1, 2. (a) Jehova wativeta anguNkulunkulu lonjani esiveni saka-Israyeli? (b) Ngumuphi umbuto lokucocwa ngawo kulesihloko?

EMALANGENI aNehemiya, licembu lelitsite lemaLevi lavuma emthantazweni welinyenti kutsi bokhokho balo “bala kulalela” imiyalo yaJehova. Nobe kunjalo, Jehova wachubeka atikhombisa ‘anguNkulunkulu lonesihawu nemusa; lowephuta kutfukutsela andze ngemusa.’ Jehova wachubeka akhombisa umusa wakhe kubantfu bangesikhatsi saNehemiya labebuyiselwe eveni labo.—Neh. 9:16, 17.

² Ngamunye wetfu angase atibute: ‘Kusho kutsini kutsetselela kwaJehova kimi?’ Kute siphendvule lombuto lobalulekile, ase sihlole indlela Nkulunkulu lawaphatsa ngayo emadvodza lamabili lazuza ekutsetseleleni kwakhe—emakhosi lamabili, Davide naManase.

3-5. Davide wasenta njani sono lesibi kakhulu?

³ Ngisho nobe Davide abeyindvodza leyesaba Nkulunkulu, wenta tono letinkhulu. Letimbili tato betitsintsa bantfu labashadene, Uriya naBhatisheba. Imiphumela yaletono yaba buhlungu kakhulu kubo bonkhe labebatsintseka. Nobe kunjalo, indlela Nkulunkulu lamyala ngayo Davide isifundzisa lokunyenti mayelana nekutsetselela kwaJehova. Asesicabange ngalokwenteka.

⁴ Davide watfumela libutfo lema-Israyeli kutsi liyewuvimbetela inhlokodolobha yema-Amoni, iRabha. Lelidolobha belingesheya kweMfula iJordane, lengemakhilomitha langu-80 emphumalanga yeJerusalema. Ngaleso sikhatsi, aseluphahleni lwendlu yakhe lebeyiseJerusalema, Davide wabona Bhatisheba—inkhosikati leshadile—ageza. Indvodza yakhe beyingekho. Davide watsatseka kakhulu ngekubuka Bhatisheba kangangekutsi waze wamngenisa endlini yakhe, waphinga naye.—2 Sam. 11:1-4.

 ⁵ Ngesikhatsi Davide atfola kutsi Bhatisheba utetfwele, wakhipha umyalo wekutsi Uriya indvodza yakhe abuye eJerusalema anelitsemba lekutsi utawuya ecasini nemfati wakhe, Bhatisheba. Uriya akazange angene nekungena endlini yakhe, ngisho nobe Davide etama kumkhutsata kutsi aye khona. Ngako-ke, lenkhosi yabhalela indvuna yemphi yatsi Uriya akabekwe “embili lapho imphi ishisa ngakhona” futsi lamanye emasotja bekufanele akhweshe kuye. Njengobe abesasele yedvwa, Uriya wabulawa emphini njengobe Davide abehlelile. (2 Sam. 11:12-17) Sono salenkhosi sekuphinga sakhula njengobe beseyibulele indvodza lete licala.

6. Yini Nkulunkulu layenta ngetono taDavide, futsi loko kusifundzisani ngaJehova?

⁶ Jehova wakubona konkhe lokwenteka, ecinisweni kute langakuboni. (Taga 15:3) Ngisho nobe lenkhosi yagcine ishade naBhatisheba, “lentfo leyayentiwe nguDavide yaba yimbi emehlweni aSimakadze.” (2 Sam. 11:27) Yini Nkulunkulu layenta ngesono lesikhulu saDavide? Watfumela umphrofethi wakhe Nathani, kuDavide. Njengobe Jehova anguNkulunkulu lotsetselelako, abefuna kubona kutsi Davide uphendvuka mbamba yini. Ayikutsintsi inhlitiyo yini indlela Jehova lenta ngayo? Akazange aphocelele Davide kutsi avume tono takhe kodvwa wamane wasebentisa Nathani kutsi acocele inkhosi indzaba letsite lebeyifanekisa bubi betono tayo. (Fundza 2 Samuweli 12:1-4.) Yabonakala iphumelela leyo ndlela yekulungisa lesimo lebesimatima.

7. Davide wativa njani ngemfanekiso waNathani?

⁷ Umfanekiso waNathani wabutsintsa bulungisa benkhosi. Davide wayitfukutselela kakhulu lendvodza leyayinjingile futsi watsi kuNathani: “Ngifunga kuphila kwaSimakadze, ngitsi, lomuntfu lowente intfo lenjena kufanele afe nekufa!” Ngetulu kwaloko, Davide watsi bekufanele ikhokhelwe lendvodza lebeyiphuyile. Kodvwa Nathani watsi kuDavide: “Lowo muntfu nguwe, nkhosi!” Davide watjelwa kutsi tento takhe betitawuletsa umphumela wekutsi “inkemba” ingasuki endlini yakhe futsi kube nenhlekelele emndenini wakhe. Abetawuphindze ahlazeke embikwebantfu ngenca yetono takhe. Davide wacaphela kutsi bekukubi kangakanani loko lakwenta futsi wavuma watsi: “Ngonile kuSimakadze.”—2 Sam. 12:5-14.

8, 9. Umbhalo weTihlabelelo 51 uyiveta njani imicabango lejulile yaDavide, futsi usifundzisani ngaJehova?

⁸ Emavi engoma leyacanjwa yiNkhosi Davide ngemuva kwaloko lokwakwentekile, akhombisa kutisola kwakhe lokusuka enhlitiyweni. Tihlabelelo 51 tineticelo taDavide letitsintsa inhlitiyo letiya kuJehova tiphindze tikhombise kutsi akazange agcine ngekuvuma tono takhe kuphela, kodvwa waphendvuka. Davide abekhatsateke kakhulu ngebuhlobo bakhe naNkulunkulu. Wavuma watsi: “Ngonile kuwe, wena wedvwa.” Wancenga Jehova watsi: “Nkulunkulu, dala kimi inhlitiyo lehlantekile, uvuselele kimi umoya wekulunga. Ungangicoshi ebusweni bakho, Ungangemuki [umoya] wakho longcwele. Buyisela kimi kutfokota kwensindziso yakho, ungisimise ngekungipha umoya lovumako.” (Hla. 51:1-4, 7-12) Nawukhuluma naJehova ngemaphutsa akho, uba cotfo ngaleyo ndlela yini?

⁹ Jehova akazange ayisuse imiphumela lebuhlungu yetono taDavide. Abetawuchubeka aphila naleyo miphumela. Nobe kunjalo, ngesizatfu sekutsi Jehova wakubona kuphendvuka kwaDavide—‘abephukile anenhlitiyo ledzabukile’—wamtsetselela. (Fundza Tihlabelelo 32:5; Hla. 51:17)  Nkulunkulu Somandla uyaticondza tizatfu letibangela kutsi umuntfu ente sono. Esikhundleni sekutsi atsi Davide naBhatisheba labaphinga ababulawe tikhulu letibantfu ngekuvumelana neMtsetfo waMosi, Jehova ngemusa wangenela futsi kwaba nguye lolungisa lendzaba. (Lev. 20:10) Nkulunkulu waze wabeka indvodzana yabo, lenguSolomoni kutsi ibe yinkhosi lelandzelako yaka-Israyeli.—1 Khr. 22:9, 10.

10. (a) Ngutiphi tizatfu lokungenteka Jehova watitfola kute atsetselele Davide? (b) Yini leyenta Jehova asitsetselele?

¹⁰ Kungenteka kutsi lokunye lokwabangela Jehova watsetselela Davide, kutsi abekhombise Sawula umusa. (1 Sam. 24:4-7) Njengobe Jesu achaza, Jehova usiphatsa ngendlela natsi lesibaphatsa ngayo labanye. Jesu watsi: “Ningabehluleli labanye, kuze nani ningetikwehlulelwa nguNkulunkulu. Ngobe ngaloko kwehlulela lenehlulela ngako labanye, nani niyakwehlulelwa ngako; nangaleso silinganiso lenilinganisa ngaso, nani niyakulinganiswa ngaso.” (Mat. 7:1, 2) Kuyasidvudvuta kwati kutsi Jehova utasitsetselela tono tetfu, ngisho netono letimbi kakhulu njengekuphinga nobe kubulala. Utawusitsetselela nangabe natsi sinemoya wekutsetselela, sitivuma tono tetfu kuye, futsi sisishintja simo setfu setento letimbi. Nangabe toni tiphendvuka ngebucotfo titfola ‘tikhatsi tekuhlumelelisa’ letivela kuJehova.—Fundza Imisebenti 3:19, 20.

11. INkhosi Manase yakwenta ngatiphi tindlela lokubi emehlweni aNkulunkulu?

¹¹ Cabanga ngalokunye kulandzisa kwemBhalo lokukhombisa kutsi singakanani sifiso saJehova sekutsetselela. Eminyakeni lengu-360 ngemuva kwekubusa kwaDavide, Manase waba yinkhosi yakaJuda. Kubusa kwakhe kweminyaka lengu-55 bekwatiwa ngekugcwala bubi futsi tento takhe letenyanyekako atizange temukeleke kuJehova. Kuletinye tintfo latenta, Manase wakhela Bhali emalati, wakhonta “tonkhe tinkhanyeti tesibhakabhaka,” wengcisa emadvodzana akhe emlilweni futsi wakhutsata tento tekusebentisa imimoya. “Wenta lokubi kakhulu emehlweni aSimakadze.”—2 Khr. 33:1-6.

12. Manase wabuyela njani kuJehova?

¹² Ekugcineni, Manase watsatfwa eveni lakhe futsi wafakwa ejele laseBhabhulona. Ngesikhatsi alapho kungenteka wakhumbula emavi Mosi lawasho kuma-Israyeli latsi: “Naniselusizini senehlelwe ngito tonkhe letintfo, kuyawutsi emvakwaloko nibuyele kuSimakadze Nkulunkulu wenu, nimlalele.” (Dut. 4:30) Manase wabuyela kuJehova. Wabuyela njani?  “Watitfoba kakhulu” futsi wachubeka ‘athantaza’ kuNkulunkulu (njengobe kuvetiwe ekhasini 21). (2 Khr. 33:12, 13) Ngisho nobe angekho emavi lacondzile labhalwa phansi lashiwo nguManase kuleyo mithantazo, singabona kutsi kungenteka abefana nalawo eNkhosi Davide labhalwe kuTihlabelelo 51. Kuyabonakala kutsi Manase wayishintja ngalokuphelele inhlitiyo yakhe.

13. Yini leyabangela kutsi Jehova amtsetselele Manase?

¹³ Jehova wayiphendvula njani imithantazo yaManase? “Watsintseka ngalokuncusa [kwaManase], wakulalela kutincengela kwakhe.” NjengaDavide, Manase wacaphela kutsi tono takhe betitimbi kangakanani futsi waphendvuka mbamba. Kungaleso sizatfu Nkulunkulu amtsetselela Manase waphindze wambuyisela ebukhosini bakhe eJerusalema. Ngako-ke, “Manase wati kutsi Simakadze nguNkulunkulu” weliciniso. (2 Khr. 33:13) Kutsintsa inhlitiyo kubona lobufakazi lobengetiwe bekutsi Nkulunkulu wetfu lonemusa uyabatsetselela labo labaphendvuka ngebucotfo.

14. Yini lencuma kutsi Jehova utawubatsetselela yini bantfu labonako?

¹⁴ Bambalwa bantfu baNkulunkulu lamuhla labayoke bacele kutsetselwa tono letinkhulu njengaDavide naManase. Nobe kunjalo, liciniso lekutsi Jehova wawatsetselela lamakhosi lamabili lisisita sibone kutsi Nkulunkulu ukulungele kutsetselela netono letinkhulu nangabe lomuntfu lowonile aphendvuka mbamba.

15. Sati njani kutsi Jehova akamane atsetselele?

¹⁵ Kuliciniso kutsi angeke siphetse ngekutsi Jehova uvele abatsetselele bonkhe bantfu tono tabo. Kulendzaba, ase sicatsanise simo saDavide naManase naleso sebantfu labangalaleli baka-Israyeli nebakaJuda. Nkulunkulu watfumela Nathani kuDavide futsi wamnika litfuba lekushintja simo sakhe. Davide walemukela ngenjabulo lelotfuba. Ngesikhatsi Manase  acindzetelekile, waphendvuka ngebucotfo. Etikhatsini letinyenti, bantfu baka-Israyeli nebakaJuda bebangaphendvuki. Ngako-ke Jehova akazange abatsetselele. Esikhundleni saloko, abetfumela baphrofethi bakhe kanyenti kute abatjele kutsi utiva njani ngekutiphatsa kwabo kwekungalaleli. (Fundza Nehemiya 9:30.) Ngisho nangesikhatsi labo labebatfunjelwe eBhabhulona sebabuyile eveni labo, Jehova wachubeka aletsa titfunywa takhe letetsembekile njenga-Ezra nemphrofethi Malakhi. Nangabe labantfu bebenta ngekuvumelana nentsandvo yaJehova, bebatfola injabulo.—Neh. 12:43-47.

16. (a) Yaba yini imiphumela yekungaphendvuki kuso sonkhe sive sema-Israyeli? (b) Kungaba namiphi imiphumela kulabo labasitukulwane sa-Israyeli wasendvulo?

¹⁶ Ngemuva kwekutfunyelwa kwaJesu emhlabeni nekukhokhwa kwemhlatjelo wenhlawulo lophelele, Jehova akazange asachubeka emukela imihlatjelo yetilwane yaka-Israyeli. (1 Joh. 4:9, 10) Ngesikhatsi angumuntfu, Jesu waveta umbono waBabe wakhe nakasho nankha emavi: “Jerusalema, Jerusalema! Wena lobulala baphrofethi, ubagcobe ngematje labatfunywe kuwe! Kukangaki ngifisa kubutsela ndzawonye bantfu bakho, njengesikhukhukati sifukamela emantjwele aso, kodvwa awuzange sewungivumele!” Ngako-ke, Jesu watsi: “Bukani-ke lelidolobha lenu selisele lodvwana, lite bantfu.” (Mat. 23:37, 38) Ngaleso sizatfu, lesive lesinesono futsi lesingaphendvuki satsatselwa indzawo ngu-Israyeli waNkulunkulu. (Mat. 21:43; Gal. 6:16) Kutsiwani-ke ngebantfu labangemalunga a-Israyeli wemvelo? Nabo bemukelekile kutsi bazuze ekutsetseleleni kwaJehova nasemuseni wakhe nangabe bakhombisa kukholwa kuNkulunkulu nasemhlatjelweni waJesu Khristu. Lelo tfuba litawuvulekela nebantfu labafa bangakaphendvuki etonweni tabo, kodvwa labatawuvuselwa emhlabeni lohlantekile.—Joh. 5:28, 29; Imis. 24:15.

17, 18. Singakutfola njani kutsetselelwa nguJehova?

¹⁷ Yini lokufanele siyente ngesifiso saJehova sekutsetselela? Kufanele sente njengaDavide naManase. Kufanele sicaphele kutsi sitoni, siphendvuke emaphutseni etfu, ngebucotfo simcele Jehova kutsi asitsetselele futsi simcele kutsi adale kitsi inhlitiyo lehlantekile. (Hla. 51:10) Nangabe sente sono lesikhulu, kufanele siphindze sicele lusito lwalabadzala belibandla. (Jak. 5:14, 15) Kunobe ngusiphi simo lesikuso, kuyadvudvuta kukugcina engcondvweni kutsi Jehova unjengobe atichaza kuMosi—“Nkulunkulu lonesihawu nemusa; uyephuta kutfukutsela andze ngemusa nangekwetsembeka, ubentela umusa labatinkhulungwane, atsetselele emaphutsa, nalokubi, netono.” Jehova akakashintji.—Eks. 34:6, 7.

¹⁸ Jehova wasebentisa kucatsanisa ngesikhatsi etsembisa ema-Israyeli laphendvukile kutsi libala letono tawo litawususwa, ‘lokubovu njengengati’ kube mhlophe “njengangcocwane.” (Fundza Isaya 1:18.) Kusho kutsini-ke kutsetselela kwaJehova kitsi? Kusho kutsetselelwa ngalokuphelele kwetono nemaphutsa etfu, nangabe sikhombisa simo sekubonga nekuphendvuka.

19. Yini lesitawucoca ngayo esihlokweni lesilandzelako?

¹⁹ Njengobe Jehova asitsetselela, singamlingisa njani endleleni lesiphatsa ngayo labanye? Singakubalekela njani kuba nesimo sekungabatsetseleli labanye labente sono lesikhulu kodvwa bakhombisa kuphendvuka kwebucotfo? Sihloko lesilandzelako sitawusisita sihlole tinhlitiyo tetfu kute silingise Babe wetfu Jehova, ‘lolungile futsi lolungele kutsetselela.’—Hla. 86:5.