Ikalenu Nayililu Yakudikehesha

‘Muntu wukudikehesha mukachi kenwenu ejima, diyi muneni.’—LUKA 9:48.

MUNATELI KUWANA ÑAKWILU?

Chumanyi chikutukwasha kwikala nayililu yakudikehesha?

Indi muntu wadikehesha wekalaña ñahi “muneni”?

Tunateli kudizoza ñahi mumaluwi, muchipompelu ninawakwetu?

1, 2. Kufumbanyi kwalejeliyi Yesu apostolu indi nawa muloñadi chayifumbililiyi?

 MWADIÑA muchaaka cha 32 C.E. Yesu wadiña munkambi yaÑaliliya hampinji yamwekeni kukala. Apostolu indi antesha atachikili kutadika nawu hinyi wadiña mukulumpi hakachi kawu. Nsoneki waNsañu Yayiwahi Luka wasonekeli nindi: “Mukachi kawu himukuvulumuka ntadi yakwila nawu nabadiki akwawu hinyi? Yesu chanamoniyi mudi nakutoñojokawu munyichima yawu, hakunona mwana wanyanya, hakumwimika kwakwihi nachikasa chindi; hakuyila nindi, Muntu wukutambula mwana wanyanyiwu mwijina dami nantambulami; wukuntambulami natambuli niyena wantemesheli; muntu nakehi mukachi kenwenu ejima, diyi muneni.” (Luka 9:46-48) Yesu wakwashili apostolu indi mumesu awunda ilaña chakadi kuhita mumbadi nindi adizozeña.

² Komana kufumba kwaYesu kwakudikehesha kwesekeni nanshimbi yawaYudeya amunkulakaji yatachi? Tahindi kwambukili? Hakuhosha hayuma yamwekeneña hayina mpinji, mukanda waTheological Dictionary of the New Testament walumbulula nawu: “Mpinji yejima, antu adihujoleleña nawu hinyi mukulumpi nawa antu adiña nakwakamena neyi chakwila muntu wejima amulemesheleña kwesekeja nachatela kumulemeshawu.” Yesu walejeleña apostolu indi nindi ekali ambukaku nawantu ejima.

3. (a) Indi kudikehesha kwatalisha mudihi nawa muloñadi chitukuhoshela netu kunateli kutukalila? (b) Malwihwinyi ehulañawu antu kutalisha hakwikala naspiritu yakudikehesha?

³ Mazu achiGiriki abalumunawu nawu ‘muntu wadikehesha’ atalisha kudi muntu wadizoza, wakehelamu, wanyanya, wabula kulemeshawu. Yesu  wazatishili mwana wanyanya kulonda apostolu indi eluki nawu atela kudizoza nikudikehesha. Iku kufumba kwazatikaña nikudi akwaKristu alala makonu neyi chikwazatikili muyaaka nkulakaji yatachi. Mpinji jikwawu, chatukalilaña kwikala namuchima wakudiwunjika. Twasemuka nachaaku chakudisamba chatuleñelaña kufwila kutuumbakana. Yaaku yakudibecha yikwetuwu antu amuchituñilu nispiritu yamukaayi yatuleñela tutachiki kudeta hebwambu, kuzuñañana nikukakeja akwetu yuma yinakubula kukeñawu. Chumanyi chikutukwasha kwikala naspiritu yakudikehesha? Indi ‘muntu wadikehesha mukachi ketu nateli kwikala ñahi muneni’? Twatela kwikala adizoza muyumanyi?

‘MAHETA NIMAANA NIYUMA YELUKAYI NZAMBI, O CHIYAKUNAMA!’

4, 5. Chumanyi chikutuleñela kwikala adizoza? Shimunenu chakutalilahu.

⁴ Njila yimu yitwatela kwikalilamu adizoza yidi yakwiluka netu Yehova watubadika nankashi. Muloña “kwosi wukushinshika mwaya kashinshi kinduku.” (Isa. 40:28) Kapostolu Pawulu wasonekeli kutalisha hamaana aYehova abadika nindi: “Maheta amaana nayuma yelukayi Nzambi, o chiyakunama! Wuñaji windi, o chiwakañanya kuwiluka! Njila jindi, o chijakañanya kujishinshika!” (Rom. 11:33) Hela chakwila antu aneluki yuma yayivulu nankashi kufuma hasonekeliyi Pawulu awa mazu yaaka 2,000 yinahituhu, awa mazu achidi kuzatika. Hela chakwila tweluka yuma yayivulu, twatela kwiluka netu kudi yuma yayivulu nankashi yitwatela kwiluka hadi Yehova, hanyidimu yindi ninjila jindi.

⁵ Leo * chelukiliyi nindi Nzambi wasweja kubadika chamuleñeleli yatachiki kudikehesha. Henohu wuchidi mukwenzi, Leo wakeñeli nankashi sayansi. Hamuloña wakukeña kwiluka chikupu yuma yamwiwulu, watachikili kudiza hanyilalanji, tutumbwa niyuma yikwawu nawa welukili chuma chalema. Wahosheli nindi: “Kutalisha hayuma yinadizileña, natachikili kwiluka nami sayansi hohu hiyinateli kukwasha antu kwiluka chikupu yileñaleña yejimaku. Dichi natachikili kudiza mudimu wakwikala ihaku.” Chimwahitili mpinji, Leo wekalili ihaku nawa kuhiñahu wekalili nsompeshi wamuchota. Nkumininaku, Leo niñodindi atachikili kudiza Bayibolu nawaYinsahu jaYehova, etejeli chalala nawa adihanini nakwikala ambuña Nzambi. Hela chakwila watañili nankashi, chumanyi chamukwashili Leo kudikehesha? Wahosheli jiika nindi, “Hela chakwila tukudiza yuma yayivulu nankashi hadi Yehova nihayileñaleña, kuchidi yuma yayivulu yitwatela kwiluka.”

6, 7. (a) Chakutalilahwinyi chakuhayamisha chakudizoza chatwinkayi Yehova? (b) Kudizoza kwaNzambi kwaleñelaña ñahi muntu kwikala “muneni”?

 ⁶ Chuma chikwawu chikutuleñela kudizoza chidi chakwila nawu Yehova yomweni wadizoza. Toñojokenu hanawa mazu: ‘Twakalakelaña hamu naNzambi.’ (1 Kor. 3:9) Chitoñojokenu! Yehova, Nzambi wabadika chikupu, watulemesha kuhitila mukutwinka kukooleka kwakuzata mumudimu wetu wakushimwina kuzatisha Izu, dindi Bayibolu. Hela chakwila Yehova diyi wakulishaña mbutu yitwatumbaña nikutukumwina, watwinka chifulu cheneni chakuzatila hamu nayena. (1 Kor. 3:6, 7) Komana chumichi hichinakumwekesha nawu Nzambi hadizozaku nehi? Eñañi, chakutalilahu chaYehova chakudizoza chatela kutuleñela wejima wetu twikaleña namuchima wakudizoza.

⁷ Chakutalilahu chaNzambi chakudizoza chamukwashili nankashi ñimbi yamasamu Davidi. Wamwimbilili Yehova nindi: “Wunanyinki nkebu yawamwinu wami; kuwunda kweyi kunanyinki kulema.” (2 Sam. 22:36) Davidi wakoñeli yuma yamaneni muIsarela hamuloña wakudizoza kwaYehova nawa Nzambi wadiña nakumutiyilila nikumukwasha. (Mas. 113:5-7) Dichelañayi Yehova nikudetu. Kutalisha hakwikala nayililu, wuswa nikukooleka kutukweti, yumanyi yitukweti ‘yitwabulili kutambula’ kudi Yehova? (1 Kor. 4:7) Muntu wadikehesha diyi ‘muneni’ muloña wekalaña muntu walema kumesu aYehova. (Luka 9:48) Tushinshikenu muchatalisha.

‘MUNTU WUKUDIKEHESHA MUKACHI KENU DIYI MUNENI’

8. Indi kudizoza kwatukwashaña ñahi kwovwahila ntanjikilu yamukuloñesha kwaYehova?

⁸ Antu adizoza azañalalaña nanyidimu yamukuloñesha kwaNzambi nawa ovwahilaña ntanjikilu yamuchipompelu. Chakutalilahu, shinshikenu hadi Petra, kankaña wakulili muchisaka chawaYinsahu. Hamuloña wakukeña kudilila yuma yakeñeleñayi, Petra wafumini muchipompelu. Chimwahitili yaaka, watachikili cheñi kudikunda nachipompelu. Chayinu mpinji nakudiluñisha mukuloñesha kwaYehova nawa wudi namuchima wakulondela ntanjikilu yamuchipompelu. Chumanyi chaletesheli yahimpi yililu yindi? Wasonekeli nindi: “Hakwila nikali wakasunuka mukuloñesha kwaNzambi, nateleleli kwiluka nikumwekesha yililu yiyedi yalema nankashi yakudizoza nikudikehesha.”

9. Muntu wadizoza wamwekeshaña spiritu yamuchidinyi hayakudya yakuspiritu yitwatambwilaña nawa wulokwinyi watambwilañayi?

⁹ Muntu wadizoza wahamekaña hayuma yaloñeshañayi Yehova, kushilahu niyakudya yakuspiritu. Muntu wamuchidiwu wadizaña chikupu Bayibolu nikutaña magazini aKaposhi Kakutalila niAwake! Kufwana ambuña aYehova ashinshika amavulu, nateli kwikala nachaaku chakutaña mukanda wejima wawuha henohu kanda yawishi hamesa hashañayi nyikanda yindi. Neyi tumwekesha muchima wakudizoza kuhitila mukutaña nikudiza munyikanda yetu yashindamena haBayibolu, tukupama kuspiritu nawa Yehova wukutuzatishaña chikupu mumudimu windi.—Heb. 5:13, 14.

10. Tunateli kwikala ñahi nayililu yekala namuntu wadikehesha muchipompelu?

¹⁰ Muntu wadikehesha wekalaña ‘muneni’ munjila yikwawu. Muyipompelu yejima mwekala amayala ashikahu atondawu nawunlomboli waspiritu yajila yaYehova kulonda ekali aeluda. Atanjikaña yuma yakuspiritu yidi neyi kupompa, mudimu wamwiha nikuya nakubiña. Neyi twikala nayililu yekala namuntu  wadikehesha kuhitila mukwovwahila iyi ntanjikilu, antu ejima muchipompelu akwikala namuzañalu, kuwunda nawa akunuñañana. (Tañenu Aheberu 13:7, 17.) Neyi mudi aeluda hela nkoñi wakuzatila, komana mwamuhamekaña Yehova hakuyinka iku kukoolekaku?

11, 12. Yililwinyi yikutuleñela kwikala alema mukuloñesha kwaYehova nawa muloñadi chichalemena?

¹¹ Muntu wadimonaña kukehelamu ‘himuneni’ nawa walema nankashi mukuloñesha kwaYehova muloña kudizoza dikwaleñela yekali muntu wamuwahi nawa kambuña aNzambi wakeñayi. Yesu wakonkomweneni atumbanji twindi kwikala adikehesha muloña atumbanji amakwawu aluwankeni naspiritu yadiñaku hayina mpinji. Mukanda waLuka 9:46 wahosha nawu: “Mukachi kawu himukuvulumuka ntadi yakwila nawu nabadiki akwawu hinyi?” Komana ninetu tunateli kutachika kutoñojoka netu twabadika akwetu akakwitiya hela twabadika antu ejima? Antu amavulu makonu mukaayi adi nachaaku chakudeta hebwambu nikudikeña aweni. Twatela kudambula kudi antu akweti yaaku yamuchidiwu. Neyi twila mwenimu nikutwamijaku nkeñelu yaYehova, tukuzañaleshaña amana kwetu niahela.

¹² Kufumba kwaYesu kwakwikala akehelamu kwakuwahi nankashi. Komana kwila tumwekesha spiritu yakudikehesha muchihandilu chetu chejima nehi? Tushinshikenu hambadi jisatu jamuchihandilu.

FWILENU KWIKALA ADIKEHESHA

13, 14. Indi eyala namumbanda atela kudikehesha ñahi nawa chumichi chikukwasha ñahi maluwi awu?

¹³ Mumaluwi. Antu amavulu makonu ashaña nankashi maana kuyuma yakeñawu hela chakwila akuneñesha akwawu neyi ela mwenimu. Ilaña muntu wadikehesha wekala nayililu yatukonkomweneniyi Pawulu nindi twikali nayu. Mumukanda wayisonekeleliyi Aroma, wasonekeli nindi: “Tushenu muchima hakwila yuma yaletaña kuwunda, niyuma yakudikolesha nachu wumu namukwawu.” (Rom. 14:19) Muntu wadikehesha wafwilaña kushakama kumatu awunda nawantu ejima sweje-e namwini kwindi.

¹⁴ Toñojokenu hansañu yayisela. Yuma yakeña kwilayi iyala hampinji yakunooka mumbanda hanateli kuyikeñaku. Hadaha iyala wakeña kushakama hetala kumatu kwamwena hampinji yakunooka iku nakutaña mukanda. Ilaña mumbanda wakeña kuya nakudyila kumaluña acheñi hela kuhempula amabwambu jindi. Komana mumbanda hatela kulemesha nfumwinduku neyi yamona nindi wamwekeshaña chililu chakudikehesha nawa walemesha yuma yakeñayi iñodindi niyahelayi chatela yasheña hohu maana kuyuma yakeñayi yomweni? Iyala niyena wukumukeña iñodindi nikumulemesha neyi yamona nindi iñodindi hasha hohu maana kuyuma yakeñayiku ilaña niyuma yakeñayi. Maluwi akolaña neyi iyala namumbanda ekala namuchima wakudikehesha.—Tañenu Afwilipi 2:1-4.

15, 16. Chililwinyi chashimwiniyi Davidi haMasamu 131, nawa chumichi chikutukwasha kwikala nayililu yamuchidinyi muchipompelu?

¹⁵ Muchipompelu. Antu amavulu mukaayi afwilaña yuma yinateli kuyizañalesha hanoyu mpinji. Hiyakweti muchima wakudiwunjika hela kuhembelelaku. Neyi twikala adikehesha chikutukwasha kumuchiñilila Yehova. (Tañenu Masamu 131:1-3.) Neyi twikala adizoza nikumuchiñilila Yehova tukukiñewa, wukutukiswila nawa tukwikala namuzañalu. Dihafumini  Davidi kukolesha akwawu aIsarela nindi ekali namuchima wakumuchiñilila Nzambi yawu chikupu!

¹⁶ Anenu nawa munateli kuzañalala neyi mumuchiñilila Yehova. (Mas. 42:5) Hadaha ‘munakukeña mudimu wawuwahi’ nawa ‘munakeñi mudimu wakwikala nkoñi.’ (1 Tim. 3:1-7) Neyi munakukeña iwu mudimu, mwatela kuzata nañovu kulonda mwiteji spiritu yajila yiyikwashi kwikala nayililu yatela kwikala nankoñi. Indi neyi munatalili hadi yaaka yayivulu chakadi kuyitonda ilaña akwenu anakuyitonda? Muntu wadikehesha, watalilaña kukooleka kwamuchidiwu, watwalekañahu nakumukalakela Yehova namuzañalu nawa wazataña mudimu wejima wunamwinkuwu namuzañalu.

17, 18. (a) Nkiswinyi yitwatambwilaña neyi tulomba kwanakena nikwanakena akwetu? (b) Kufumbanyi kudi haYishimu 6:1-5?

¹⁷ Nawakwetu. Antu amavulu chayikalilaña kulomba kwanakena. Ilaña, ambuña aNzambi adikeheshaña kuhitila mukwiteja yiluwa yawu nikulomba kwanakena. Ekala cheñi namuchima wakwanakena antu ayivulumunaña. Muntu wadetaña hebwambu waletaña chaambu nimadombu ilaña muntu wanakenaña akwawu waletaña kuwunda muchipompelu.

¹⁸ Twatela ‘kudizoza’ kuhitila mukulomba kwanakena kudi muntu itwadikanini nindi ilaña tunakañanyi kwila mutwadikasili nindi muloña hadi chuma chinamwekani. Hela chakwila wukutachika kwinka mukwawu muloña, mukwaKristu wadizoza watoñojokaña hayiluwa yindi nawa wetejaña yiluwa yindi.—Tañenu Yishimu 6:1-5.

19. Yumanyi yikutuzañalesha wonsu wetu hakufumba kwamuBayibolu kwakwikala adikehesha?

¹⁹ Tudi amuzañalu nankashi muloña Nsona yinatukoleshi kwikala nachililu chakudikehesha. Mpinji yikwawu chatukalilaña kudikehesha, ilaña neyi twiluka netu Nleñi yetu watubadika nawa wadizoza, anetu nawa tukwikala adizoza. Neyi twila mwenimu, tukwikala ambuña aYehova alemeshayi. Dichi wejima wetu twikalenu nachililu chakudikehesha.

[Tumazu twaheshina]

[Malwihu aKuzatisha haKudiza]

[Mwevulu wudi hefu 16]

Yehova watulemesha hakutwinka kukooleka kwakushimwina nsañu yayiwahi

[Nyevulu yidi hefu 19]

Kukoolekanyi kumukweti kukuyileñela mwikali adikehesha?