Catre Jë Troa Tune La Atre Co
7-13 JANUARE 2012
NYIMA: 26, 68
Catre Jë Troa Tune La Atre Co
“Ame la ka co hi e nyipunie asëjëihë, celë hi ka tru.”—LUKA 9:48.
THELE JË TROA SA:
Nemene la ka troa xatua së troa ipië?
Nemene la aqane tro la ka co a “tru”?
Troa mama tune kaa la ipië hnine la faipoipo, me hnine la ekalesia, memine la aqane imelekeu së me itre xan?
1, 2. Nemene la hnei Iesu hna inine kowe la ange aposetolo? Pine nemene matre ini angatre jë tune lai?
KOLO macatre 32. Ce Iesu me ange aposetolo i nyidrë e Galilaia. Hnene la itre xan e ange aposetolo hna isenyine göi troa atre, ka hape drei la ka tru e angatr. Hanawange la aqane qeje pengöne hnei Luka: “Ame hna ciajë la ikelikelë i angat, ma dei e angate la ka tro ha sisitia. Nge Iesu a ate hmekune la mekune ne la ite hni angat, ame hnei nyidëti hna xome la nekönat, me acili nyëne thei nyidë me hape koi angat, Ame la ate tro ha kapa la nekönate celë ngöne la ëjeng, angeic’ a kepe ni ; nge ame la ate tro ha kepe ni, kola kapa la ate upi ni ; ke ame la ka co hi e nyipunie asëjëihë, celë hi ka tru.” (Luka 9:46-48) Hnei Iesu hna xomihni me xatua angatre troa trotrohnine la enyipiewekëne la troa ipië.
2 Ame la aqane ipië hna qaja hnei Iesu troa hetrenyi hnene la ange aposetolo, tre, ka ceitu jë kö memine la aqane ujë ne la angetre Iuda ngöne la ijine cili? Ohea, isapengöne catr. Önine la ketre itus ka hape, ame ngöne la aqane imelekeu ne la angetre Iuda ka nyipi ewekë catre, ke, troa atre ka hape drei la nyine atrun, nge ka sisitria catre koi angatre troa itö iatruny. (Theological Dictionary of the New Testament) Xele Iesu ma wange e tro la itretre drei nyidrë a mele tune la itre atr ne la nöje i angatr.
3. (a) Nemene la aliene la kola hape troa co? Pine nemene matre tha ka hmaloi kö koi së troa ujë tune lai? (b) Nemene la itre hnyinge nyine troa sa ngöne la tane mekune celë?
3 Ame la qene Heleni ne la “ka co,” tre, kola hape ketre aminatr, maine atr ka pë musin. Ame la pengöne la atr celë, tre, ka ipië, nge tha ka mekune kö ka hape ka sisitria angeic hui ketre. Hnei Iesu hna inine la ange aposetolo ka hape tha tro kö a pi mama ngo troa ipië tune la nekönatr. Tro la itre nyipi Keresiano enehila a xomi tulu qa ngöne la ini hnei Iesu hna hamëne kowe la ange aposetolo. Jole koi së e itre xa ijine troa ipië. Nge ketre itre ka tha pexeje së, celë hi matre traqa koi së la pi mama me ajane troa sisitria hui itre xan. Ketre mina, fene i Satana a huli së troa sipu meku së kö me thele iwesitrë me pi imusinë. Troa xatua së tune kaa troa ipië? Nemene la aliene la ithanata i Iesu lo kola hape “ame la ka co hi e nyipunie asëjëihë, celë hi ka tru”? Ngöne nemene ijine la tro sa amamane laka ka ipië së?
“EKÖLÖ HI NI LA EJUINE LA INAMACANE KA SISITIA MEMINE LA ATE PENGÖNE I AKÖTESIE !”
4, 5. Nemene la ka troa xatua së troa ipië? Hamëne la ketre ceitun.
4 Ame la ketre aqane tro sa hetrenyi la ipië, tre, ene la troa mekune hnyawa ka hape, ka sisitria catre Iehova hu së. Eje hi laka, pëkö ka atreine troa traqa kowe la ejuine la itre ewekë hnei Iehova hna atre pengön. (Is. 40:28) Hnei Paulo hna qaja la etrui Iehova me hape: “Ekölö hi ni la ejuine la inamacane ka sisitia memine la ate pengöne i Akötesie ! sihngödi atraqate la iameköti nyidë, nge tha nune öhne kö la ite kala i nyidë !” (Rom. 11:33) Tru la itre ewekë hna atre hnene la itre atr qaane lo Paulo a cinyihane la itre mekune celë, traqa ha enehila koi 2 000 lao macatre. Ngo ka nyipici pala hi enehila la itre ithanata i angeic. Ngacama tru ju hë la hne së hna atre, ngo thatreine jë pi kö së lai troa atre asë la itre pengöi Iehova, me itre huliwa i Nyidrë, me itre mekuna i Nyidrë.
5 Drei la ketre ceitun, ame la ka xatua Leo troa ipië, tre, atre hë angeice laka tha ijiji angeice kö troa atre asë la itre ewekë hna xupe hnei Akötresie. a Ketre thöthi Leo ka pi inine la Sias. Angeic a ajane troa trotrohnine la pengöne la fene hnengödrai asë, celë hi matre pi tro jë angeice a inine lai. Ngo trotrohnine hë angeice laka tha ijije kö tro hi la Sias a xatuane la itre atr troa trotrohnine la nöjei ewekë ngöne la fene me hnengödrai asë. Haawe, angeice hmaca pena jë a inine ju la itre wathebo ne la mus. Matre, hnei angeice hna pane avocat ngöne la hnakootr, nge thupene lai atre ikootrë. Ame hë thupen, hnei angeice me ifënekö i angeice hna inine la Tusi Hmitrötre memine la Itretre Anyipici Iehova, me kapa la nyipici, me xomi bapataiso. Ngacama ka qa i angeice ngöne la hna ini ka tru, ngo nemene la ka xatua Leo troa ipië? Öni angeic e sa: “E trotrohnine hnyawa së ka hape, ngacama tru catre ju hë la nöjei ewekë hne së hna inine göi Iehova me göne la fene me hnengödrai asë, ngo ka thatre hmekune pala kö la itre ewekë nyine tro sa atre.”
6, 7. (a) Nemene la tulu ne ipië ka lolo hnei Iehova hna hamë së? (b) Pine nemene matre qaja jë ka hape kola “tru” la atr hnene la ipië i Akötresie?
6 Ame fe la ka xatua së troa hane ipië, tre, hnei Iehova hna hane ipië. Loi e tro sa mekune ka hape, itre ka “ce huliwa tro kö [së] me Akötesie.” (1 Kor. 3:9) Iehova Akötresie ka Pucatinasë a ajane tro sa ce huliwa me Nyidrë. Kola atrunyi së hnei Nyidrëti la kola aijijë së troa huliwane la Wesi Ula i Nyidrë, ene la Tusi Hmitrötr, göi troa cainöjëne la maca ka loi. Ngacama Iehova la ka aciane la itre feja, ngo Nyidrëti a nue së fe troa hane trane me fi itre ej. (1 Kor. 3:6, 7) Celë hi aqane hamë së lai hnei Akötresie la ketre tulu ne ipië. Eje hi laka, tro la tulu i Iehova a xatua së isa ala cas troa tune la ka co!
7 Kola mama hnyawa la thangane la tulu ne ipië i Akötresie thei Davita. Öni nyidrë e nyimane koi Iehova: “Hnei cilieti hna hamë ni la pete ne iamele i cilie ; nge hna atrunyi ni hnene la thina ka [“ipië,” MN] i cilie.” (2 Sam. 22:36) Atre hnyawa hi Davita ka hape, ame la ka atreine jë nyidrë kuca la itre ewekë ka tru e Isaraela, tre, pine hi laka hnei Iehova hna ipië, ene laka Nyidrë a hane nyipine me xatua Davita. (Sal. 113:5-7) Hnei Nyidrëti fe hna hane tune koi së. Ame asë hi la itre thiina ka loi, me itre hne së hna atreine kuca, me itre hnëqa ka tru hne së hna cilën, tre, itre qaathei Iehova asë hi. (1 Kor. 4:7) Ame lo Iesu a qaja ka hape tro la atre ipië a “tru,” tre, kolo hi lai a hape, tro la atre cili a hlue ka nyipi ewekë koi Iehova. (Luka 9:48) Tro sa wange la pengön.
AQANE TRO LA KA CO A “TRU”
8. Pine nemene matre troa hetrenyi la ipië thene la itre atrene la organizasio i Akötresie?
8 Ame la angetre ipië hnine la organizasio i Akötresie, itre ka madrine angatr, me kapa hnyawa pala hi la itre huliwa hna hamëne hnine la ekalesia. Hane hi la ketre ceitun, Petra la ketre jajinyi hna hetrune hnine la ketre hnepe lapa ka nyi hlue i Iehova. Ngo hnei angeice hna ketre pi kuci mekun, ene pe trotrije pi angeice la ekalesia. Thupene la itre macatre ka nyimutre, hnei angeice hna bëeke hmaca kowe la ekalesia. Tru la madrine i angeice enehila hnine la ekalesia, me kapa hnyawa pala hi la itre huliwa hna hamëne hnine la ekalesia. Hna saze tune kaa la aqane ujë i angeic? Öni angeic, “Lue aqane ujë ka nyipi ewekë catre nyine tro ni a trotrohnine hnyawa me tro ni a hetreny, ene la ipië nge tha tro kö a ketre kuci mekun.”
9. Nemene la aqane wange hnene la atre ipië la Tusi Hmitrötre memine la itre xa itusi së? Pine nemene matre tro lai a hetre thangane ka loi koi angeic?
9 Ame la atre ipië, tre, hetrenyi angeice la hni ne ole kowe la nöjei ewekë ka lolo hna hamëne hnei Iehova kowe la itre atre i Nyidrë, tune la ixatua hnei Nyidrëti hna hamën matre tro angatr a hane atre Nyidrë. Celë hi matre ame la atre ipië, angeice a inine lapane la Tusi Hmitrötr, me e la itre zonal La Tour de Garde me Réveillez-vous ! Ala nyimu la itre hlue i Iehova ka e asë la itre itus hna hnyipi kapa qëmekene troa amë ngöne la hna ami tus. Maine tro sa amamane la ipië së hnene la hne së hna e me inine la itre itusi së, haawe, tro hë lai a catre la aqane imelekeu së me Akötresie, nge tro fe hë sa catre huliwa i Nyidrë.—Heb. 5:13, 14.
10. Nemene la aqane tro sa amamane la ipië hnine la ekalesia?
10 Hetre ketre aqane tro la atre ipië a ka “tru” maine nyipi ewekë koi Akötresie. Iehova a xome la uati hmitrötre i Nyidrë matre troa acile la itre qatre thupe ngöne la nöjei ekalesia asë. Qa i angatre troa hnëkëne la aqane trongene la itre icasikeu, me aqane trongene la huliwa ne cainöj, me thupëne la ekalesia. Ame la easa melëne la ipië ngöne la kola ce huliwa hnyawa memine la itre qatre thup, easë hi lai a acatrene la madrine me tingetinge, me cas hnine la ekalesia. (E jë la Heberu 13:7, 17.) Nge maine qatre thupe epuni maine drikona, hetrenyi kö thei epuni la ipië hnene la hna hane olene koi Iehova la hnëqa hnei Nyidrë hna hamë epun?
11, 12. Nemene la aqane ujë ka xatua së troa hane nyipi ewekë kowe la organizasio i Iehova? Pine nemen?
11 Ixatua ka tru la atre ipië kowe la organizasio i Iehova, ke, kola aijijë angeice troa ketre hlue i Akötresie ka lolo nge ka huliwa. Nyipi ewekë ekö koi Iesu troa amekunëne la itretre drei nyidrë troa tune la ka co, ke, hna löthe la itre xan e angatr hnene la aqane waiewekë ne la itre atr ka pi mama ngöne lo hneijine cili. Öni Luka 9:46 ka hape: “Hna ciajë la ikelikelë i angat, ma dei e angate la ka tro ha sisitia.” Hapeu, hne së fe kö hna hane mekune, ka hape, sisitria kö së hune la itre trejine me easë maine hune la itre xa atr? Tha tro kö sa ujë tune la itre atr ka mele xötreithi së, itre ka pi mama me itre ka sipu meku angatre kö. Maine ka ipië së, nge easa amë panëne la aja i Iehova, tro ha thuecatrene la itre trejine me easë ngöne la easa ce mele me angatr.
12 Ame la easa trotrohnine la eamo i Iesu, ene la troa tune la ka co, kola upi së troa ipië ngöne la nöjei götrane la mele së. Tro hë sa ce ithanatane la köni götran.
CATRE JË TROA TUNE LA KA CO
13, 14. Tune kaa la aqane tro la trahmanyi maine föe a ujë tune la ka co?
13 Ngöne la faipoipo. Tru hnei atr enehila ka tha imeku, kolo hi a wange la meköti thatraqa i angatre kö, nge tha nyipiine hë la meköti itre xan. Ngo ame la atre ipië, tre, casi hi la aqane ujë i angeice memine la ithuecatre hnei Paulo hna hamëne ekö kowe la itre Keresiano ne Roma. Öni angeic: “Tro sha xöte thenge la ite ewekë ne tingeting, me ite ewekë nyine iakeukawanekeun.” (Rom. 14:19) Ame la atre ipë ka ujë tune la ka co, tre, angeic a thele troa mele tingetinge me nöjei atr, nge tro hi a nyiqaane thei föi angeic.
14 Hane hi la ketre ceitun, maine ame ngöne la itre ijine mano, hetre hna pi kuca hnei trahmany, ngo isazikeu pe me hna ajane hnei föe. Trahmanyi a ajane tro hi a lapa hnalapa göi troa e tusi ngöne la ijine mano, ngo ame pena ha föe, ka pi ce tro troa iöhnyi me itre sinee. Tha jole kö kowe la föe troa metrötrëne la föi nyiidro, e tro la trahmanyi a ipië, nge tha tro kö angeic a meku angeice hi ngo tro fe a wangatrune la aja ne la föi angeic. E tro la trahmanyi me föe a ipië, tro ha catre la imelekeu nyidro.—E jë la Filipi 2:1-4.
15, 16. Ame ngöne la Salamo 131, nemene la hnei Davita hna thuecatrene la angetre Isaraela troa kuca? Nemene la aqane tro sa nyitipune lai ngöne la ekalesia?
15 Hnine la ekalesia. Ame ngöne la fen, ala nyimu la itre atr ka thatreine itreqe me xomihni, ke e hetre aja i angatre hë, saqei angatre hi pi kapa. E ka ipië së, tro ha hmaloi koi së troa treqe Iehova, me troa mejiune koi Nyidrë. (E jë la Salamo 131:1-3.) Maine hetre ipië së, nge easë fe a treqe Iehova, tro sa hetre manathith qa ngön. Tro hë sa mele xetietë, me keukawa la hni së me madrin. Haawe, trotrohnine hi së la kepine matre Davita a xatuane la angetre Isaraela troa xomihni ahoeany me treqe Akötresie!
16 Tro fe a keukawa la hni epun tui Davita, e tro epuni a hetrenyi la ipië me treqe Iehova. (Sal. 42:5) Ma aja i epuni jë fe troa xome la hnëqa ne qatre thupe matre troa hane catre huliwa kowe la ekalesia. (1 Tim. 3:1-7) Eje hi laka, loi e tro epuni a kuca asë la hnei epuni hna atreine matre troa nue la uati hmitrötre troa akökötrene thei epuni la itre thiina hna thele thene la atre thup. Ngo e pai itre xane hë qatre thup, nemene la nyine troa kuca troa traqa fe kowe lai? Ame la atr ujë tune la ka co, tre angeic a treqene hnyawa la ijine troa hamëne koi angeic la itre xaa hnëqa ka tru hmaca kö ngöne la ekalesia. Ka tru pala hi la madrine i angeice troa nyi hlue i Iehova me kuca la nöjei pengöne huliwa hna hamëne koi angeice hnine la ekalesia.
17, 18. (a) Maine tro sa iqejemenukeu, me isa kapa la hna iqejemenukeu, nemene ju hë la thangane ka loi hne së hna kapa qa ngön? (b) Nemene la eamo hna hamëne ngöne Ite Edomë 6:1-5?
17 Ngöne la aqane imelekeu së me itre xan. Ketre ewekë ka jole koi itre xane troa qaja ka hape “menu hë ni.” Ngo ame la itre hlue i Iehova, tre hnei angatre pala hi hna catre troa ipië, kola mama lai jëne la aqane ujë i angatr, ke, e hetre tria i angatre hë, angatre a qeje menun. Nge canga saqei angatre fe hi kapa la kola qeje menu hnei itre xan. E hetrenyi la pi mama thene la itre atr, troa hetre gomegome nyipi angatr, ngo e canga saqei angatre hi iqejemenukeu, troa tingetinge la ekalesia.
18 Maine jë nyipi ewekë tro sa amamane la ipië së e qaja jë së ka hape “menu hë së.” Drei la ceitun, hetre ewekë hne së hna ce eköthe memine la ketre atr, ngo tha eatrëne ju kö së. Ame ngöne la ijine cili, loi e tro sa atre ka hape, ka tria së, nge thupene lai tro sa kapa, ngacama tha qaathe së casi kö la zön.—E jë la Ite Edomë 6:1-5.
19. Pine nemene matre tro sa olene laka hnene la Tusi Hmitrötr hna thuecatre së troa ujë tune la ka co?
19 Easa olene laka Tusi Hmitrötre a thuecatre së troa ujë tune la ka co. Ame itre xa ijin, ka jole koi së troa ipië. Ngo maine easa mekune la edraië i Iehova, me mekune laka hnei Nyidrëti hna hane ipië, tro fe hë sa ajane troa hane ipië. E tro sa xötre thenge lai, tro hë sa ketre hlue i Iehova ka nyipi ewekë catr. Haawe, catre pi së troa tune la ka co.
[Ithueamacany]
a Hna saze la itre ëj.
[Thying]