Kalikatsiw chuna la tiku “taktuju”
Kalikatsiw chuna la tiku “taktuju”
«Xampi wanti ntlakg xtaktujulh lantla xlipaks wixin, wa xapuxku nawan.» (LUC. 9:48)
KAPUTSA XTAKGALHTIN
¿Tuku nakinkamakgtayayan nalikatsiyaw la tiku «taktujukgo»?
¿La «tlakg kalhiy xlakgasi» tiku «taktuju»?
¿La tlan limasiyayaw pi taktujuyaw kkintamakgaxtokgatkan, kcongregación chu xlakata la katalalinaw amakgapitsin?
1, 2. ¿Tukuya tastakyaw kamaxkilh Jesús xʼapóstoles, chu tuku xlakata?
KKATA 32. Akxni Jesús xwi kkachikin xalak Galilea, xʼapóstoles tsukukgolh taʼakglhuwikgo xlakata tiku tlakg lanka xlitaxtu. Evangelio xla Lucas wan: «Pus chi tilaliakgslokgokgolh xpalakata xati xapuxku nawan nchatum xlakan. Cha nchu Jesús, mpi lakgapasli xtalakapastakna xnakukan, titiyalh nchatum aktsu kgawasa, na anta nchu wililh kxpaxtun. Cha nchu wanikgolh: “Kaxati kawa nti xmakgamakglhtinalh xtachuna na yuma aktsu kgawasa kkintukuwini, kit nkimakgamakglhtinan; na kaxati kawa nti nkit xkimakgamakglhtinalh, wa makgamakglhtinan wa nti nkimalakgacha xampi wanti ntlakg xtaktujulh lantla xlipaks wixin, wa xapuxku nawan”» (Luc. 9:46-48). Jesús ni sitsilh pero tliwakga kawanilh xʼapóstoles pi xtalakaskin ni tlankajwa xwankgolh.
2 ¿Uma tuku masiyalh Jesús xtachuna tuku xlakpuwankgo judíos kxapulana siglo, o xtalakgpali? Maktum libro nema lhuwa lakgapaskan wan la xlakpuwankan uma kilhtamaku: «Pulakatunu tuku xtatlawa, putum kilhtamaku xtakatsiputun tiku tlakg lanka xlitaxtu, chu chuna chatunu chatunu xkamaxkikan kakni uma lu xlakaskinka xwanit chu xtlawa xʼanalh taʼakglhuwit» (Theological Dictionary of the New Testament [Diccionario teológico del Nuevo Testamento]). Jesús kastakyawalh xʼapóstoles xlakata ni chuna xlikatsikgolh la amakgapitsi latamanin.
3. 1) ¿Tuku kilhchanima “nataktujuyaw” chu tuku xlakata min kilhtamaku tuwa chuna natlawayaw? 2) ¿Tukuya takgalhskinin nakgalhtinanaw?
3 Tachuwin xagriego nema tamatitaxti “taktujut” xlimaklakaskinkan xlakata latamanin tiku ni tlankajwa, tiku xtataktuju, o tiku nitu litaxtu chu ni lu xlakaskinka xliʼakxilhkan. Jesús limaklakaskilh chatum aktsu kgawasa xlakata xkamasiyanilh xʼapóstoles pi xtalakaskin ni tlankajwa xwankgolh chu xkatsikgolh pi nila putum tlawakgo, uma tuku wa chuntiya kamakgtaya xaxlikana kstalaninanin Cristo xala uku chuna la kamakgtayalh natalan xalak pulana siglo. Pero min kilhtamaku tuwa namakgkatsiyaw nalikatsiyaw la tiku “taktuju”. Xlakata latamanin tlanka kamakgkatsikan uma tlawa naputsakgo lilanka. Komo mastayaw kilhtamaku pi xʼespíritu kakilhtamaku nakinkamatlawiyan tuku xlakan tlawakgo max lixkajni nalikatsiyaw chu nakamatlawiyaw amakgapitsin tuku lakaskinaw. ¿Tuku nakinkamakgtayayan xlakata “nataktujuyaw”? ¿La “wanti ntlakg xtaktujulh, wa xapuxku nawan”? ¿Chu niku tlakg talakaskin nalimasiyayaw pi ni tlankajwa likatsiyaw? Kaʼakxilhwi.
«[¡]KGALHI LHUWA [...] XLISKGALALA CHU XTAKATSIN DIOS!»
4, 5. ¿La tlan katsinikan “taktujut”? Kawili akgtum liʼakxilhtit.
4 Pulaktum tuku nakinkamakgtayayan ni tlankajwa nalikatsiyaw wa nalilakapastakaw xlilanka Jehová chu tuku litaxtuyaw akinin. Biblia kinkawaniyan pi, «nila lakputsananikan xtakatsin» (Is. 40:28). Pablo chuna lichuwinalh xlilanka: «¡Dios kgalhi lhuwa tasikulunalin nema mastay chu xliskgalala chu xtakatsin Dios! ¡Lu nila putsananikan tuku lakkaxtlawa chu nila akgatekgsnikan xtiji!» (Rom. 11:33, NM). Maski latamanin lhuwa tuku katsinikgonit uma akgtiy mil kata nema titaxtukgonit tuku tsokgli Pablo chuntiyaku xlikana. Maski lhuwa tuku katsiyaw, makgkatsiyaw pi nitu litaxtuyaw akxni akxilhaw pi lhuwa kinkatsankganiyan nakatsiniyaw xlakata Jehová, tuku tlawanit, xtayat chu la tlawa tuku lakaskin.
5 Akxni katsiyaw pi xtiji Jehová tlakg xalanka kinkamakgtayayan «nataktujuyaw». Wa uma tuku akgspulalh Leo, * tiku akxni kgawasaku xwanit lu xlakgati ciencia. Lu xkatsiputun xlakata kakilhtamaku chu kgalhtawakgalh Astrofísica chu wa uma tuku wa: «Tuku kkgalhtawakgalh, kkatsilh pi tuku wankgo científicos nila kinkamakgtayakgoyan naʼakgatekgsaw putum tuku anan kkakilhtamaku». Wa xlakata tsukulh kgalhtawakga Derecho. Alistalh fiscal de distrito chu Juez litaxtulh. Titaxtulh kilhtamaku xla chu xpuskat tsukukgolh takgalhtawakgakgo Biblia xtatayananin Jehová, katsinikgolh tuku xaxlikana chu tamakamastanikgolh Dios. Xlakata Leo lu xkgalhtawakganit, ¿tuku makgtayalh “xtaktujulh”? Xla kinkakgalhtiyan: «Kkatsilh pi maski lhuwa tuku nakatsiniyaw xlakata Jehová chu kakilhtamaku, chuntiyaku lhuwa tuku kilikatsinitkan».
6, 7. 1) ¿Tuku lu tlan liʼakxilhtit xlakata taktujut kinkawilinin Jehová? 2) ¿La xtaktujut Jehová kinkamalankiyan?
6 Atanu tuku na nakinkamakgtayayan nataktujuyaw wa pi Jehová na taktuju. Kalilakapastakwi pi «nkin x[lak]skujnin Dios» (1 Cor. 3:9). Xlikana, maski Jehová Dios tiku tlakg lanka kinkamaxkiyan kakni xlakata masta talakaskin nalichuwinanaw xtukuwani chu nalimaklakaskinaw xTachuwin, Biblia. Maski wa Dios tiku tlawa nastaka talhtsi nema chanaw chu akgmunuwiliyaw, kinkamaxkiyan talakaskin akxtum nataskujaw (1 Cor. 3:6, 7). ¡Akgtum lu tlan liʼakxilhtit! Xlikana, xliʼakxilhtit Jehová kinkamakgtayayan xlakata “nataktujuyaw”.
7 Xlakata Jehová ni tlankajwa, tlawalh pi David tlan xlimakgkatsilh. Wa xlakata kilhtlinilh: «Wix nakimaxkiya escudo xla lakgtaxtut, chu xlakata taktujuya wa tuku tlawa pi lanka nakwan» (2 Sam. 22:36). David wa pi lanka xlitaxtu kʼIsrael xlakata Jehová xtaktuju, Dios ni lanka makgkatsikan, chu kuenta xtlawa tuku xwani David (Sal. 113:5-7). Chu akinin nachuna makgkatsiyaw. ¿Tiku tlan nawan pi tayat, tuku tlan tlawa, chu tuku lakgaya, ni wa Jehová maxkinit? (1 Cor. 4:7.) ¿Tuku xlakata «tlakg kalhiy xlakgasi» tiku “taktuju”? Xlakata litaxtu kskujni Jehová (Luc. 9:48). Kalakapastakwi tsinu xlakata uma.
«WANTI NTLAKG XTAKTUJULH [...] WA XAPUXKU NAWAN»
8. Akxni taktujuyaw, ¿la akxilhaw xkachikin Jehová?
8 Xlakata napaxuwayaw kxkachikin Dios chu namakgtayayaw congregación talakaskin nataktujuyaw. Chuna limasiya tuku titaxtulh Petra, chatum tsumat tiku makgastakka kʼakgtum familia xla xtatayananin Jehová. Xlakata kaj xtlawaputun tuku xlakaskin, makgxtakgli congregación. Lhuwa kata alistalh tsukupa an tamakxtumit, chu la uku paxuwa xlakata wilapa kxkachikin Jehová chu makgtaya. ¿Tuku talakgpalilh? Xla kinkawaniyan: «Xlakata tlan xakmakgkatsilh kxkachikin Dios xtalakaskin xakʼakgatekgsli chu xakkgalhilh akgtiy tayat nema lu xlakaskinka: nataktujuyaw chu ni lanka nalimakgkatsiyaw».
9. ¿La akxilha kstalanina Cristo likgalhtawakga nema makgamakglhtinan, chu tuku xlakata uma tayat tlawa tlakg nalimaklakaskinkan?
9 Kstalanina Cristo tiku taktuju xlikana paxtikatsini xliputum xnaku putum tuku Jehová masta, la tuku takanajla. Liwana likgalhtawakga Biblia chu revistas Makatsinina, chu ¡Despertad! Xtachuna la lhuwa tiku nikxni makgxtakgkgo Dios, likgalhtawakga xalaksasti likgalhtawakga chu alistalh kamaki xbiblioteca. Chuna limasiya pi paxtikatsini tuku Dios masta chu taktuju, xlakata likgalhtawakga xlikgalhtawakgakan kstalaninanin Cristo, staka xtakanajla chu Jehová tlan tlakg nalimaklakaskin (Heb. 5:13, 14).
10. ¿La tlan limasiyayaw pi “taktujuyaw” kcongregación?
10 Kaʼakxilhwi atanu niku «tlakg kgalhiy xlakgasi» tiku “taktuju”. Lakgkgolotsin xla xliputum congregaciones xla xtatayananin Jehová, kalilaksakkan espíritu santo. Xlakan lakkaxwilikgo tuku xaʼespiritual la tamakxtumit, la natalichuwinan Dios, chu lakgapaxialhnankgo natalan. Akxni taktujuyaw chu makgtayananaw xtaskujutkan, makgtayayaw xlakata naʼanan tapaxuwan, ni naʼanan taʼakglhuwit, chu akxtum tawila congregación (kalikgalhtawakga Hebreos 13:7, 17). Chu komo Jehová maxkinitan talakaskin naskuja la siervo ministerial o kgolotsin xalak congregación talakaskin nataktujuya chu napaxtikatsiniya.
11, 12. ¿Tuku natlawa pi tlakg nakinkamaklakaskinkan xkachikin Jehová chu tuku xlakata?
11 Tiku “taktuju” wa tiku «tlakg kgalhiy xlakgasi» xlakata tlakg xlakaskinka litaxtu kxkachikin Jehová. Jesús kamasiyanilh kstalaninanin nataktujukgo xlakata makgapitsi tsukukgolh lakapastakkgo la latamanin xala kxkilhtamaku. Chuna la wan Lucas 9:46, litaʼakglhuwikgolh «xpalakata xati xapuxku nawan». ¿Chu akinin? ¿Na tlan xtsukuw lakapastakaw pi tlakg tlan likatsiyaw ni xawa kinatalankan o atanu latamanin? Lhuwa tiku wilakgo kkakilhtamaku tlankajwa likatsikgo chu putum kgalhiputunkgo. Talakaskin pi akinin nataktujuyaw. Komo chuna tlawayaw chu pulana wiliyaw xtalakaskin Jehová, tlakg nakamakgtayayaw kinatalankan.
12 Xlakata Jesús kinkamasiyaniyan “nataktujuyaw” wa tuku nakinkamakgtayayan nataktujuyaw kilatamatkan. Pulaktutu niku tlan limasiyayaw uma.
NALISKUJAW XLAKATA “NATAKTUJUYAW”
13, 14. ¿La tlan tiku tamakgaxtokgnit “nataktuju”, chu la natawila tamakgaxtokgat?
13 Kmintamakgaxtokgat. La uku, lhuwa latamanin kaj kuenta tlawakgo tuku xlakan lakaskinkgo chu ni kuenta tlawakgo komo uma katlawani tuku nitlan amakgapitsin. Pero tiku taktuju likatsi xtachuna la Pablo wa kxcarta: «Katlawaw tuku tlawa ni kaʼanalh taʼakglhuwit chu tuku makgtayanan tlan nalatalalinaw» (Rom. 14:19, NM). Tiku “taktuju” ni katakgalhi taʼakglhuwit amakgapitsin chu tlakg liwaka tiku tatamakgaxtokga.
14 Akgtum liʼakxilhtit, max tiku tatamakgaxtokgkgonit ni watiya tuku lakgatikgo xlakata nalilakgastanankgo. Max xachixku natamakgxtakgputun kxchik chu nalikgalhtawakga maktum libro, pero xapuskat max naʼamputum kʼakgtum restaurante o nakalakgapaxialhnamputun xʼamigos. Xla tlakg nituwa namaxki kakni xchixku komo akxilha pi xla “taktuju” chu kuenta tlawa tuku xla lakgati chu ni kaj tuku xla lakaskin. Chu xachixku tlakg paxki xpuskat komo naʼakxilha pi ni kaj lakaskin katatlawalh tuku lakaskin, chu kuenta tlawa tuku xla lakaskin. Akxni xchatiykan “taktujukgo” xtamakgaxtokgat tatliwakglha (kalikgalhtawakga Filipenses 2:1-4).
15, 16. ¿Tuku lichuwinalh David kSalmo 131, chu la kinkamakgtayayan uma xlakata la nalikatsiyaw kcongregación?
15 Kcongregación. Kkakilhtamaku lhuwa latamanin kaj lakpuwankgo xlakata tuku kgalhiputunkgo chu tunkun lakaskinkgo. Xlakan lakapala sitsikgo chu ni katsikgo kgalhkgalhinankgo. Akxni akinin “taktujuyaw” kinkamakgtayayan nalipawanaw Jehová (kalikgalhtawakga Salmo 131:1-3). Komo taktujuyaw chu kgalhkgalhinanaw lhuwa tasikulunalin makglhtinanaw: tlan nalimakgkatsiyaw, nitu napekuanaw chu nakgalhiyaw xtasikulunalin Dios. ¡Wa xlakata David kawanilh israelitas pi xlipawankgolh Dios!
16 Komo wix nataktujuya chu nalipawana Jehová tlan nalimakgkatsiya (Sal. 42:5). Max wix tlakg makgtayanamputuna kcongregación chu wa xlakata «mpuxkunaniputun[a] xtaskujut Dios» (1 Tim. 3:1-7). Xlikana, natlawaya putum tuku namatlaniya xlakata espíritu santo namakgtayayan nakgalhiya tayat nema talakaskin xlakata napulalipina congregación. Pero ¿tuku nala komo naʼakxilha pi amakgapitsin tlakg lakapala wi tuku kalakgayawakan nixawa wix? Komo wix “taktujuya”, ni nasitsiya chu chuntiyaku xatapaxuwan naskujniya Jehová, chu xatapaxuwan natlawaya taskujut nema namaxkikana.
17, 18. 1) ¿Tuku tlan kitaxtu akxni skinaw nakinkatapatikanan chu akxni katapatiyaw amakgapitsin? 2) ¿Tukuya tastakyaw kinkamaxkiyan Proverbios 6:1-5?
17 La katalalinaw amakgapitsin. Lhuwa latamanin tuwa makgkatsikgo naskinkgo nakatapatikan. Pero xlakskujnin Dios ni tlankajwa likatsikgo, wankgo akxni tlawakgo tuku nitlan chu skinkgo nakatapatikan. Nachuna, xlakan katapatikgo tiku katlawanikgo tuku nitlan. Akxni wi tiku lanka makgkatsikan tlawa kaʼanalh taʼakglhuwit, pero akxni tapatinankan tlawa tlan nalatalalinkgo natalan.
18 Kstalaninanin Cristo na limasiyayaw pi ni tlankajwa akinin, wa akxni skinaw nakinkatapatikanan xlakata nila makgantaxtiyaw tuku wanitaw pi natlawayaw. Maski max akinin ni putum linaw kuenta, komo taktujuyaw nawanaw tuku nitlan tlawanitaw (kalikgalhtawakga Proverbios 6:1-5).
19. ¿Tuku xlakata paxtikatsiniyaw pi Biblia kinkamalakapastakayan “nataktujuyaw”?
19 ¡Lu paxtikatsiniyaw Jehová xlakata kBiblia kinkamalakapastakan pi «nataktujuyaw»! Maski min kilhtamaku lu tuwa namakgkatsiyaw, katsiyaw pi akinin lu aktsina komo litatalakxtumiyaw xlilanka kiMalakatsukinakan chu akxilhaw la xla taktuju, akinin na tlan nakgalhiyaw uma tayat. Chuna nalitaxtuyaw lu tlan xlakskujnin Jehová. Wa xlakata, putum kilhtamaku «kataktujuw».
[Nota nema wi kpágina]
^ párr. 5 Talakgpalinit tukuwani.
[Takgalhskinin]
[Dibujo xla página 16]
Jehová kinkamaxkiyan talakaskin nalichuwinanaw xalakwan xalaksasti
[Dibujo xla página 19]
¿Niku talakaskin nalikatsiya la tiku «taktujukgo»?
