Momekeroul er a Klengariourreng

“Ngikel kot el ngariou er a delongeliu el rokui, ingikei ia kot el ngarbab.”​—LUKAS 9:48.

NGSEBECHEM EL METIK A NGER?

Ngera mo ngosukid el omekeroul er a klengariourreng?

Ngokiu a ngera el rolel e a ngariou a rengul el chad a “kot el ngarbab”?

Ngmekerang a dolecholt a klengariourreng er a chelsel a chebechiil, ongdibel, me a deleuill er kid me a rechad?

1, 2. Ngera el omellach a ledillii a Jesus, e ngera uchul?

 SERA rak er a 32 er a lengar a Galilea a Jesus e a rebebil el apostol er ngii a mlo kaititekangel. A Lukas a ouchais el kmo: “Ng mlor ngii a klaititekangel er a delongelir a rubengkel er a kmo ng techa er tir a kot el ngarbab. A Jesus a mle medengei a ngar a uldesuir me ng ngiluu a tal ngalek el mekedecherur el bitar ngii e dmu er tir el kmo, ‘Ngikel nguu ngikal ngalek el oba ngklek a ngoikak; me ngikel ngoikak, a dirrek el nguu ngikel ulderchak. Ele ngikel kot el ngariou er a delongeliu el rokui, ingikei ia kot el ngarbab.’ ” (Lukas 9:46-​48) Me a Jesus a mle klou a rengul el olisechakl er a rechapostol er ngii el kmo ngkirir el mo ngariou a rengrir.

² Sel tekingel a Jesus el kirel a klengariourreng nguleltirakl er a siukang er a Rechijudea er sel taem? Me a lechub e ngmle ngodech er a uldesuir a rechad? A Theological Dictionary of the New Testament a mesaod er a blekeradel er sel taem el kmo: “A rechad a mle blechoel el melatk el kmo ngtechang a kot el ngarbab me ngkmal mle klou a ultutelel a olechotel a omengull el oltirakl a deruchellir a redersta el chad.” Me a Jesus a milellach er a rechapostol er ngii me lak bo leua uldesuir a rechad er sel taem.

3. (a) Ngua ngerang a blekerdelel a chad el ngariou a rengul, e ngera uchul me ngsebechel el mo meringel er kid el olecholt er ngii? (b) Ngera el ker el kirel a klengariourreng a mo duubech?

³ A belkul a tekoi er a Grik el “ngikel kot el ngariou” a mesaod er a chad el ngariou a rengul, e medengei a chelitechetul, e ngariou a deruchellel. A Jesus a uluusbech er a kekerei el ngalek el olisechakl er a rechapostol er ngii el mo medengei a chelitecheterir  e mo ngariou a rengrir. Me tia el tekingel a dirrek el klou a ultutelel el kirir a remera el Kristiano er chelechang. A lebebil er a taem e ngsebechel el mo meringel er kid el olecholt er a klengariourreng. Kid el diak demecherrungel a uchul me ngsebechel el mo kedidai a rengud e mo soad el osiik a ngarbab el deruchall. A blekeradel er tia el beluulechad, el rechad er ngii a di kaisichai a sebechel el rullid el mo ngarbab a rengud e soad el mengaisichai e dirrek el omesiul er a rechad el mo meruul a soad. Ngera ngosukid el omekeroul er a klengariourreng? Ngmekerang e ‘ngike el kot el ngariou er a delongeled’ e mo kot el ngarbab? Ngkired el olecholt er a klengariourreng er a chelsel a uangera el blekeradel?

A DIOS A “KMAL DMOLECH A LLEMESEL A RENGUL MA LODENGEI”

4, 5. Ngera sebechel el rullid el mo ngariou a rengud? Momekesiu.

⁴ A ta er a rolel e kede mekurulii a klengariourreng a sel domtab er a klengarbab er a Jehovah. A mera er ngii, “Ng diak a chad el mtab a uldesuel.” (Isaia 40:28) A apostol el Paulus a milsaod er a Jehovah el kmo: “Kele ng kol meral klou a klungiolel a Dios! E kmal dmolech a llemesel a rengul ma lodengei!” (Rom 11:33) Me alta e a rechad a mla suub a betok el tekoi er a chelsel aika el mereko el 2,000 er rak, engdi a tekingel a Paulus a dirk klemerang. Me sel dodengei el kmo ngdirk betok a tekoi el kirel a Jehovah, me a urerel me a blekerdelel el dirkak bo dodengei, e ngkirel el rullid el mo ngariou a rengud.

⁵ Me a klemedengei er a Leo * el kirel a klengarbab er a Jehovah a ngilsuir el mo ngariou a rengul. Sera lekekerei el chad e ngkmal mle semeriar a tekoi er a science. Me ngii el mle soal el mo medengei a lmuut el betok el kirel a melidiul a uchul e ngmlo mesuub el kirel a astrophysics e mlo melechesuar a lmuut el klou a ultutelel el tekoi. Engdi a omesubel a dimlak lebsang a cherrungel el klemedengei, me ngmlo mesuub a tekoi er a llach. Me a Leo a mlo chad er a llach e a uriul e ngmlo chad er a kerrekeriil. Cherengel a taem e ngii me a bechil a mlo mesuub er a Biblia el obengterir a Resioning er a Jehovah, e kilengei er a klemerang e mlo metecholb el mo mesiungel a Dios. Me alta e a Leo a mle ngarbab el chad er a uchei, engdi ngerang a mla ngosuir el mo ngariou a rengul? Ngdmu el kmo: “Ak mla mo ungil el medengei el kmo ngdiak el sebeched el suub a rokui el tekoi el kirel a Jehovah me a eanged me a chutem.”

6, 7. (a) A Jehovah ngmekerang a lolecholt er a klengariourreng? (b) Ngmekerang a klengariourreng er a Dios e rullii a chad el mo “kot el ngarbab”?

 ⁶ A ta er a tekoi el ngosukid el mo ngariou a rengud a sel klengariourreng er a Jehovah. El ua tiang: Kede “kldemel a Dios er a ureor.” (1 Korinth 3:9.) Ka di molatk er a klengarbab er a Jehovah el Dios el omes er kid e longididai er kid el meskid a techelled me kede meruul er a omesiunged el ousbech er a Tekingel el Biblia. Me alta e a Jehovah a ngike el omekeroul a tane el dolalem e melubs engdi ngmeskid a ngarbab el deruchall el mo oureor el obengkel. (1 Korinth 3:6, 7) Tiang a olechotel a klou el klengariourreng er a Dios, el kirel el melisiich er a derta er kid el mo ngariou a rengud.

⁷ A klengariourreng er a Jehovah a kmal mle klou a lerellii er a uldesuel a David, me ngdilu el kmo: “RUBAK, kau a cheuotelek e osebelek; ke mla ngosukak e ongesecheklak.” (2 Samuel 22:36) A David a milsaod el kmo a klengariourreng er a Jehovah el omekerreu er ngii a uchul me ngmle ngarbab a deruchellel. (Psalm 113:5-7) Me nguaisei, aike el ungil el blekerdeled, me a duch er kid me a techelled a rokui el lebilskid a Jehovah. (1 Korinth 4:7) Me a chad el olecholt er a klengariourreng a mo “kot el ngarbab” e le Jehovah a mo sebechel el ousbech er ngii. (Lukas 9:48) Me bo dosaod.

‘NGIKEL KOT EL NGARIOU A MO KOT EL NGARBAB’

8. A klengariourreng er kid ngera ngrullii er a osenged el kirel a cheldebechelel a Jehovah?

⁸ A rengariou a rengrir el chad a dmeu a rengrir el teloi er a cheldebechelel a Dios e oltirakl a ulekrael el medung er a ongdibel. El ua tiang, a Petra el kekerei el redil el mlukeroul er a telungalek er a Resioning, a mle soal el mo cheroid er a ongdibel me bo lsebechel el meruul aike el soal el tekoi. Engdi a betok el rak er a uriul, e ngliluut el me er a ongdibel, e chelechang e ngkmal dmeu a rengul el teloi er a cheldebechelel a Jehovah e kmal semeriar el oltirakl a tekoi el bla leketmokl a ongdibel. Ngera ngildechii a uldesuel? Ngmeluches el kmo: “Ngmle kirek el mo suubii a klungel a ultutelel a klengariourreng e mo omekeroul er ngii me bo el sebechek el mo chelellakl a renguk el ngar er a chelsel a cheldebechelel a Dios.”

9. Ngua ngerang a uldesuel a ngariou a rengul el chad el kirel aike el babilenged, e ngera uchul me ngrullii el mo ungil el mesiou?

⁹ A ngariou a rengul el chad a oba omereng el saul el kirel aike el lomeskid a Jehovah. Me ngblak a rengul el mesuub er a Biblia e menguiu a bek el Ongkerongel me a Awake! el makesin. A rebetok el mesiungel a Jehovah a blechoel el menguiu a derta el babier er a uchei er a leketmeklii er a blil a babilengir. Me sel dolecholt er a klengariourreng el okiu sel donguiu e dosuub a babilenged el mengai a uchetemel er a Biblia, e kede mo olengeriakl er a omesiunged me a Jehovah a mo sebechel el ousbech er kid.​—Hebru 5:13, 14.

10. Ngmekerang a dolecholt er a klengariourreng er a chelsel a ongdibel?

¹⁰ A chad el ngariou a rengul a mo “kot el ngarbab” el okiu a ta er a rolel. A bek el ongdibel a ngar er ngii a remechuodel el tir a mlengilt el okiu a oureor el klisichel a Jehovah. Te mengetmokl a miting er a ongdibel, me a ureor er a berkel a klumech e dirrek el oldingel er a derta el chad er a ongdibel. Me sel dolecholt er a klengariourreng e dekengei el oltirakl a bek el ulekrael er a ongdibel  e kede toketekii a deurreng, budech me a kltarreng. (Monguiu er a Hebru 13:7, 17.) A lsekum ke mesiou el ta er a remechuodel me a lechub e ke ministerial servant, e kau ke mereng a sulel a Jehovah e le ngmla meskau tia el techall er a omesiou?

11, 12. Ngera uchul me ngkirel el mo ngodech a blekerdeled er a rebetok el chad er chelechang?

¹¹ A chad a dirrek el mo klou a belkul er a chelsel a cheldebechelel a Jehovah e le klengariourreng er ngii a rullii el mo ungil el mesiungel a Dios. A Jesus a ulemeklatk er a redisaiplo er ngii el mo ngariou a rengrir e le rebebil er tir a mle ua uldesuir a rechad er sel taem. A Lukas 9:46 a kmo: “Ng mlor ngii a klaititekangel er a delongelir a rubengkel er a kmo ng techa er tir a kot el ngarbab.” Me kid, ngsebeched el mo uai tir el omdasu el kmo kede kuk ungil er a rechad er a ongdibel me a lechub e kede kuk ngarbab er a rebek el chad? Te betok el chad er chelechang a kmal mekedidai a rengrir e di melatk er a di tir. Me bo dongeroid er kid er tir, e bai bo dolecholt er a klengariourreng. A bo deuaisei e denguu a Jehovah el mo kot, e kede mo melisiich er a rudam me a rudos er kid.

¹² A tekingel a Jesus el kirel a klengariourreng a mo uchul a klungioled, me ngkired el olecholt er ngii er a bek el taem. Me bo dosaod a edei el rolel e kede olecholt er a klengariourreng.

BO MOBA KLENGARIOURRENG

13, 14. Te mekerang a rubekel e olecholt er a klengariourreng, e tiang ngera ngrullii er a chebechiielir?

¹³ Er a chelsel a chebechiil. A rebetok el chad er chelechang a di mesaod er a llemeltir e diak lomekerreu a llemeltir a rebebil. Engdi a ngariou a rengul el chad a bai oltirakl er sel ulekrael er a Paulus el mo er a rechad er a Rom el kmo: “Ng kired el di blechoel el telbiil er a rengud a meruul a ikel mo uchul a budech ma olisichel a delongeled.” (Rom 14:19) A ngariou a rengul el chad a melisiich a budech el obengterir a rebek el chad e ileakl el meruul er ngii el mo er a betik er a rengul el bechil.

¹⁴ El ua tiang, a rubekel a sebechel el mo kakerous a sorir el kirel a tekoi er a ongelaod. Alta e a sechal a soal di kiei er a blai e menguiu a babier, engdi a redil a soal el omengur er a blil a blengur me a lechub e ngoldingel er a resechelil. Ngmo beot er a bechiil el redil el mengull er a bechil a lsekum ngomes er ngii el olecholt er a klengariourreng e dirrek el melatk aike el soal e diak di lolatk er ngii e lemerekong. Me a bechiil el sechal a mengal mo betik a rengul er a bechil sel lomes er ngii el kerekikl el melatk er ngii e diak di longerechir aike el soal. Me a rubekel sel ledu el olecholt er a klengariourreng e te lmuut el smisichii a chebechiielir.​—Monguiu er a Filipi 2:1-4.

15, 16. Ngera el blekeradel a lullisiich er ngii a David er a Psalm 131, e ngera ngrullii er a blekerdeled er a chelsel a ongdibel?

¹⁵ Er a chelsel a ongdibel. Ngar tia el beluulechad, e a rebetok el chad a kiei el di melisiich a ngelbesel a rengrir. Ngdiak a kllourreng er tir me ngmeringel er tir el mengiil a tekoi. Engdi a dokurulii a klengariourreng e ngosukid el mo klou a rengud el mengiil er a temel a Jehovah. (Monguiu er a Psalm 131:1-3.) Me a doruul el uaisei, e ngmo uchul a ulekerreu, ongelaod, deurreng me a klengeltengat. Misei a uchul me a David a millisiich er a rechad er a Israel el mo oumerang el ulsirs er a Dios er tir!

¹⁶ Ngdirrek el mo mechelaod a  rengum sel moba klengariourreng el mengiil er a Jehovah. (Psalm 42:5) Me alta e ke oureng “er a kot el ungil el ureor” e “semeriar el mo mengeteklel a ikelesia.” (1 Timothy 3:1-7) Me ngkirem el mo er aike el sebechem el omekeroul a ungil el blekeradel el okiu a oureor el klisichel a Dios. Engdi ngmekerang a lsekum ke mengiil er a techellem el kuk kemanget el taem er a techellir a rebebil? A ngariou a rengul el chad a klou a rengul el mengiil er a techellel e melemolem el dmeu a rengul el mesiou er a Jehovah e meruul aike el ngerachel el moterekokl er ngii.

17, 18. (a) Ngera el klungiaol a mo er ngii a dolengit a klausubes e dousubes er a rebebil? (b) Ngera el uleklatk a medung er a Osisechakl 6:1-5?

¹⁷ Er a delongelem kau me a rebebil. A rebetok el chad a meringel er tir el olengit a klausubes. Engdi a remesiungel a Dios a oba klengariourreng sel lekengei a cheleuid el omerellir e lolengit a klausubes el kirel. Te dirrek el mereched el ousubes er a rebebil. A kldidairreng a uchul a uldikel me a klekakiakl, e a klausubes a melisiich er a budech er a chelsel a ongdibel.

¹⁸ A lebebil er a taem e ngkired el olecholt er a klengariourreng e mo olengit a klausubes er a chad e le ngmlo diak el sebeched el otireklii a telbiled el mo er ngii. Me alta e ngdimlak a ngera el letemellii, engdi a ngariou a rengul el Kristiano a kongei el kmo ngmlo mekngit e olengit a klausubes.​—Monguiu er a Osisechakl 6:1-5.

19. Ngera uchul me kede rokui el oba omereng el saul el kirel a uleklatk er a Biblia el kirel a klengariourreng?

¹⁹ Kede oba klou el omereng el saul el kirel a omelisiich er a Bades el mo omekeroul er a klengariourreng! Me alta e a lebebil er a taem e ngmeringel er kid el olecholt er a klengariourreng engdi sel domtab er a klengarbab er Ngike el Ulemeob e dodengei el kmo ng ngariou a rengul, e ngrullid el mo omekeroul er tia el ungil el blekeradel. Me sel doruul el uaisei, e a Jehovah a mo sebechel el ousbech er kid el mesiou er ngii. Me kid el rokui bo dolemolem el olecholt er a klengariourreng.

[Footnote]

[Aike el Ker er a Suobel]

[Siasing el ngar er a 19 el llel]

A Jehovah a mengedidai er kid el okiu a techelled el omerk er a ungil el chais

[Siasing el ngar er a 22 el llel]

Kau ke oba ngera el techall el mo olecholt er a klengariourreng?