1, 2. (a) Jehovah onyuto ni ebedo Lubanga ma nining bot Luicrael? (b) Lapeny mene ma wabinyamo ipwony man?

 IKARE pa Nekemia, gurup pa Lulevi mogo guye dok gulego i dye lwak ni kwarigi yam ‘gukwero lubo’ cik pa Jehovah. Ento Jehovah obedo ka timmigi kica teretere, pien en tye ‘Lubanga ma weko bal pa dano, ber dok lakica, kiniga pe mako oyot, mar mere dwong ma pe lokke.’ Jehovah omedde ki nyuto kica bot Luicrael magi ma gudwogo ki i lobo me opii-ni i kare pa Nekemia.​—Nek. 9:16, 17.

² Ngat acel acel myero openye kekene ni, ‘Atwero nongo adwogi maber ki i kica pa Jehovah nining?’ Me gamo lapeny man ma pire tek tutwal-li, kong wanyamu lok i kom kabaka aryo ma gunongo adwogi maber ki i kica pa Jehovah​—Daudi gin ki Manace.

3-5. Bal madit ango ma Daudi otimo?

³ Kadi bed ni Daudi onongo lworo Lubanga, en otimo bal madongo adada. Bal aryo magi madongo-ni otimme i kom Uria gin ki dakone Batceba. Adwogi malit ma bal man okelo ogudo gin adek ducu. Kadi bed kumeno, kit ma Lubanga otiro kwede Daudi nyuto kica madit pa Jehovah. Nen kong gin mutimme.

⁴ Daudi ocwalo lumony me Icrael me rumo ki monyo gang me Raba ma tye i Ammon. Gang man onongo tye mairo 50 i kunyango me Jerucalem, loka Kulu Jordan. Ento inongo ni i kare ma Daudi tye ka wot i wi ot pa kabaka i Jerucalem, en oneno Batceba dako pa Uria ka tye ka lwok. Cware onongo tye i dog lweny. Wi Daudi obale i kare ma oneno Batceba, ma oweko en ocwalo dano ni myero kikel i gang  kalle, ka ma en obedo kwede.​—2 Cam. 11:1-4.

⁵ I kare ma Daudi ongweyo yamo ni Batceba oyac, en oweko kicwalo Uria odwogo cen i Jerucalem ki i dog lweny, ki gen ni Uria bicito paco bedo ki Batceba. Kadi bed ni Daudi obedo ka diye ni ocit paco bot dakone, Uria pe oye. Pi meno, Daudi otuko diro kun coyo waraga i mung bot Joab ni oket Uria “anyim ka ma lweny gwa iye” ci owek lumony mukene-ni gujer gudwog cen ki ngegi. Man oweko kineko Uria oyotoyot adada kit ma Daudi oyubo kwede-ni. (2 Cam. 11:12-17) Bal pa kabaka omedde odoko dit pe pi timo abor keken ento pi neko laco ma pe ki bal bene.

6. Ngo ma Lubanga otimo ma lubbe ki bal pa Daudi, dok man pwonyowa gin ango i kom Jehovah?

⁶ Ki lok ada, Jehovah oneno jami ducu ma obedo ka timme. En onongo ngeyo jami ducu. (Car. 15:3) Kadi bed ni i ngeye lacen Daudi onyomo Batceba, ento “gin ma Daudi otimo pe oyomo cwiny Rwot [Jehovah].” (2 Cam. 11:27) Pi meno, gin ango ma Lubanga otimo i kare ma Daudi otimo bal magi madongo-ni? En ocwalo lanebi Natan bot Daudi. Pien en Lubanga ma lakica, Jehovah onongo tye ka yenyo yo me timo kica. Gin man ma Jehovah otimo-ni mono pe cuko cwiny tutwal? En pe odiyo Daudi me ye balle ento oweko Natan omiyo lapor mo ma nyuto kit ma balle rac kwede. (Kwan 2 Camuel 12:1-4.) Meno aye yo maber ma Jehovah okwanyo me ngeyo ka ada Daudi ongut!

7. Daudi odok i lapor ma Natan omiyo-ni nining?

⁷ Lapor ma Natan omiyo-ni pe oyomo cwiny kabaka. Kiniga omako Daudi adada i kom lalonyo ma i lapor-ri ci owaco bot Natan ni: “Macalo Rwot [Jehovah] tye makwo-ni, dano ma otimo kit meno ber ginek woko.” Daudi omedo ni lacan-ni myero kicul romone ma lalonyo okwanyo-ni. Ento i ngeye kijwato wi Daudi malit. Natan owacce ni “In aye i dano meno kikome.” Lacen kiwaco bot Daudi ni pi bal ma itimo-ni, “pala lucwan” pe biweko ode dok peko bipoto i pacone. Kibibuto ki monne i dyeceng ka maleng, i nyim jo Icrael ducu pi balle. Daudi oniang bal madit ma etimo ci ongut kun wacci: “An atiyo bal i kom Rwot [Jehovah].”​—2 Cam. 12:5-14.

8, 9. Jabuli 51 nyuto kit ma Daudi owinyo kwede ki i cwinye nining, dok man pwonyowa gin ango i kom Jehovah?

⁸ Wer ma Kabaka Daudi owero i nge balle onyuto kit ma en ongut kwede ki i cwinye. Jabuli 51 opong ki lega me bako dog ma Daudi olego bot Jehovah, dok lega man nyuto ni en pe oye balle keken. En bene ongut pi balle. Gin ma pire tek bot Daudi obedo wat i kin en ki Lubanga. En oye balle kun wacci, “Dong atyeko timo bal i komi, i komi keken.” En obako doge bot Jehovah ni: “Ai Lubanga ma Lacwec, miya abed ki cwiny mulony, ket cwiny manyen ma pe lokke obed i iya. . . . Lara, ci imi dok abed ki yomcwiny; miya cwiny me lubo cikki wek acung matek.” (Jab. 51:1-4, 7-12) Ka itito balli bot Jehovah, tika itito lok ada kun a ki i cwiny kit ma Daudi otimo kwede-ni?

⁹ Jehovah pe okwanyo adwogi marac ma bal pa Daudi okelo. En onongo bibedo ki adwogi man pi kwone ducu. Ento, pien Daudi ongut dok ‘cwinye ocwer’ pi balle, Jehovah otimme kica. (Kwan  Jabuli 32:5; Jab. 51:17) Lubanga Won Twer Ducu ngeyo gin mumiyo ngat moni timo bal. Jehovah pe oweko ni lungolkop me Icrael aye gungol kop i wi Daudi gin ki Batceba ma lubbe ki Cik ma Kimiyo bot Moses, ma ka meno, en aye ongolo kop i wigi dok otimigi kica. (Levi. 20:10) Lubanga oweko wodgi Solomon odoko kabaka me Icrael.​—1 Tekwaro 22:9, 10.

10. (a) Gin ango mukene mumiyo Jehovah otimo kica bot Daudi? (b) Ngo ma myero watim wek Jehovah otimiwa kica?

¹⁰ Oromo bene bedo ni tyen lok mukene mumiyo Jehovah otimo kica bot Daudi aye ni Daudi otimo kica bot Caulo. (1 Cam. 24:4-7) Kit ma Yecu otito kwede, Jehovah terowa kit ma watero kwede jo mukene. Yecu owacci: “Pe wungol kop i kom jo mukene, wek wun bene pe kingol kop i komwu. Pien kop ma wungolo-ni bene gibingolo i komwu, dok gin ma wupimo kwede jami, en aye doki gibipimo kwede jami botwu.” (Mat. 7:1, 2) Pud dong kweyo cwinywa me ngeyo ni Jehovah bitimiwa kica pi balwa, kadi bed balle dongo rom ki timo abor nyo nek! En bitimiwa kica ka watye ki cwiny me timo kica, ka watuco balwa bote, ki dong ka wanyuto cwiny me ngut pi bal ma watimo. “Nino me yweyo” bino ki bot Jehovah ka ce wangut ki cwinywa ducu.​—Kwan Tic pa Lukwena 3:19.

11. I yo ango ma Kabaka Manace obedo ka tiyo gin ma nen marac i wang Lubanga?

¹¹ Tam kong dok i kom lanen mukene ma nyuto kit ma Jehovah tye atera kwede me timo kica. Manace odoko kabaka me Juda i nge mwaki 360 nicakke ma Daudi ocak kwede loc. Locce pi mwaki 55 onongo oywek pi bal maraco ma en obedo ka timogi ma oweko Jehovah ongolo kop i wiye. I kin bal ma en otimo aye en ocano keno tyer pi Baal, oworo “mony ma i polo ducu,” owango lutino awobene ki mac me gityer, dok obedo ka tyet ki ajaa ki ngiyo i dyel-gu. Ada, en “obedo ka tiyo gin ma nen marac i wang Rwot [Jehovah].”​—2 Tekwaro 33:1-6.

12. Manace olokke odwogo bot Jehovah nining?

¹² Lacen, kimako Manace ci kitweyo i buc i lobo Babilon. Ki kunnu, en nen calo wiye opo i kom lok man ma Moses owaco bot Luicrael ni: “Ka piny oloyowu, ma dong gin meno ducu opoto i komwu i kare me lacen, wubilokke wudwogo cen bot Rwot Lubangawu,  ci wubiworo doge.” (Nwo. 4:30) Manace olokke odwogo bot Jehovah. Nining? En “omwolle kene” dok bene obedo ka “lega” bot Lubanga (kit ma kinyuto kwede i pot karatac 23). (2 Tekwaro 33:12, 13) Pe wangeyo gin ango kikome ma Manace owaco i legane, ento nen calo rom ki pa Kabaka Daudi, ma legane kicoyo i Jabuli 51. Ento gin ma wangeyo aye ni Manace ongut ki cwinye ducu.

13. Pingo Jehovah otimo kica bot Manace?

¹³ Jehovah odok i lega pa Manace-ni nining? “Lubanga owinyo legane [Manace] dok owinyo lega me bako doge.” Calo Daudi, Manace oniang kit ma balle rac kwede ci ada ongut. Man aye gin mumiyo Jehovah otimo kica bot Manace ci odwoko en i Jerucalem i wi kom kerre. Macalo adwogine, “Manace ongeyo atir ni Rwot [Jehovah] aye Lubanga.” (2 Tekwaro 33:13) Pud dong kweyo cwinywa me pwonyo ki i lanen man ni Lubanga tye atera me timo kica bot jo ma gingut ki cwinygi ducu!

14. Gin ango ma moko ka ce Jehovah bitimo kica bot labalo moni?

¹⁴ Jo mogo i kin lutic pa Lubanga pe gikwayo kica ki bot Jehovah kadi bed gutimo bal madongo calo pa Daudi gin ki Manace. Ento kun inongo ni timo kica ma Jehovah otimo bot kabaka aryo magi-ni konyowa me niang ni Lubanga tye atera me timo kica pi bal madongo pa ngat moni ka ce en ada ongut.

15. Wangeyo nining ni Jehovah pe timo kica kare ducu?

¹⁵ Ada, omyero pe dong wamok i cwinywa ni Jehovah kare ducu bitimo kica bot jo duc pi balgi. Pi meno, kong dong wanenu cwiny ma Daudi gin ki Manace gubedo kwede ka iporo ki pa jo Juda ma gukwero lubo cik pa Jehovah-ni.  Lubanga ocwalo Natan bot Daudi wek omi kare ki Daudi me ngut i kom balle. Daudi ojolo kony meno ki cinge apar. I kare ma piny oloyo Manace woko, en ongut ki cwinye ducu pi balle. Pol kare, Luicrael ki jo Juda pe gungut pi balgi. Meno oweko Jehovah pe otimigi kica. Ma ka meno, en obedo ka cwalo teretere lunebine me poyo wigi kit ma eneno kwede balgi. (Kwan Nekemia 9:30.) Kadi wa i kare ma gudwogo i Juda ki i lobo Babilon, Jehovah omedde kicwalo luticce ma gin lugen calo lalamdog Ejira ki lanebi Malaki. Ka onongo gutimo gin ma rwatte ki miti pa Jehovah, ci gin onongo gibedo ki yomcwiny madit.​—Nek. 12:43-47.

16. (a) Ngo mutimme i kom rok me Icrael pienni pe gungut i kom balgi? (b) Mot ango ma tye pi ngat acel acel ma kinywalo i Icrael?

¹⁶ Jehovah okwero gityer me lee ma Luicrael onongo gityero-ni i kare ma ocwalo Yecu me bino i lobo me miyo kwone ma pe ki roc-ci macalo ginkok. (1 Jon 4:9, 10) I kare ma tye i lobo, Yecu oloko i yo ma nyuto kit ma Jehovah winyo kwede i kare ma en owacci: “Jerucalem, Jerucalem, in ma ineko lunebi, ma icelo jo ma gioro boti woko ki got, tyen adi ma nene amito coko litinoni woko macalo min gweno ma coko litinone i te bwome, ento wun pe wuye giwu!” En omedde ni: “Nen, dong gitenyo otwu botwu, iye odong nono.” (Mat. 23:37, 38) Pi meno, rok man ma lubalo dok pe gimito ngut-ti kileyo ka wanggi ki Luicrael me cwiny. (Mat. 21:43; Gal. 6:16) Ento ngat acel acel ma kinywalo i Icrael kono? Gin bene Jehovah bitimmigi kica ka ce gibedo ki niye i kome kacel ki ginkok pa Yecu Kricito. Kibitimo kica bene bot jo ma guto labongo ngut pi balgi ka kicerogi i lobo manyen.​—Jon 5:28, 29; Tic. 24:15.

17, 18. Ngo ma myero watim wek Jehovah otimiwa kica?

¹⁷ Ngo ma myero watim kit ma Jehovah tye agonya me timiwa kica-ni? Omyero walub lanen pa Daudi gin Manace. Omyero bene waye ni wan lubalo, wangut kun wakwayo kica ki bot Jehovah, dok myero walege me konyowa wek pe wabed ki cwiny me bal. (Jab. 51:10) Ka watimo bal madit, omyero bene watit bot luelda wek gukonywa. (Yak. 5:14, 15) Kadi bed watimo bal madit lakwene, kweyo cwinywa me ngeyo ni Jehovah lakica kit ma Moses owaco kwede ni, “Lubanga ma lakica dok maro dano, kiniga pe make oyot, marre ma pe lokke dwong, en lagen mada. En ogwoko mar ma pe lokke pi jo alip ki alip, kun weko rocgi, ki tim aranyigi ki balgi.”​—Nia 34:6, 7.

¹⁸ Jehovah ocikke me timo kica ki Luicrael ma gungut pi balgi. En owacci kadi bed balgi “kwar” calo pala ento bidoko matar calo “pee.” (Kwan Icaya 1:18.) Ento, wan watwero nongo adwogi maber ki i kica pa Jehovah nining? Ka wabedo ki pwoc i kom kica pa Jehovah dok wangut i kom balwa, ci en bitimiwa kica.

19. Gin ango ma wabinyamo ipwony ma lubo man?

¹⁹ Kit macalo Jehovah timiwa kica-ni, wan watwero lubo lanen pa Jehovah kun watimo kica bot jo mukene nining? Wan watwero gwokke ki cwiny me kwero timo kica ki jo ma gutimo bal madongo ento gungut pi balgi nining? Pwony ma lubo man bikonyowa me ngiyo cwinywa wek wadok calo Wonwa Jehovah, ma en ‘ber dok weko bal pa dano-ni.’​—Jab. 86:5.