1, 2. Jesu o neile baapostola ba gagwe keletšo efe, gona ke ka baka la’ng a ile a dira bjalo?

EBE e le ngwaga wa 32 C.E. Jesu o be a le seleteng sa Galilea ge mathata a rotoga. Baapostola ba gagwe ba sego kae ba be ba ngangišana gare ga bona mabapi le yo e lego yo mogolo. Luka o ngwala Ebangeding ya gagwe gore: “Ba [ile ba] ngangišana mabapi le yo e lego yo mogolo go bona. Jesu ka go tseba keleletšo ya dipelo tša bona, a tšea ngwana yo monyenyane a mmea hleng ga gagwe, a re go bona: ‘Mang le mang yo a amogelago ngwana yo bjalo ka baka la leina la ka, le nna o a nkamogela gomme mang le mang yo a nkamogelago, o amogela le Yo a nthomilego. Gobane yo a itshwarago bjalo ka yo monyenyane gare ga lena, ke yena yo mogolo.’” (Luka 9:46-48) Jesu a sa fele pelo eupša a tiišitše, o ile a thuša baapostola bao go bona bohlokwa bja gore ba ikokobetše.

² Na keletšo ya Jesu ya gore ba itshware bjalo ka yo monyenyane e be e sepedišana le ditekanyetšo tša Bajuda ba lekgolong la pele la nywaga? Goba e be e le se fapanego le moya woo ka kakaretšo ba bego ba na le wona? Ge Theological Dictionary of the New Testament e bolela ka maemo a setšhabeng a nakong yeo, e hlalosa gore: “Maemong ka moka, taba ya gore ke mang yo mogolo e be e dula e rotoga, le gona ka mehla ba be ba tshwenyegile ge e ba ba nea motho yo mongwe le yo mongwe tlhompho yeo e bego e mo swanetše.” Jesu o ile a eletša baapostola ba gagwe gore ba se swane le batho ka kakaretšo.

3. (a) Go itshwara bjalo ka yo monyenyane go bolela eng, gona ke ka baka la’ng go ka re thatafalela go dira seo? (b) Ke dipotšišo dife tšeo di rotogago tša mabapi le go hlagolela moya wa go ba ba banyenyane?

³ Lentšu la Segerika leo le fetoletšwego e le “yo monyenyane” le bolela motho yo a ipoeditšego, yo a ikokobeditšego, yo a sego bohlokwa, yo a nyatšegago goba yo a se nago maemo goba tutuetšo. Jesu o ile a diriša  ngwana yo monyenyane go thuša baapostola ba gagwe go kwešiša taba ya gore ba swanetše go ba ba ikokobeditšego le ba ipoeditšego. Keletšo yeo e šoma le go Bakriste ba therešo lehono go etša ge e be e šoma lekgolong la pele la nywaga. Maemong a itšego, re ka thatafalelwa ke go itshwara bjalo ka yo monyenyane. Tshekamelo ya batho mabapi le boikgogomošo e ka re tutuetša gore re rate maemo. Tikologo yeo e kgothaletšago phadišano le moya wa lefase e ka re tutuetša gore re be ba ikgopolago, bontwadumela goba go rata go laola. Ke eng seo se ka re thušago go hlagolela moya wa go ba ba banyenyane? Ke ka tsela efe ‘yo monyenyane gare ga rena e lego yo mogolo’? Ke dibopegong dife tša bophelo moo re swanetšego go katanela go bontšha moya wa boikokobetšo?

4, 5. Ke eng seo se ka re šušumetšago gore re hlagolele boikokobetšo? Bontšha.

⁴ Tsela e nngwe yeo re ka hlagolelago boikokobetšo ka yona ke go naganišiša ka bogolo bja Jehofa ge bo bapetšwa le rena. Ge e le gabotse, “kwešišo ya gagwe ga e fihlelelwe.” (Jes. 40:28) Ge moapostola Paulo a bolela ka dibopego tše itšego tša letago la Jehofa, o ngwadile gore: “A bodiba bja mahumo a Modimo, bohlale le tsebo! Ruri dikahlolo tša gagwe ke tšeo di sa nyakišišegego gomme ditsela tša gagwe ke tše di sa latišegego!” (Baroma 11:33) Gaešita le ge tsebo ya batho ka dilo tše dintši e ile ya oketšega kudu go tloga mola Paulo a ngwadilego mantšu ao nywaga e 2 000 e fetilego, mantšu ao e sa dutše e le a kgonthe. Go sa šetšwe tsebo yeo re nago le yona, re swanetše go ikokobetša gomme re lemoge gore re ka se tsoge re kgaoditše go ithuta ka Jehofa, mediro ya gagwe le ditsela tša gagwe.

⁵ Go lemoga gore ga re na bokgoni bja go nyakišiša ditsela tša Modimo go ile gwa thuša Leo * gore a itebelele e le yo monyenyane. Ge Leo e be e sa le lesogana, o be a kgahlwa kudu ke thutamahlale. Ka ge a be a kganyoga go kwešiša go gontši ka legohle, o ile a ithutela thuto ya tša tlhago le kagego ya dinaledi gomme a fihlelela phetho e bohlokwa. Leo o re: “Dilong tšeo ke bego ke ithuta tšona, ke ile ka lemoga gore dithuto tšeo re bego re šetše re di tseba tša thutamahlale di ka se kgone go thuša batho go kwešiša legohle ka mo go feletšego. Ka gona ke ile ka thoma go ithutela molao.” Ge nako e dutše e eya, Leo o ile a ba ramolao wa selete gomme ka morago ga moo a ba moahlodi kgorong ya tsheko. Mafelelong, yena le mosadi wa gagwe ba ile ba ithuta Beibele le Dihlatse tša Jehofa, ba ile ba amogela therešo gomme ba ba bahlanka ba ineetšego ba Modimo. Go sa šetšwe maemo a gagwe, ke eng seo se thušitšego Leo gore a itshware bjalo ka yo monyenyane? Leo o araba ka go se dikadike gore: “Ke ile ka lemoga gore go sa šetšwe seo re ithutago sona ka Jehofa le legohle, re sa dutše re tla ithuta mo gontši kudu.”

6, 7. (a) Jehofa o re beetše mohlala ofe o makatšago wa boikokobetšo? (b) Boikokobetšo bja Modimo bo ka dira bjang gore motho e be yo “mogolo”?

 ⁶ Taba e nngwe yeo e re thušago gore re ikokobetše ke gore Jehofa ka boyena o ikokobeditše. Ela hloko se: “Re bašomigotee le Modimo.” (1 Bakor. 3:9) Akanya ka seo! Jehofa, e lego Modimo yoo bogolo bja gagwe bo ka se lekanywego le selo, o re swara ka seriti ka tsela yeo ka go re nea sebaka sa gore re phethe bodiredi bja rena re diriša Lentšu la gagwe, e lego Beibele. Gaešita le ge Jehofa e le yena yoo a dirago gore dipeu tšeo re di bjalago le go di nošetša di gole, o re nea boemo bjo bo hlomphegago bja go šoma le yena. (1 Bakor. 3:6, 7) Na wo ga se mohlala o makatšago wa boikokobetšo woo o bontšhwago ke Modimo? Ruri mohlala wa Jehofa wa boikokobetšo o swanetše go kgothaletša yo mongwe le yo mongwe wa rena gore a itshware bjalo ka yo monyenyane.

⁷ Mohlala wa Modimo wa boikokobetšo o ile wa kgoma mopsalme Dafida kudu. O ile a opelela Jehofa gore: “O tla nnea kotse ya gago ya phološo, boikokobetšo bja gago bo a nkgodiša.” (2 Sam. 22:36) Dafida o bontšhitše gore bogolo le ge e le bofe bjoo a bego a na le bjona Isiraeleng o bo hweditše ka baka la boikokobetšo bja Jehofa, e lego go inama ga Modimo goba go ikokobetša ga gagwe e le gore a mo ele hloko. (Ps. 113:5-7) Na le rena ga re swane le yena? Mabapi le dika, bokgoni le ditokelo, ke eng seo yo mongwe le yo mongwe wa rena a nago le sona seo a “sa se fiwago” ke Jehofa? (1 Bakor. 4:7) Motho yo a itshwarago bjalo ka yo monyenyane e ba yo “mogolo” ka ge e eba mohlanka wa Jehofa yo bohlokwa kudu. (Luka 9:48) Anke re boneng kamoo seo se kgonegago ka gona.

8. Boikokobetšo bo kgoma bjang boemo bja rena bja kgopolo ka mokgatlo wa Jehofa?

⁸ E le gore re be le lethabo mokgatlong wa Modimo le go thekga ditokišetšo tša phuthego, re swanetše go ba le boikokobetšo. Ela hloko mohlala wa Petra, e lego kgarebe yeo e godišeditšwego lapeng la Dihlatse. Ka ge Petra a be a nyaka go itirela boithatelo, o ile a tlogela phuthego. Nywaga ka morago ga moo, o ile a thoma go kopanela le phuthego gape. Ga bjale o thabela go ba ka mokgatlong wa Jehofa gomme o dula a fagahlela go thekga ditokišetšo tša ka phuthegong. Ke eng seo ga bjale se fetošitšego pono ya gagwe? O ngwala gore: “E le gore ke ikwe ke le gae ga mahlaku ge ke le ka mokgatlong wa Modimo, dika tše pedi tše bohlokwahlokwa tšeo ke bego ke swanetše go di kwešiša le go di hlagolela e be e le go ba le boikokobetšo le boipoetšo.”

9. Ke boemo bofe bja kgopolo bjoo motho yo a ikokobeditšego a nago le bjona mabapi le dijo tša moya tšeo re di hwetšago, gona ke ka baka la’ng seo se mo dira gore e be yo bohlokwa kudu?

⁹ Motho yo a ikokobeditšego o na le tebogo yeo e tšwago pelong ka ditokišetšo tša Jehofa, go akaretša le dijo tša moya. Ka gona, motho yo bjalo ke morutwana yo mafolofolo wa Beibele e bile ke mmadi yo a fišegago wa dimakasine tša Morokami le Phafoga! Go swana le bahlanka ba bangwe ba Jehofa, a ka itlwaetša go bala kgatišo e nngwe le e nngwe pele ga ge a ka e bea rakeng ya bokgobapuku bja gagwe. Ge e ba ka boikokobetšo re bontšha tebogo ya rena ka go bala le go ithuta dikgatišo tša rena tšeo di theilwego Beibeleng, re dira tšwelopele ya moya gomme Jehofa o kgona go re diriša ka botlalo tirelong ya gagwe.—Baheb. 5:13, 14.

10. Re ka bontšha bjang boemo bja kgopolo bja go ba ba banyenyane ka phuthegong?

¹⁰ Motho yo a itshwarago bjalo ka yo monyenyane ke yo “mogolo” ka tsela e nngwe gape. Phuthego e nngwe le e nngwe e na le banna bao ba swanelegago bao ba kgethilwego ka tlhahlo ya moya wa Jehofa o mokgethwa go hlankela e le bagolo. Ba dira ditokišetšo dilong tša moya tše bjalo ka diboka tša phuthego, tirelo ya tšhemo le modiro wa bodiši. Ge re bontšha boemo bja kgopolo bja go  ba ba banyenyane ka go ikemišetša go thekga ditokišetšo tšeo, re tlaleletša lethabong, khutšong le boteeng bja phuthego. (Bala Baheberu 13:7, 17.) Ge e ba o hlankela o le mogolo goba mohlanka wa bodiredi, na ka boikokobetšo ga o leboge Jehofa ka tokelo yeo ya tirelo yeo a go gafetšego yona?

11, 12. Ke boemo bofe bja kgopolo bjoo bo ka re dirago ba bohlokwa kudu mokgatlong wa Jehofa, gona ke ka baka la’ng go le bjalo?

¹¹ Yo a itshwarago bjalo ka yo monyenyane ke yo “mogolo,” goba o bohlokwahlokwa mokgatlong wa Jehofa, ka gobane boikokobetšo bja gagwe bo mo dira mohlanka yo bohlokwa le yo a lokilego wa Modimo. Jesu o ile a swanelwa ke gore a eletše barutiwa ba gagwe gore ba itshware bjalo ka ba banyenyane ka gobane ba bangwe ba bona ba be ba tutuetšwa ke moya woo o bego o aparetše mehleng yeo. Luka 9:46 e re: “Ba [ile ba] ngangišana mabapi le yo e lego yo mogolo go bona.” Na go ka direga gore le rena re nagane gore ka tsela e itšego re kaone go phala badumedigotee le rena goba re phagametše batho ka kakaretšo? Batho ba bantši bao ba re dikologilego lefaseng ba šušumetšwa ke boikgogomošo le boithati. Anke re phemeng ka mo go feletšego baikgogomoši ka go dira dilo ka boikokobetšo. Ge re dira bjalo e bile re etiša thato ya Jehofa pele, re ba bagwera bao ba lapološago kutšwanyana go bana babo rena le dikgaetšedi.

¹² Keletšo ya Jesu ya gore re itshware bjalo ka ba banyenyane e a kgothatša e le ruri. Na ga se ra swanela go katanela go bontšha moya wa boikokobetšo dibopegong ka moka tša bophelo? Anke re eleng hloko dikarolo tše tharo tšeo di nyakago šedi.

13, 14. Monna le mosadi ba swanetše go itshwara bjalo ka ba banyenyane ka tsela efe, gomme se se ka kgoma lenyalo bjang?

¹³ Lenyalong. Batho ba bantši ba tshwenyegile ka ditshwanelo tša bona moo e lego gore ba di tsoma gaešita le ge go dira seo go bolela go gatakela ditshwanelo tša ba bangwe. Lega go le bjalo, yo monyenyane o hlahlwa ke boemo bja kgopolo bjoo Paulo a re kgothaletšago gore re be le bjona. Lengwalong la gagwe leo le yago go Baroma, o ngwala gore: “A re phegeleleng dilo tše di išago khutšong le dilo tše e lego tša go agana.” (Baroma 14:19) Motho yo a itshwarago bjalo ka yo monyenyane o phegelela khutšo le batho bohle gomme o dira se kudukudu go molekane wa gagwe wa lenyalo yo a mo ratago.

¹⁴ Ela hloko taba ya boitapološo. Ge go tliwa tabeng ya boithabišo, banyalani ba ka rata dilo tše di sa swanego. Mohlomongwe monna o rata go iketla ka go itulela ka gae gomme a bale puku. Ka lehlakoreng le lengwe, mosadi a ka ba a rata go intšha ka gore ba ye go ja mabenkeleng goba go etela bagwera. Na e be e ka se be mo gobotse gore mosadi a hlomphe monna wa gagwe ge a bona gore monna o bontšha boikokobetšo le gore o kgahlegela e le ka kgonthe dilo tšeo a di ratago le tšeo a sa di thabelego go e na le gore a tshwenyege feela ka dilo tšeo yena a di ratago? Le gona, ruri monna o tla rata mosadi wa gagwe le go mo tšeela godimo ge a bona gore mosadi ga a itirele boithatelo eupša o ela hloko dinyakwa tša gagwe! Tlemo ya lenyalo e a tia ge molekane yo mongwe le yo mongwe a itshwara bjalo ka yo monyenyane.—Bala Bafilipi 2:1-4.

15, 16. Dafida o kgothaleditše boemo bofe bja kgopolo bjoo bo hwetšwago go Psalme 131, gona se se swanetše go kgoma bjang boitshwaro bja gago ka phuthegong?

¹⁵ Ka phuthegong. Batho ba bantši lefaseng ba phelela go kgotsofatša dikganyogo tša bona le semeetseng. Ba fela pelo e bile ba thatafalelwa ke go leta. Go hlagolela moya wa boikokobetšo go re thuša gore re letele Jehofa. (Bala Psalme 131:1-3.) Mehola ya go ba ba ikokobeditšego le go letela Jehofa ke gore re tla šireletšega le go šegofatšwa, ra iketla gotee le go kgotsofala. Ruri ga go makatše ge Dafida a ile a kgothaletša Baisiraelegotee le  yena gore ba letele Modimo wa bona ka go se fele pelo!

¹⁶ Le wena o ka ba le boiketlo bjo swanago ge o letela Jehofa ka boikokobetšo. (Ps. 42:5) Mohlomongwe “o kganyoga modiro o mobotse,” gomme seo se dira gore o ‘katanele go fihlelela bolebeledi.’ (1Tim. 3:1-7) Therešo ke gore o swanetše go dira sohle seo o ka se kgonago gore o dumelele moya o mokgethwa o tšweletša ka go wena dika tše di nyakegago go balebeledi. Eupša go thwe’ng ge e ba seo se bonagala se tšea nako e telele tabeng ya gago ge go bapetšwa le ba bangwe? Yo monyenyane, e lego yo a letelago ka go se fele pelo tokelo ya tirelo, o tla tšwela pele a hlankela Jehofa ka lethabo gomme o tla thabišwa ke kabelo le ge e le efe yeo a e newago.

17, 18. (a) Ke mehola efe yeo re e hwetšago ge re tsoma tebalelo e bile re ikemišeditše go lebalela ba bangwe? (b) Diema 6:1-5 e re kgothaletša go dira eng?

¹⁷ Ditswalanong tša rena le batho ba bangwe. Batho ba bantši ba thatafalelwa ke go kgopela tshwarelo. Lega go le bjalo, bahlanka ba Modimo ba hlagolela boikokobetšo ka go amogela diphošo tša bona ke moka ba kgopela tshwarelo. Le gona ba ikemišeditše go lebalela ba bangwe dikarogo tša bona. Gaešita le ge boikgogomošo bo baka dikarogano le dikgohlano, tebalelo yona e godiša khutšo ka phuthegong.

¹⁸ Go ka nyakega gore re “ikokobetše” gomme re kgopele tshwarelo go tšwa pelong ge re ka se kgone go phetha seo re dumelelanego ka sona le motho yo mongwe ka baka la maemo ao re ka se a laolego. Gaešita le ge Mokriste yo a ikokobeditšego a ka ba le lebaka le le kwagalago la go bea motho yo mongwe molato, o šetša mafokodi a gagwe gomme o ikemišeditše go a amogela.—Bala Diema 6:1-5.

19. Ke mabaka afe ao a dirago gore yo mongwe le yo mongwe wa rena a leboge keletšo ya Beibele ya gore re itshware bjalo ka ba banyenyane?

¹⁹ Ruri go a thabiša gore Mangwalo a re kgothaletša go hlagolela moya wa go ba ba banyenyane! Gaešita le ge ka dinako tše dingwe re ka thatafalelwa ke go bontšha moya o bjalo, go ba le pono e nepagetšego ka boemo bja rena ge re bapetšwa le Mmopi wa rena le go tšeela godimo boikokobetšo bja gagwe go ka re kgothaletša gore re hlagolele seka seo se sebotse. Ka go dira bjalo, ruri re tla itlhatsela re le bahlanka ba Jehofa ba bohlokwa kudu. Ka gona, anke yo mongwe le yo mongwe wa rena a itshware bjalo ka yo monyenyane.