Tese Wer U Hemba Ndahar
Tese Wer U Hemba Ndahar
“Or u nan hembe ndahar ken a ven la, ka nan nan lu orvesen ye”—LUKA 9:48.
U FATYÔ U ZUAN A MBAMLUMUN SHA MBAMPIN MBAN KPA?
Ka nyi ia wase se u lun a ieren i tesen ser se hemba ndahar laa?
Ka sha igbenda i nyi nahan or u tesen ér nan hemba ndahar la nan lu ‘orvesene’?
Se tese ieren i hiden a iyol ijime la ken ivese yase man ken tiônnongo man hen mbagenev nena?
1, 2. Yesu yange wa mbaapostoli nav kwagh ér nyi, man lu sha ci u nyi?
KEN inyom i 32 la, Yesu tagher a zayol ugen ken Galilia. Mbaapostoli nav gba anyiman sha kwagh u or u nan lu u orvesen ken a ve yô. Luka u a nger takerada u Ivangeli la kaa ér: “Ve sendegh anyiman er, shin ka an nan lu orvesenou? Kpa Yesu kaven akperan ken asema a ve nahan yô, A tôô wanye A ver hen ikyooso, A kaa a ve er: Anti or u nana lumun wanye ne ken iti Yam yô, ka Mo je nan lumun ye, man shi anti or u nan lumun Mo yô, nan ngu lumun Un u A tindim la kpaa. Gadia ka or u nan hembe ndahar ken a ven la, ka nan nan lu orvesen ye.” (Luka 9:46-48) Yesu wa ishima tese mbaapostoli nav sha u ve nenge ér gba u vea lu mbahiden a iyol ijime.
2 Ieren i hiden a iyol ijime i Yesu kaa a mbaapostoli nav ér ve lu a mi la, lu ieren i Mbayuda mba sha ayange a na la lu a mi je he? Mayange ga. Mbayuda lu mbakeren icivir. Takerada ugen kaa ér: “Hanma ijiir i Mbayuda yange vea lu a kuma iorov uhar shin a hemba nahan yô, ve nôngo u pinen keng ér vea fa or u nan lu orvesen la, sha er vea na hanma or icivir i nan yô, sha ci u ieren ne lu Mbayuda kwagh u vesen, u ve henen sha mi hanma shighe yô.” Yesu lu wan mbaapostoli nav kwagh ér ve lu kposo a ior mbagenev.
3. (a) Se tese ser se hemba ndahar nena, man alaghga a taver se u eren nahan sha ci u nyi? (b) Ka mbampin mba nyi ve dugh sha kwagh u lun a ieren i tesen ér se hemba ndahar laa?
3 Ishember i ken zwa Grika i i gem ér ‘hemba ndahar’ la ngi ôron kwagh u or u eren kwagh akuma akuma, shin or u hiden a iyol ijime, shin u nan nengen ér nan gba kwagh ga shin nan ngu sha kwarkyaa ga yô. Yesu tese mbaapostoli nav wang ér gba u vea lu mbahiden a iyol ijime shi eren kwagh akuma akuma, er wanye nahan. Kwagh u Yesu wa mbaapostoli la ngu sha ci u Mbakristu mba mimi nyian kpaa. Ashighe agen yô, alaghga a taver se u tesen ser se hemba ndahar. Alaghga ieren i uumace i kenden a iyol sha la ia na se hingir u keren icivir. Shi alaghga ieren i keren mhembe i i dumbur ken tar u se lu ker ne, kua jijingi u taregh una na yô, se hingir u nengen ser se hemba gban kwagh a mbagenev, gayô vihin tu, shin kighir ior. Ka nyi ia wase se u lun a ieren i tesen ér se hemba ndahar laa? ‘Or u nan hembe ndahar ken a vese la, nan ngu orvesen’ sha nyi gbenda? Ka sha igbenda i nyi nahan i gbe u se nôngo sha afatyô wase cii se tese ser se mba mba hiden a iyol ijime?
“KPASH! MZE U IKPELAAKAA MAN MFE MAN KWAGHFAN U AÔNDO VE ZA KWENG NE!”
4, 5. Ka nyi ia wase se u lun a ieren i hiden a iyol ijime laa? Tese ikyav.
4 Kwagh môm u una wase se u lun a ieren i hiden a iyol ijime yô, ka u henen sha mhembe u Yehova a hembe se i yem zende zende la. Mimi je “mkav Na gande u timen fan.” (Yes. 40:28) Apostoli Paulu yange nger kwagh ter igbenda igen i Yehova a gande ave yô, a kaa ér: “Kpash! Mze u ikpelaakaa man mfe man kwaghfan u Aôndo ve za kweng ne! Ajir a ôron a Na gande u timen sha mi, igbenda Na kpaa i gande u tôvon tsôô!” (Rom. 11:33) Paulu nger mkaanem man tsa hemba anyom 2,000 hegen, shi uumace seer zuan a mfe sha akaa kpishi, nahan kpa mkaanem mara ma a gba ken inya ga. Sea lu a mfe nan nan kpa, doo u se hide a iyol ijime sha ci u akaa a Yehova a se fe ga la nga kpishi, kua ityom na man igbenda na, i sea hen nan nan kpa se bee sha won ga yô.
5 U tesen ikyav yô, Orgen u i yer iti na ér Leo * yô, yange kav er i lu u mayange je una fatyô u fan akaa a Aôndo a gbe la been ga yô, nahan kwagh ne wase un u seer hiden a iyol ijime. Shighe u Leo lu gumor la, a soo kwagh u sainsi kpishi. Er sar un u fan akaa a sha kwavaôndo kpishi yô, a za hen gbaa u sainsi u timen sha akaa a sha kwavaôndo la, nahan a mase kaven kwagh u injaa ne. A kaa ér: “Kwagh u m lu henen la na yô, m mase kaven mer atesen a sainsi tseegh aa fatyô u wasen uumace u fan akaa a sha won cii ga. Tsô m hide m gba henen atindi.” Leo maa va hingir loya, shi shighe kar yô, a hingir jôôji. Ken masejime yô, un vea kwase na ve hen Bibilo vea Mbashiada mba Yehova, ve ngohol mimi, shi ve er batisema. Er Leo fa takerada kpishi nahan kpa, ka nyi yange i wase un u hiden a iyol ijime shin tesen ér un hemba ndahara? A kaa ér: “Yange m kav mer sea hen kwagh u Yehova kua akaa a sha man a shin tar nan nan kpa se fatyô u fan been ga.”
6, 7. (a) Yehova ver se ikyav i vesen sha kwagh u hiden a iyol ijime nena? (b) Iyol i Aôndo a hiden a mi ijime la ia na or a “gba ikyôr” shin nana hingir “orvesen” nena?
6 Kwagh ugen u una wase se u lun mbahiden a iyol ijime yô, ka sha ci u Yehova iyol na kpa hidi a iyol ijime. Shi umbur wer, “se mba mbashirentom a Aôndo imôngo je.” (1 Kor. 3:9) Nenge imba la sha wono! Yehova Aôndo u a hembe sha won cii la na se icivir sha imba gbenda ne, sha u nan se tom u pasen ior loho u dedoo ken Mkaanem nam. Shin er i lu Yehova ka a na kwagh u se lee shi se ur la a vese nahan kpa, a na se ian i civirigh i eren tom vea na imôngo. (1 Kor. 3:6, 7) Kwagh la ka ikyav i vesen i tesen ér Aôndo hidi a iyol ijime ga he? Doo u ikyav i Yehova i hiden a iyol ijime la ia taver se ishima shi ia tese se u nengen ayol a ase ser se hemba ndahar.
7 Ikyav i hiden a iyol ijime i Aôndo la yange i kôr orpasalmi Davidi ken ishima tsung. A wa Yehova icam ér: “U nam perutya u myom Wou kpaa; ishima You i legh legh erem m gba ikyôr.” (2 Sam. 22:36) Davidi yange nenge ér nyityôkwagh i vesen i un er ken Iserael cii kpa, ka er Yehova a hide a iyol na ijime, a ver ato a na shi a wase un ve, un kercio u eren akaa shon ye. (Ps. 113:5-7) Se mba nengen iyol yase er Davidi nahan kpa? Sea lu a aeren a dedoo man mfe man ityom i injaa kpa, i na se a na. Ka nyi se lu a mi i se “ngohol a ngohol ga?” (1 Kor. 4:7) Or u nan tesen ér nan hemba ndahar la nan ngu “orvesen” sha ci u ka nan hemba gban Yehova kwagh. (Luka 9:48) De se nenge er i hii ve ka i lu nahan yô.
‘OR U HEMBAN NDAHAR KEN A VEN LA NAN NGU ORVESEN’
8. Gba u mba ve lu ken nongo u Yehova la vea hiden a Iyol ijime sha ci u nyi?
8 Aluer se mba mbahiden a iyol jime yô, a saan se iyol ken nongo u Yehova shi se lu eren akaa a tiônnongo a eren la. U tesen ikyav yô, nenge ase kwagh u gumkwase ugen u i yer un ér Petra, u yange i yese un hen tsombor u Mbashiada yô. Petra yange soo ér una eren kwagh sha ishima na, nahan a undu tiônnongo. Anyom nga kar yô, a hide a hii u kohol a anmgbianev imôngo ken tiônnongo. Hegen saan un iyol u lun ken nongo u Yehova, shi gba un ishima u eren akaa a tiônnongo a eren la cii. Ka nyi yange i na ve gema inja? A kaa ér: “Yange m nenge mer gba kpee u me hen u hiden a iyol ijime shi eren kwagh akuma a kuma ve a saan mo iyol ken nongo u Yehova ye.”
9. Or u hiden a iyol ijime ka nan tese ér Bibilo kua ityakerada yase gba nan kwagh nena, man kwagh ne ngu a na nan hemba gban Yehova kwagh nena?
9 Or u nan hidi a iyol ijime yô, akaa a dedoo a Yehova a ne se la cii ka a gba nan kwagh tsung, kua iwasen i a ne se sha u se hen kwagh na la kpaa. Ka nahan ve or u hiden a iyol ijime ka nan ver ishima nan timen ken Bibilo shi nan ôron Iyoukura man Awake! Hanma takerada u he u i dugh a mi cii yô, ka nan ôr u cii ve nan mase veren u hen ijiir i nan i koson ityakerada la ye, er mbagenev kpishi mba ve civir Yehova sha mimi kpa ve eren nahan. Aluer se tese ser se mba a ieren i hiden a iyol ijime, se mba ôron ityakerada yase i i gber sha u i wase se u henen Bibilo la hanma shighe yô, se seer kporom ikyua a Yehova, shi una seer nan se ityom ken nongo na kpaa.—Heb. 5:13, 14.
10. Se tese ser se hemba ndahar ken tiônnongo nena?
10 Or u nan tesen ér nan hemba ndahar la nan ngu “orvesen” sha gbenda ugen kpaa. Hanma tiônnongo yô ngu a ior mba jijingi u Yehova a tsough ve ve lu mbatamen yô. Mbatamen mban mba nengen sha ityom i ken tiônnongo, er mbamkombo man kwaghpasen nahan, shi mba taver ikyumile ishima kpaa. Ka sea tese ser se hemba ndahar, sea kegh iyol u eren akaa ne yô, se va a msaanyol man mzough man bem ken tiônnongo. (Ôr Mbaheberu 13:7, 17.) Wea lu ortamen shin diakon yô, ka u hide a iyol ijime, u tese wer tom u Yehova a we u sha ikyev ne u gba u kwagh kpa?
11, 12. Ka ieren i nyi se lu a mi ve se hemba gban nongo u Yehova kwagha, man er nan ve i lu nahana?
11 Or u nan tese ér nan hemba ndahar la nan ngu “orvesen,” shin nan hemba gban nongo u Yehova kwagh sha ci u ieren i nan i hiden a iyol ijime la na yô, nan ngu or u civir Aôndo u injaa. Yesu yange wa mbahenen nav kwagh ér ve tesen ér ve hemba ndahar sha ci u mbagenev ken a ve lu a ieren i ior kpishi lu a mi sha shighe ve la yô. Luka 9:46 kaa ér: “Ve sendegh anyiman er, shin ka an nan lu orvesenou?” Se kpa alaghga tsô se hii u nengen ser se hemba gban kwagh a mba ve civir Yehova a vese imôngo la sha igbenda igen, shin se hemba mban a icivir a ior shinii? Ior kpishi ken tar u se lu ker ne ka mba wan ihyagh shi wan ayol a ve ikyo tseegh. Se palegh nen mbagengeseyol, se hiden a iyol ijime. Aluer se er nahan, shi hemba gban se ishima u eren ishima i Yehova yô, anmgbianev asev mba nomso man mba kasev vea hemba zuan a ishimataver shighe u ve lu vea vese yô.
12 Kwaghwan u Yesu yange kaa ér se lu mba tesen ser se hemba ndahar la ka u taver se ishima kpen kpen. Doo u se nôngo sha afatyô wase cii se tese ser se hemba ndahar sha hanma kwagh u se eren ken uma wase cii gaa? Yô, de se time nen sha igbenda itiar i se er kwagh ne yô.
NÔNGO TSUNG LU OR U HEMBAN NDAHAR
13, 14. Nom shin kwase nana tese ér nan hemba ndahar nena, man kwagh ne una wase ivese ve nena?
13 Ken ivese you. Nyian ne, ior kpishi hemba soon u eren kwagh sha asema a ve. Kwagh gba ve sha ian i mbagenev kpa ve lu a mi i eren akaa a ve soo la ga. Kpa or u tesen ér nan hemba ndahar yô, ka nan lu a ieren i Paulu a we se kwagh ér se lu a mi la. Yange ôr ken washika na u nger hen Mbaromanu la ér: “Se keren nen kwagh u nan bem man shi kwagh u se maan a maa ayol a ase sha mi” yô. (Rom. 14:19) Or u tesen ér nan hemba ndahar yô, ka nan ker u lun ken bem vea hanma or cii, hemban je yô, vea kwase shin nom u nan.
14 Hen ase sha kwagh u msaanyol u eren. Alaghga msaanyol u kwase nan soo la, nom a gema a soo ga. U tesen ikyav yô, alaghga nom nan hembe soon u teman hen ya ving ôron takerada shighe u nan dugh gbilin yô. Kpa kwase u nan di nana hemba soon ahumbe a man shin za sôron azende a nan. Aluer nom la nan ngu or u hiden a iyol ijime, nan ngu henen sha kwagh u nan soo la tseegh ga, kpa nan wa ikyo sha kwagh u kwase u nan kpa a soo shin a soo ga la yô, a lu kwase la ican u nan nan icivir ga. Man aluer kwase la kpa nan hembe soon u eren kwagh u nan soo la tseegh ga, kpa nan we ikyo sha kwagh u nom u nan kpa a soo la yô, nana gba nom u nan la kwagh kpishi, shi nana seer doon nan ishima kpaa. Nom man kwase cii ka vea tesen ér ve hemba ndahar yô, ivese ve i hemba doon.—Ôr Mbafilipi 2:1-4.
15, 16. Ken Pasalmi u sha 131 la, Davidi wa Mbaiserael kwagh ér ve lu a ieren i nyi, man se tese ieren ne ken tiônnongo nena?
15 Ken tiônnongo. Ken tar yô, ior kpishi ka i lu ve pe zuan a kwagh u ve soo la ave ave je. Mba we ishima ga, shi mba soon u keghen kwagh kpaa ga. Aluer se mba a ieren i tesen ser se hemba ndahar la yô, kwagh la una wase se u keghen Yehova. (Ôr Pasalmi 131:1-3.) Aluer se hide a iyol ijime shi se mba keghen Yehova yô, una kura se shi una ver se doo doo, se lu bem bem shi a saan se iyol kpaa. Ka nahan ve Davidi yange wa Mbaiserael kwagh ér ve wa ishima, ve kegh Aôndo ve ye.
16 We kpa aluer u hide a iyol ijime u ngu keghen Yehova yô, u zua a mpeveryol er Davidi nahan. (Ps. 42:5) Alaghga ‘tom u dedoo sar’ ú, nahan u “ngu keren u lun orkuran.” (1 Tim. 3:1-7) Sôn icighan jijingi u Aôndo a wase ú, nahan nôngo sha afatyô wou cii lu a aeren a i gbe u ú lu a mi ve u kuma u lun ortamen la. Kpa aluer ka lun we inja er mba nan we ortamen fele er i ne mbagenev nahan ga di ye? Or u tesen ér nan hemba ndahar, u nan we ishima nan kegh shighe u a na nan tom ken tiônnongo yô, nana za hemen u eren Yehova tom a ahan zwa, shi a saan nan iyol u eren nyityô tom u i ne nan cii.
17, 18. (a) Aluer se mba keren ser mbagenev ve de se kwaghbo shi se kpa se kegh iyol u den ve yô, ka nyi i dedoo ia due kere? (b) Zum u se fetyô u kuren iceghzwa i se er a or ga sha ci u kwagh ugen va nyôr se atô yô, i wa se kwagh ken Anzaakaa 6:1-5 ér se er nena?
17 Hen mbagenev. Ior kpishi ka i taver ve u kaan a or ér ‘yam anyi.’ Kpa mbacivir Yehova yô, ka ve nôngo sha afatyô ve cii ve hide a ayol a ve ijime, ve lumun ibo sha kwagh u ve er a or i doo nan ga yô, shi ve zamber a nan ér nana ya ve anyi. Shi ka ve kegh iyol u den mbagenev a kwaghbo ve. Iyolgengese ngi ve a mpav man ayôôso, kpa ieren i den or a kwaghbo la i ve a bem hen atô u anmgbianev.
18 Alaghga a gba u se hide a iyol a ase jime, se kaa a or sha mimi ser nana ya se anyi, zum u se fatyô u kuren iceghzwa i se er a nan ga, sha ci u kwagh ugen va nyôr se atô u se fetyô u yangen ga yô. Aluer se mba a ibo sha kwagh la eleghee ga je kpa, er se lu Mbakristu mba hiden a iyol ijime yô, a gba u se hen sha vegher u se er shami ga la, shi se lumun ibo kpaa.—Ôr Anzaakaa 6:1-5.
19. Doo u hanma wase nana wuese kwaghwan u Bibilo i we se ér se tesen ser se hemba ndahar la sha ci u nyi?
19 Doo se kpishi er Bibilo i we se kwagh ér se lu a ieren i tesen ér se hemba ndahar la nahan! Shin er alaghga a taver se u lun a ieren ne ashighe agen nahan kpa, aluer se nenge er Yehova, u a hembe se i yem zende zende la kpa a hiden a iyol ijime yô, kwagh ne una wase se u lun a ieren i doon tsung ne. Se er nahan yô, se gba Yehova kwagh tsung je. Yô, hanmô wase nana lu a ieren i tesen ér nan hemba ndahar la.
[Ngeren u shin kpe]
^ I gema ati a ken ngeren ne.
[Mbampin Mba Ngeren u Henen]
[Foto u sha peeji 16]
Tom u Yehova a ne se u pasen ior loho u dedoo la ka kwagh u civirigh je a er se ye
[Ufoto mba sha peeji 19 la]
Ka aan a nyi u lu a mi a tesen wer u ngu or u hemban ndahara?
