1, 2. ¿Mbaʼépa Jesús omboʼe ijapostolkuérape, ha mbaʼérepa?

 ÁÑO 32-pe Jesús ha ijapostolkuéra oĩ Galiléape. Lucas kuatiañeʼẽ omombeʼu mbaʼépa ojapo umi apóstol upérõ guare: “Oñepyrũ ojodiskuti hikuái oikuaa hag̃ua mávapa tuichave ijapytepekuéra. Jesús oikuaa mbaʼépa opensa hikuái, upévare ogueru peteĩ mitãʼi, omoĩ ijykére, ha heʼi: ‘Oimeraẽ orresivíva ko mitãme che rérape, cherresivi avei chéve. Ha oimeraẽ cherresivíva, orresivi avei pe chembouvaʼekuépe. Pe oñemomichĩvéva pende apytépe, upéva hína pe tuichavéva’” (Lucas 9:46-48, NM). Jesús ningo ipasiénsia hesekuéra, upéicharõ jepe oñemoñeʼẽ mbarete ha heʼi chupekuéra tekotevẽha hekomirĩ.

² ¿Opensápa umi hudío upe tiempopegua Jesús omboʼéva oĩ porãha térã oĩ vaiha? Peteĩ diksionário ohechauka mbaʼéichapa oñepensa upérõ guare: “Oimeraẽ situasiónpe umi hudío ohecha mávapa hína upe tuichavéva, ha ohaʼarõ voi hikuái ojerrespeta upéva” (Theological Dictionary of the New Testament [Diccionario teológico del Nuevo Testamento]). Péro Jesús heʼi hemimboʼekuérape nopensaivaʼerãha umi hénteicha.

3. a) ¿Mbaʼépa heʼise jaikovaʼerãha ‘pe oñemomichĩvévaicha’, ha mbaʼérepa sapyʼánte hasy jajapo hag̃ua upéva? b) ¿Mbaʼépa ñambohováita ko artíkulope?

³ Pe ñeʼẽ griégo ojetradusíva “pe oñemomichĩvéva”, heʼise oñemomirĩva, ndaijejapóiva ha noñemoimportánteiva. Jesús omoĩ ijapostolkuéra renondépe peteĩ mitãʼi omboʼe hag̃ua chupekuéra iñumílde ha noñembotuichaivaʼerãha. Upe konsého ideprovechoiterei avei ñandéve koʼag̃aite  peve. Péro sapyʼánte hasy jepi ‘ñañemomichĩ’ hag̃ua. Ñaneimperfékto rupi, ñañembotuichase ha jaikose ñandevaleverõguáicha oimeraẽvagui. Umi hénte ko mundopegua ningo oñemotenondese hapichakuérare, ha ñande ñapensáramo upéicha, ikatu avei ñañembotuicha, jaiko vaise ha jarekoséta ñande poguýpe ñande rapichápe. ¿Mbaʼépa ñanepytyvõta jaiko hag̃ua ‘pe oñemomichĩvévaicha’? ¿Mbaʼéichapa ñantendevaʼerã pe téysto heʼíva: “Pe oñemomichĩvéva [...], upéva hína pe tuichavéva”? ¿Mbaʼéicha javépa jahechaukavaʼerã ñanderekomirĩha? Jahechamína koʼã mbaʼe.

4, 5. ¿Mbaʼéichapa ikatu jahechauka ñanderekomirĩha? Emoĩ peteĩ ehémplo.

⁴ Ñanemanduʼavaʼerã ñande ndahaʼeiha mbaʼeve Jehová rovake, haʼe tuichaitereive ñandehegui. Upéva ñanepytyvõta ñaneumílde hag̃ua. La Biblia heʼi Ñandejára ‘arandu ndaijapyraiha’ (Is. 40:28). Pablo avei ohai: “¡Ajépa ipypukuete Ñandejára mbaʼeta, arandu ha mbaʼekuaa! Avave ndaikatúi omyesakã umi mbaʼe haʼe ojapóva ni oikuaa hapekuéra” (Rom. 11:33, NM). Ojapóma ningo dos mil áño ko téysto ojehai hague, ha yvyporakuéra hetaiterei mbaʼéma oaprende upe rire, péro jaʼekuaa Pablo heʼivaʼekue añeteha koʼag̃aite peve. Jaikuaáramo jepe heta mbaʼe, ñarrekonosevaʼerã arakaʼeve ndajaikuaapamoʼãiha Jehovápe, hembiapokue, ni umi mbaʼe opensáva.

⁵ Ikatu hag̃uáicha jaiko ‘pe michĩvévaicha’, jahechakuaavaʼerã ndaikatumoʼãiha jaikuaapa Jehová rape. Upéva oiko Leo rehe. a Chupe ogustavaʼekue pe siénsia imitã guive ha oikuaase ikatúva guive pe univérsogui, upévare ostudia Astrofísica. Péro upéi omombeʼu: “Che estúdio rupive ahechakuaa pe siénsia nañanepytyvõiha ñantendepaite hag̃ua ko univérso”. Upémarõ Leo odesidi ostudia avogadorã ha oiko chugui fiskál ha hués. Tiémpo rire haʼe ha hembireko ostudia la Biblia ha oiko chuguikuéra testígo de Jehová. ¿Mbaʼépa oipytyvõ ko karai aranduetépe oiko hag̃ua peteĩ ‘michĩvévaicha’? Haʼe heʼi: “Ahechakuaa oĩha hetaiterei mbaʼe ndajaikuaáiva gueteri Jehovágui ha pe arapýgui, jepe hetáma jastudia”.

6, 7. a) ¿Mbaʼeichagua ehémplopa omoĩ ñandéve Jehová? b) ¿Mbaʼéichapa Jehová ñanembotuicha hekomirĩ haguére?

⁶ Jaikuaávo Jehová hekomirĩha ñanepytyvõ  avei ani hag̃ua ñañemombaʼeguasuse. Ñanemanduʼavaʼerã ‘Ñandejára ajudanteha ñande’ (1 Cor. 3:9, NM). ¡Ajépa tuichaite mbaʼe Jehová oheja haguére ñaipytyvõ chupe! Haʼe tuichaiteve ñandehegui, upéicharõ jepe omeʼẽ ñandéve oportunida ñamombeʼu hag̃ua pe marandu porã jaiporúvo Iñeʼẽ, la Biblia. Ñandejára ningo omongakuaa umi semílla, péro omeʼẽ ñandéve pe priviléhio ñambaʼapo hag̃ua hendive ñañotỹ ha jarregávo (1 Cor. 3:6, 7). Péicha Jehová omoĩ peteĩ ehémplo porã ñanemomýiva jaiko hag̃ua peteĩ ‘oñemomichĩvévaicha’.

⁷ David ohechakuaa Jehová hekomirĩha ha omombaʼeterei upéva. Upéicha rupi opurahéi: “Remeʼẽ avei chéve [nde eskúdo] chesalva hag̃ua, ha [nderekomirĩ rupi] chembotuicha” (2 Sam. 22:36, ÑÑB). David orrekonose Jehová iñumildeha ohendu ha oipytyvõ haguére chupe ohupyty hag̃ua umi mbaʼe tuicháva Israélpe (Sal. 113:5-7). Upéicha avei Jehová ñanepytyvõ koʼág̃a peve. Haʼe rupínte ñandekatupyry, jahupyty umi priviléhio ha jahechauka heta mbaʼe porã jaiko lájare (1 Cor. 4:7.) Upéicharõ, ¿mbaʼérepa ‘tuichave’ peteĩ oikóva ‘pe oñemomichĩvévaicha’? Jehová ikatu rupi oiporu porãve chupe (Luc. 9:48, nóta). Jahechamína mbaʼérepa jaʼe upéva.

8. ¿Mbaʼérepa tekotevẽ ñanderekomirĩ ñaime hag̃ua Jehová organisasiónpe?

⁸ Tekotevẽ ningo ñanderekomirĩ ikatu hag̃uáicha javyʼa Jehová organisasiónpe ha ñaipytyvõ kongregasiónpe. Peteĩ kuñataĩ hérava Petra ohechakuaa upéva. Itúva ha isy ningo Testígo, péro haʼe oñepyrũ oiko iñakãre ha oñemomombyry Ñandejáragui. Tiémpo rire oho meme jey rreunionhápe ha koʼág̃a vyʼapópe oservi Jehovápe ha ombaʼapo kyreʼỹ kongregasiónpe. ¿Mbaʼépa oipytyvõ chupe okambia hag̃ua? Haʼe heʼi: “Añeñandu porã hag̃ua Ñandejára organisasiónpe, tekotevẽvaʼekue cherekomirĩ ha arrekonose ndaikuaaiha térã ndaikatuiha ajapo heta mbaʼe”.

9. ¿Mbaʼéichapa pe kristiáno hekomirĩva ohecha umi mbaʼe oúva Ñandejáragui, ha mbaʼéichapa upéva oipytyvõ chupe ikatu hag̃uáicha ideprovechove Jehová servísiope?

⁹ Pe kristiáno hekomirĩva omombaʼe ipyʼaite guive Jehová omeʼẽva omombarete hag̃ua ñande jerovia. Ohesaʼỹijo porã la Biblia ha olee meme Ñemañaha ha ¡Despertad! Ha ojapoháicha opavave Jehová siérvo iñeʼẽrendúva, oleepa umi puvlikasión osẽ ramóva oñongatu mboyve ivivliotékape. Olee ha ostudiávo umi puvlikasión ohechauka hekomirĩha ha oñakãrapuʼãha ohóvo. Péicha Jehová ikatu oiporu porãve chupe iñorganisasiónpe (Heb. 5:13, 14).

10. ¿Mbaʼéichapa ikatu jaiko pe ‘oñemomichĩvévaicha’ kongregasiónpe?

¹⁰ Jahechamína mbaʼéichapa peteĩ ‘oñemomichĩvévagui’ ikatu avei oiko “pe tuichavéva” Jehová renondépe. Entéro kongregasiónpe oĩ ansiáno oñenombravaʼekue espíritu sánto rupive. Haʼekuéra omotenonde opa tembiapo ojejapóva kongregasiónpe, pór ehémplo umi rreunión, predikasión ha pastoréo. Ñanderekomirĩramo ha ñaipytyvõ chupekuéra, javyʼa, ñandepyʼaguapy ha ñaimemba peteĩ ñeʼẽme kongregasiónpe (elee Hebreos 13:7, 17).  Oiméramo jaservi siérvo ministeriál térã ansiánoramo, ñaneumildevaʼerã ha jaagradese Jehovápe ñande pyʼaite guive omeʼẽ haguére ñandéve upe priviléhio.

11, 12. ¿Mbaʼépa ñanepytyvõta ñandedeprovechove hag̃ua Jehová organisasiónpe, ha mbaʼérepa jaʼe upéva?

¹¹ Peteĩ oikóva ‘pe michĩvévaicha’, ‘tuichave’ hína, térã ideprovechove Jehová organisasiónpe. ¿Mbaʼérepa jaʼe upéva? Hekomirĩvo ikatu oipytyvõ ha omokyreʼỹ ótrope. Jesús omboʼevaʼekue hemimboʼekuérape hekomirĩ hag̃ua oĩ rupi ijapytepekuéra opensáva avei umi hénte upe tiempopegua opensaháicha. Lucas 9:46 heʼi: “Oñepyrũ ojodiskuti hikuái oikuaa hag̃ua mávapa tuichave ijapytepekuéra”. ¿Ha ñande? ¿Oimépa ñaimoʼã ñandevaleveha ñane ermanokuéragui térã oimeraẽvagui? Heta hénte ko mundopegua oñemombaʼeguasu ha opensa ijehénte. Upévare ñaneumildevaʼerã ha ñañehaʼãmbaite ani hag̃ua ñapensa haʼekuéraicha. Jajapóramo upéicha ha ñamotenonde Ñandejára rembipota, tuichaiterei ñaipytyvõta ñane ermanokuérape.

¹² Ñantendéramo mbaʼépa heʼise jaikovaʼerãha ‘pe michĩvévaicha’, ñanepytyvõta ñanderekomirĩ hag̃ua opa mbaʼe jajapóvape. Jahechamína koʼág̃a mbaʼéichapa ikatu jahechauka upéva mbohapy hendáicha.

13, 14. ¿Mbaʼéichapa umi omendáva ohechauka oikoha ‘pe michĩvévaicha’, ha mbaʼéichapa upéva oipytyvõta chupekuéra?

¹³ Ne matrimóniope. Koʼág̃a rupi heta oĩ opensáva ijehénte ha ombovaleséva ideréchonte, ohasapáramo jepe hapichakuéra ári. Péro peteĩ persóna hekomirĩva ojapo apóstol Pablo heʼivaʼekue: “Jajapo memékena opa mbaʼe oguerúva pyʼaguapy ha ñañopytyvõ ñanembarete hag̃ua” (Rom. 14:19, NM). Peteĩ oikóva ‘pe oñemomichivévaicha’ oñehaʼãmbaite ojogueraha porã opavavéndi, koʼýte hembiayhúndi.

¹⁴ Sapyʼánte umi omendáva ikatu ojoavy ogustávape chupekuéra. Pór ehémplo, ikatu peteĩ ména opytase hógape itiémpo lívre jave olee hag̃ua. Péro hembireko ohose iñangirũkuéra rógape térã osẽse osena upérupi. Chupe g̃uarã ningo ndahasymoʼãi orrespeta iménape ohecháramo hekomirĩha ha nopensaiha ijehénte, síno avei oñeinteresaha hese. Pe ména katu ohayhuve ha omombaʼevéta hembirekópe ohechávo noñehaʼãiha okonsegi haʼe oipotávante. Mokõivéva oikóramo ‘pe michĩvévaicha’, imatrimónio imbaretevéta (elee Filipenses 2:1-4).

15, 16. ¿Mbaʼe konséhopa omeʼẽ David Salmo 131-pe, ha mbaʼéichapa upéva ñanepytyvõ kongregasiónpe?

¹⁵ Kongregasiónpe. Ko múndope heta hénte ohupytyseterei oipotáva ha pyaʼe voi okonsegise. Nohaʼarõséi hikuái ha naipasiénsiai. Péro ñande jaservíva Jehovápe jaiko ‘pe oñemomichĩvévaicha’ ha upéva ñanepytyvõ ñahaʼarõkuaa ha jajeroviave hag̃ua (elee Salmo 131:1-3). Ñaneumílde ha ñanepasiénsiaramo, jaikóta pyʼaguapýpe, ñañeñandu porãta, javyʼáta ha jahupytýta heta mbaʼe Jehovágui. ¡Ndareíri David omokyreʼỹvaʼekue umi isrraelítape oheja hag̃ua opa mbaʼe Jehová pópe!

¹⁶ Katuete ndepyʼaguapýta rejeroviáramo  Jehováre ha rehaʼarõkuaárõ (Sal. 42:5). Ikatu oime reipytyvõseve umi ermáno oĩvape ne kongregasiónpe ha ‘reñehaʼãmbaite reservi hag̃ua ansiánoramo’ (1 Tim. 3:1-7, NM). Jaikuaaháicha, reñehaʼãmbaitevaʼerã ikatu hag̃uáicha pe espíritu sánto nepytyvõ rekumpli hag̃ua tekotevẽva guive reservi hag̃ua ansiánoramo. Péro, ¿mbaʼépa rejapóta rehecháramo ótro ermánope raẽ oñenombraha ha haʼete ndéve aréma rehaʼarõ hague? Oiméramo reiko umi ‘oñemomichĩvévaicha’, nepasiénsiata ha revyʼáta reservívo Jehovápe, tahaʼe haʼéva pe tembiapo oñemeʼẽva ndéve.

17, 18. a) ¿Mbaʼépa ikatu ojehupyty jajeruréramo diskúlpa ha ñaporoperdonakuaáramo? b) ¿Mbaʼe konséhopa omeʼẽ Proverbios 6:1-5?

¹⁷ Retratávo nde rapichakuérape. Saʼi ningo oĩ ojediskulpáva ofalla rire. Péro Ñandejára siervokuéra ohechauka hekomirĩha orrekonosévo ojavy hague ha ojerurévo perdón. Avei oĩramo ofalláva hendivekuéra, oñehaʼãmbaite oporoperdona. Umi oñemombaʼeguasúva ojoavy hapichakuérandi ha oiko vaisénte voi, umi oporoperdonáva katu oipytyvõ oĩ hag̃ua pyʼaguapy kongregasiónpe.

¹⁸ Jahechaukavaʼerã avei ñaneumildeha jajerurévo diskúlpa ñande pyʼaite guive nañakumplíri haguére peteĩ kompromíso jajapovaʼekue. Ikatu ningo jafalla ótro káusare, péro ñanderekomirĩramo ñarrekonoséta ñande avei jajavy hague (elee Proverbios 6:1-5).

19. ¿Mbaʼérepa jaagradesevaʼerã la Biblia ñanemokyreʼỹ haguére jaiko hag̃ua ‘pe oñemomichĩvévaicha’?

¹⁹ ¡Ajépa javyʼaite la Biblia ñanemokyreʼỹ haguére jaiko hag̃ua ‘pe oñemomichĩvévaicha’! Jaikuaaháicha, sapyʼánte hasy ñandéve ñaneumílde hag̃ua, péro ñanemanduʼavaʼerã Jehová hekomirĩha tuichaitevéramo jepe ñandehegui. Upéva ñanepytyvõta ñaneumílde hag̃ua ha ñandedeprovechovéta Jehová organisasiónpe. Upéicharõ, jaikókena akóinte ‘pe oñemomichĩvévaicha’.