1, 2. Sortu rai Yesus gi den apostel fu en èn fu san ede a du dati?

NA INI a yari 32, Yesus nanga den apostel fu en ben de na Galilea. Ne den apostel bigin haritaki nanga makandra suma fu den ben de a moro bigiwan. A Bijbel skrifiman Lukas e fruteri san ben pasa: „Den bigin haritaki nanga makandra suma fu den ben de a moro bigiwan. Fu di Yesus ben sabi san den ben e prakseri, meki a teki wan yongu pikin, dan a poti en na en sei. A taigi den: ’Efu wan sma e teki a yongu pikin disi na ini mi nen, dan a sma dati e teki mi tu. A sma di e teki mi, e teki sosrefi a sma di seni mi kon. Bika a sma di e tyari ensrefi leki a moro lagiwan fu un alamala, na a sma dati bigi’” (Luk. 9:46-48). Nanga pasensi, Yesus yepi den apostel fu si krin taki den ben musu abi sakafasi.

² Ma fa a ben de nanga den Dyu fu a fosi yarihondro? Den ben abi sakafasi soleki fa Yesus ben taigi den apostel fu en? Nôno, den ben de heri tra fasi. Wan buku e taki dati den Dyu ben feni en prenspari trutru fu sabi suma na ini a libimakandra ben musu kisi grani. Ala ten den ben e aksi densrefi efu den ben gi wan sma a grani di a ben musu kisi (Theological Dictionary of the New Testament). Ma Yesus ben wani taki den disipel fu en ben musu de tra fasi leki den sma fu a ten dati.

3. (a) San a wani taki fu tyari yusrefi leki a moro lagiwan? (b) Fu san ede a kan muilek fu tyari yusrefi na a fasi dati? (c) Sortu aksi wi o luku na ini na artikel disi?

³ A Griki wortu di vertaal nanga „a moro lagiwan” abi fu du nanga wan sma di no e denki furu fu ensrefi, di abi sakafasi, di e si ensrefi moro lagi leki trawan, di no e si ensrefi so prenspari leki trawan èn di no abi so furu makti leki trawan. Yesus ben sori den apostel  fu en taki den ben musu de leki pikin-nengre di abi sakafasi èn di no e denki tumusi furu fu densrefi. Tru Kresten na ini a ten disi musu leri a srefi sani disi di Yesus ben leri den apostel fu en. Kande a muilek gi wi fu sori sakafasi, spesrutu na ini son situwâsi. Fu di ala libisma abi sondu, meki furu fu den abi heimemre èn disi e meki taki nofo tron den e feti fu kisi biginen noso den e feti fu de wan prenspari sma. Boiti dati, a grontapu fu Satan kan abi krakti na wi tapu, so taki wi e denki wisrefi nomo, wi ati e bron esi-esi, noso wi wani dwengi trawan fu du san wi wani. San kan yepi wi fu abi sakafasi? San Yesus ben abi na prakseri di a taki dati wan sma „bigi” te a e tyari ensrefi leki a moro lagiwan? Na ini sortu situwâsi wi musu sori taki wi abi sakafasi?

4, 5. San kan yepi wi fu abi sakafasi? Fruteri wan ondrofenitori.

⁴ Wan fasi fa wi kan leri fu abi sakafasi, na fu hori na prakseri taki Yehovah bigi omeni tron moro wi. Fu taki en leti, „nowan sma kan frustan den sani di a sabi” (Yes. 40:28). Na apostel Paulus ben fruteri fa Yehovah bigi, di a taki: „Ai, den blesi, a koni nanga a sabi fu Gado, furu trutru! Wi no man frustan fa a e krutu sani èn wi no man kon sabi fa den pasi fu en de!” (Rom. 11:33) Sensi Paulus skrifi a sani disi sowan 2000 yari pasa, libisma kon sabi furu sani. Ma toku a sani disi di a taki, tru te now ete. Awinsi omeni wi sabi, toku wi no o man taki noiti taki wi sabi ala sani fu Yehovah, fu den sani di a meki èn fu a fasi fa a e denki.

⁵ Luku wan ondrofenitori. Leo * ben kon abi moro sakafasi di a kon frustan taki noiti a ben o man sabi ala sani fu den sani di Gado meki. Di a ben de wan yongu man, a ben lobi den sani di sabiman kon sabi. Fu di a ben wani sabi someni leki a man fu grontapu nanga den tra planeiti, meki a bosroiti fu go leri dati na heiskoro. Ma bakaten a kon si wan prenspari sani. A si taki sabidensi wawan no kan yepi libisma fu sabi ala sani fu grontapu nanga den tra planeiti. Dati meki a bigin studeri den wèt fu a kondre. Na so Leo tron afkati èn baka dati a tron krutuman. Bakaten en nanga en wefi bigin studeri Bijbel nanga Yehovah Kotoigi, den teki a tru bribi èn den dopu. Leo ben kisi furu skoroleri, ma san yepi en fu abi sakafasi? A taki: „A sani di yepi mi, na taki mi kon frustan taki awinsi omeni wi kon sabi fu Yehovah èn fu grontapu nanga den tra planeiti, toku bun furu sani de fu sabi ete.”

6, 7. (a) Gi wan moi eksempre di e sori wi fa Gado e sori sakafasi. (b) Fa wan sma kan kon „bigi” fu di Gado e sori sakafasi?

 ⁶ Wan tra sani di kan yepi wi fu abi sakafasi, na fu hori na prakseri taki Yehovah srefi e sori sakafasi. Prakseri a sani disi: „Wi e wroko makandra nanga Gado” (1 Kor. 3:9). Iya, na so fasi Yehovah Gado, di hei moro iniwan sma, e gi wi grani. A e gi wi na okasi fu gebroiki a Wortu fu en fu du en wroko. A tru taki na Yehovah e meki sani gro, ma toku a e meki wi wroko makandra nanga en fu prani sani èn fu gi den watra (1 Kor. 3:6, 7). Dati na wan moi eksempre fa Gado e sori sakafasi, a no so? A no de fu taki dati a fasi fa Yehovah sori sakafasi, e gi wi alamala deki-ati fu sori sakafasi tu.

⁷ A fasi fa Gado sori sakafasi ben abi furu krakti tapu David. A ben singi gi Yehovah: „Yu o gi mi yu skelt fu frulusu mi. Na a sakafasi fu yu e meki mi kon bigi” (2 Sam. 22:36). David ben sabi taki na fu di Yehovah abi sakafasi, meki a poti prakseri na en èn a yepi en, so taki a ben man du den bigi sani di a du na ini Israel (Ps. 113:5-7). Na so a de nanga wi tu. Iniwan fasi di wi abi, iniwan sani di wi man du, noso iniwan grani di wi abi, wi kisi fu Yehovah (1 Kor. 4:7). Wan sma di abi sakafasi kan kon „bigi”, na te a e tron wan futuboi fu Yehovah di a man gebroiki moro bun fu du a wroko fu en (Luk. 9:48). Sobun, meki wi go luku fa wi kan tron so wan sma.

8. Fu san ede den sma na ini Gado organisâsi musu abi sakafasi?

⁸ Den sma di abi sakafasi breiti fu de na ini na organisâsi fu Gado èn den e horibaka gi den sani di seti na ini a gemeente. Fu eksempre, luku a tori fu Petra, wan yongu uma di gro kon bigi na ini wan osofamiri di de Kotoigi. Fu di a ben wani du sani soleki fa ensrefi wani, meki a gowe libi a gemeente. Wan tu yari baka dati, a bigin go na a gemeente baka. Now a breiti fu de na ini Yehovah organisâsi baka èn a e horibaka fayafaya gi den seti na ini a gemeente. Fu san ede a e denki tra fasi now? A taki: „Den tu moro prenspari sani di mi ben musu frustan èn di mi ben musu leri ben de fu abi sakafasi èn fu no denki tumusi furu fu misrefi.”

9. (a) Fa wan sma di abi sakafasi e denki fu Bijbel nanga den tra buku di wi e kisi èn san a o du fu dati ede? (b) Fu san ede a bun fu de wan sma di abi sakafasi?

⁹ Wan sma di abi sakafasi de nanga tangi trutru taki Yehovah e gi wi someni bun sani èn taki a e yepi wi fu kon leri sabi en. Dati meki so wan sma e studeri Bijbel doronomo èn finifini. A abi a gwenti tu fu leisi den Waktitoren nanga Ontwaakt! Furu futuboi fu Yehovah e leisi ibri nyun buku di wi e kisi, fosi den poti en na ini a bukukasi fu den. Te wi e leisi èn studeri den buku fu wi, dan wi e sori taki wi abi sakafasi èn taki wi abi warderi gi san Yehovah e du gi wi. Na so wi o kon tron moro bun mati fu Gado èn a o man gebroiki wi moro bun.​—Hebr. 5:13, 14.

10. Fa wi kan sori sakafasi na ini a gemeente?

¹⁰ Wan tra fasi de tu fa wan sma di abi sakafasi kan kon „bigi”, noso fa a kan meki taki Yehovah gebroiki en moro bun. Nanga yepi fu en santa yeye Yehovah poti son mansma na wroko leki owruman na ini den gemeente. Den man disi e seti sani gi den konmakandra nanga a preikiwroko èn den e sorgu gi a gemeente. Wi  e sori sakafasi te wi e wroko makandra nanga den owruman. Na so wi e yepi fu meki moro prisiri, freide nanga wánfasi de na ini a gemeente. (Leisi Hebrewsma 13:7, 17.) Efu yu na wan owruman noso wan dinari ini a diniwroko, yu kan sori sakafasi te yu e warderi a wroko di Yehovah gi yu fu du.

11, 12. Efu wan sma wani du moro na ini Yehovah organisâsi, dan sortu fasi a musu abi èn fu san ede?

¹¹ Efu wan sma e tyari ensrefi leki a moro lagiwan, dan a kan du moro na ini Yehovah organisâsi, fu di a sakafasi fu en e meki a tron wan futuboi fu Gado di a man gebroiki bun. Yesus ben musu gi den disipel fu en a rai fu abi sakafasi, fu di sonwan fu den ben e denki leki den heimemre sma fu a ten dati. Lukas 9:46 e taki: „Den bigin haritaki nanga makandra suma fu den ben de a moro bigiwan.” A de so taki wisrefi bigin denki taki wi bun moro den brada nanga sisa fu wi, noso taki wi bun moro tra sma? Furu sma na ini a grontapu disi e du sani fu di den abi heimemre èn fu di den e denki densrefi nomo. Meki wi du muiti fu abi sakafasi èn fu no abi heimemre. Te wi e du disi èn te wi e poti a wani fu Yehovah na a fosi presi, dan wi brada nanga sisa o kisi deki-ati te den de nanga wi.

¹² Te wi e frustan fu san ede Yesus gi wi a rai fu abi sakafasi, dan wi o wani sori sakafasi ala ten. Meki wi luku dri situwâsi pe wi kan sori sakafasi.

13, 14. (a) San wan masra nanga wan wefi kan du fu sori taki den abi sakafasi? (b) Fa a trowlibi fu den o de te den abi sakafasi?

¹³ A trowlibi. Furu sma na ini a ten disi e poti prakseri na den eigi reti nomo. Den reti fu tra sma no prenspari gi den. Ma wan sma di abi sakafasi o tyari ensrefi soleki fa Paulus ben taki. Na ini en brifi gi den Romesma, a skrifi: „Meki wi du muiti fu libi bun nanga trawan èn fu du sani di e gi trawan deki-ati” (Rom. 14:19). Wan sma di abi sakafasi e du muiti fu libi bun nanga trawan, spesrutu nanga en trowpatna.

¹⁴ Son leisi a kan pasa taki wan masra lobi fu du wan sani, ma en wefi wani du wan tra sani. Kande a masra lobi fu tan na oso èn leisi wan buku te a abi ten, ma en wefi lobi fu go nyan na wan presi noso fu go luku den mati fu en. Efu a masra abi sakafasi, dan a no o luku nomo san en wani, ma a o luku tu san en wefi lobi èn san a no lobi. Disi o meki en moro makriki gi a wefi fu lespeki en masra. Sosrefi, te a wefi no e dwengi ala ten fu kisi san en srefi wani èn te a e poti prakseri tu na san en masra wani, dan a masra o lobi en moro tu. Sobun, a masra nanga a wefi o lobi makandra moro te den ala tu e sori taki den abi sakafasi.​—Leisi Filipisma 2:1-4.

15, 16. (a) Sortu deki-ati David gi den Israelsma soleki fa skrifi na ini Psalm 131? (b) Fa wi kan du a srefi na ini a gemeente?

¹⁵ A gemeente. Na ini a grontapu disi, furu sma feni taki efu den wani wan sani, den musu kisi en wantewante. Den no abi pasensi èn den no wani wakti srefisrefi. Te wi abi sakafasi, dan a o de moro makriki gi wi fu wakti Yehovah, noso fu frutrow na en tapu. (Leisi Psalm 131:1-3.) Efu wi abi sakafasi èn wi e wakti Yehovah, dan wi o kisi blesi. Wi o kisi trowstu, wi o de koloku èn nowan sani o meki wi frede. Dati meki wi kan frustan fu san ede David gi den Israelsma a deki-ati fu wakti Gado nanga pasensi!

¹⁶ Yu srefi kan kisi trowstu te yu e  wakti Yehovah nanga pasensi (Ps. 42:5). Kande yu wani „tron wan sma di e teki fesi na ini a gemeente” fu kan du moro na ini a gemeente (1 Tim. 3:1-7). A no de fu taki dati yu musu du ala san yu man fu meki a santa yeye yepi yu fu kisi ala den fasi di wan brada musu abi fu tron owruman. Ma san yu o du te yu musu wakti pikinso moro langa leki trawan fu tron owruman? Wan sma di abi sakafasi e wakti nanga pasensi teleki a kisi moro frantwortu na ini a gemeente. So wan sma o tan dini Yehovah nanga prisiri. A breiti fu du iniwan wroko di a e kisi na ini a gemeente.

17, 18. (a) Sortu bun e kon te wi e aksi trawan pardon èn te wi de klariklari fu gi den pardon? (b) Sortu rai wi e kisi na ini Odo 6:1-5?

¹⁷ A fasi fa wi e libi nanga trawan. Furu sma feni en wan muilek sani fu aksi pardon te den meki wan fowtu. Ma futuboi fu Gado di e du muiti fu sori sakafasi o taki krin taki den fowtu èn den o aksi pardon. Boiti dati, te trawan meki wan fowtu, den o gi den pardon. Nofo tron a de so taki heimemre sma no man libi bun nanga trawan. Ma te wi de klariklari fu gi trawan pardon, dan freide o de na ini a gemeente.

¹⁸ Tra situwâsi de tu pe wi musu sori sakafasi èn aksi pardon nanga wan krin ati. Kande wi ben meki wan kontrakti noso wan tra sortu kruderi nanga wan sma, ma wan sani pasa di meki taki wi no man du san wi pramisi. Kande a no wi wawan abi fowtu na ini a tori disi. Ma efu wi na Kresten di abi sakafasi, dan wi o si den fowtu di wi meki leki seryusu sani èn wi no o suku wan fasi fu sori taki wi no fowtu.​—Leisi Odo 6:1-5.

19. Fu san ede wi musu de nanga tangi taki Bijbel e gi wi deki-ati fu abi sakafasi?

¹⁹ Wi de nanga tangi trutru taki Bijbel e gi wi a deki-ati fu abi sakafasi. Son leisi a kan muilek fu sori sakafasi. Ma efu wi e prakseri taki Yehovah srefi e sori sakafasi aladi a bigi omeni tron moro wi, dan wi o wani teki na eksempre fu en. Te wi abi sakafasi, dan Yehovah o man gebroiki wi moro bun leki futuboi fu en. Sobun, meki wi du ala muiti fu tyari wisrefi leki a moro lagiwan.