Nịm Idemfo ke N̄kpri-N̄kan
Nịm Idemfo ke N̄kpri-N̄kan
“Owo emi enịmde idem ke n̄kpri-n̄kan ke otu mbufo kpukpru edi enye emi okponde.”—LUKE 9:48.
NDI EMEKEME NDIFIỌK IBỌRỌ?
Nso ikeme ndin̄wam nnyịn inịm idem ke n̄kpri-n̄kan?
Didie ke owo emi enịmde idem ke n̄kpri-n̄kan ‘okpon’?
Didie ke ikeme ndiwụt ke imosụhọde idem ke ndọ, ke esop, ye ke nte inamde n̄kpọ ye mbon en̄wen?
1, 2. Nso item ke Jesus ọkọnọ mme apostle esie, ndien ntak emi enye ọkọnọde mmọ item emi?
KE ISUA 32 E.N., Jesus okodu ke Galilee ye mme apostle esie ke ini mmọ ẹketọn̄ọde ndineni m̀mê anie okpon akan ke otu mmimọ. Luke andiwet Gospel ewet ete: “Eneni edemede ke otu mmọ aban̄a m̀mê anie edi n̄kponn̄kan ke otu mmimọ. Jesus ọfiọk eneni emi odude mmọ ke esịt, onyụn̄ anam ekpri eyenọwọn̄ edida enye ke n̄kan̄ ndien ọdọhọ mmọ ete: ‘Owo ekededi eke adarade ekpri eyenọwọn̄ emi ke ntak enyịn̄ mi adara mi n̄ko, ndien owo ekededi eke adarade mi adara enye emi okosiode mi ọdọn̄ n̄ko. Koro owo emi enịmde idem ke n̄kpri-n̄kan ke otu mbufo kpukpru edi enye emi okponde.’” (Luke 9:46-48) Jesus ama ada ini anam mme apostle ẹfiọk ke akpana mmọ ẹsụhọde idem.
2 Ndi mme Jew oro ẹkedude ke eyo mme apostle ẹma ẹsisụhọde idem nte Jesus okoyomde mme apostle esie ẹsụhọde? Baba. Utu ke oro, mmọ ẹkesitatan̄ idem. Kop se n̄wed oro ẹkotde Theological Dictionary of the New Testament etịn̄de mi aban̄a nte mme owo ẹkesinamde n̄kpọ ye kiet eken: “Kpukpru ini, mmọ idehedei ifre owo emi okponde akan ke otu mmọ, ẹnyụn̄ ẹkụt ẹte ke ẹnọ owo kiet kiet ukpono oro ekemde ye enye.” Jesus ọkọdọhọ mme apostle esie ẹkûbiet mbon eyo mmọ.
3. (a) Nso ke owo ndinịm idem ke n̄kpri-n̄kan ọwọrọ, ndien ntak emi ekemede ndisọn̄ ndinam oro ndusụk ini? (b) Mme mbụme ewe oro ẹban̄ade ndinịm idem ke n̄kpri-n̄kan ke ikeme ndibụp?
3 Ikọ Greek oro ẹkabarede “n̄kpri-n̄kan” ọwọrọ owo emi osụhọrede idem, emi mîbatke idem ke n̄kpọ, m̀mê emi mîkponke itie. Jesus akada eyenọwọn̄ ekpep mme apostle esie ke ana mmọ ẹsụhọde idem. Ata mme Christian ẹkpenyene ndisụhọde idem nte Jesus ekekpepde mme apostle esie. Enyene mme ini emi ekemede ndisọn̄ nnyịn ndinịm idem ke n̄kpri-n̄kan. Unana mfọnmma ekeme ndinam nnyịn ikohode idem inyụn̄ iyom ndikpon n̄kan mbon en̄wen. Ke adianade do, ererimbot Satan ekeme ndinam nnyịn ikere iban̄a idem nnyịn ikaha, itie ikọ ikọ, m̀mê itie ukara ukara. Nso idin̄wam nnyịn inịm idem ke n̄kpri-n̄kan? Didie ke ‘owo emi enịmde idem ke n̄kpri-n̄kan ke otu nnyịn edi enye emi okponde?’ Ini ewe ke oyom isụhọde idem?
“INYENE YE ỌNIỌN̄ YE IFIỌK ABASI ẸTỤN̄Ọ ADAN̄A DIDIE!”
4, 5. Nso ikeme ndin̄wam nnyịn isụhọde idem? Nọ uwụtn̄kpọ.
4 N̄kpọ kiet emi ekemede ndin̄wam nnyịn isụhọde idem edi ndikere adan̄a nte Jehovah okponde akan nnyịn. Ke nditịm ntịn̄, nnyịn ikemeke ndifiọk ofụri se Jehovah ọfiọkde. (Isa. 40:28) Kop se apostle Paul ekewetde mi aban̄a adan̄a nte Jehovah okponde: “Inyene ye ọniọn̄ ye ifiọk Abasi ẹtụn̄ọ adan̄a didie! Mme ikpe esie ẹkak owo ndidụn̄ọde adan̄a didie onyụn̄ ayan̄a owo ndifiọk mme usụn̄ esie didie ntem!” (Rome 11:33) Ikọ Paul emi osụk ededi akpanikọ, kpa ye oro edide mme owo ẹkpep ata ediwak n̄kpọ tọn̄ọ enye ekewet n̄kpọ emi ke n̄kpọ nte isua 2,000 emi ẹkebede. Inamke n̄kpọ m̀mê ifiọk nnyịn okpon adan̄a didie, akpana ifiọk ke nnyịn idịghe n̄kpọ ndomokiet ke ini itide ke kpukpru ini idisụk inyenyene ekese ndikpep mban̄a Jehovah, mme utom esie, ye nte enye esinamde n̄kpọ.
5 Ke uwụtn̄kpọ, ke ini Leo * ekedide edifiọk ke nnyịn ikemeke ndifiọk kpukpru n̄kpọ mban̄a Abasi, emi ama anam enye enen̄ede osụhọde idem. Enye ama enen̄ede ama n̄kpọ-obot ke ini enye ekedide akparawa. Enye okoyom ndifiọk n̄kpọ mban̄a n̄kpọ-obot adan̄a nte enye ekekeme, ntre enye ama aka ekekpep emi ke ufọkn̄wed ntaifiọk, onyụn̄ esịm akpan ubiere emi: “Se n̄kekpepde ama anam mfiọk ke se ntaifiọk ẹtịn̄de ẹban̄a ekondo ikemeke ndinam owo ọfiọk kpukpru n̄kpọ aban̄a ekondo. Emi ama anam n̄kabade n̄kpep ibet.” Nte ini akakade, Leo ama akabade edi ekpeibet, ekem edi ebiereikpe. Ekem enye ye n̄wan esie ẹma ẹdikpep Bible ye Mme Ntiense Jehovah, ẹbọ akpanikọ, ẹnyụn̄ ẹkabade ẹdi mme asan̄autom Abasi emi ẹyakde idem ẹnọ enye. Nso ikan̄wam Leo enịm idem ke n̄kpri-n̄kan kpa ye emi enye ekenen̄erede ọfiọk n̄wed? Enye ọdọhọ ete: “Ndifiọk ke inamke n̄kpọ m̀mê n̄ka n̄wed adan̄a didie, ke nsụk nnyenyene ekese ndikpep mban̄a Jehovah ye ekondo.”
6, 7. (a) Nso utọ uwụtn̄kpọ nsụhọdeidem ke Jehovah enịm ọnọ nnyịn? (b) Didie ke nsụhọdeidem Abasi ekeme ndinam owo ‘okpon’?
6 N̄kpọ en̄wen emi ekemede ndin̄wam nnyịn isụhọde idem edi nditi ke Jehovah osụhọde idem. Kere ban̄a emi: “Nnyịn idi nsan̄autom Abasi.” (1 Cor. 3:9) Ndi oro ikpaha fi idem? Jehovah Abasi emi okponde akan ke ofụri ekondo ada nnyịn nte nsan̄autom esie ke ndinọ nnyịn ukpono nyak nnyịn ida Ikọ esie, kpa Bible, ikwọrọ eti mbụk. Okposụkedi emi edide Jehovah esinam se nnyịn itọde inyụn̄ iduọkde mmọn̄ ọkọri, enye ọnọ nnyịn ukpono ke ndiyak nnyịn idi nsan̄autom esie. (1 Cor. 3:6, 7) Ndi emi idịghe akakan uwụtn̄kpọ nsụhọdeidem? Ke akpanikọ, nsụhọdeidem Jehovah ekpenyene ndinam nnyịn inịm idem ke n̄kpri-n̄kan.
7 Nsụhọdeidem Abasi ama enen̄ede otụk David andiwet psalm. Enye ama ọkwọ ikwọ ọnọ Jehovah ete: “Afo ọyọnọ mi otuekọn̄ edinyan̄a fo, nsụhọdeidem fo onyụn̄ anam mi n̄kpon.” (2 Sam. 22:36) David ọkọdọhọ ke Jehovah ndisụhọde idem nse owo nte imọ akan̄wam imọ inam ofụri ikpọ n̄kpọ emi imọ ikanamde ke Israel. (Ps. 113:5-7) Ukem oro ke edi ye nnyịn n̄ko. Ke ikerede iban̄a mme edu, ukeme, ye mme ifetutom nnyịn, ndi odu se owo nnyịn ndomokiet enyenede emi mîdịghe Jehovah ọkọnọ enye? (1 Cor. 4:7) Owo emi enịmde idem ke n̄kpri-n̄kan ‘okpon’ sia Jehovah ada enye nte ata ọsọn̄urua asan̄autom esie. (Luke 9:48) Ẹyak ise nte emi edide akpanikọ.
‘OWO EMI EKPRIDE AKAN KE OTU MBUFO OKPON’
8. Ntak emi mbon emi ẹdude ke esop Jehovah ẹkpesụhọrede idem?
8 Mbon oro ẹsụhọrede idem ẹkop inem esop Abasi ẹnyụn̄ ẹbere ye ndutịm esop mmọ. Da Petra ke uwụtn̄kpọ. Enye edi eyenan̄wan emi ẹkebọkde ke ubon Mme Ntiense. Enye ama ọkpọn̄ esop Abasi ke ntak emi enye okoyomde ndidu uwem nte enemde enye. Ke ediwak isua ẹma ẹkebe, Petra ama afiak ọnyọn̄ edi esop Abasi. Esop Jehovah enenem enye idahaemi, ndien enye enen̄ede ama ndibere ye ndutịm esop mmọ. Nso inam enye okpụhọde ntem? Enye ewet ete: “Man n̄keme ndikop inem esop Abasi, n̄kenyene ndikpep ndisụhọde idem nnyụn̄ mfiọk ukeme mi.”
9. Didie ke owo emi osụhọrede idem ada Bible ye mme n̄wed esop Abasi, ndien didie ke edu emi anam enye ọsọn̄ urua ke enyịn Abasi?
9 Owo emi osụhọrede idem enen̄ede ama kpukpru n̄kpọ emi Jehovah ọnọde nnyịn, esịnede udia eke spirit. Ke ntre, enye esinen̄ede ekpep Bible onyụn̄ ama ndikot Enyọn̄-Ukpeme ye Awake! Enye esinam nte ediwak mme anam-akpanikọ asan̄autom Jehovah eken, ayak emehe enye ndisikot mbufa n̄wed n̄kụre mbemiso emende enye ekenịm ke itie ubon n̄wed esie. Edieke iwụtde ke imosụhọde idem inyụn̄ iwụt esịtekọm ke ndisikot nnyụn̄ n̄kpep mme n̄wed esop Abasi, nnyịn iyetetịm ikpere Abasi, ndien enye ayada nnyịn anam n̄kpọ ke esop esie.—Heb. 5:13, 14.
10. Didie ke ikeme ndinịm idem ke n̄kpri-n̄kan ke esop nnyịn?
10 Owo emi enịmde idem ke n̄kpri-n̄kan ‘okpon’ ke usụn̄ en̄wen. Jehovah ada edisana spirit esie emek irenowo ke kpukpru esop ete ẹdi mbiowo. Mmọ ẹsinam ndutịm ẹnọ utọ n̄kpọ nte mbono esop, mbono an̄wautom, ye utom ubọkerọn̄. Edieke inịmde idem ke n̄kpri-n̄kan inyụn̄ iberede ye ndutịm emi, nnyịn iyanam idatesịt, emem, ye edidianakiet ẹdu ke esop. (Kot Mme Hebrew 13:7, 17.) Edieke edide ebiowo m̀mê asan̄autom unamutom, ndi oro ikpanamke osụhọde idem onyụn̄ okop inemesịt ke Jehovah ọnọ fi utọ akwa ifetutom emi?
11, 12. Nso edu edinam nnyịn inen̄ede inyene ufọn ke esop Jehovah, ndien ntak emi edide ntre?
11 Owo emi enịmde idem ke n̄kpri-n̄kan ‘okpon’ onyụn̄ ọsọn̄ urua ke esop Jehovah koro nsụhọdeidem esie anam enye edi eti asan̄autom Abasi. Jesus ọkọdọhọ mme mbet esie ẹnịm idem ke n̄kpri-n̄kan koro ndusụk mmọ ẹkesikere n̄kpọ nte mbon eyo mmọ oro ẹkedade idem ke n̄kpọ ẹkaha. Luke 9:46 ọdọhọ ke “eneni [ama] edemede ke otu mmọ aban̄a m̀mê anie edi n̄kponn̄kan ke otu mmimọ.” Ndi nnyịn n̄ko imekeme nditọn̄ọ ndikere ke imọfọn ikan nditọete nnyịn m̀mê mbon en̄wen? Ediwak owo ke ererimbot ẹkohode idem ẹnyụn̄ ẹkere ẹban̄a idemmọ ẹkaha. Ana isụhọde idem mbak idikpebe mbon n̄kohodeidem. Nditọete nnyịn ẹyema ndidian idem ye nnyịn edieke isụhọrede idem inịm uduak Jehovah akpa ke uwem nnyịn.
12 Edieke item Jesus emi aban̄ade edinịm idem ke n̄kpri-n̄kan an̄wan̄ade nnyịn, iyama ndisụhọde idem kpukpru ini. Ẹyak ineme iban̄a idaha ita emi ọfọnde ndisụhọde idem.
DOMO NDINỊM IDEM KE N̄KPRI-N̄KAN
13, 14. Didie ke ebe m̀mê n̄wan ekpenịm idem ke n̄kpri-n̄kan, ndien didie ke emi edinam ndọ mmọ ọfọn?
13 Ke ndọ. Ediwak owo mfịn ẹsinen̄ede ẹkere ẹban̄a unen mmọ, ikereke iban̄a eke mbon en̄wen. Edi mbon emi ẹnịmde idem ke n̄kpri-n̄kan ẹdu uwem nte Paul ọkọdọhọde nditọete ke Rome ẹdu. Paul ekewet ete: “Ẹyak nnyịn ibịne mme n̄kpọ oro ẹnamde emem odu ye mme n̄kpọ oro ẹbọpde kiet eken.” (Rome 14:19) Owo emi enịmde idem ke n̄kpri-n̄kan esisịn ukeme ndidu ke emem ye kpukpru owo, akpan akpan ye edima an̄wan m̀mê ebe esie.
14 Ẹyak ida edinam ini nduọkodudu ke uwụtn̄kpọ. Se ebe amade ndinam ke ini nduọkodudu ekeme ndikpụhọde ye se n̄wan esie amade. Ebe ekeme ndima nditie ke ufọk n̄kot n̄wed, edi n̄wan ama ndika n̄kese mme ufan esie. Edieke ebe osụhọrede idem ekere aban̄a se n̄wan esie amade ye se enye mîmaha utu ke ndikere mban̄a se enye ikpọn̄ amade, n̄wan esie eyenen̄ede okpono enye. N̄ko, edieke n̄wan ekerede aban̄a ebe esie, mînyụn̄ ikereke ke ana esidi ke uyo imọ kpukpru ini, ebe esie eyenen̄ede ama enye. Ebe ye n̄wan ẹyenen̄ede ẹdiana ẹnyụn̄ ẹma kiet eken edieke owo mmọ kiet kiet enịmde idem ke n̄kpri-n̄kan.—Kot Philippi 2:1-4.
15, 16. Nso utọ edu ke David ekesịn udọn̄ ọnọ nnyịn ete inyene ke Psalm 131, ndien didie ke emi akpanam inam n̄kpọ ke esop?
15 Ke esop. Ediwak owo ke ererimbot ẹsiyom ndisọsọp nnyene se idọn̄de mmọ. Mmọ inyeneke ime, inyụn̄ imaha ndisitie mbet n̄kpọ. Ndinịm idem ke n̄kpri-n̄kan an̄wam nnyịn ibet Jehovah. (Kot Psalm 131:1-3.) Jehovah ọyọdiọn̄ nnyịn edieke isụhọrede idem ibet enye; iyokop ndọn̄esịt, esịt oyonyụn̄ enem nnyịn. Emi akanam David esịn udọn̄ ọnọ nditọ Israel ete ẹnyene ime ẹbet Abasi.
16 Ntem ke edinyụn̄ itie fi ke idem edieke osụhọrede idem ebet Jehovah. (Ps. 42:5) Yak idọhọ ke ‘omoyom eti utom,’ ndien ke “anyanarede ebịne itieutom esenyịn.” (1 Tim. 3:1-7) Imọfiọk ke ana esịn ofụri ukeme ayak edisana spirit an̄wam fi enyene mme edu emi anade esenyịn enyene. Edi nso ke edinam edieke anade ebet ebịghi akan nte mbon en̄wen ẹkebetde? Owo emi enịmde idem ke n̄kpri-n̄kan eyenyene ime etie ebet ifetutom, aka iso anam n̄kpọ Jehovah ye idatesịt, onyụn̄ oyụhọ ye ifetutom ekededi emi ẹnọde enye idahaemi.
17, 18. (a) Nso idi ufọn edikpe owo ubọk ye ufọn edinyịme ndifen nnọ mbon en̄wen? (b) Nso ke Mme N̄ke 6:1-5 ọdọhọ nnyịn inam?
17 Nte inamde n̄kpọ ye mbon en̄wen. Esisọn̄ ediwak owo ndikpe owo ubọk. Edi mme asan̄autom Abasi ẹsinịm idem ke n̄kpri-n̄kan, ẹnyịme ndudue mmọ, ẹnyụn̄ ẹkpe owo ubọk. Mmọ ẹsinyịme ndifen nnọ mbon en̄wen n̄ko. N̄kohodeidem esitọ ubahade onyụn̄ esịn utọk ke otu mme owo, edi edifen nnọ esinam emem odu ke esop.
18 Ekeme ndiyom ‘isụhọde idem’ ikpe owo ubọk ke ini n̄kpọ emi nnyịn mîkemeke ndinyan̄a anamde nnyịn ikûnam se ikọn̄wọn̄ọde ndinam. Edieke emi etịbede, ikpenyene ndikere mban̄a ndudue nnyịn inyụn̄ inyịme ndikpe ubọk idem ọkpọkọm owo enye eken etiene enyene nduduọhọ.—Kot Mme N̄ke 6:1-5.
19. Ntak emi nnyịn imade nte Bible ekpepde nnyịn ndinịm idem ke n̄kpri-n̄kan?
19 Imenen̄ede ima nte Bible ekpepde nnyịn ete inịm idem ke n̄kpri-n̄kan. Kpa ye emi ekemede ndisọn̄ nnyịn ndisụhọde idem ndusụk ini, nditi adan̄a nte Jehovah okponde akan nnyịn ye nte ke enye osụhọde idem ekeme ndin̄wam nnyịn isụhọde idem n̄ko. Nsụhọdeidem ayanam isọn̄ urua ke enyịn Jehovah. Ke ntre, ẹyak kpukpru nnyịn isịn ofụri ukeme inịm idem ke n̄kpri-n̄kan.
[Ikọ Idakisọn̄]
^ ikp. 5 Ẹkpụhọ mme enyịn̄.
[Mme Mbụme Ukpepn̄kpọ]
[Ndise ke page 16]
Jehovah okpono nnyịn ke ndinọ nnyịn ifet ndikwọrọ eti mbụk
[Mme ndise ke page 19]
Mme ifet ewe ẹberede ẹnọ fi ndinịm idem ke n̄kpri-n̄kan̄?
