Ia Taumafai e Avea ma Tagata Faatauvaa
Ia Taumafai e Avea ma Tagata Faatauvaa
“O lē e fai o ia lava ma tagata faatauvaa iā te outou uma, e sili lava o ia.”—LUKA 9:48.
PE MAFAI ONA E MAUA LE TALI?
O le ā e fesoasoani i le avea o i tatou o ni ē e faatauvaa?
O ā auala e avea ai lē e faatauvaa ma lē “e sili”?
E faapefea ona faaalia le lotomaulalo i le faaipoipoga, faapotopotoga, ma a tatou faiā ma isi?
1, 2. O le ā le timaʻiga na avatu e Iesu i ona soo, ma aiseā?
A O IAI Iesu i Kalilaia i le 32 T.A., na fefinauaʻi ai nisi o ona aposetolo po o ai o i latou e sili. Na taʻua e Luka e faapea: “Ona latou fefinauaʻi lea po o ai o i latou e sili. Ua silafia e Iesu manatunatuga o o latou loto, ona ia aumaia lea o se tamaitiiti ma faatū i ona tafatafa, ma ua ia fetalai atu iā i latou: ʻO sē e na te taliaina lenei tamaitiiti ona o loʻu igoa, ua ia taliaina aʻu, ma o sē e na te taliaina aʻu, ua ia taliaina foʻi lē na auina mai aʻu. O lē e fai o ia lava ma tagata faatauvaa iā te outou uma, e sili lava o ia.’” (Luka 9:46-48) Na faapalepale Iesu ma taumafai e fesoasoani i ona soo e iloa le tāua o le faaalia o le lotomaulalo.
2 Pe na tutusa le timaʻiga a Iesu ina ia avea ma tagata faatauvaa, ma manatu o tagata Iutaia i le uluaʻi senituri? Na taʻua i se tasi tusi e tusa ma le tulaga o mea i lenā taimi e faapea: “E masani ona aliaʻe le fesili lenei po o ai e sili i le tele o taimi. E sili foʻi ona tāua i tagata le mauaina o le ava ma le faaaloalo.” (Theological Dictionary of the New Testament) O lea, na apoapoaʻi ai Iesu i ona soo ina ia ese i latou mai i tagata o le lalolagi.
3. (i) O le ā e uiga i ai le avea ma lē e faatauvaa? (ii) Aiseā e avea ai ma luʻi le faia faapea i aso nei? (iii) O ā fesili e tatau ona iloiloina ina ia avea ai ma lē e faatauvaa?
3 O le upu Eleni ua faaliliuina mo le “tagata faatauvaa,” e uiga atu i se tagata e lotomaulalo, e lē tāua, pe e lē taualoa. Ina ua faaaogā e Iesu se tamaitiiti, na faailoa atu ai i ona soo le tāua o le lotomaulalo ma le iloa o mea e gata mai ai lo latou mafai. E tāua foʻi mo i tatou ona utagiaina lenā fautuaga, auā e iai taimi e faigatā ai ona tatou faia faapea. O le faamaualuga e ono uunaʻia ai i tatou e fia taʻutaʻua. E mafai e le uiga faatautavā ma le agaga o lenei lalolagi, ona aafia ai i tatou i le fia matamuamua ma le agaga faumālō. O lea, o le ā e fesoasoani iā i tatou e avea ai o ni ē faatauvaa? E faapefea ona avea ʻlē e faatauvaa ma lē e sili’? O ā vala o le olaga e tatau ona tatou taumafai e faaalia ai le lotomaulalo?
ʻMAʻEU LE ATAMAI O LE ATUA!’
4, 5. O le ā se tasi o mea e uunaʻia i tatou e atiaʻeina le lotomaulalo? Aumai se faataʻitaʻiga.
4 O se tasi auala e tatou te atiaʻe ai le lotomaulalo, o le manatunatu lea i le silisili ese o Ieova. O le mea moni, ʻe lē masuʻesuʻeina le poto o Ieova.’ (Isa. 40:28) Na tusi Paulo e faapea: “Maʻeu le tele o le tamaoaiga, ma le atamai atoa ma le silafaga a le Atua! E lē masuʻesuʻeina ana faamasinoga, ma e lē mafai foʻi ona iloa ona ala!” (Roma 11:33) O loo tumau pea le moni o upu a Paulo, e ui o loo faatuputupulaʻia pea le poto o tagata. E tele mea ua tatou iloa ma aʻoaʻoina. Peitaʻi, e tatau ona tatou lotomaulalo ma iloa, o loo tele pea mea e tatau ona aʻoaʻoina e faatatau iā Ieova, faapea ana galuega ma ona ala.
5 O le iloaina e Lio * e lē masuʻesuʻeina le poto o Ieova, na ia manatu ai iā te ia o sē e faatauvaa. A o talavou Lio, na ia fiafia ai i le mataupu o le faasaienisi. O lona fia iloa atili e faatatau i le lalolagi paneta, na ia suʻesuʻeina ai mataupu tau i le vateatea. Na ia iloa mai ai i ana suʻesuʻega, e lē mafai e le poto o saienitisi ona fesoasoani i tagata, e malamalama atoatoa ai i le vateatea. Na ia faapea atili mai, “o lea na ou aʻoaʻoina ai loa le tulafono.” Na avea o ia ma lōia a le malo, ma mulimuli ane avea ma faamasino. E leʻi umi ae la suʻesuʻeina loa ma lana avā le Tusi Paia faatasi ma Molimau a Ieova, ma avea ai i laʻua ma auauna papatisoina a le Atua. O le ā na fesoasoani iā te ia e avea ma sē e faatauvaa, e ui lava i le maualuga o lona tulaga tauaʻoaʻoga? Na ia faapea mai, “e ui e tele mea ua tatou iloa e faatatau iā Ieova ma le vateatea, ae o loo tele pea mea e tatau ona tatou aʻoaʻoina.”
6, 7. (i) O le ā se faaaʻoaʻoga o le lotomaulalo o Ieova? (ii) O le ā se aafiaga o le faamaulaloina e Ieova o ia lava?
6 O le faaalia e Ieova lava ia o le lotomaulalo, o se tasi lea o vala e fesoasoani iā i tatou e faaalia lea uiga. Seʻi mafaufau i le manatu lenei: ʻO i tatou o le ʻaufaigaluega faatasi ma le Atua.’ (1 Kori. 3:9) E silisili ese Ieova, peitaʻi ua ia faamamaluina i tatou, e ala i le tuuina mai o le avanoa e tatou te talaʻia ai le tala lelei. O loo faatupuina e Ieova fatu o loo tatou totō ma faasūsūina. E ui i lea, ua ia faamamaluina i tatou i le avea ma se ʻaufaigaluega faatasi ma ia. (1 Kori. 3:6, 7) Pe e lē o se faaaʻoaʻoga lelei ea lenā o le lotomaulalo o Ieova? E mautinoa e fesoasoani lea faaaʻoaʻoga e avea ai i tatou lava, o ni ē e faatauvaa.
7 Na iai se aafiaga tele o le lotomaulalo o Ieova iā Tavita. Na ia pese e faapea: ʻE te tuuina mai iā te aʻu o lou talita o le faaolataga, o lou agamalu ua faasilisiliina ai aʻu.’ (2 Samu. 22:36) O le manatu o Tavita, na māfua ona faaeaina o ia, ona sa faamaulaloina e le Atua o Ia lava, ina ia la feutagaʻi. (Sala. 113:5-7) Ae e faapefea i tatou? Pe e iai ni tomai ma ni faaeaga ua tatou mauaina “e leʻi foaʻiina” mai e Ieova iā i tatou? (1 Kori. 4:7) E matuā tautele i le silafaga a Ieova se auauna lotomaulalo, ma ona o lenā tulaga, ua avea ai o ia ma sē “e sili.” (Luka 9:48) O lea, seʻi o tatou vaai pe e faapefea ona tupu lenā mea.
ʻO LĒ E FAATAUVAA E AVEA MA LĒ E SILI’
8. E faapefea i le lotomaulalo ona aafia ai la tatou vaaiga i le faalapotopotoga a Ieova?
8 E tāua le lotomaulalo ina ia maua ai le lotomalie i le faalapotopotoga a Ieova, faapea le lagolagoina o faatulagaga i le faapotopotoga. O se faaaʻoaʻoga, na ola aʻe se tuafafine talavou e igoa iā Petra, i se aiga Molimau a Ieova. Na manaʻo e taulima mea i lana lava auala. O lea, na ia faaesea ai o ia mai le faapotopotoga. Ae i ni nai tausaga mulimuli ane, na ia toe auaufaatasi ai ma le faapotopotoga. Ua ia lagona le fiafia i le faalapotopotoga a Ieova i le taimi lenei, ma ua ia naunau e lagolagoina faatulagaga a le faapotopotoga. Aiseā na suia ai lona mafaufau? Na ia faapea mai: “Ina ia maua le faamalieina i le faalapotopotoga a Ieova, e tatau ona ou malamalama ma atiaʻe uiga tāua e lua, o le lotomaulalo ma le iloa o mea e gata mai ai loʻu mafai.”
9. O le ā le vaaiga a le tagata lotomaulalo i meaʻai faaleagaga, ma aiseā e tāua ai le faia faapea?
9 E talisapaia e le tagata lotomaulalo sauniuniga a Ieova, lea e aofia ai meaʻai faaleagaga. O lea, e naunau ai se tagata lotomaulalo e suʻesuʻe le Tusi Paia, ma faitau mekasini o le Olomatamata ma le Ala Mai! E pei o isi auauna faamaoni a Ieova, e tatau ona tatou taumafai e faitau ma suʻesuʻeina lomiga fou faale-Tusi Paia uma i le taimi e maua ai. E fesoasoani lea i lo tatou agaʻigaʻi i luma faaleagaga, ma mafai ai ona faaaogā atoatoa e Ieova i tatou i lana auaunaga.—Epe. 5:13, 14.
10. E faapefea ona tatou faaalia atu o i tatou o ē faatauvaa i totonu o le faapotopotoga?
10 E iai se isi auala e avea ai lē e faatauvaa ma lē “e sili,” pe tautele iā Ieova. Ua faaaogā e Ieova lona agaga paia e tofia toeaina o loo auauna i faapotopotoga. E latou te faia le tele o faatulagaga e pei o fuafuaga mo le talaʻiga, sauniga ma le leoleoina o le faapotopotoga. E avea i tatou ma ē e faatauvaa, pe a tatou naunau e gauaʻi iā i latou. O le faia faapea, o le a tatou saosaolaumea ai i le filemu, autasi ma le fiafia o le faapotopotoga. (Faitau le Eperu 13:7, 17.) Pe afai o oe o se toeaina po o se auauna o le faiva, pe e te lotomaulalo ma faafetaia Ieova ona o faaeaga ua e maua?
11, 12. O le ā le uiga e tāua i le faalapotopotoga a Ieova, ma aiseā?
11 E tautele i le faalapotopotoga a Ieova se tagata lotomaulalo, ona e faalaeiauina ai isi. Na timaʻi atu Iesu i ona soo ina ia avea i latou ma ē e faatauvaa, ona sa aafia nisi i le agaga sa taatele i lenā taimi. O loo taʻua i le Luka 9:46, ʻna latou fefinauaʻi po o ai o i latou e sili.’ Pe e iai ni taimi e tatou te manatu ai e sili atu i tatou nai lo o isi? Ua taatele i le lalolagi le faamaualuga ma le manatu faapito. O le lotomaulalo e mafai ai ona tatou ʻalofia nei uiga. O le a faafouina o tatou uso, pe a tatou faaalia le lotomaulalo, ma faamuamua le faia o le finagalo o Ieova.
12 E tatau ona uunaʻia i tatou e timaʻiga a Iesu ina ia amioaʻi ai o ni ē e faatauvaa, i vala uma o o tatou olaga. O lea, seʻi o tatou talanoaina nisi vala o le olaga, e mafai ona tatou faia ai faapea.
IA AVEA MA Ē E FAATAUVAA
13, 14. E faapefea ona taumafai se ulugalii e avea i laʻua ma ē e faatauvaa, ma o le ā le aafiaga i le faaipoipoga?
13 Faaipoipoga. O le toʻatele i aso nei e mafaufau i lo latou lava lelei, e tusa lava pe aafia ai isi. Peitaʻi, o sē e faatauvaa, e iā te ia le manatu sa taʻua e Paulo i le Roma 14:19 e faapea, “seʻi tatou tausisi i mea e faatupu ai le filemu, ma mea e atiaʻe ai e le tasi le isi.” E naunau lē e faatauvaa e maua le nofo lelei ma isi, aemaise lava a latou paaga faaipoipo.
14 Seʻi mafaufau i mea e ono filifili se ulugalii e fai i taimi paganoa. Atonu e fiafia le tane e faaaogā lona taimi avanoa e faitau ai se tusi i le fale. Peitaʻi e manaʻo le avā e ō i se faleʻaiga, pe asiasi foʻi i uō. O le a faigofie ona faaaloalo le avā, pe a lotomaulalo le tane ma lolo atu iā te ia i nisi taimi. E alofa ma talisapaia e le tane lana avā, pe a ia mātauina le amanaʻia e le avā o ona manaʻoga. E faamalosia se faaipoipoga, pe a taumafai uma se ulugalii e avea i laʻua ma ē e faatauvaa.—Faitau le Filipi 2:1-4.
15, 16. (i) O le ā le uiga na faamatilatila e Tavita i le Salamo e 131? (ii) E faapefea ona aafia ai o tatou uiga faaalia i le faapotopotoga?
15 I le faapotopotoga. O le toʻatele o tagata i le lalolagi, e faigatā ona latou faaalia le onosaʻi. O lea, e latou te naunau ai e vave faamalie o latou tuʻinanauga. Ae i se faaeseesega, o lo tatou taumafai e avea ma ē e faatauvaa, e fesoasoani lea e tatou te faatalitali ai iā Ieova. (Faitau le Salamo 131:1-3.) E iai iʻuga lelei o le lotomaulalo ma le faatalitali iā Ieova. E maua ai le saogalemu, faamanuiaga, faamāfanafanaga ma le faamalieina. E lētioa faalaeiau e Tavita tagata Isaraelu, ina ia faatalitali pea ma le onosaʻi iā Ieova.
16 O iʻuga foʻi na e tatou te mauaina, pe a tatou lotomaulalo ma faatalitali iā Ieova. (Sala. 42:5) Atonu e te fia auauna o se toeaina ina ia mafai ai ona e fesoasoani atili i le faapotopotoga. (1 Timo. 3:1-7) O lea, ia fai au taumafaiga ina ia mafai ai ona galue le agaga paia iā te oe, i le atiaʻeina o uiga manaʻomia mo se toeaina. Ae faapefea pe a vave ona avea se isi uso ma toeaina, ae ua umi se taimi o e taumafai e ausia lenā sini? O sē e faatauvaa, e faatalitali iā Ieova mo faaeaga, ma fiafia pea i le auaunaga e tusa lava po o ā faaeaga e tuuina mai.
17, 18. (i) O ā aogā o le saʻili mo le faamagaloga ma naunau e faamagalo isi? (ii) O le ā le fautuaga o loo i le Faataoto 6:1-5?
17 Faiā ma isi. E faigatā mo le toʻatele o tagata ona faatoese. Peitaʻi, e avea auauna a Ieova ma ē e faatauvaa, e ala i le taʻutino o a latou mea sesē, ma saʻili mo le faamagaloga. E lē gata i lea, e latou te nofosauni e faamagalo atu i isi. E faatupuina e le faamaualuga feeseeseaʻiga ma fevaevaeaʻiga i le faapotopotoga. Peitaʻi, o le lotofaamagalo e maua ai le autasi i le ʻauuso.
18 E manaʻomia ona tatou faamaulalo, e ala i le faatoese atu pe a tatou lē tausisi i se maliega na faia ma se isi tagata, ona o ni māfuaaga lē maʻalofia. O le Kerisiano lotomaulalo, e na te taʻutino atu ona sesē e ui lava e iai se isi tagata e tuuaʻia foʻi i le mea na tupu.—Faitau le Faataoto 6:1-5.
19. Aiseā e tatou te talisapaia ai le faalaeiauga ina ia avea ma ni ē e faatauvaa?
19 Maʻeu lo tatou lotofaafetai ona o faalaeiauga mai le Tusi Paia, ua fesoasoani iā i tatou i le avea ai ma ē e faatauvaa. E iai taimi e faigatā ai ona tatou faaalia lea uiga. Ae e fesoasoani iā i tatou le malamalama lelei i lo tatou tulaga faatauvaa, pe a faatusatusa iā Ieova. E lē gata i lea, o le talisapaia o le faaaʻoaʻoga a Ieova o le lotomaulalo, o le a uunaʻia ai foʻi i tatou e faaalia lea uiga. O le faia faapea, e faamaonia ai o i tatou o ni auauna tautele a Ieova. O lea, ia atagia atu i o tatou uiga, lo tatou faanaunauga e avea ma ni ē e faatauvaa.
[Faaopoopoga i lalo]
^ pala. 5 Ua suia nisi igoa.
[Fesili mo le Suʻesuʻega]
[Ata i le itulau 16]
Ua faamamaluina e Ieova i tatou e ala i le tuuina mai o le faaeaga e tatou te talaʻia ai le tala lelei
[Ata i le itulau 19]
O ā avanoa e mafai ona atagia atu ai i tatou o ni ē e faatauvaa?
