e egois. Si nou demontre limilite, nou pou reste lwen avek bann dimoun orgeye. Kan nou fer sa e met lavolonte Zeova premye dan nou lavi, nou pou vin pli itil dan kongregasyon.
12 Konsey Zezi pour azir konman enn ki pli pti i vreman motiv nou pour demontre limilite. Pa nou devret fer nou mye pour azir konman enn ki pli pti dan tou laspe nou lavi? Annou vwar trwa laspe.
FER OU MYE POUR AZIR KONMAN ENN KI PLI PTI
13, 14. Ki mannyer en msye oubyen madanm i devret azir konman enn ki pli pti, e ki lefe sa i kapab annan dan maryaz?
13 Dan maryaz. Bokou dimoun ozordi i mazin zis zot prop drwa e pour zot, drwa lezot pa enportan. Me en dimoun ki annan limilite i les li ganny gide par sa latitid ki Pol i ankouraz nou pour annan dan let ki i ti ekrir bann Romen. I ti dir: “Annou rod sa bann keksoz ki prodwi lape, e rann nou for ansanm dan lafwa.” (Rom. 14:19) En dimoun ki azir konman enn ki pli pti i toultan anpe avek tou dimoun, espesyalman avek son konzwen.
14 Annou pran par egzanp moman detant. Dan en maryaz, sak konzwen i kapab annan en divertisman ki i prefere. I kapab ki en msye i kontan reste kot lakaz e lir en liv, tandis ki en madanm i kapab pli kontan al en dinen oubyen vizit son bann zanmi. I pou pli fasil pour en madanm respekte son msye kan son msye i demontre limilite e annan konsiderasyon senser pour son madanm. De lot kote, en msye i vreman kontan e apresye son madanm kan son madanm pa fer keksoz zis dan son fason, me osi konsider son pwennvi. Sa lyen dan maryaz i vin pli for kan tou le de i azir konman enn ki pli pti.—Lir Filipyen 2:1-4.
15, 16. Ki latitid David ti ankouraz bann Izraelit pour annan dan Psonm 131, e ki lefe sa i devret annan lo nou fason azir dan kongregasyon?
15 Dan kongregasyon. Dan sa lemonn, bokou dimoun i viv zis pour ganny sa ki zot oule la konmela. Zot napa pasyans e i en problenm pour zot espere. Si nou devlop sa leta lespri enn ki pli pti, sa pou ed nou esper Zeova. (Lir Psonm 131:1-3. *) Byenfe ki nou gannyen kan nou annan limilite e esper Zeova i benediksyon, sekirite, rekonfor, ek satisfaksyon. I pa drol alor ki David ti ankouraz bann Izraelit pour esper zot Bondye avek pasyans!
16 Ou osi ou kapab ganny sa menm kalite rekonfor kan ou demontre limilite par esper Zeova. (Ps. 42:5) Petet ou ti a kontan servi konman ansyen pour ou kapab ed plis dan kongregasyon. (1 Tim. 3:1-7) Alor ou devret fer tou sa ki ou kapab pour les lespri sen ed ou devlop bann kalite ki neseser pour vin en ansyen. Me si i paret ki ou pe esper pli lontan ki lezot? Sa enn ki pli pti, ki pe esper avek pasyans pour ganny en privilez dan servis Zeova, pou kontinyen servi li avek lazwa e i pou kontan pour fer nenport ki travay i gannyen.
17, 18. (a) Ki byenfe nou gannyen kan nou demann pardon e volonterman pare pour pardonn lezot? (b) Ki Proverb 6:1-5 i ankouraz nou pour fer?
17 Dan nou relasyon avek lezot. Laplipar dimoun i vwar li difisil pour demann leskiz. Parkont, bann serviter Bondye i devlop sa leta lespri enn ki pli pti par admet kan zot fer fot e demann pardon. Zot osi pare pour pardonn lezot. Lorgey i kre divizyon ek diskisyon, par kont, i pou annan lape dan kongregasyon kan nou pare pour pardonnen.
18 I posib ki nou pou bezwen ‘al imilye nou’ e senserman demann leskiz si nou’n fer en lagreman avek en dimoun me pa kapab respekte sa lagreman akoz en sityasyon ki an deor nou kontrol. Menm si i kapab en pe lafot sa lot dimoun osi, sa Kretyen ki annan limilite i bezwen rekonnet son prop fot e admet ki sa ki i’n fer i mal.—Lir Proverb 6:1-5. *
19. Akoz sakenn ant nou i devret apresye sa bann konsey Labib pour azir konman enn ki pli pti?
19 Pa nou apresye lankourazman baze lo Labib pour devlop leta lespri enn ki pli pti! Menm si parfwa i kapab difisil pour demontre sa leta lespri, si nou rapel grander nou Kreater an konparezon avek nou, e lafason ki i demontre limilite, sa pou ed nou devlop sa bon kalite. Ler nou fer sa, nou pou annan plis valer konman bann serviter Zeova. Alor annou azir konman enn ki pli pti.
[Not anba lo paz]
^ par. 5 Serten non in ganny sanze.
^ par. 15 Psonm 131:1-3: “1 O Zeova, mon leker pa’n orgeye, ni mon lizye pa’n orgeye; Mon pa ni’n rod bann keksoz ki tro gran, ni bann keksoz ki tro merveye pour mwan. 2 Sirman mon’n kalme e fer mwan vin trankil parey en pti baba ki’n aret tete dan lebra son manman. Mon parey en pti baba ki’n fek aret tete dan mon lebra. 3 Les Izrael esper Zeova depi la konmela e pour letan endefini.”
^ par. 18 Proverb 6:1-5: “1 Mon garson, si ou’n port garanti pour ou prosen, si ou’n donn ponnyendmen menm avek en etranze, 2 si ou’n tonm dan latrap ou prop labous, si ou labous in met ou dan en pyez, 3 alor mon garson pran sa aksyon, e delivre ou, parski ou’n tonm dan lanmen ou prosen. Deswit al imilye ou e persiste avek ou prosen. 4 Pa les ou lizye dormi, ni les ou lizye kler fer en pti sonm. 5 Delivre ou lekor parey en gazel ki dan lanmen e parey en zwazo dan lanmen sa saser zwazo.”
[Kestyon]
[Portre lo paz 19]
Zeova i onor nou par donn nou sa privilez pour pres sa bon nouvel
[Portre lo paz 22]
Ki loportinite ou annan pour azir konman enn ki pli pti?
