1, 2. (a) Jehofa o ile a ba Modimo wa mohuta mang go setšhaba sa Isiraele? (b) Sehlogo se se tla ahlaahla potšišo efe?

MEHLENG ya Nehemia, sehlopha se sengwe sa Balefi se ile sa amogela thapelong ya sona ya phatlalatša gore borakgolokhukhu ba sona ‘ba ganne go theetša’ ditaelo tša Jehofa kgafetšakgafetša. Lega go le bjalo, Jehofa o ile a bontšha ka makga a mantši gore ke “Modimo yo a lebalelago, yo a šokelago, yo a gaugelago, yo a diegago go galefa le yo a tletšego botho.” Jehofa o ile a dula a bontšha botho bjo bogolo go mathopša ao a bego a bušeditšwe gae mehleng ya Nehemia.—Neh. 9:16, 17.

² Yo mongwe le yo mongwe wa rena a ka ipotšiša gore: ‘Ke ithuta eng tseleng ya Jehofa ya go lebalela?’ Go re thuša gore re arabe potšišo ye e bohlokwa, anke re ahlaahleng ditirišano tša Modimo le banna ba babedi bao ba ilego ba holwa ke tebalelo ya Jehofa—dikgoši tše pedi e lego Dafida le Manase.

3-5. Go tlile bjang gore Dafida a dire sebe se segolo?

³ Gaešita le ge Dafida e be e le monna yo a boifago Modimo, o ile a dira dibe tše dikgolo. Tše pedi tša dibe tšeo di akaretša banyalani ba bitšwago Uria le Batseba. Ditlamorago tša dibe tšeo di ile tša kweša bohloko bohle bao ba akaretšwago. Lega go le bjalo, tsela yeo Modimo a ilego a phošolla Dafida ka yona e re utollela gabotse seo se bolelwago ke tebalelo ya Jehofa. Ela hloko seo se ilego sa direga.

⁴ Dafida o be a rometše madira a Isiraele go yo rakelela motsemošate wa Baamoni, e lego Raba. O be o le bokgole bja dikhilomithara tše ka bago 80 ka bohlabela bja Jerusalema, ka mošola wa Noka ya Jorodane. Eupša eitše ge a le ka godimo ga tlhaka ya ntlo ya gagwe kua Jerusalema, Dafida a bona Batseba—mosadi yo a nyetšwego—a hlapa. Monna wa gagwe o be a ile ntweng. Dafida o itše go bona  Batseba a mo kganyoga kudu moo a ilego a laela gore a tlišwe ka ntlong ya gagwe, gomme a dira bohlotlolo le yena.—2 Sam. 11:1-4.

⁵ Ge Dafida a ekwa gore Batseba o imile, o ile a laela gore monna wa gagwe, Uria, a boe gae Jerusalema ka kholofelo ya gore a robale le mosadi wa gagwe. Eupša Uria o ile a se ye ntlong ya gagwe—go sa šetšwe maiteko a Dafida a go mo kgothaletša gore a dire seo. Ka gona, kgoši ka sephiring e ile ya ngwalela molaodi wa madira a yona gore a bee Uria “ka pele moo ntwa e fišago” gomme madira a mangwe a mo katologe. Ka ge go be go le bonolo gore Uria a hlaselwe, o ile a hwela moo ntweng, ka yona tsela yeo Dafida a bego a rulagantše ka yona. (2 Sam. 11:12-17) Ka go re’alo, sebe sa kgoši sa bohlotlolo se ile sa oketšwa ke gore o dirile gore monna yo a se nago molato a bolawe.

6. Modimo o ile a arabela bjang ka morago ga gore Dafida a dire dibe, gomme se se utolla eng ka Jehofa?

⁶ Therešo ke gore Jehofa o be a bone tšohle tšeo di bego di diregile. Ga go seo a sa se bonego. (Die. 15:3) Gaešita le ge kgoši mafelelong e ile ya nyala Batseba, “seo Dafida a se dirilego e be e le se sebe mahlong a Jehofa.” (2 Sam. 11:27) Ka gona Modimo o ile a arabela bjang ka morago ga gore Dafida a dire dibe tšeo tše dikgolo? O ile a romela moporofeta wa gagwe Nathane go Dafida. Ka ge Jehofa e le Modimo yo a lebalelago, go bonagala a be a nyaka go bona ge e ba a ka hwetša motheo wa gore a lebalele Dafida. Na tsela ye ya Jehofa ya go phošolla Dafida ga e go kgome pelo? Ga se a gapeletša Dafida gore a ipobole, eupša o ile a fo dira gore Nathane a botše kgoši kanegelo yeo e bego e bontšha bogolo bja dibe tša yona. (Bala 2 Samuele 12:1-4.) Ruri tsela yeo ya go swaragana le boemo bjoo bjo thata e ile ya atlega!

7. Dafida o ile a arabela bjang seswantšhong seo Nathane a mmoditšego sona?

⁷ Seswantšho seo Nathane a se dirišitšego se ile sa dira gore kgoši e bontšhe gore e na le toka. Dafida o ile a galefela monna wa mohumi wa kanegelong yeo gomme a re go Nathane: “Ke ikana ka Jehofa yo a phelago gore monna yo a dirago seo o swanetše go hwa!” Go oketša moo, Dafida o ile a bolela gore motho yo a senyeditšwego ka baka la go hloka toka mo go bjalo o swanetše go lefša seo a se lobilego. Eupša bjale go ile gwa tla seo a bego a sa se letela. Nathane o ile a re go yena: “Monna yoo ke wena!” Ke moka Dafida o ile a botšwa gore ditlamorago tša ditiro tša gagwe e be e tla ba gore “tšhoša” e ka se tloge ntlong ya gagwe le gore lapa la gagwe le be le tla welwa ke masetlapelo. Le gona o be a tla gobošwa phatlalatša ka baka la melato yeo ya gagwe. Dafida o ile a lemoga bogolo bja seo a se dirilego gomme a ipobola a nyamile gore: “Ke senyeditše Jehofa.”—2 Sam. 12:5-14.

8, 9. Psalme 51 a utolla eng ka maikwelo a ka gare a Dafida, le gona e re ruta eng ka Jehofa?

⁸ Mantšu a koša yeo Kgoši Dafida a ilego a e hlama ka morago ga moo a utolla go itshola ga gagwe go tšwa pelong. Psalme 51 e bolela kamoo Dafida a ilego a lopa Jehofa gomme e bontšha gabotse gore o dirile se se fetago go fo amogela gore o obile melato. Le gona o ile a itsholela dibe tša gagwe. Dafida o be a tshwenyegile kudu ka tswalano ya gagwe le Modimo. O ile a ipobola ka gore: “Ke go diretše sebe, ke se diretše wena feela.” O ile a lopa Jehofa ka gore: “Bopa pelo e sekilego ka go nna, hle Modimo, o ntsenye moya o mofsa, wona moya o tiilego. . . . Ntsošološetše lethabo le le tlišwago ke go phološwa ke wena, anke o nthekge ka go ntira gore ke be le moya wa go rata go go kwa.” (Ps. 51:1-4, 7-12) Na le wena o bolela le Jehofa go tšwa pelong le ka bolokologi ge o mmotša ka mafokodi a gago?

⁹ Jehofa ga se a ka a fediša ditlamorago tše bohloko tša dibe tša Dafida. Ditlamorago tša tšona di be di tla tšwela pele di le gona bophelong bja gagwe ka moka. Lega go le bjalo, ka  ge Jehofa a ile a lemoga gore Dafida o a itshola—gore o be a na le “pelo e robegilego le e setlegilego”—o ile a mo lebalela. (Bala Psalme 32:5; Ps. 51:17) Modimo Ramatlaohle o kwešiša boemo bja kgopolo bja motho yo a dirilego sebe le seo se dirilego gore a dire seo. Go e na le gore Jehofa a dumelele gore dihlotlolo tšeo di ahlolelwe lehu ke baahlodi ba batho go ya ka Molao wa Moshe, o ile a tsena ditaba gare ka gore a ba gaugele, a phošolla Dafida le Batseba ka boyena. (Lef. 20:10) Modimo o ile a ba a dira gore morwa wa bona Solomone e be kgoši e latelago ya Isiraele.—1 Dikor. 22:9, 10.

10. (a) Jehofa a ka ba a ile a hwetša motheo ofe wa gore a lebalele Dafida? (b) Ke dilo dife tšeo di ilego tša šušumeletša Jehofa gore a lebalele Dafida?

¹⁰ Mohlomongwe selo se sengwe seo se dirilego gore Jehofa a lebalele Dafida ke tsela yeo Dafida ka boyena a ilego a gaugela Saulo. (1 Sam. 24:4-7) Go etša ge Jesu a hlalositše, Jehofa o re swara ka tsela yeo re swarago ba bangwe ka yona. Jesu o itše: “Tlogelang go ahlola gore le se ahlolwe, gobane kahlolo ye le ahlolago ka yona, le tla ahlolwa ka yona; kelo yeo le elago ka yona, ba tla le elela ka yona.” (Mat. 7:1, 2) Ruri go tloga go homotša go tseba gore Jehofa o tla re lebalela dibe—go akaretša le dibe tše dikgolo tše swanago le bohlotlolo goba go bolaya motho! O tla dira seo ge e ba re na le moya wa go lebalela, ge e ba re ipobola dibe pele ga gagwe, le ge e ba re fetoša boemo bja rena bja kgopolo ka boitshwaro bja rena bjo bobe. “Mehla ya tapologo” e tšwa go Jehofa ge badiradibe ba itshola go tšwa pelong.—Bala Ditiro 3:19.

11. Kgoši Manase o ile a dira bobe ka ditsela dife mahlong a Modimo?

¹¹ Ela hloko pego e nngwe ya Mangwalo yeo e bontšhago kamoo Jehofa a tlogago a ikemišeditše go lebalela. Nywaga e ka bago e 360 ka morago ga ge pušo ya Dafida e thomile, Manase o ile a ba kgoši ya Juda. Pušo ya gagwe yeo e tšerego nywaga e 55 e ile ya tuma ka bokgopo, gomme dilo tše mpe tšeo a ilego a di dira di ile tša dira gore Jehofa a se sa mo amogela. Gare ga dilo tše dingwe tšeo Manase a ilego a di dira, o ile a direla Bobaali dialetare, a rapela “makoko ka moka a magodimong,” a fetiša barwa ba gagwe mollong gomme a kgothaletša mekgwa ya go dirišana le meoya e mebe. Ee, “o ile a dira dilo tše mpe ka tekanyo e kgolo mahlong a Jehofa.”—2 Dikor. 33:1-6.

12. Manase o ile a boela bjang go Jehofa?

¹² Mafelelong, Manase o ile a tšewa nageng ya gabo gomme a lahlelwa kgolegong Babilona. Go ka direga gore ge a le moo o ile a gopola mantšu ao Moshe a a boditšego Isiraele a gore: “Ge bofelong bja mehla mantšu a ka moka a phethagala go lena gomme le le mathateng a šiišago, gona le tla boela go Jehofa  Modimo wa lena la theetša lentšu la gagwe.” (Doit. 4:30) Manase o ile a boela go Jehofa. Bjang? O ile “a ikokobeletša Modimo wa borakgolokhukhu ba gagwe kudu” gomme “a rapela” Modimo (go etša ge go bontšhitšwe go letlakala 21). (2 Dikor. 33:12, 13) Ga re na pego ya mantšu a lebanyago ao Manase a a boletšego dithapelong tšeo, eupša re ka kgona go nagana gore ka ditsela tše itšego a be a swana le a Kgoši Dafida, ao a begilwego go Psalme 51. Tabakgolo ke gore Manase o ile a fetoša pelo ya gagwe ka mo go feletšego.

13. Ke ka baka la’ng Jehofa a ile a lebalela Manase?

¹³ Jehofa o ile a arabela bjang dithapelong tša Manase? O ile “a theetša ge [Manase] a mo lopa gomme a kwa kgopelo ya gagwe ya gore a mo gaugele.” Go swana le Dafida yo a phetšego pele ga mehla ya gagwe, Manase o ile a lemoga bogolo bja dibe tša gagwe gomme a itshola go tšwa pelong. Ke ka baka leo Modimo a ilego a lebalela Manase gomme a mmušetša bogošing bja gagwe kua Jerusalema. Ka baka leo, “Manase [o ile] a tseba gore Jehofa ke Modimo wa therešo.” (2 Dikor. 33:13) E tloga e le mo go homotšago go ba le bohlatse bjo oketšegilego bja gore Modimo wa rena yo a gaugelago o lebalela bao ba itsholago go tšwa pelong!

14. Ke eng seo se dirago gore Jehofa a lebalele badiradibe?

¹⁴ Ga se ba bantši gare ga batho ba Modimo lehono bao ka letšatši le lengwe ba ka tlago ba nyaka go lebalelwa dibe tše dikgolo go swana le tša Dafida le Manase. Eupša ka ge Jehofa a ile a lebalela dikgoši tše tše pedi, re kgona go bona gore Modimo wa rena o ikemišeditše go lebalela gaešita le dibe tše dikgolo ge e ba modiradibe a itshola go tšwa pelong.

15. Re tseba bjang gore Jehofa ga a fo lebalela batho ntle le lebaka?

¹⁵ Therešo ke gore re ka se no phetha ka gore Jehofa o fo lebalela batho ka moka dibe tša bona ntle le lebaka. Tabeng ye, anke re bapišeng boemo bja kgopolo bja Dafida le Manase gotee le bja setšhaba sa marabele sa Isiraele le Juda. Modimo o ile a romela Nathane  gore a bolele le Dafida gomme a mo nee sebaka sa gore a fetoše boemo bja gagwe bja kgopolo. Dafida o ile a amogela ka bolokologi thušo yeo. Ge Manase a be a ikhwetša a le mathateng a šoro, o ile a šušumeletšega go itshola go tšwa pelong. Lega go le bjalo, ke ka makga a mantši moo badudi ba Isiraele le Juda ba ilego ba se itshole. Ka gona, Jehofa ga se a ka a ba lebalela. Go e na le moo, o ile a diriša baporofeta ba gagwe kgafetšakgafetša go ba botša kamoo a bego a lebelela boitshwaro bja bona bja go se kwe. (Bala Nehemia 9:30.) Gaešita le ka morago ga gore mathopša a boele nageng ya gabo ona go tšwa Babilona, Jehofa o ile a tšwela pele a ba romela bahlanka ba gagwe ba botegago, ba bjalo ka moperisita Esera le moporofeta Maleaki. Ge batho ba be ba dira dilo ka go dumelelana le thato ya Jehofa, ba be ba thaba kudu.—Neh. 12:43-47.

16. (a) Ke ditlamorago dife tšeo di ilego tša wela setšhaba sa Isiraele ka moka ka baka la go se itshole ga sona? (b) Ke selo sefe se sebotse seo se ka tlago sa diragalela ditho tša setšhaba sa Isiraele ya bogologolo?

¹⁶ Ka morago ga gore Jesu a romelwe lefaseng gomme go neelwe sehlabelo setee se phethagetšego, Jehofa o ile a se sa hlwa a amogela dihlabelo tša Isiraele tša diphoofolo. (1 Joh. 4:9, 10) Ge Jesu a be a le mo lefaseng, o ile a bonagatša pono ya Tatagwe ge a be a bolela mantšu a a kwešago bohloko: “Hee Jerusalema, hee Jerusalema, wena mmolai wa baporofeta le yo a kgatlago ka maswika bao ba rometšwego go wena—ke gantši gakaakang ke nyaka go bokanya bana ba gago gotee ka tsela yeo kgogo e bokanyago matswiana a yona ka tlase ga diphego tša yona! Eupša lena ga se la ka la nyaka.” Ka gona Jesu o itše: “Bonang! Modimo o tla lahla ntlo ya lena.” (Mat. 23:37, 38) Ka go re’alo, setšhaba seo sa go dira dibe le sa go se itshole se ile sa tšeelwa legato ke Isiraele ya moya. (Mat. 21:43; Bagal. 6:16) Eupša go thwe’ng ka ditho tša setšhaba sa Isiraele ya nama? Di be di ka lebalelwa le go gaugelwa ke Jehofa ge e ba di bontšha tumelo go Modimo le sehlabelong sa Jesu Kriste. Batho bao ba hwilego pele ga ge ba ka itsholela dibe tša bona, le bona ba tla bulegelwa ke sebaka seo ge ba tsošetšwa lefaseng leo le hlwekišitšwego.—Joh. 5:28, 29; Dit. 24:15.

17, 18. Jehofa a ka re lebalela ka tsela efe?

¹⁷ Re swanetše go arabela bjang boikemišetšong bja Jehofa bja go re lebalela? Ruri re swanetše go dira dilo ka tsela yeo Dafida le Manase ba dirilego ka yona. Re swanetše go lemoga gore re na le sebe, re itsholele melato ya rena, re lope Jehofa gore a re lebalele gomme re mo kgopele gore a bope pelo e sekilego ka go rena. (Ps. 51:10) Ge e ba re dirile sebe se segolo, re swanetše go nyaka thušo ya moya go bagolo. (Jak. 5:14, 15) Go sa šetšwe gore maemo a rena ke afe, ke mo go homotšago go gopola gore Jehofa o ka tsela yeo a hlaloseditšego Moshe gore o ka yona, gore ke “Modimo yo a gaugelago le yo a šokelago, yo a diegago go galefa, yo a tletšego botho le therešo, yo a bolokelago ba dikete botho bja gagwe, yo a swarelago molato, karogo le sebe.” Jehofa ga se a fetoga.—Ek. 34:6, 7.

¹⁸ A diriša seswantšho se matla, Jehofa o ile a holofetša Baisiraele ba itsholago gore sepatso sa dibe tša bona se tla fedišwa ka mo go feletšego, ka go dira gore seo se bego se etša “madi” e be se sešweu bjalo ka “kapoko.” (Bala Jesaya 1:18.) Ka gona, re ithuta eng tseleng ya Jehofa ya go lebalela? Re ithuta gore o re lebalela dibe tša rena le melato ya rena ka mo go feletšego, ge feela re bontšha tebogo e bile re itshola.

19. Re tlo ahlaahla eng sehlogong se se latelago?

¹⁹ Ka ge Jehofa a re lebalela, re ka mo ekiša bjang ditirišanong tša rena le ba bangwe? Re ka phema bjang moya wa go se lebalele bao ba dirilego dibe tše dikgolo eupša ba itshola go tšwa pelong? Sehlogo se se latelago se tla re thuša gore re hlahlobe dipelo tša rena e le gore re ka swana kudu le Tatago rena, Jehofa, yena yo a ‘lokilego e bile a ikemišeditše go lebalela.’—Ps. 86:5.