1, 2. (a) Ki sorto di Dios Jehova tabata pa e nacion di Israel? (b) Ki pregunta e articulo aki lo analisa?

DEN tempo di Nehemias, un grupo di levita a admiti den un oracion publico cu hopi biaha nan antepasadonan “a nenga di scucha”, of cumpli cu, e mandamentonan di Jehova. Pero bes tras bes Jehova a pordona nan. E ta “un Dios di pordon, yen di gracia y compasion, kende no ta rabia lihe, y ta abunda den misericordia.” El a sigui mustra bondad inmereci na e exiliadonan repatria ey den tempo di Nehemias.​—Neh. 9:16, 17.

² Cada un di nos lo por puntra nos mes: ‘Con ami por beneficia di Dios su pordon?’ Pa yuda nos contesta e pregunta importante aki, laga nos analisa con Jehova a trata cu dos homber cu a beneficia di su pordon: Rey David y Rey Manases.

3-5. Ki pica serio David a comete?

³ Aunke David tabata un homber temeroso di Dios, el a comete pica serio. Dos di e picanan aki a envolve un pareha casa, Urias y Betsabe. E consecuencianan di e picanan ey tabata masha doloroso pa nan tur tres. Pero e manera cu Dios a corigi David ta siña nos hopi cos tocante Jehova su manera di pordona hende. Laga nos analisa kico a pasa.

⁴ David a manda e ehercito di Israel bay captura Raba, capital di Amon. E luga aki tabata keda un 80 kilometer oost di Jerusalem, na otro banda di Riu Jordan. Mientrastanto, David a keda Jerusalem, y for di riba dak di su palacio, el a mira Betsabe​—un muher casa​—ta baña. Su esposo tabata den e ehercito. Ora David a mira Betsabe, el a haya asina tanto gana di tene relacion cu ne cu el a laga trec’e  na su palacio y a comete adulterio cu ne.​—2 Sam. 11:1-4.

⁵ Ora David a haya sa cu Betsabe a sali na estado, el a laga trece Urias bek na Jerusalem, cu e speransa cu Urias lo a tene relacion cu Betsabe, pa despues e kere cu e yiu ta di dje. Ma Urias no kier a bay su cas, ni maske cuanto David a anim’e pa bay. E ora ey e Rey a skirbi su comandante di ehercito secretamente y a bis’e pa pone Urias “den e fila mas dilanti di e bataya di mas fuerte” y laga e otro soldaatnan retira for di dje. Esey a pone cu e enemigo a mata Urias facilmente, net manera David a plania. (2 Sam. 11:12-17) Pues, e Rey a purba di tapa su pica di adulterio cu un pica mas grandi ainda: matando un homber inocente.

6. Kico Jehova a haci despues cu David a peca, y kico esaki ta siña nos tocante Jehova?

⁶ Claro cu Jehova a mira tur loke a pasa. Nada no ta scap’e. (Prov. 15:3) Maske cu despues di loke a pasa, David a casa cu Betsabe, “e cos cu David a haci tabata malo den bista di SEÑOR.” (2 Sam. 11:27) Pues, con Dios a reacciona riba e picanan serio cu David a comete? El a manda profeta Natan cerca David. Como cu Jehova ta un Dios cu ta dispuesto pa pordona, aparentemente e kier a wak si tabatin motibo pa tene misericordia cu David. Bo no ta haya esaki hopi alentador di su parti? E no a obliga David confesa, sino simplemente el a laga Natan conta e Rey un cuenta cu ta ilustra con serio su pica tabata. (Lesa 2 Samuel 12:1-4.) Esey tabata un bon manera pa sa kico realmente tabata e sintimentonan di David!

7. Con David a reacciona riba e ilustracion di Natan?

⁷ E ilustracion di Natan a traha riba e Rey su sentido di husticia. David a rabia masha hopi cu e homber rico den e cuenta y a bisa Natan: “Manera SEÑOR ta biba, siguramente e homber cu a haci esaki ta merece morto.” Tambe el a bisa cu mester a compensa e victima di e inhusticia ey pa loke el a perde. Pero e ora ey Natan a bis’e: “Ta abo ta e homber!” Esey si lo mester a shock David! Natan a bis’e cu pa motibo di loke el a haci lo el a sufri tragedia y miembronan di su famia lo a muri un morto violento. Tambe lo el a ser humilia publicamente pa su picanan. David a realisa cu loke el a haci tabata hopi grave, y cu un curason arepenti el a admiti: “Mi a peca contra SEÑOR.”​—2 Sam. 12:5-14.

8, 9. Con Salmo 51 ta revela kico David a sinti, y kico esey ta siña nos tocante Jehova?

⁸ E palabranan di un cantica cu David a compone despues ta mustra cu di berdad a duel e loke el a haci. Den Salmo 51 nos por lesa con David a roga Jehova pa yud’e. Pero David a bay mas aleu cu simplemente admiti cu el a haci malo; el a arepenti tambe di su picanan. Su relacion cu Dios tabata e cos di mas importante p’e. El a confesa: “Contra abo, abo so, mi a peca.” El a roga Jehova: “Crea den mi un curason limpi, o Dios, y renoba un spirito recto den mi. . . . Duna mi atrobe e goso di bo salbacion, y sostene mi cu un spirito boluntario.” (Sal. 51:1-4, 7-12) Ora bo ta papia cu Jehova tocante e fayonan cu bo a comete, bo ta mes sincero y honesto cu David?

⁹ Jehova no a libra David di e consecuencianan doloroso di su picanan. Nan lo a keda caus’e problema pa resto di su bida. Pero como cu David tabatin un actitud corecto, esta, “un curason arepenti y kibra”, Jehova a pordon’e. (Lesa Salmo  32:5; Sal. 51:17) Dios Todopoderoso ta compronde e berdadero sintimento- y motibonan cu ta pone un hende comete pica. Pesey, en bes di a laga hues humano condena David cu Betsabe na morto pa motibo di adulterio, manera e Ley di Moises a manda, Jehova mes, den su gran misericordia, a interveni y a husga nan. (Lev. 20:10) Cu tempo, hasta el a haci nan yiu Salomon e siguiente rey di Israel.​—1 Cro. 22:9, 10.

10. (a) Ki motibo Jehova por tabatin pa pordona David? (b) Kico un hende mester haci pa Jehova pordon’e?

¹⁰ Un otro motibo pakico kisas Jehova a pordona David ta pa e manera cu David mes a mustra misericordia na Saul. (1 Sam. 24:4-7) Manera Hesus a splica, Jehova ta trata nos manera nos ta trata otro hende. Hesus di: “Stop di husga, pa boso no ser husga, pasobra cu e huicio cu boso ta husga, boso lo ser husga, y cu e midi cu boso ta midi, nan lo midi pa boso.” (Mat. 7:1, 2) Ta un gran consuelo pa sa cu Jehova lo pordona nos picanan, hasta picanan serio manera adulterio of asesinato! Pero lo e pordona nos solamente si nos ta dispuesto pa pordona otro hende, si nos confesa nos picanan na dje y si nos cambia nos actitud y mira nos picanan manera e ta mira nan. Ora hende arepenti di curason di nan picanan, Jehova lo refresca nan, es decir, yuda nan haya un consenshi limpi.​—Lesa Echonan 3:19.

11. Menciona e cosnan malo cu Rey Manases a haci den bista di Dios.

¹¹ Laga nos analisa un otro relato biblico cu ta mustra te con leu Jehova ta dispuesto pa pordona. Un 360 aña despues cu David a cuminsa reina, Manases a bira rey di Juda y su reinado di 55 aña tabata conoci pa su maldad. Jehova a conden’e pa e cosnan repugnante cu el a practica. Entre otro, el a traha altar pa Baal, el a adora solo, luna y strea, a kima su yiunan como sacrificio na un dios falso y a stimula e pueblo pa practica spiritismo. Si, “el a haci hopi maldad den bista di SEÑOR.”​—2 Cro. 33:1-6.

12. Con Manases a bolbe na Jehova?

¹² Cu tempo, Manases a ser captura y hiba preso na Babilonia. Eynan kisas el a corda riba e palabranan aki cu Moises a bisa Israel: “Ora bo ta den angustia y tur e cosnan aki bin riba bo, den e ultimo dianan, lo bo bolbe cerca SEÑOR bo Dios y scucha su bos.” (Deu. 4:30) Manases a bolbe cerca Jehova. Con? El “a  humilia su mes grandemente” y a sigui “haci oracion” na Dios (manera e plachi na pagina 23 ta mustra). (2 Cro. 33:12, 13) Bijbel no ta bisa nos kico precies Manases a bisa den e oracionnan ey, pero nos por imagina cu lo tabata algo similar na loke Rey David a expresa, manera ta para skirbi na Salmo 51. En todo caso, Manases a cambia su actitud completamente.

13. Dicon Jehova a pordona Manases?

¹³ Con Jehova a reacciona riba e oracionnan di Manases? “El a keda conmovi door di [Manases] su rogamento y a tende su suplica.” Mescos cu David, Manases tambe a reconoce con serio su picanan tabata y di berdad a arepenti. Ta pesey Dios a pordona Manases y a permitie bay Jerusalem bek y sigui cu su reinado. Como resultado, ‘Manases a reconoce cu Jehova ta Dios.’ (2 Cro. 33:13) Ta hopi alentador di por mira for di e ehempel aki tambe cu Jehova ta un Dios misericordioso y cu e ta pordona esnan cu di berdad a arepenti!

14. Kico ta determina si Jehova lo pordona un persona cu a peca?

¹⁴ Masha poco sirbidor di Dios di awendia lo tin cu pidi pordon pa picanan serio manera esnan di David y Manases. Pero e echo cu Jehova a pordona e dos Reynan aki ta yuda nos realisa cu nos Dios ta dispuesto pa pordona hasta picanan hopi grave, basta e pecador di berdad a arepenti.

15. Dicon nos sa cu no ta semper Jehova ta pordona hende pa nan picanan?

¹⁵ Ta claro cu nos no mester pensa cu Jehova semper ta pordona tur hende pa nan picanan. Por ehempel, e actitud di David y Manases tabata completamente diferente for di e actitud di e hendenan desobediente di Israel y Juda. Dios a manda Natan bay confronta David y dun’e un oportunidad pa cambia. David tabata gradicido pa e oportunidad aki y a  arepenti. Ora Manases a haya su mes den un situacion di angustia, el a realisa cu e mester a arepenti di su picanan. Pero e habitantenan di Israel y Juda hopi biaha no a arepenti di nan picanan, a pesar cu Jehova bes tras bes a manda su profetanan bay bisa nan kico e tabata pensa di nan conducta desobediente. Pesey Jehova no a pordona nan. (Lesa Nehemias 9:30.) Hasta despues cu e Israelitanan a bin nan pais bek for di Babilonia, Jehova a sigui manda mensahero fiel cerca nan, manera sacerdote Esdras y profeta Malakias. E pueblo tabatin gran goso ora nan a actua na harmonia cu e boluntad di Jehova.​—Neh. 12:43-47.

16. (a) Ya cu e nacion di Israel a nenga di arepenti, kico tabata e consecuencia pa nan? (b) Ki oportunidad Jehova ta duna hende cu ta descendiente di e nacion di Israel?

¹⁶ Como hende riba tera, Hesus a refleha e punto di bista di Jehova ora el a bisa e siguiente palabranan conmovedor: “Jerusalem, Jerusalem, abo cu a mata e profetanan y cu a piedra esnan cu Dios a manda cerca bo. Cuanto biaha mi kier a hala bo yiunan hunto manera un galiña ta hala su puyitonan hunto bou di su halanan! Ma boso no tabata kier.” Pesey Hesus a declara: “Dios lo bandona boso tempel!” (Mat. 23:37, 38) Pues, Israel spiritual a reemplasa e nacion pecaminoso cu a nenga di arepenti. (Mat. 21:43; Gal. 6:16) Pero ta posibel pa hende cu ta descendiente di e nacion di Israel haya pordon pa nan picanan? Si, Jehova ta dispuesto pa pordona nan y tene misericordia cu nan basta nan pone fe den dje y den e sacrificio di rescate di Hesus cu a reemplasa e sacrificionan di bestia di Israel. (1 Juan 4:9, 10) Hende cu a muri sin arepenti di nan picanan tambe lo haya e oportunidad ey ora nan ser resucita riba tera.​—Juan 5:28, 29; Echo. 24:15.

17, 18. Ki ora Jehova ta dispuesto pa pordona nos?

¹⁷ Ya cu Jehova ta dispuesto pa pordona nos, kico nos mester haci? Pa cuminsa, nos mester haci manera David y Manases. Nos mester admiti cu nos ta pecador, arepenti di nos picanan, roga Jehova di curason pa pordona nos y pidie yuda nos deshaci di mal deseo y crea den nos un curason limpi. (Sal. 51:10) Si nos comete pica serio, nos mester busca yudansa spiritual cerca e ancianonan tambe. (Sant. 5:14, 15) Maske con serio nos picanan ta, ta un consuelo pa corda cu Jehova ta manera el a describi su mes na Moises, esta, un Dios “yen di compasion y gracia, kende no ta rabia lihe y kende ta abunda den misericordia y berdad; kende ta mantene misericordia pa milnan, kende ta pordona inikidad, transgresion y pica.” Jehova no a cambia.​—Exo. 34:6, 7.

¹⁸ Jehova a uza un ilustracion impactante ora el a priminti e Israelitanan cu a arepenti cu lo el a pordona nan completamente. El a bisa cu nan picanan tabata manera un mancha color escarlata, pero lo el a haci nan blanco manera “sneeuw.” (Lesa Isaias 1:18.) Pues, con nos por beneficia di Jehova su pordon? Jehova por pordona nos picanan completamente basta nos mustra cu nos ta agradecido y arepenti.

19. Kico nos lo analisa den e siguiente articulo?

¹⁹ Como cu Jehova ta dispuesto pa pordona nos, con nos por imit’e den nos trato cu otro hende? Con nos por pordona hasta hende cu comete pica serio pero cu ta mustra cu di berdad nan a arepenti? E siguiente articulo lo yuda nos analisa nos propio curason, pa asina nos por bira mas manera nos Tata, Jehova, kende ta “bon, y cla pa pordona.”​—Sal. 86:5.