1, 2. Йесо йӕ апостолтӕн цавӕр уынаффӕ радта ӕмӕ цӕмӕн?

ХАБАР уыд н. э. 32 азы. Йесо ӕмӕ йӕ апостолтӕ уыдысты Галилейӕйы. Ӕмӕ уыцы рӕстӕг йӕ апостолтӕ райдыдтой быцӕу кӕнын, уӕлдӕр сӕ чи у, ууыл. Лука уый тыххӕй афтӕ ныффыста: «Се ’хсӕн рауад ныхас, уӕлдӕр сӕ чи уыдзӕн, ууыл. Йесо та сын зыдта сӕ хъуыдытӕ, ӕмӕ ӕрбакодта гыццыл сывӕллоны, йӕ цуры йӕ ӕрлӕууын кодта ӕмӕ сын загъта: „Ацы гыццыл сывӕллоны мӕ номы тыххӕй чи суазӕг кӕна, уый суазӕг кӕндзӕн мӕн дӕр. Ӕмӕ мӕн чи суазӕг кӕна, уый та суазӕг кӕндзӕн, мӕн чи рарвыста, уый дӕр. Уӕдӕ сымахӕй йӕхи иннӕтӕй дӕлдӕрыл чи нымайы, уӕлдӕр гъе уый у“» (Лук. 9:46–48). Йесо апостолтӕн фӕразонӕй, фӕлӕ фидарӕй бамбарын кодта, сӕрныллӕг кӕй хъуамӕ уой.

² Цымӕ уыцы рӕстӕг дзуттӕгтӕ дӕр ахӕм хъуыдыйыл хӕст уыдысты, ӕмӕ адӕймаг хъуамӕ йӕхи иннӕтӕй дӕлдӕрыл нымайа? Ӕви бынтон ӕндӕрхуызон хъуыды кодтой? Фыццаг ӕнусы дзуттӕгтӕн сӕ фылдӕр цы зондыл хӕст уыдысты, уый тыххӕй иу чиныджы фыст ис: «Кӕимӕфӕнды сын цыфӕнды хъуыддаг ма уыдаид, алкӕддӕр хъуыды кодтой, фылдӕр кады аккаг чи у, ууыл. Ӕдзухдӕр мӕт кодтой, кӕмӕн цы кад ӕмбӕлы, уый йын кӕнынц ӕви нӕ» (Theological Dictionary of the New Testament). Уӕдӕ Йесойы фӕндыд, цӕмӕй йӕ апостолтӕ иннӕ адӕмӕй хицӕн кодтаиккой.

3. а) Нӕхи иннӕтӕй дӕлдӕрыл нымайӕм, уый куыд ӕмбаргӕ у ӕмӕ нын уый зын цӕмӕн вӕййы? ӕ) Ацы статьяйы цавӕр фарстатыл аныхас кӕндзыстӕм?

³ Дзырд «дӕлдӕр»-ӕй цы грекъаг дзырд ӕрцыд тӕлмац, уый нысан кӕны бонзонгӕ, сӕрныллӕг, бирӕ бартӕ ӕмӕ стыр кад кӕмӕн нӕй, ахӕм адӕймаг. Йесо йӕ апостолтӕн цӕвиттонӕн ӕрхаста сывӕллоны, цӕмӕй сын бамбарын кодтаид, сӕрныллӕг ӕмӕ бонзонгӕ кӕй  хъуамӕ уыдаиккой. Уыцы уынаффӕ фыццаг ӕнусы чырыстӕттӕм куыд хауд, афтӕ хауы абон дӕр ӕцӕг чырыстӕттӕм се ’ппӕтмӕ дӕр. Чи зоны нын кӕцыдӕр уавӕрты зын вӕййы нӕхи иннӕтӕй дӕлдӕрыл банымайын. Ӕнӕххӕст кӕй стӕм, уымӕ гӕсгӕ нӕ туджы ис сӕрбӕрзонддзинад ӕмӕ нӕ фӕфӕнды, цӕмӕй иннӕтӕй хуыздӕр уӕм. Нӕ алыварс цы адӕм ис, уыдон ӕдзух архайынц, иннӕтӕй хуыздӕр куыд уой, ууыл, ӕмӕ дунейы зондахаст, гӕнӕн ис, ӕмӕ махыл дӕр фӕзына, ӕмӕ райдайӕм ӕрмӕст нӕхиуыл хъуыды кӕнын, быцӕу кӕнын, иннӕты нӕхи зондыл аразын. Цы нын баххуыс кӕндзӕн, цӕмӕй ахӕм ма уӕм, фӕлӕ сӕрныллӕг? Куыд ӕмбаргӕ сты ацы ныхӕстӕ, йӕхи иннӕтӕй дӕлдӕрыл чи нымайы, уый уӕлдӕр у, зӕгъгӕ? Цавӕр уавӕрты-иу хъуамӕ уӕм сӕрныллӕг?

4, 5. Цы нын баххуыс кӕндзӕн, цӕмӕй сӕрныллӕгдӕр уӕм? Ӕрхӕсс цӕвиттон.

⁴ Цы нын баххуыс кӕндзӕн, цӕмӕй сӕрныллӕгдӕр уӕм? Зӕгъӕм, Йегъовӕ махӕй бирӕ бӕрзонддӕр кӕй у, ууыл куы хъуыды кӕнӕм. Хуыцауы «зондыл адӕймаджы зонд не ’ххӕссы» (Ис. 40:28). Йегъовӕ куыд диссаджы Хуыцау у, уый тыххӕй апостол Павел афтӕ ныффыста: «О, куыд ӕнӕкӕрон сты Хуыцауы хорздзинӕдтӕ, йӕ зонд ӕмӕ йӕ зонындзинӕдтӕ! Кӕй зонд аххӕсдзӕн йӕ тӕрхӕттыл, ӕмӕ йын чи раиртасдзӕн йӕ хъуыддӕгтӕ!» (Ром. 11:33). Кӕд Павел уыцы ныхӕстӕ иу-2 000 азы размӕ ныффыста ӕмӕ уӕдӕй нырмӕ адӕм тынг бирӕ цыдӕртӕ базыдтой, уӕддӕр абон дӕр фидарӕй ис афтӕ зӕгъӕн. Цасфӕнды ма зонӕм, уӕддӕр, Йегъовӕйы тыххӕй ӕмӕ йӕ хъуыддӕгты тыххӕй цы ис базонӕн, уымӕн кӕрон нӕ уыдзӕн. Ӕмӕ уый куы ӕмбарӕм, уӕд нӕхицӕй хъал нӕ уыдзыстӕм.

⁵ Адӕймагӕн Хуыцауы хъуыддӕгты тыххӕй йӕ бон алцы базонын кӕй нӕу, уый иу нӕлгоймагӕн, Леойӕн *, баххуыс кодта, цӕмӕй сӕрныллӕгдӕр суыдаид. Ӕрыгонӕй Леойы зӕрдӕмӕ тынг цыди, Дун-дуне куыд конд у, уый иртасын. Тынг ӕй фӕндыд уыдӕтты тыххӕй алцыдӕр базонын, ӕмӕ уый тыххӕй райдыдта астрофизикӕ ахуыр кӕнын. Фӕлӕ фӕстӕдӕр бамбӕрста, ӕрмӕст наукӕйы фӕрцы кӕй нӕй алцыдӕр кӕронмӕ бамбарӕн. Ӕмӕ уӕд райдыдта юристыл ахуыр кӕнын. Рӕстӕг рацыд, ӕмӕ Лео сси адвокат, уый фӕстӕ та тӕрхонгӕнӕг. Фӕстӕдӕр Лео ӕмӕ йӕ бинойнаг Йегъовӕйы Ӕвдисӕнтимӕ Библи ахуыр кӕнын райдыдтой, рӕстдзинад базыдтой ӕмӕ донаргъуыд дӕр райстой. Цы баххуыс кодта Леойӕн сӕрныллӕгдзинад равдисынӕн, кӕд ӕм стыр ахуырдзинад уыд, уӕддӕр? Мӕнӕ цы зӕгъы йӕхӕдӕг: «Ӕз бамбӕрстон уый, ӕмӕ, Йегъовӕйы тыххӕй ӕмӕ Дун-дунейы тыххӕй цасфӕнды ма зонӕм, уӕддӕр нӕ нырма бирӕ цыдӕртӕ хъӕудзӕн базонын».

6, 7. а) Йегъовӕйы диссаджы сӕрныллӕгдзинад цӕмӕй у бӕрӕг? ӕ) Хуыцауы сӕрныллӕгдзинад адӕймаджы куыд «бӕрзонд кӕны»?

 ⁶ Йегъовӕ йӕхӕдӕг дӕр сӕрныллӕг кӕй у, уый дӕр нын баххуыс кӕндзӕн, цӕмӕй сӕрныллӕг уӕм. Ахъуыды-ма кӕн, «мах стӕм Хуыцауы ӕмкусджытӕ» (1 Кор. 3:9). Уый диссаг куыннӕ у! Йегъовӕ, Иунӕг Стыр Хуыцау, мах нымайы йе ’мкусджытыл! Ахӕм кады аккаг нӕ скодта, цӕмӕй йӕ Ныхас Библийы фӕрцы хорз хабар хъусын кӕнӕм. Цы байтауӕм, уый кӕд Йегъовӕ рӕзын кӕны, уӕддӕр нын фадат дӕтты, цӕмӕй рӕстдзинады мыггаг тауӕм, дон ыл кӕнӕм ӕмӕ афтӕмӕй йемӕ кусӕм (1 Кор. 3:6, 7). Уый Хуыцауы диссаджы сӕрныллӕгдзинадыл дзурӕг куыннӕ у! Уӕдӕ кӕд Йегъовӕ афтӕ сӕрныллӕг у, уӕд мах ай-гъайдӕр хъуамӕ уӕм сӕрныллӕг ӕмӕ нӕхи иннӕтӕй дӕлдӕрыл нымайӕм.

⁷ Хуыцауы сӕрныллӕгдзинад тынг бандӕвта псаломзарӕггӕнӕг Давидыл. Уый Йегъовӕйӕн зарыд: «Ды мын ратдзынӕ дӕ ирвӕзындзинады уарт, дӕ сӕрныллӕгдзинад мӕ бӕрзонд кӕны» (2 Сам. 22:36). Давид ӕмбӕрста, Израилы цы стыр хъуыддӕгтӕ сарӕзта, уыдон йӕ къухы кӕй бафтыдысты ӕрмӕстдӕр Йегъовӕйы сӕрныллӕгдзинады фӕрцы – Хуыцау ӕм кӕй ӕркаст ӕмӕ йын кӕй ӕххуыс кодта, уый фӕрцы (Пс. 113:5–7). Ӕмӕ мах хабар дӕр афтӕ нӕу? Нӕ миниуджытӕ, нӕ курдиӕттӕ, нӕ кадджын хӕстыл куы цӕуа дзырд, уӕд нӕм цы ис ахӕмӕй, ӕмӕ нын ӕй «Хуыцау нӕ радта»? (1 Кор. 4:7). Йӕхи иннӕтӕй дӕлдӕрыл чи нымайы, уый «уӕлдӕр» свӕййы уыцы хуызы, ӕмӕ Йегъовӕйӕн хуыздӕр лӕггадгӕнӕг свӕййы (Лук. 9:48). Куыд, уымӕ ныртӕккӕ ӕркӕсдзыстӕм.

8. Йегъовӕйы организацийы чи ис, уыдон сӕрныллӕг цӕмӕн хъуамӕ уой?

⁸ Цӕмӕй Хуыцауы организацийы алцӕмӕй райгонд уӕм ӕмӕ, ӕмбырды цы разамынд лӕвӕрд цӕуы, уымӕ хъусӕм, уый тыххӕй хъуамӕ уӕм сӕрныллӕг. Иу ӕрыгон сылгоймаг, Петрӕ, зӕгъгӕ, схъомыл Йегъовӕйы Ӕвдисӕнты бинонты ’хсӕн. Фӕлӕ Петрӕйы фӕндыд, цӕмӕй алцыдӕр уыдаид, уымӕ растдӕр куыд каст, афтӕ ӕмӕ ӕмбырдтӕм нал цыди. Азтӕ куы рацыд, уӕд та ногӕй райдыдта ӕмбырдтӕм цӕуын. Ӕмӕ ныр, Йегъовӕйы организацийы кӕй ис, уымӕй райгонд у ӕмӕ, ӕмбырды цы разамынд лӕвӕрд цӕуы, уымӕ зӕрдиагӕй хъусы. Йӕ зондахаст цӕй фӕрцы фӕивта? Петрӕ зӕгъы: «Цӕмӕй мын Хуыцауы организаци мӕхи хӕдзары ад скодтаид, уый тыххӕй мӕ хъуыди бамбарын, ӕппӕты тынгдӕр мӕ сӕрныллӕгдзинад ӕмӕ бонзонгӕдзинадыл кӕй хъӕуы кусын».

9. Сӕрныллӕг адӕймаг Библимӕ ӕмӕ нӕ публикацитӕм цы цӕстӕй кӕсы? Уый фӕрцы Хуыцауы хъуыддаджы йӕ бон фылдӕр аразын куыд свӕййы?

⁹ Сӕрныллӕг адӕймаг ӕппӕт зӕрдӕйӕ аргъ кӕны, Йегъовӕ йын цыдӕриддӕр дӕтты, уымӕн, уыимӕ уырнындзинад фидаргӕнӕн хӕринагӕн дӕр. Ахӕм адӕймаг лӕмбынӕг фӕахуыр кӕны Библи ӕмӕ зӕрдиагӕй фӕкӕсы журналтӕ «Хъахъхъӕнӕн мӕсыг» ӕмӕ «Пробудитесь!». Сӕрныллӕг адӕймаг алы ног публикаци дӕр йе скъаппы сӕвӕрыны размӕ кӕрӕй-кӕронмӕ бакӕсы. Ӕмӕ афтӕ кӕнынц Йегъовӕйы иузӕрдион лӕггадгӕнджытӕй бирӕтӕ. Нӕ литературӕ куы кӕсӕм ӕмӕ йӕ куы иртасӕм, уӕд равдисдзыстӕм, сӕрныллӕг ӕмӕ бузныгзӕрдӕ кӕй стӕм. Афтӕмӕй фӕлтӕрдджындӕр кӕндзыстӕм, ӕмӕ уӕд Йегъовӕйӕн йӕ бон уыдзӕн фылдӕр хъуыддӕгтӕ нӕ бар бакӕнын (Дзут. 5:13, 14).

10. Сӕрныллӕг кӕй стӕм, уый ӕмбырды нӕ бон куыд у ӕвдисын?

¹⁰ Йӕхи иннӕтӕй дӕлдӕрыл чи нымайы, уый ма ноджыдӕр иу хуызы у «уӕлдӕр». Алы ӕмбырды дӕр ис хистӕр нӕлгоймӕгтӕ, снысан сӕ кӕнынц Йегъовӕйы сыгъдӕг тыхы разамындмӕ гӕсгӕ. Уыдон спълан кӕнынц ӕмбырды фембӕлдтӕ, хъусын кӕныны хъуыддаг, стӕй ма хотӕ ӕмӕ ӕфсымӕртӕй алкӕуыл дӕр тыхсынц, сӕ ныфсыл  сын ныфс ӕфтауынц. Сӕрныллӕг кӕй стӕм, уый равдисдзыстӕм, хистӕр нӕлгоймӕгты разамындмӕ зӕрдиагӕй куы хъусӕм, уӕд. Ӕмӕ афтӕмӕй ӕмбырды циныл цин ӕфтдзӕн, уыдзӕн дзы фарн ӕмӕ иудзинад. (Бакӕс Дзуттӕгтӕм 13:7, 17.) Кӕд хистӕр нӕлгоймаг кӕнӕ кӕстӕриуӕггӕнӕг ӕфсымӕр дӕ, уӕд Йегъовӕйӕн сӕрныллӕгӕй бузныг нӕ фӕдзурыс, ахӕм кадджын куыст дын дӕ бӕрны кӕй бакодта, уый тыххӕй?

11, 12. Йегъовӕйы организацийы нын фылдӕр аргъ цӕй фӕрцы уыдзӕн ӕмӕ афтӕ цӕмӕн у?

¹¹ Йӕхи иннӕтӕй дӕлдӕрыл чи нымайы, уымӕн Йегъовӕйы организацийы фылдӕр аргъ ис, уымӕн ӕмӕ, сӕрныллӕг кӕй у, уый фӕрцы йӕ бон вӕййы Хуыцауӕн хуыздӕр лӕггад кӕнын. Йесойы бахъуыди йӕ ахуыргӕнинӕгтӕн уынаффӕ раттын, цӕмӕй сӕхи иннӕтӕй дӕлдӕрыл нымадтаиккой. Афтӕ уымӕн бакодта, ӕмӕ сӕ чидӕртӕ хъуыды кодтой, уыцы рӕстӕг адӕмӕн сӕ фылдӕр куыд хъуыды кодтой, афтӕ. Лукайы 9:46 фыст ис: «Се ’хсӕн рауад ныхас, уӕлдӕр сӕ чи уыдзӕн, ууыл». Цымӕ уый гӕнӕн ис, ӕмӕ мах дӕр афтӕ хъуыды кӕнын райдайӕм, ӕмӕ не ’мчырыстӕттӕй кӕнӕ иннӕ адӕмӕй цӕмӕйдӕр хуыздӕр стӕм? Ацы дунейы адӕмӕн сӕ фылдӕр сты сӕрбӕрзонд ӕмӕ сӕхи йеддӕмӕ никӕуыл хъуыды кӕнынц. Фӕлӕ мах хъуамӕ уыдоны хуызӕн ма уӕм. Сӕрныллӕг куы уӕм ӕмӕ нын Йегъовӕйы фӕндон сӕйраг куы уа, уӕд нӕ хотӕ ӕмӕ не ’фсымӕртӕн ныфс ӕмӕ удӕнцойы хос уыдзыстӕм.

¹² Йесойы уынаффӕ цӕуыл дзурӕг у, уый куы бамбарӕм, уӕд архайдзыстӕм, цӕмӕй алы хъуыддаджы дӕр уӕм сӕрныллӕг. Цӕй ӕмӕ дзы ӕртӕ хъуыддагыл бӕстондӕр аныхас кӕнӕм.

13, 14. Кӕд уыдзӕн зӕгъӕн, адӕймаг йӕхи йӕ цардӕмбалӕй дӕлдӕрыл кӕй нымайы? Уый сӕ цардыл куыд фӕзындзӕн?

¹³ Бинонты ’хсӕн. Абон бирӕтӕ хъуыды кӕнынц ӕрмӕст сӕхи бартыл. Иннӕтӕн дӕр бартӕ кӕй ис, уый та сӕм нымады дӕр нӕу. Фӕлӕ сӕрныллӕг адӕймаг архайы, Павел Ромы чырыстӕттӕн цы уынаффӕ радта, уымӕ гӕсгӕ: «Цӕй уӕдӕ тырнӕм, фарн цы хӕссы ӕмӕ кӕрӕдзийы цӕй фӕрцы ис бафидар кӕнӕн, уымӕ» (Ром. 14:19). Йӕхи иннӕтӕй дӕлдӕрыл чи нымайы, уый архайы, цӕмӕй фӕрнӕй цӕра алкӕимӕ дӕр, уӕлдайдӕр та йӕ зынаргъ цардӕмбалимӕ.

¹⁴ Зӕгъӕм, лӕг ӕмӕ ус, сӕ сӕрибар рӕстӕг куыд ӕрвитой, уый тыххӕй, гӕнӕн ис, иухуызон ма хъуыды кӕной. Чи зоны, лӕджы фӕнда хӕдзары баззайын ӕмӕ чиныг бакӕсын, усы та – йе ’мбӕлттӕм ацӕуын кӕнӕ искуы абадын. Ахӕм уавӕры лӕг сӕрныллӕгдзинад куы равдиса ӕмӕ, йӕхи куыд фӕнды, афтӕ нӕ, фӕлӕ, йӕ усы куыд фӕнды, афтӕ куы бакӕна, уӕд усӕн дӕр ӕнцондӕр уыдзӕн йӕ сӕрыхицауӕн кад кӕнын. Стӕй лӕг дӕр йӕ усы тынгдӕр уарздзӕн ӕмӕ йын фылдӕр аргъ кӕндзӕн, куы уына, йӕхи фӕндоныл кӕй нӕ ныллӕууы, фӕлӕ, йӕ лӕджы цы фӕнды, ууыл дӕр кӕй хъуыды кӕны. Лӕг дӕр ӕмӕ ус дӕр сӕрныллӕг куы уой, уӕд кӕрӕдзийӕн адджындӕр уыдзысты. (Бакӕс Филиппӕгтӕм 2:1–4.)

15, 16. 131-ӕм псаломмӕ гӕсгӕ, Давид израилӕгты цӕмӕ разӕнгард кодта ӕмӕ махӕн дӕр ӕмбырды нӕ бон куыд у афтӕ архайын?

¹⁵ Ӕмбырды. Ацы дунейы бирӕтӕ ахӕм зондӕй архайынц, ӕмӕ сӕ цы ӕрхъӕуы, уый хъуамӕ уайтагъд сӕ къухы бафта. Ахӕм адӕммӕ фӕразондзинад нӕй, ӕнхъӕлмӕ кӕсынӕй зындӕр сӕм ницы кӕсы. Мах нӕхи иннӕтӕй дӕлдӕрыл куы нымайӕм, уӕд нын Йегъовӕмӕ ӕнхъӕлмӕ кӕсын ӕнцондӕр уыдзӕн. (Бакӕс Псалом 131:1–3.) Сӕрныллӕг куы уӕм ӕмӕ Йегъовӕмӕ куы ӕнхъӕлмӕ кӕсӕм, уӕд схайджын уыдзыстӕм бирӕ арфӕдзинӕдтӕй, уыдзыстӕм ӕдас, нӕ зӕрдӕ уыдзӕн сабыр ӕмӕ дзы уыдзӕн фарн. Давид дӕр израилӕгты уымӕн разӕнгард кодта, цӕмӕй сӕ Хуыцаумӕ фӕразонӕй ӕнхъӕлмӕ кастаиккой.

¹⁶ Йегъовӕмӕ сӕрныллӕгӕй куы ӕнхъӕлмӕ кӕсай, уӕд дӕуӕн дӕр Давидау дӕ  зӕрдӕйы уыдзӕн фарн (Пс. 42:5). Зӕгъӕм, ахӕм «хорз хъуыддагмӕ бӕллыс», цӕмӕй хистӕр нӕлгоймаг суай ӕмӕ ӕмбырдӕн фылдӕр ӕххуыс кӕнай (1 Тим. 3:1–7). Кӕй зӕгъын ӕй хъӕуы, уый тыххӕй уал хъуамӕ, дӕ бон цыдӕриддӕр у, уый аразай, цӕмӕй сыгъдӕг тыхы фӕрцы дӕ удыхъӕды рӕзын кӕнай, хистӕр нӕлгоймагмӕ цы миниуджытӕ хъуамӕ уа, уыдон. Фӕлӕ дӕ иннӕтӕй фылдӕр ӕнхъӕлмӕ кӕсын куы бахъӕуа, уӕд куыд? Йӕхи иннӕтӕй дӕлдӕрыл чи нымайы, ахӕм адӕймаг фӕразонӕй ӕнхъӕлмӕ кӕсдзӕн, цалынмӕ йын фылдӕр хӕстӕ нӕ бабар кӕной, уӕдмӕ. Уый Йегъовӕйӕн дарддӕр дӕр цингӕнгӕйӕ лӕггад кӕндзӕн ӕмӕ йын ӕмбырды цыфӕнды хъуыддаг ма бахӕс кӕной, уӕддӕр райгонд уыдзӕн.

17, 18. а) Хатыр куы курӕм ӕмӕ иннӕтӕн дӕр куы хатыр кӕнӕм, уӕд уый хорзӕй цы ӕрхӕсдзӕн? ӕ) Ӕмбисӕндты 6:1–5 стихтӕ нӕ цӕмӕ разӕнгард кӕнынц?

¹⁷ Иннӕтимӕ куыд стӕм. Адӕмӕн сӕ фылдӕрӕн хатыр курын зын у. Фӕлӕ Хуыцауы лӕггадгӕнджытӕ архайынц, цӕмӕй сӕрныллӕг уой, ӕмӕ сӕ рӕдыдтытыл басӕттынц ӕмӕ хатыр ракурынц, стӕй сӕхӕдӕг дӕр иннӕтӕн ӕнцонтӕй хатыр кӕнынц. Сӕрбӕрзонддзинад у быцӕуты хос, адӕмы кӕны кӕрӕдзийы ныхмӕ. Хатыр кӕнын куы зонӕм, уӕд та ӕмбырды уыдзӕн фарн.

¹⁸ Гӕнӕн ис, ӕмӕ нӕ бахъӕуа «нӕхи ӕрныллӕг кӕнын», цӕмӕй адӕймагӕй зӕрдиагӕй хатыр ракурӕм. Зӕгъӕм, кӕимӕдӕр цӕуылдӕр баныхас кодтам, фӕлӕ стӕй, махӕй кӕнгӕ чи нӕ уыд, ахӕм аххосӕгты тыххӕй нӕ ныхас сӕххӕст кӕнын нӕ бон нӕ баци. Ахӕм уавӕры сӕрныллӕг адӕймаг ахъуыды кӕндзӕн йӕхи рӕдыдтытыл ӕмӕ сыл басӕтдзӕн, хабар афтӕ кӕй рауад, уый ӕрмӕст йӕхи аххос куы нӕ уа, уӕд дӕр. (Бакӕс Ӕмбисӕндтӕ 6:1–5.)

19. Цӕмӕн хъуамӕ аргъ кӕнӕм Библийы уынаффӕйӕн, уӕхи иннӕтӕй дӕлдӕрыл нымайут, зӕгъгӕ?

¹⁹ Куыд тынг аргъ кӕнӕм Библийы уынаффӕйӕн, уӕхи иннӕтӕй дӕлдӕрыл нымайут, зӕгъгӕ! Сӕрныллӕгдзинад равдисын хатт зын вӕййы. Фӕлӕ не Сфӕлдисӕг махӕй цас бӕрзонддӕр у, ууыл куы хъуыды кӕнӕм ӕмӕ, Йегъовӕ йӕхӕдӕг дӕр сӕрныллӕг кӕй у, уый нӕ зӕрдыл куы дарӕм, уӕд нӕ тынгдӕр фӕнддзӕн, цӕмӕй нӕм уыцы диссаджы миниуӕг уа. Ӕмӕ уӕд Йегъовӕйӕн хуыздӕр лӕггадгӕнджытӕ уыдзыстӕм. Цӕй уӕдӕ нӕ алчидӕр йӕхи иннӕтӕй дӕлдӕрыл нымайӕд!