1, 2. Iesu ese ena aposetolo taudia dekenai dahaka ia hadibaia, bona dahaka dainai unai bamona ia karaia?

 LAGANI 32 C.E. ai, Iesu bona ena aposetolo taudia be Galilea dekenai idia noho. Aposetolo taudia haida be idia huanai daika be bada idia hepapahuahulaia. Evanelia bukana ia torea tauna Luka, ia gwau: “Hahediba taudia be sibodia huanai idia hepapahuahu, daika be ia bada. Iesu be edia lalohadai ia diba dainai, natuna maragina ta ia abia bona ia badinai ia haginia, bona idia dekenai ia gwau: ‘Lauegu ladanai inai natuna maragina ta ia abia dae tauna ese lau danu ia abia dae, bona lau ia abia dae tauna ese lau ia siaia Tauna danu ia abia dae. Badina umui ibounai huanai ia maragi tauna be do ia bada.’” (Luka 9:46-48) Iesu be mai haheauka ida ena aposetolo taudia ia hadibadia, sibona edia ladana idia abia isi lasi totona.

² Iesu ese aposetolo taudia dekenai ia hadibaia lalohadaina be, Iuda taudia edia lalohadai hegeregerena, a? Lasi. Iesu ese ia hadibadia dalana be idau. Buka ta (Theological Dictionary of the New Testament) ia gwau, Iuda taudia be dagi idia laloa bada. Bona edia dagi hegeregerena ai, ta ta dekenai hemataurai karana idia hahedinaraia. Iesu ia ura ena hahediba taudia be unai lalohadai do idia dadaraia.

3. (a) “Ladana maragi tauna” ena anina be dahaka? Dahaka dainai nega haida manau karana ita hahedinaraia be auka? (b) Inai stadi lalonai edena henanadai do ita haerelaidia?

³ Greek herevana idia hahanaia “ladana maragi tauna” ena anina be, ta be sibona ia laloa bada lasi, ia be dagi lasi o siahu lasi bona manau tauna. Unai bamona tauna be ia hekokoroku lasi, bona ia laloa lasi ia ese ma haida ia hereaia. Iesu ese aposetolo taudia ia hadibaia natudia bamona do idia manau.  Ita Keristani taudia dekenai, Iesu ese aposetolo taudia dekenai ia hadibaia gauna be mai anina bada. Reana, nega haida manau karana ita hahedinaraia be auka. Ita be goevadae lasi taudia dainai, nega haida do ita hekokoroku bona ita ura ma haida ita hereaia. Danu, reana Satani ena tanobada ese ita ia veria sibona eda namo ita laloa bada, haida ida ita kara helulu, bona ita ura idia ita biagua. Dahaka ese ita ia durua ita hekokoroku lasi totona? Inai hereva, “ia maragi tauna be do ia bada” ena anina be dahaka? Edena bamona negadiai manau karana ita hahedinaraia be namo?

4, 5. Dahaka ese ita ia durua ita hekokoroku lasi totona? Haheitalai ta gwauraia.

⁴ Hekokoroku karana ita dadaraia totona, namona be ita laloatao Iehova ese ita ia hereaia. Iehova ia diba gaudia ibounai be ta ese ia davaria diba lasi. (Isa. 40:28) Aposetolo Paulo ese Iehova ena siahu ia herevalaia, ia gwau: “Dirava ena taga, ena aonega bona ena diba be dobu momokani! Iena hahemaoro karadia be ta ese ia tahua diba lasi, bona ena dala ibounai be ta ese ia lalopararalaia diba lasi!” (Roma 11:33) Lagani 2,000 gunanai Paulo ese unai ia torea, bona taunimanima be gau momo idia diba vadaeni. To, Paulo ena hereva be do mai anina bada. Ena be gau haida ita diba, to Iehova ia karaia gaudia bona ena lalohadai dekenai gau momo ita do diba lasi.

⁵ Mani Leo ena sivarai ita laloa. Ia laloparara ia hegeregere lasi Dirava ese ia havaraia gaudia ibounai ia dibaia totona, bona unai dainai ia hekokoroku lasi. a Leo be mero matamata neganai, saiens ia ura henia bada. Ia ura iunives ena gaukara dalana do ia lalopararalaia namonamo, unai dainai sikuli ai saiens ia stadilaia. To, ia laloparara saiens sibona ese taunimanima ia durua lasi, iunives ena gaukara dalana ibounai idia lalopararalaia totona. Unai dainai loea sikuli ia karaia, loea tauna ai ia lao, bena gabeai diadi gaukara ia karaia. Gabeai, ia bona ena adavana be Iehova ena Witnes taudia ida Baibel idia stadilaia, hereva momokani idia abia dae bona idia bapatiso. Ena be Leo ena diba be bada, to dahaka ese ia durua ia hekokoroku lasi totona? Ia gwau: “Lau laloparara Iehova bona iunives ena gaukara dalana dekenai gau momo herea ita do diba lasi.”

6, 7. (a) Edena dala ai Iehova be manau karana ia hahedinaraia? (b) Edena dala ai Dirava ena manau karana dainai, ladana maragi tauna be “do ia bada”?

⁶ Ita hekokoroku lasi totona, ita ia durua  gauna ma ta be, do ita laloatao Iehova danu be manau karana ia hahedinaraia. Baibel ia gwau: ‘Ita be Dirava ida ita gaukara hebou taudia.’ (1 Kor. 3:9) Mani oi laloa, Ataiai Momokani Diravana, Iehova ia ura ia ida ita gaukara hebou! Ia ese ita ia matauraia dainai Baibel ia henia, bona ita gaukaralaia diba sivarai namona ita harorolaia totona. Ena be Iehova ese uhe ia hatubua, to uhe hadoa bona dairia gaukarana be ita dekenai ia henia. (1 Kor. 3:6, 7) Unai dala amo, Dirava ese manau karana dekenai haheitalai namona ia hahedinaraia. Oibe, namona be Iehova ena haheitalai ese ita ta ta ia hagoadaia ita hekokoroku lasi totona!

⁷ Davida be Dirava ena manau karana ese ia durua bada dainai, Iehova dekenai inai ane ia abia: “Lohiabada e, oi ese lau oi gimaia, bona lau oi hamauria, bona oi ese lau oi durua dainai, lau be tau badana lau lao.” (2 Sam. 22:36) Davida ia diba ia ese Israela ai gau badadia ia karaia, badina Iehova be ia dekenai manau karana ia hahedinaraia bona ia durua. (Sal. 113:5-7) Iehova be ita dekenai unai bamona ia karaia danu. Iseda kara namodia, diba bona hahenamo idauidau be Iehova amo ita abia. (1 Kor. 4:7) Iesu ia gwau, sibona ena ladana ia abia isi lasi tauna be “do ia bada” anina be, unai tauna be Iehova ena hesiai tauna namona ai do ia lao. (Luka 9:48) Mani unai ita herevalaia.

8. Dahaka dainai Dirava ena orea lalonai idia noho taudia idia hekokoroku lasi be namo?

⁸ Idia manau taudia be Dirava ena orea lalonai idia moale, bona kongrigeisen ena gaukara dalana idia durua. Hegeregere, kekeni matamata ta, Petra bona ena ruma bese be Witnes taudia. To, ia be sibona ena ura ia badinaia bona kongrigeisen ia rakatania. Lagani haida murinai, kongrigeisen dekenai ia giroa lou. Hari, Petra ia moale badina Dirava ena orea lalonai ia noho, bona kongrigeisen ena gaukara dalana ia durua. Dahaka ese Petra ia durua ena lalohadai ia haidaua totona? Ia gwau: “Lau laloparara Dirava ena orea lalonai lau noho totona, namona be lau hekwarahi manau bona hekokoroku lasi karadia lau hahedinaraia totona.”

9. Hekokoroku lasi tauna ese Baibel, Gima Kohorona bona Awake! magasin be edena bamona ia laloa? Iehova be unai bamona tauna dekenai dahaka ia laloa?

⁹ Ia hekokoroku lasi tauna be Iehova ese ena taunimanima dekenai ia henia gau namodia ibounai, hegeregere Baibel, Gima Kohorona bona Awake! magasin ia stadilaia namonamo. Unai gaudia ese ita idia durua, Iehova ita diba namonamo totona. Iehova ena hesiai taudia momo be buka bona magasin matamatadia idia duahia guna, bena gabeai edia laiberi dekenai idia atoa. Bema ita manau bona iseda buka bona magasin ita duahia bona stadilaia, eda hetura karana Dirava ida do ia goada, bona ena hesiai gaukara idauidau lalonai ita do ia gaukaralaia.​—⁠Heb. 5:13, 14.

10. Edena dala ai kongrigeisen lalonai ita manau diba?

¹⁰ Sibona ena ladana ia abia isi lasi tauna be dala ma ta ai “do ia bada.” Kongrigeisen ibounai lalonai, Iehova ese lauma helaga amo tatau haida ia abia hidi elda gaukara idia karaia totona. Elda taudia be kongrigeisen hebou bona haroro grup idia gunalaia, bona mamoe naria gaukarana idia karaia. Bema ita manau bona elda taudia ida ita gaukara hebou, ita ese kongrigeisen ita  durua moale, maino bona lalotamona ai ia noho totona. (Heberu 13:7, 17 duahia.) Bona bema oi be elda o hesiai tauna ta, emu maduna be mai manau ida oi huaia, a?

11, 12. Iehova ena orea lalonai, edena kara be mai anina bada? Bona dahaka dainai?

¹¹ Iehova ena orea lalonai, sibona ena ladana ia abia isi lasi tauna be Iehova ese ia laloa bada, badina ena manau karana dainai ia be hesiai tauna namona ai ia lao diba. Iesu ese ena hahediba taudia ia sisiba henia do idia manau, badina idia haida be unai negai idia noho hekokoroku taudia edia lalohadai idia abia. Luka 9:46 ia gwau: “Hahediba taudia be sibodia huanai idia hepapahuahu, daika be ia bada.” Ita laloa ita ese eda tadikaka o ma haida ita hereaia, a? Namona be tanobada taudia amo ita idau, badina idia be hekokoroku bona sibona edia ura idia laloa bada taudia. Bema ita manau bona Iehova ena ura ita atoa guna, iseda tadikaka taihu be ita idia bamoa neganai, goada do idia abia.

¹² Iesu ena sisiba ita lalopararalaia neganai, ita ia durua iseda mauri lalonai manau ita hahedinaraia totona. Mani ita itaia edena dala ai, headava lalonai, kongrigeisen lalonai bona ma haida ita kara henia negadiai, manau karana ita hahedinaraia diba.

13, 14. Edena dala ai tau bona hahine ese manau karana idia hahedinaraia diba? Bona dahaka namo do idia davaria?

¹³ Headava lalonai. Hari, momo be sibona edia ura idia laloa bada, to ma haida edia ura idia laloa bada lasi. To, Paulo ese Roma Keristani taudia ia hamaoroa: “Namona be maino idia havaraia gaudia bona ma haida idia hagoadaia gaudia ita tahua noho.” (Roma 14:19) Manau tauna be unai bamona ia karaia. Anina be ia hekwarahi taunimanima ibounai ida, bona ena headava lalonai maino ia havaraia totona.

¹⁴ Hegeregere, tau ese ia ura henia moale karadia be reana ena adavana ese ia ura henia gaudia amo idia idau. Reana tau ia ura ruma ai ia noho bona TV ia raraia, to ena adavana ia ura do idia lao loaloa, o turadia idia vadivadi henidia. Bema tau ese manau karana ia hahedinaraia bona ena adavana ena ura gaudia ia laloa guna, ena hahine ese do ia matauraia be auka lasi. Bema hahine ese sibona ena ura gaudia ia tahua momo lasi, to ena adavana ena ura gaudia ia laloa guna, ena adavana ese ia do ia lalokau henia bona laloa bada. Edia headava do ia goada, bema idia ruaosi ese ta ta idia matauraia.​—⁠Filipi 2:1-4 duahia.

15, 16. (a) Mika be dahaka lalohadai ia abia? (b) Bona edena dala ai kongrigeisen lalonai unai bamona ita karaia diba?

¹⁵ Kongrigeisen lalonai. Hari inai negai, momo idia ura edia ura gaudia do idia abia haraga. Idia ura lasi idia naria. Bema ita manau, Iehova ita naria eiava abidadama henia be auka lasi. (Mika 7:7 duahia.) Bema ita manau Iehova ese ita do ia hanamoa​—⁠do ita noho namonamo, gari lasi bona moale. Namona be Mika hegeregerena, ita haheauka bona Dirava ita naria noho!

¹⁶ Danu, Davida bamona mai manau ida Iehova oi naria neganai, ia ese oi do ia durua. (Sal. 42:5) Reana oi ura elda tauna ai oi lao, unai amo kongrigeisen lalonai gaukara momo oi karaia diba. (1 Tim. 3:1-7) To, elda maduna oi abia totona namona be oi gaukara goada, bona lauma helaga ena heduru amo kara namodia do oi hahedinaraia. Bema haida  be elda maduna idia abia haraga, to oi do naria noho, dahaka do oi karaia? Ia manau tauna be mai haheauka ida ia naria ela bona maduna ia abia. Bona herevana dahaka gaukara idia henia, to ia be mai moale ida Iehova bona kongrigeisen do ia hesiai henia noho.

17, 18. (a) Edena dala toi amo manau karana ita hahedinaraia diba, bona dahaka namo do ia vara? (b) Aonega Herevadia 6:1-5 ena sisiba be dahaka?

¹⁷ Ma haida ita kara henia neganai. Momo ese sori herevana idia gwauraia be auka. To, Dirava ena hesiai taudia be inai dala toi amo manau karana idia hahedinaraia: (1) Edia kerere idia gwauraia hedinarai, (2) ma haida idia noia edia dika idia gwauatao, bona (3) idia ese ma haida edia kerere idia gwauatao danu. Hekokoroku taudia ese kongrigeisen lalonai hepapahuahu bona parara karana idia havaraia, to bema ma haida edia dika idia gwauatao, kongrigeisen lalonai maino do ia noho.

¹⁸ Namona be ita manau bona sori herevana ita gwauraia. Hegeregere, reana ta dekenai ita gwauhamata gau ta do ita karaia, to hekwakwanai ta ia vara dainai eda gwauhamata ita hagugurua lasi. Ena be ia vara gauna be iseda kerere lasi, to eda gwauhamata ita hagugurua lasi dainai, ia dekenai sori herevana ita gwauraia be namo.​—⁠Aonega Herevadia 6:1-5 duahia.

19. Dahaka dainai Baibel ena heduru ita moalelaia?

¹⁹ Ita moale badina Baibel ese ita ia durua ita hekokoroku lasi totona. Nega haida manau karana ita hahedinaraia be auka, to inai ita laloatao be namo: Ena be Iehova ese ita ia hereaia, to ia be manau karana ia hahedinaraia. Unai ese ita ia durua ita hekokoroku lasi totona. Ita manau neganai, ita be Iehova ena hesiai taudia namodia ai do ita lao. Oibe, namona be ita gaukara goada ladana maragi taudia ai ita lao totona.