1, 2. Ki konseho Hesus a duna su apòstelnan i dikon?

TABATA aña 32 di nos era. Hesus tabata huntu ku su apòstelnan den e distrito di Galilea. Na dado momento, a surgi un problema entre su apòstelnan; nan tabata diskutí tokante ken tabata esun di mas grandi entre nan. E eskritor Lukas a relatá loke a pasa: “Anto a lanta un diskushon entre e disipelnan tokante kua di nan lo tabata esun di mas grandi. Ma Hesus, sabiendo kiko nan tabata pensa den nan kurason, a pone un mucha chikitu para banda di dje, i el a bisa nan: ‘Ken ku risibí e mucha akí den mi nòmber ta risibí mi tambe, i ken ku risibí mi, ta risibí tambe Esun ku a manda mi. Pasobra esun ku ta komportá su mes komo esun di mas chikitu meimei di boso tur, esei ta esun ku ta grandi.’” (Luk. 9:46-48) Sí, ku pasenshi pero na un manera firme, Hesus a yuda su apòstelnan mira ku nan mester ta humilde.

² Awor, e konseho akí ku Hesus a duna su apòstelnan tabata na armonia ku e norma- i balornan di e hudiunan di e tempu ei? Nò. De echo, e tabata nèt lo kontrario. E buki Theological Dictionary of the New Testament ta bisa: ‘Den tur asuntu, pa e hudiunan tabata masha importante pa sa ken meresé mas onor. I semper nan tabata masha preokupá pa nan realmente haña e onor ku nan meresé.’ Pero Hesus tabata ke pa su apòstelnan ta diferente.

3. (a) Kiko ke men komportá nos mes komo esun di mas chikitu? (b) Dikon tin biaha por ta difísil pa nos komportá nos mes asina? (c) Ki preguntanan e artíkulo akí lo kontestá?

³ E palabra griego tradusí komo “esun di mas chikitu” ta referí na un persona insignifikante òf sin outoridat. Un persona asina ta humilde i no ta konsiderá su mes mas importante ku otronan. Hesus a siña su apòstelnan ku nan mester ta humilde i modesto  manera mucha. I esaki ta konta tambe pa tur kristian berdadero awe. Pero tin biaha, no ta fásil pa komportá nos mes komo esun di mas chikitu, esta, pa desplegá humildat. Debí na imperfekshon, orguyo por pone nos hasi esfuerso pa ta mihó ku otronan. Ademas, e mundu di Satanas por influensiá nos pa ta egoista, ambisioso òf dominante. Awor, kiko nos por hasi pa nos por tin un aktitut humilde? Kiko Hesus tabata ke men ora el a bisa ku ‘esun di mas chikitu ta esun ku ta grandi’? Den ki área nos mester desplegá humildat?

4, 5. Kiko por yuda nos kultivá humildat? Duna un ehèmpel.

⁴ Pa nos por ta mas humilde nos mester meditá riba Yehova su grandesa. De echo, “su komprondementu ta inskudriñabel.” (Isa. 40:28) Refiriendo na sierto aspekto di Yehova su grandesa, apòstel Pablo a skirbi: “O ki profundo e rikesa, sabiduria i konosementu di Dios ta! Ki insondabel su huisionan ta i ki ininvestigabel su kamindanan ta!” (Rom. 11:33) Aunke hende su konosementu a oumentá konsiderablemente den vários área desde ku Pablo a skirbi e palabranan ei kasi 2.000 mil aña pasá, loke el a skirbi ketu bai ta sierto. Pues, maske kuantu kos nos sa kaba, nunka nos ta kaba di siña tokante Yehova, su obranan i su kamindanan. Si nos ta realisá esei, nos ta keda humilde.

⁵ Laga nos tuma Leo * komo ehèmpel. Ora el a realisá ku nunka e por siña tur kos enkuanto Dios su kreashon, esei a yud’é mira su mes komo esun di mas chikitu. Tempu ku Leo tabata hóben, e tabata fasiná ku siensia. Komo ku e tabata kier a siña mas tantu posibel di nos universo, el a kuminsá studia astrofysica. Pero el a yega na e konklushon ku siensia so no por yuda hende komprondé tur kos tokante e universo i p’esei el a kambia di estudio. El a kuminsá studia lei i, ku tempu, el a bira abogado i hues. Algun tempu despues, e ku su kasá a kuminsá studia Beibel ku Testigunan di Yehova; nan a progresá i batisá. Kiko a yuda Leo desaroyá un aktitut humilde pa asina e por komportá su mes komo esun di mas chikitu maske e tabata un persona ku bon edukashon? Leo a bisa: “Mi a realisá ku, maske kuantu nos siña tokante Yehova i e universo, ainda nos tin hopi mas pa deskubrí.”

6, 7. (a) Kon Yehova ta pone un maravioso ehèmpel di humildat? (b) Den ki sentido Yehova su humildat por hasi un persona “grandi”?

⁶ Un otro manera ku nos por kultivá  humildat ta di reflekshoná riba e echo ku Yehova mes ta desplegá humildat. Pensa riba esaki: Beibel ta bisa ku “nos ta kompañero di trabou di Dios.” (1 Kor. 3:9) Imaginá bo! Yehova, e Dios Haltísimo, ke pa nos traha en kooperashon kuné. E ta duna nos e onor di kumpli ku nos sirbishi, usando su Palabra, Beibel. Sí, aunke ta Yehova mes ta sòru pa e simianan krese, tòg el a duna nos e privilegio grandi di planta i muha. (1 Kor. 3:6, 7) Esei no ta un ehèmpel maravioso di humildat? No tin duda, Yehova su ehèmpel di humildat mester animá nos kada un pa komportá nos mes komo esun di mas chikitu.

⁷ Dios su ehèmpel di humildat tabatin un efekto profundo riba e salmista David, kende a kanta na Yehova: “Bo a duna mi e eskudo di bo salbashon, i bo gentilesa [“humildat,” NW] ta hasi mi grandi.” (2 Sam. 22:36) Asina David a rekonosé ku si no tabata pa e echo ku Yehova a desplegá humildat i a presta atenshon na dje, lo e no por a hasi tur e kosnan grandi ku el a hasi na Israel. (Sal. 113:5-7) Meskos ta konta pa nos. Dikon? Pasobra tur kualidat, kapasidat, abilidat òf responsabilidat spesial ku nos tin, nos “a risibí” di Yehova. (1 Kor. 4:7) Ora Hesus a bisa ku esun ku ta komportá su mes komo esun di mas chikitu ta bira “grandi,” e tabata ke men ku e persona akí ta bira un sirbidó mas balioso pa Yehova. (Luk. 9:48) Laga nos wak kon asina.

8. Dikon esnan ku ta forma parti di Dios su organisashon mester ta humilde?

⁸ Pa nos por ta felis den e organisashon di Dios i sigui guia ku nos ta haña mediante su organisashon, ta masha importante pa nos ta humilde. Tuma por ehèmpel Petra, un mucha muhé hóben ku a lanta den un famia Testigu di Yehova. Komo ku Petra kier a hasi kosnan na su manera, el a alehá su mes for di e kongregashon. Pero algun aña despues, el a bolbe kuminsá asistí na e reunionnan. Awor, e ta kontentu ku e ta forma parti atrobe di e organisashon di Dios i ku e por sigui guia di Yehova. Kon bini awor sí e ta sinti asina? El a skirbi: “Pa mi por a sinti mi na kas den e organisashon di Dios, mi mester a kultivá dos kualidat masha importante: humildat i modestia.”

9. (a) Kon un persona humilde ta mira Beibel i e otro publikashonnan ku nos ta risibí for di e esklabo fiel i prudente? (b) Dikon esei ta hasié mas balioso?

⁹ Un persona humilde ta balorá Yehova su provishonnan, inkluso e kuminda spiritual ku e ta perkurá. P’esei un persona asina ta studia Beibel diligentemente i ta lesa tur edishon di E Toren di Vigilansia i ¡Despertad! Pues, meskos ku hopi sirbidó di Yehova, e tin e kustumber di lesa tur publikashon nobo promé ku e warda nan den su biblioteka personal. Si nos ta lesa i studia nos publikashonnan basá riba Beibel, nos ta demostrá ku nos ta humilde i ku nos ta apresiá kosnan spiritual. Ademas, esaki lo yuda nos progresá spiritualmente, i Yehova por usa nos mihó den su sirbishi.—Heb. 5:13, 14.

10. Kon nos por komportá nos mes komo esun di mas chikitu den kongregashon?

¹⁰ Un persona ku ta komportá su mes komo esun di mas chikitu ta “grandi,” òf mas balioso, den un otro sentido tambe. Den tur kongregashon tin hòmbernan kapasitá ku ta ser nombrá mediante Yehova su spiritu santu pa sirbi komo ansiano. E hòmbernan akí ta dirigí diferente aktividat teokrátiko, manera por ehèmpel reunionnan di kongregashon i sirbishi, i ta pastoriá e kongregashon. Ora nos ta  humilde i ta kooperá di buena gana ku e ansianonan, nos ta kontribuí na e goso, pas i union di e kongregashon. (Lesa Hebreonan 13:7, 17.) Si bo ta un ansiano òf sirbidó ministerial, bo aktitut ta demostrá ku bo ta humilde i ku bo ta kontentu ku e privilegio akí ku Yehova a duna bo?

11, 12. Ki aktitut ta hasi nos mas balioso pa Yehova su organisashon, i dikon?

¹¹ Esun ku ta komportá su mes komo esun di mas chikitu ta “grandi,” òf mas balioso pa Yehova su organisashon, pasobra su aktitut humilde ta hasié un sirbidó útil pa Dios i un bon ruman. Hesus mester a konsehá su disipelnan pa nan komportá nan komo esun di mas chikitu pasobra algun di nan a kuminsá pensa meskos ku e hendenan orguyoso di e tempu ei. Lukas 9:46 ta bisa ku “a lanta un diskushon entre e disipelnan tokante kua di nan lo tabata esun di mas grandi.” Esaki por sosodé ku nos tambe? Nos tambe por kuminsá pensa ku nos ta mihó ku nos rumannan òf superior na otro hende? Mayoria di hende den mundu ta orguyoso i egoista, pero nos mester ta diferente. P’esei, laga nos ta humilde i pone Yehova su boluntat na promé lugá den nos bida. Asina nos rumannan lo sinti nan bon ora nan ta den nos kompania.

¹² Hesus su konseho pa komportá nos mes komo esun di mas chikitu ta animá nos pa desplegá humildat den tur área di bida. Laga nos trata tres área.

13, 14. Kon un esposo òf esposa por komportá su mes komo esun di mas chikitu, i ki efekto esaki por tin riba nan matrimonio?

¹³ Den matrimonio. Awendia, hopi hende ta wak pa nan mes. I pa nan haña loke nan ke, nan ta bai asina leu di trapa otro hende su derechonan. Pero un hende ku ta komportá su mes komo esun di mas chikitu ta sigui e konseho ku Pablo a duna e romanonan. El a bisa nan: “Laga nos hasi esfuerso pa buska e kosnan ku ta promové pas i ku ta yuda edifiká otro.” (Rom. 14:19) Sí, un persona ku ta komportá su mes komo esun di mas chikitu ta hasi esfuerso pa e ta na pas ku tur hende, spesialmente ku su kasá.

¹⁴ Por ehèmpel, ora ta trata di rekreo, un pareha kasá kisas no tin e mesun smak. Podisé e esposo ta preferá di keda kas trankil i lesa un buki den su tempu liber. Di otro banda, su esposa kisas ta preferá pa nan bai kome un kaminda òf bishitá algun amigu. Si e esposo ta un persona humilde ku ta tene kuenta ku su esposa su gustu i no ta pensa solamente riba loke é ta gusta, lo ta mas fásil pa e esposa respetá su esposo, no ta bèrdat? I e esposo, na su turno, tambe lo stima i balorá su esposa mas si su esposa ta tene kuenta kuné i no ta buska semper pa haña loke é ke. Sí, ora tantu e esposo komo e esposa ta humilde, nan laso matrimonial lo bira mas fuerte.—Lesa Filipensenan 2:1-4.

15, 16. Segun Salmo 131, kiko David a animá e israelitanan pa nan hasi, i kon nos por hasi meskos den kongregashon?

¹⁵ Den kongregashon. Tin hopi hende ta pensa ku nan tin ku haña loke nan ke mesora. Nan no tin pasenshi i nan no ta gusta warda tampoko. Pero ora nos ta humilde, nos no tin problema pa warda, òf spera, riba Yehova. (Lesa Salmo 131:1-3.) Si un persona ta humilde i ta warda riba Yehova, lo e tin trankilidat, lo e haña konsuelo, felisidat i hopi bendishon. P’esei, nos ta komprondé pakiko David a animá e israelitanan pa nan warda riba Yehova ku pasenshi.

¹⁶ Abo tambe por haña konsuelo si bo ta warda humildemente riba Yehova. (Sal. 42:5) Podisé bo tin gana di sirbi komo  ansiano pa bo por yuda e kongregashon mas. (1 Tim. 3:1-7) Ta klaru ku bo tin ku pidi Yehova su yudansa mediante spiritu santu i hasi tur loke bo por pa kultivá e kualidatnan nesesario pa sirbi komo ansiano. Pero kiko si ta parse ku bo tin ku warda mas ku otronan? Un persona ku ta komportá su mes komo esun di mas chikitu ta warda ku pasenshi riba Yehova pa e risibí mas privilegio den kongregashon. Pero mientrastantu, e ta sigui sirbi Yehova ku goso i ta kontentu ku kualke asignashon ku e haña.

17, 18. (a) Ki ta e benefisionan di pordoná otro i pidi despensa? (b) Kiko Proverbionan 6:1-5 ta konsehá nos pa hasi si, pa un motibu bálido, nos no por kumpli ku loke nos a primintí?

¹⁷ Den nos trato ku otro hende. Mayoria di hende tin problema pa pidi despensa. Sinembargo, sirbidónan di Dios ta hasi esfuerso pa nan ta humilde; nan ta atmití nan erornan i ta pidi despensa. Ademas, nan ta kla pa pordoná otro hende. Orguyo ta kousa divishon i pleitu. Pero un persona ku ta kla pa pordoná ta promové pas den e kongregashon kristian.

¹⁸ Tin biaha por sosodé ku, pa un motibu bálido, nos no por kumpli ku loke nos a primintí. Den un situashon asina, nos mester desplegá humildat i pidi despensa. Anto maske un kristian por kulpa un otro persona pa e fayo, si e ta humilde, e no ta hasi esei; mas bien, e ta wak unda e mes a faya i ta atmití su eror.—Lesa Proverbionan 6:1-5.

19. Dikon nos mester ta kontentu ku Beibel ta animá nos pa komportá nos mes komo esun di mas chikitu?

¹⁹ Nos ta masha kontentu ku Beibel ta animá nos pa ta humilde, esta, pa komportá nos mes komo esun di mas chikitu. Pero tin biaha, no ta fásil pa desplegá humildat. Ma si nos ta reflekshoná riba Yehova su grandesa, esei lo motivá nos pa desplegá e kualidat maravioso akí. Dikon? Pasobra si e mes, siendo e Dios Haltísimo, ta desplegá humildat, kuantu mas nos tin ku hasi esei! Es mas, si nos ta humilde, nos lo ta mas balioso den bista di Dios. P’esei, laga nos kada un sigui komportá nos mes komo esun di mas chikitu.