1, 2. a) Ka ligaburi Heowá larufudubei houn ísüraelina? b) Kaba uagu layanuha arütíkulu le?

LIDAN meha lidaani Neemíasi, ariñagatiña lílana aban sétanu hani lewitagu lídan aban furíei hagibugiñe saragu gürigia luagu ‘madügün hamá meha hagüchagu gasu lau lugumadin Bungiu’. Gama lumoun, arufudati Heowá saragu wéiyaasu ‘aban lan Bungiu gíchigaditi ferudun ligía, gudemehabuti, gaguraasunti, ani hínsiñehabuti’. Le linarün katei, sigiti arufuda areini houn gürigia ha awinwandubaña lidaaniwagu Neemíasi ha meha agiribudubaña lídangiñe hadaürǘn (Neem. 9:16, 17).

² Gayarati wálügüdagun woungua: “Ka buiti gayarabei nibihini lídangiñe líchigadi Heowá ferudun?”. Lun wóunabuni álügüdahani súdiniti le, akutiha waméi ida liña lan meha lóuseruniña Bungiu bián wügüriña ha feruduna lubaña: Dawidi luma Manasési ha meha urúeigu.

3-5. Ka burí figóu wéinamuti ladügübei Dawidi?

³ Íbini meha inebe lan Bungiu lun Dawidi, adügati figóu wéinamuti. Bián lídangiñe figóu le ladügübei, gadan lumuti Uríasi tuma Betüsawé to lani weiriou. Wéiriti lirun resultóu le lanügübei figóu burí le houn súngubei. Gama lumoun, lídangiñe ligaburi lererehan Bungiu lun Dawidi furendeitiwa saragu luagu ferudun le líchugubei Bungiu. Ariha waméi le asuseredubei.

⁴ Aba lóunahaniña Dawidi lisudaranigu ha ísüraelina lun hegeyedaguni Rabá, uburugu le meha lichügüdinabei ageiraü Amón, le meha adarirúbei kéiburi 80 kilometuru luégiñe oubaü le ñéingiñe lubéi laboucha weyu libiti Herusalén, yagürounmeme luéi Duna Hordán. Ábati larihinu Dawidi Betüsawé, tábulugugiñe lani palasiu Herusalén, tágounña dan le anigira lan tani weiriei lidan wuribu. Adügati le lun laweiridun layumahan darí lun lóunahan ariñaga lun  tanügǘniwa lun ábati lagabarahan tuma (2 Sam. 11:1-4).

⁵ Danbei le lasubudiruni Dawidi luagu dageinañoun lan Betüsawé, aba ladügün lun lagiribudun Uríasi le tani weiriei Herusaléun ladüga aguraba lan yebe larounruba lan tuma lani weiriou. Gama lumoun, mebelugubeiti Uríasi lúbiñoun, lau sun yebe ariñaga lan Dawidi lun lun ladügüni. Ligíati, lóunahanbei urúei aban uganu le úati amu íchuguti fe luagu, le ídanbei lariñaga lun lani úfisi lun líchuguni Uríasi “igibugiñoun lidan ubaraü le ñein lubéi deretima lan wuribu” luma lun hígiruni ha híbiri súdara lábugua, lun ménrengun lan lafarúniwa hilagubei. Ítara kei laransehani Dawidi, hilati Uríasi lidan wuribu (2 Sam. 11:12-17). Ítarati, mámarügüñein agabarahani ladüga Dawidi, adügati lun laweiridagun lifigoun lau láfarun aban wügüri madurunti.

6. a) Ka ladügübei Bungiu lárigiñe lafigouhan Dawidi? b) Ka wafurendeirubei luagu Heowá lídangiñe ligaburi laransehani turóbuli ligía?

⁶ Furanguti ariha lumuti lan Heowá sun le asuseredubei, lugundun úati ni kata le gayarati laramudagun luéi (Ari. 15:3). Íbini maríei lan Dawidi tuma Betüsawé dan lárigiñe, “magundanti Wabureme [Heowá] lau katei le ladügübei” (2 Sam. 11:27). Kati ladügübei Heowá lárigiñe lafigouhan Dawidi? Aba lóunahani Natán le lani profeta. Kei ‘aban lan Bungiu gíchigaditi ferudun ligía’, genegeti busenti lan meha ladarirun ébunaü lun lóuseruni Dawidi lau gudemehabu. Ma ruti dǘgüdaguaü warihini ida liña lan laransehani Bungiu turóbuli le? Mafosurun lumuti Heowá Dawidi lun lagufeseruni lifigoun, adügarügüti lun labahüdagun Natán aban abahüdagüni lun le arufudubalin wéiriti lan luriban le ladügübei (aliihoualá 2 Samueli 12:1-4). Aban meha igaburi buiti le lun laransehóun turóbuli ligía.

7. Ka ladügübei Dawidi lárigiñe laganbuni le labahüdagubei Natán?

⁷ Adügati le labahüdagubei Natán lun lasaminarun urúei adügǘwa lan aban marichaü. Aba lagañidun Dawidi luma rísiti le uágubei labahüdawagúa, ábati lariñagun lun profeta: “Fiñutina bun luagu Wabungiute, luagu le lan adügübalin katei le, lunti lan lounwen”. Ani ariñagati giñe lunti lan laransehóun damichi le adügǘbei lun gürigia le asufurirubalin lanarime marichaü le. Ligíaliti laganbuni Dawidi katei le adügübei lun tadilirun lanigi sódini. “Buguya wügüri ligía!”, liña Natán lun. Ábati lasubudiruni Dawidi ladügüba lan buga katei le ladügübei lun háfarawagun liduheñu lau anarimeni ani hasufuriruba lan giñe amu lamiselu. Ani luéigiñe le aban oubaü, lanügüba lan buga lichara busiganu lun hagibugiñe sun ísüraelina. Aba líchugun Dawidi fe luagu weiri lan luriban katei burí le ladügübei, aba lariñagun lau asakürihani: “Afigouhaadina ligibugiñe Wabureme” (2 Sam. 12:5-14).

8, 9. Ka larufudubei Sálumu 51 luagu katei le lasandirubei Dawidi, ani ka wafurendeirubei luagu Heowá lídangiñe katei le?

⁸ Asakürihani le larufudubei Dawidi tídangiñe sun lanigi arihúati bürüwañu lidan aban uremu le ladügübei dan lárigiñe. Lidan Sálumu 51 aliiha wamuti igaburi le aubei layumuragua lun Heowá, le arufudubalin mámarügü luagu subudilani afigouha lan, arufudati giñe luagu asakürihalani le ladügübei. Lumadagua luma Bungiu ligía meha súdinitimabei lun. Ariñagati lun Bungiu: “Afigouhaadina bigibugiñe”. Aba giñe layumuragun: “Adügabá aban anigi to harumatu nidan, Nubungiute! Ru buguyame aban iseri sífiri le gúnfuliti nidoun! [...] Sandigüdayabei ugundani le lánina besefuhan nun; ágüdahabana lau lareini bani sífiri” (Sal. 51:1-4, 7-12). Furangutiwa san kei Dawidi dan le wayanuhan luma Heowá luagu wachara?

⁹ Malibürerun lumuti Heowá Dawidi lídangiñe luriban resultóu le lanügübei lifigoun, ani lanügüba buga katei le turóbuli lun lidan sun dan le lunbei lerederun meha wínwanñu. Íbini ítara,  feruduna lumuti Heowá dan le larihinbei “aban sífiri gagariguti lárigi figóu” luagu, ani asakürihaali lan buga tídangiñe sun lanigi (aliihoualá Sálumu 32:5; Sal. 51:17). Subudi lumuti Bungiu Suntigabafu kátima lan uagu léiguada aban gürigia lidoun somu figóu. Lubaragiñe meha lígirun Heowá lun hasiadiruniña aguseragüdütiña Dawidi tuma Betüsawé lun hóunwegun ladüga hagabarahan kei meha lariñaguni Lilurudun Moisesi, aba hagudemedagun lun ábati desidírü lan ligíaba lan aransehei katei (Fad. 20:10). Darí lun ladügün Heowá lun larúeihan Salomón aban liráü Dawidi tuma Betüsawé Ísüraeli (1 Kro. 22:9, 10).

10. a) Ka amu katei adügübei lun feruduna lani Heowá Dawidi? b) Ka burí katei ínchahabalin Heowá lun feruduna lániwa?

¹⁰ Másiñati lugudemehabu lan Dawidi lun Saulu ligía lan ábanya katei le adügübei lun feruduna lani Heowá Dawidi (1 Sam. 24:4-7). Óusera lumutiwa Heowá ítara kei wóuseruniña amu. Ariñagati Hesusu: “Míchiga humá hadurun amu, michugúnwa láamuga giñe hidurun, ladüga kei ligaburi híchugun hadurun amu, ítara luba giñe lichugúniwa hidurun; le aubei hamisuraha, lauba giñe lamisurahaün Bungiu” (Mat. 7:1, 2). Ma lueirin awalidaguni le wasandirubei dan le wasubudiruni luagu feruduna lani Heowá wafigoun, íbini anhein weiri lubéi kei agabarahani o áfarahani! Gama lumoun, ánhawagubeirügü aranseñu lun feruduna wamaniña amu, lun wagufeseruni wafigoun ani arufuda wagíame sansi wamaali lan wagaburi ligíarügüba feruduna lániwa. Dan le lasakürihan gürigia le afigouhabei tídangiñe sun hanigi, ibihati awalidaguni lugundun ‘chibá lumuti Heowá lifigoun’(aliihoualá Adügaü 3:19).

11. Ka katei wuribati ladügübei Manasési ligibugiñe Heowá?

¹¹ Akutiha wamá amu abahüdaguni tídangiñeti Bíbülia le arufudubalin aranseñu liña lan Heowá lun feruduna lániwa. Kéiburi ǘrüwa-san-ǘrüwa-wein irumu lárigiñe lagumeserun Dawidi arúeiha, aba larúeihan Manasési Hudá. Durati larúeihan Manasési dimí-san-seingü irumu, ani gíbeti meha turóbuli lidan larúeihan ladüga lisalufurin, siadi lumuti Heowá Manasési luagu katei wuribati le ladügübei. Lidan sun katei le ladügübei, adügati burí latarü lun Baali, “huduguati [...] houn sun waruguma ha siélubaña”, gudagüda lumutiña lirahüñü keisi adagaragüdüni, áluaha ligía garíaahatiña, burú, abuyeiha ligía abiñaraha. Le linarün katei, “wéiriti bugaha luriban lóuserun [Manasési] ligibugiñe Wabungiute” (2 Kro. 33:1-6).

12. Ida liña lagararaagun Manasési lun Heowá?

¹² Lau lásügürün dan, aba lanügǘn Manasési adaürǘwa Babilónia, dise luéi lageira. Másiñati ñein lan laritaguei dimurei le lariñagubei Moisesi houn ísüraelina: ‘Danme hásügürün lídangiñe  sun súfuri, ábame hagararaagun lun Heowá, adüga humeime le lubeibei’ (2 Lur. 4:30). Ani ligía asuseredubei, aba lagaraagun Manasési lun Heowá. Ida liña ladügüni? “Aba lagúaruni Wabureme le Lubungiute lau ǘnabuguni” (arihualá páhina 23) (2 Kro. 33:12, 13). Mafuranguagüdün tumuti Bíbülia woun kátima lan meha dimurei le lariñagubei Manasési lidan afurieiduni ligía, gama lumoun, gayarati wasaminarun luagu genegegua lan luma meha le labürüdübei Dawidi lidan Sálumu 51. Meberesenga ka lan lariñagubei, le linarün katei, sansi lumuti Manasési ligaburi sunsuinagubei.

13. Ka uagu feruduna lubalin Heowá Manasési?

¹³ Ida liña lóunabuni Heowá lafurieidun Manasési? “Aba laganbuni [...] lafurieidun.” Ítara kei meha lasuseredun lun Dawidi, aba líchugun Manasési fe luagu wéinamu lan meha lifigoun, ábati lasakürihan tídangiñe sun lanigi. Ligíati aba lubéi feruduna lani Bungiu, aba ladügün lun lagiribudun Herusaléun lunya lárügüdüni larúeihan. Ítara liña “gunfurandalani Manasési luagu Wabureme lan [Heowá] Búngiubei” (2 Kro. 33:13). Ma lueirin dǘgüdaguaü le líchugubei libiaman hénpulu le woun lau warihini luagu feruduna lániña Wabungiute le gudemehabubei, gürigia ha asakürihabaña luagu hafigoun!

14. Ka adügübei lun gayara lan feruduna lani Heowá somu gürigia?

¹⁴ Uguñe weyu, fiúrügüñanu lubúeingu Bungiu ha lúntiña hamuriahan ferudun luagu somu figóu wéiriti le hadügübei kei meha le ladügübei Dawidi luma Manasési. Gama lumoun, arufudati hani biama urúeigu ha hénpulu woun luagu aranseñu liña lan Heowá lun feruduna lan somu figóu íbini anhein weiri lubéi, dan le hasakürihan gürigia tídangiñe sun anigi.

15. Ka arufudubalin luagu mama lan ítaraguarügü feruduna lan Heowá?

¹⁵ Gayarati lubéi wasaminarun feruduna lumuti lan Heowá hafigoun sun gürigia súnwandan? Uá. Konpararü waméi igaburi le larufudubei Dawidi luma Manasési luma igaburi le harufudubei gürigia mabuchahatiña ha ísüraelina hama hudaana. Adügati Bungiu lun ladimurehan Natán furangu lun Dawidi, ítara liña  líchugun chansi lun lun lasansiruni ligaburi ani teinki lumuti urúei le Heowá luagu katei le. Ani dan meha le lasandiragunbei Manasési lungua lidan lidere dan, aba lasakürihan tídangiñe sun lanigi. Gama lumoun, madügüntiña meha ísüraelina hama hudaana gasu libe-agei dan, ligía ua lubéi feruduna lániña Heowá. Lubaragiñe lira, aba lóunahaniña lánigu profeta saragu wéiyaasu lun hariñaguni houn ka lan lasaminarubei luagu luriban hóuserun (aliihoualá Neemíasi 9:30). Íbini lárigiñe hagiribudun Babilóniagiñe hageiroun, óunahamemeti wügüriña úaraguatiña íchiga uganu houn, kéiburi Ésüdürasi le fádiri luma Malakíasi le profeta. Wéiriti meha hagundan sun gürigia dan le gaganbadi hamá lun lubalinti (Nee. 12:43-47).

16. a) Ka asuseredubei lun néchani Ísüraeli ladüga hámahan lílana hasakürihan luagu hafigoun? b) Ka chansi gayarabei gani hamani kada aban hádangiñe hadügawagun ísüraelina?

¹⁶ Aba lamaharun Heowá lun sákürifisiu hani animaalugu lárigiñe lóunahani Hesusu ubouagun, ábati líchuguni Hesusu libagari kei ábanrügü sákürifisiu le úati mégeiti luagu lun lesefuruniña gürigia (1 Huan 4:9, 10). Arufuda lumuti Hesusu ka lan lasandirubei Lúguchi lau burí dimurei le: “Huguya Herusalénna! Áfaragua humaaña profetagu, chügua huguya dübü hawagun ha lóunahabaña Bungiu lau uganu buiti hun! Saragu wéiyaasu nálugun nóundarunün kei tóundaruniña gayu tirahüñü lábugiñe tarüna, máhatün! Guentoti teredera huban málouga” (Mat. 23:37, 38). Gama lumoun, aba lasansirúniwa néchani gafigounti ani dereti ligía luagu Ísüraeli lani Bungiu (Mat. 21:43; Gál. 6:16, NM). Gayarati san ferudunawa lan lifigoun somu gürigia le hadügawagun ísüraelina? Anha, agunbirahóuati kada aban hádangiñe íchigei lafiñen luagu Heowá luma luagu lani Hesukrístu sákürifisiu lun leresibiruni ferudun luma lugudemehabu Bungiu. Danme le háguyugun gürigia lun hawinwandun lidan aban ubóu le ñeinba lubéi marihíniwa lan wuribani, aranseñu luba giñe Heowá lun feruduna lani hafigoun ha óunweguñaba sin hasakürihan (Huan 5:28, 29; Adü. 24:15).

17, 18. Ka lunbei wadügüni lun feruduna lániwa Heowá?

¹⁷ Kei aranseñu liña lubéi Heowá lun feruduna lániwa, ka lunbei wadügüni? Le linarün katei, mosu wáyeihani Dawidi luma Manasési. Lunti wánharun luagu chará wamá, wasakürihan, wayumuragun lun Bungiu lun feruduna lániwa ani amuriaha wagíame luma lun ladügün aban anigi to harumatu wadan (Sal. 51:10). Anhein adügaadiwa lubéi somu figóu le wéiriti mosu wáluahan ídemuei hama wéiyaaña lidan afiñeni (Sant. 5:14, 15). Ani meberesenga ka lan gádanbaliwa, ruti dǘgüdaguaü woun waritaguni le lariñagubei Heowá lun Moisesi: “Gudemehabutina, gaguráasuntina, wéiritina lidan ínsiñeni luma inarüni! Deregüdaguati nínsiñehabu súnwandan, feruduna numuti wuribani, maganbadi luma figóu”. Ani masansirungili Heowá (Afu. 34:6, 7).

¹⁸ Lau aban lubuidun hénpulu, füramaseti Heowá houn ísüraelina ha asakürihabaña luagu larumadahabei lan dáseiti lánina figóu le hawagubei hawéi sunsuinagubei, ariñagati houn: “Íbini anhein funá lubéi hifigoun kei lagumuhóun ífunani, náharudagüdübei kei niewe” (aliihoualá Isaíasi 1:18). Kati buiti gayarabei wabihini lídangiñe líchigadi Heowá ferudun? Lagidarún sun wafigoun luma wachara sunsuinagubei, ánhawa arufuda geteingiradi wamá ani asaküriha wagíame.

19. Kaba wakutiha lidan le aban arütíkulu?

¹⁹ Kei feruduna lániwa Heowá, ida luba wáyeihani lidan ligaburi wóuseruniña amu? Kaba íderaguawa lun feruduna wamaniña ha adügübaña aban figóu wéiriti ani aba hasakürihan lárigiñe? Líderagubadiwa le aban arütíkulu lun wakutihani ka lan tídanbei wanigi lun ítaratima lan ligaburi wóuserun kei ligaburi lóuserun Wáguchi Heowá, le uágubei lariñaga abürühati Sálumu: “Buítibu ani gíchigadi buguya ferudun” (Sal. 86:5).