Oinsá mak Jeová nia perdua ajuda Ita?
“Jeová [mak] Maromak neʼebé laran-sadiʼa no laran-luak, neineik atu hirus . . . , fó perdua ba ema nia sala.”—ÊX 34:6, 7.
1, 2. (a) Ba nasaun Israel, Jeová hatudu katak nia Maromak hanesan saida? (b) Iha lisaun neʼe, ita sei koʼalia kona-ba pergunta saida?
IHA Neemias nia tempu, ema levita balu hatete sai iha sira-nia orasaun katak nasaun Israel ho ulun-toos “lakohi rona” no lakohi halo tuir Jeová nia ukun-fuan sira. Maski nuneʼe, Jeová nafatin fó perdua ba sira tanba nia mak “Maromak neʼebé fó perdua, laran-sadiʼa, la hirus lalais, no iha laran-diʼak neʼebé nakonu ho domin”.—Neem 9:16, 17.
2 Karik ita ida-idak mós husu: ‘Husi Jeová nia perdua, buat diʼak saida mak haʼu bele hetan?’ Atu hetan resposta ba pergunta importante neʼe, mai ita hanoin kona-ba oinsá mak Maromak fó perdua ba liurai naʼin-rua, David no Manassés.
DAVID NIA SALA BOOT
3-5. Sala boot saida deʼit mak David halo?
3 Maski Liurai David mak ema neʼebé hamtaʼuk Maromak, maibé nia mós halo sala boot balu, inklui sala boot rua neʼebé envolve kaben-naʼin ida, Urias no Batseba. No rezultadu husi sala sira-neʼe lori susar boot ba sira hotu. Maski nuneʼe, dalan neʼebé Jeová korrije David hatudu oinsá Nia prontu atu fó perdua ba ema. Entaun, mai ita hanoin kona-ba buat neʼebé akontese iha tempu neʼebá.
4 David haruka Israel nia tropa atu halo funu hodi hadau ema Amon nia sidade kapitál, naran Rabá. Sidade neʼe dook maizumenus kilómetru 80 iha parte leste husi Jerusalém, iha Mota Jordaun nia sorin neʼebá. Durante tempu neʼe, David hela iha ninia palásiu. Husi uma leten, nia haree feto kaben-naʼin ida naran Batseba hariis hela. Ninia laʼen serbisu militár iha fatin dook. Tanba David hateke beibeik ba Batseba, nia husik ninia laran monu, no ikusmai nia bolu Batseba iha ninia palásiu no halo sala-foʼer ho nia.—2 Sam 11:1-4.
5 Kuandu David hatene ona katak Batseba isin-rua, nia bolu Urias atu fila fali ba Jerusalém no fó laran-manas ba nia atu fila ba uma hodi Urias bele halo relasaun seksuál ho ninia feen Batseba. Maibé, Urias lakohi fila ba uma. Tan neʼe, ho subasubar, David hakerek surat ba ninia komandante hodi haruka nia atu tau Urias “iha oin iha funu-fatin neʼebé makaʼas liu” no hatete ba soldadu seluk atu husik Urias mesak. Rezultadu mak Urias mate iha funu neʼe tuir David nia planu. (2 Sam 11:12-17) Hodi halo nuneʼe, David halo sala boot rua, ida mak halo sala-foʼer ho ema nia kaben, no ida seluk mak oho ema neʼebé la halo sala.
DAVID ARREPENDE NINIA SALA
6. Maromak halo saida kona-ba David nia sala? Ida-neʼe hatudu saida kona-ba Jeová?
6 Klaru katak Jeová haree buat hotu neʼebé David halo. (Prov 15:3) Maski ikusmai Liurai David kaben ho Batseba, “maibé buat neʼebé David halo mak aat iha Jeová nia oin”. (2 Sam 11:27) Entaun, Maromak halo saida kona-ba David nia sala boot? Nia haruka profeta Natan atu hasoru David. Jeová, nuʼudar Maromak neʼebé prontu atu fó perdua, nia hakarak hatudu laran-sadiʼa ba David. Maibé atu Jeová bele fó perdua ba David, Jeová hakarak haree se David arrepende an tebes. Jeová nia hahalok neʼe fó laran-manas mai ita, loos ka lae? Jeová la obriga David atu fó sai ninia sala, maibé haruka Natan hodi konta ai-knanoik ida neʼebé ajuda David atu komprende katak nia halo sala boot. (Lee 2 Samuel 12:1-4. *) Ida-neʼe dalan diʼak ba Jeová atu hatene oinsá David sente kona-ba ninia sala!
7. Natan nia ai-knanoik book David atu halo saida?
7 Natan nia ai-knanoik book duni David nia laran neʼebé hadomi justisa. David sai hirus ba mane riku iha ai-knanoik neʼe no hatete ba Natan: “Hanesan Jeová neʼebé moris, mane neʼebé halo ida-neʼe merese mate!” Liután neʼe, David mós hatete katak ida neʼebé lakon bibi tenke hetan fali buat neʼebé mane riku neʼe hadau. Iha tempu neʼebá, Natan hatete ba David: “Ita rasik mak mane neʼe!” Tuirmai, Natan mós fó-hatene katak tanba ninia hahalok sala, “surik” sei la dook husi ninia umakain no susar oioin sei kona ninia família. Nia mós hatete ba David katak ema sei hatene ninia sala no nia sei hetan moe. David rekoñese katak nia halo ona sala neʼebé boot tebes, no hodi arrepende nia an, nia dehan: “Haʼu halo sala ona hasoru Jeová.”—2 Sam 12:5-14.
DAVID HALO ORASAUN NO MAROMAK PERDUA NIA
8, 9. Tuir Salmo 51, David sente oinsá kona-ba ninia sala? Ita bele aprende saida kona-ba Jeová?
8 Knananuk ida neʼebé Liurai David hakerek iha Salmo 51 hatudu katak nia triste tebes kona-ba sala neʼebé nia halo, no nia husu Jeová nia ajuda. David nia liafuan hatudu katak nia laʼós rekoñese deʼit sala neʼebé nia halo, maibé nia mós hakribi sala neʼe. Ba David, relasaun ho Maromak mak buat neʼebé importante liu hotu. Nia hatete ba Jeová: “Haʼu halo sala hasoru Ita, Ita deʼit.” Nia mós husu: “Tau laran neʼebé moos iha haʼu, oh, Maromak, no iha haʼu-nia laran tau espíritu neʼebé foun no metin. . . . Halo haʼu haksolok fali hanesan kuandu Ita salva haʼu, no book haʼu-nia laran atu hakarak prontu halo tuir Ita.” (Sal 51:1-4, 7-12) Kuandu ita hatete sai ita-nia sala ba Jeová, ita mós koʼalia ho laran nakloke hanesan David ka lae?
9 Jeová la halakon rezultadu aat husi David nia sala. Tan neʼe, David hetan susar oioin iha ninia moris toʼo nia mate. Maibé, tanba David laran-tun duni kona-ba ninia sala no arrepende an, Jeová fó perdua ba nia. (Lee Salmo 32:5; * Sal 51:17) Maromak neʼebé Forsa Boot Liu Hotu komprende ema ida-idak nia sentimentu no nia mós hatene tansá mak sira halo sala. Tan neʼe, Jeová la husik juis sira tesi lia ba David no Batseba atu fó kastigu-mate ba sira tuir Moisés nia Ukun-Fuan. (Lev 20:10) Duké halo ida-neʼe, Jeová rasik mak tesi lia ba sira no hatudu laran-sadiʼa ba sira. Ikusmai, Maromak halo sira-nia oan Salomão sai Israel nia liurai.—1 Crôn 22:9, 10.
10. (a) Karik tanba razaun ida seluk saida mak Jeová fó perdua ba David? (b) Atu bele hetan perdua husi Jeová, saida deʼit mak ita tenke halo?
10 Karik razaun ida seluk atu Jeová fó perdua ba David mak David rasik mós hatudu laran-sadiʼa ba Saul. (1 Sam 24:4-7) Hanesan Jesus esplika ona, Jeová hatudu laran-diʼak hodi tuir oinsá mak ita hatudu laran-diʼak ba ema seluk. Jesus hatete: “Keta tesi lia ba ema, atu Maromak sei la tesi lia ba imi, tanba dalan neʼebé imi tesi lia ba ema, Maromak mós sei tesi lia ba imi, no buat neʼebé imi sukat ba ema, nuneʼe mós ema sei sukat ba imi.” (Mt 7:1, 2, MF) Ita sente kmaan tebes hodi hatene katak Jeová sei fó perdua ba ita maski ita halo sala boot, hanesan sala-foʼer ka oho ema! Maibé, atu bele hetan perdua husi Jeová, ita mós tenke prontu atu fó perdua ba ema seluk, fó sai ita-nia sala ba nia, no hakribi sala neʼebé ita halo. Sin, kuandu ita arrepende an ho laran, Jeová “fó kmaan” mai ita, ka ajuda ita atu iha laran neʼebé moos.—Lee Apostolu 3:19, MF. *
MANASSÉS HALO SALA BOOT MAIBÉ ARREPENDE AN
11. Buat aat saida deʼit mak Liurai Manassés halo?
11 Agora, mai ita hanoin kona-ba ezemplu ida tan husi Bíblia neʼebé hatudu oinsá Jeová prontu atu fó perdua ba ema nia sala maski boot tebes. Liutiha maizumenus tinan 360 husi tempu neʼebé David komesa ninia ukun, Manassés mak sai liurai ba nasaun Judá. Durante ninia ukun ba tinan 55, nia halo buat oioin neʼebé aat tebes, no ida-neʼe halo Jeová tesi lia todan ba nia. Manassés nia hahalok aat sira-neʼe inklui halo altár ba maromak falsu Baal, adora loron-matan, fulan no fitun, nia mós sunu ninia oan rasik nuʼudar sakrifísiu ba maromak falsu, no habelar matan-dook nia atividade oioin. Sin, “nia halo buat aat barak tebes iha Jeová nia oin”.—2 Crôn 33:1-6.
12. Manassés halo saida deʼit atu fila fali ba Jeová?
12 Ikusmai, ema Babilónia kaer Manassés no hatama nia iha dadur laran iha rai-Babilónia. Iha neʼebá, karik nia hanoin-hetan Moisés nia liafuan ba ema Israel, neʼebé dehan: “Kuandu ó iha susar laran no liafuan sira-neʼe hotu sai loos ba ó iha tempu neʼe nia rohan, nuneʼe mak ó sei fila fali duni ba Jeová, ó-nia Maromak, no ó sei rona duni ninia lian.” (Deut 4:30) Manassés fila fali duni ba Jeová. Atu halo nuneʼe, saida deʼit mak nia halo? Nia “haraik an tebes” no “halo orasaun beibeik” ba Jeová (hanesan hatudu iha dezeñu iha pájina 21). (2 Crôn 33:12, 13) Maski Bíblia la fó sai liafuan saida loos mak Manassés hatoʼo iha ninia orasaun sira-neʼe, maibé ninia orasaun karik hanesan ho Liurai David nian neʼebé hakerek iha Salmo 51, no Bíblia hatudu ho klaru katak Manassés arrepende an duni no troka ninia hahalok.
13. Tanbasá mak Jeová fó perdua ba Manassés?
13 Saida mak Jeová halo kuandu Manassés halo orasaun? Jeová “rona ninia orasaun atu husu laran-diʼak”. Hanesan Liurai David, Manassés mós rekoñese katak nia halo sala neʼebé boot tebes no arrepende an ho laran. Tan neʼe, Maromak fó perdua ba Manassés no ajuda nia atu fila fali ba Jerusalém nuʼudar liurai. Ikusmai, rezultadu mak “Manassés hatene katak Jeová mak Maromak neʼebé loos”. (2 Crôn 33:13) Istória neʼe fó kmaan mai ita tanba ida-neʼe hatudu katak Jeová prontu atu fó perdua ba ema neʼebé arrepende an ho laran!
JEOVÁ SEMPRE FÓ PERDUA KA LAE?
14. Atu Jeová bele perdua ema nia sala, ema neʼe presiza halo saida?
14 Ohin loron, Maromak nia atan barak la halo sala boot hanesan David no Manassés halo. Maibé, istória kona-ba liurai naʼin-rua neʼe hatudu katak ita-nia Maromak Jeová prontu atu fó perdua ba ema nia sala maski ema neʼe halo sala boot, naran katak ema neʼe arrepende an ho laran.
15. Saida mak hatudu katak Jeová la fó perdua ba ema naran deʼit?
15 Entaun, ita labele hanoin katak Jeová sempre fó perdua ba ema naran deʼit. Atu haree kona-ba neʼe, mai ita kompara David no Manassés nia hahalok ho povu Israel no Judá nia hahalok. Kuandu Maromak haruka Natan atu hasoru David hodi fó oportunidade ba nia atu arrepende ninia sala, David agradese ida-neʼe no arrepende an ho laran. Kuandu Manassés hasoru susar boot, ida-neʼe mós book nia atu arrepende ninia sala ho laran. Maibé, povu Israel no Judá, dala barak sira la arrepende an husi sira-nia sala maski Jeová haruka beibeik ninia profeta sira atu fó-hatene sira kona-ba sira-nia hahalok aat. Tan neʼe, Jeová mós la fó perdua ba sira. (Lee Neemias 9:30. *) Kuandu ema Israel sai livre ona husi dadur iha rai-Babilónia no fila fali ba Judá, Jeová kontinua haruka ninia atan sira hanesan amlulik Esdras no profeta Malaquias atu fó sai ninia hakarak ba sira. No kuandu povu halo tuir Jeová nia hakarak, sira hetan haksolok.—Neem 12:43-47.
16. (a) Nasaun Israel neʼebé lakohi arrepende sira-nia sala hetan rezultadu saida? (b) Ema Israel ida-idak bele hetan oportunidade saida?
16 Maibé, tanba povu Israel nuʼudar nasaun la halo tuir Jeová, ikusmai Jeová la simu tan sira-nia sakrifísiu animál nian no haruka Jesus mai toʼo mundu atu fó ninia moris perfeitu nuʼudar sakrifísiu ba ema hotu. (1 Joao 4:9, 10) Kuandu Jesus iha mundu, nia koʼalia kona-ba Jerusalém iha dalan neʼebé haleno ninia Aman nia hanoin, hodi dehan: “Jerusalém, Jerusalém, neʼebé oho profeta sira, neʼebé tuda ho fatuk ema sira neʼebé Naʼi haruka ba ó! Dala hira ona mak haʼu hakarak halibur hamutuk ó-nia oan sira, hanesan manu-inan halibur nia oan sira iha nia liras okos, maibé ó lakohi!” Nuneʼe, Jesus hatete: “Imi-nia uma sei sai mamuk.” (Mt 23:37, 38) Tanba nasaun Israel halo sala beibeik no lakohi arrepende an, Jeová la simu tan nasaun neʼe no troka fali ho nasaun foun, “Israel Maromak nian”. (Gal 6:16, MF; Mt 21:43) Maibé, oinsá ho ema ida-idak husi nasaun Israel? Sira bele hetan perdua ba sira-nia sala ka lae? Bele. Jeová prontu atu perdua sira no hatudu laran-sadiʼa ba sira bainhira sira tau fiar ba Maromak no ba Jesus Kristu nia sakrifísiu. Liután neʼe, bainhira Jeová sei fó moris-hiʼas ba ema mate neʼebé uluk halo sala no seidauk arrepende an, nia sei fó oportunidade ba sira atu hetan perdua.—Joao 5:28, 29; Apos 24:15.
HETAN BENSAUN HUSI JEOVÁ NIA PERDUA
17, 18. Atu bele hetan perdua husi Jeová, saida deʼit mak ita presiza halo?
17 Tanba ita hatene ona katak Jeová prontu atu fó perdua ba ita-nia sala, ita presiza halo saida? Ita presiza hatudu hahalok hanesan David no Manassés. Ita mós presiza rekoñese katak ita ema sala-naʼin, arrepende ita-nia sala, husu Jeová atu fó perdua, no husu ninia ajuda atu iha laran neʼebé moos. (Sal 51:10) Se ita halo sala boot ruma, ita mós presiza husu katuas kristaun sira-nia ajuda. (Tgo 5:14, 15) Maski sala neʼebé ita halo ona mak boot, maibé ita bele hetan kmaan hodi hanoin nafatin katak Jeová mak “Maromak neʼebé laran-sadiʼa no laran-luak, neineik atu hirus no nakonu ho laran-diʼak no lia-loos, . . . hatudu domin laran-metin ba jerasaun rihun ba rihun, no fó perdua ba ema nia sala”. Sin, Jeová la troka ninia hahalok.—Êx 34:6, 7.
18 Jeová promete ba ema Israel neʼebé arrepende an katak nia sei fó perdua ba sira iha dalan neʼebé kompletu. Nia hatete katak maski sira-nia sala hanesan buat neʼebé “mean lakan”, maibé nia sei halo sira sai “mutin hanesan jelu-rahun”. (Lee Isaías 1:18. *) Entaun, husi Jeová nia perdua, buat diʼak saida mak ita bele hetan? Ita bele hetan perdua ba ita-nia sala iha dalan neʼebé kompletu, naran katak ita arrepende an ho laran no agradese ba Jeová nia perdua.
19. Iha lisaun tuirmai, ita sei koʼalia kona-ba saida?
19 Maibé, oinsá mak ita bele halo tuir Jeová nia ezemplu hodi fó perdua ba ema? Oinsá mak ita bele sai prontu atu fó perdua ba ema neʼebé halo sala boot maibé arrepende an ho laran? Lisaun tuirmai sei ajuda ita atu hatene oinsá ita sente iha ita-nia laran atu bele banati-tuir ita-nia Aman Jeová, neʼebé “prontu atu fó perdua”.—Sal 86:5.
^ par. 6 2 Samuel 12:1-4: “1 No Jeová haruka Natan ba David. Tan neʼe, Natan bá hasoru David no hatete ba nia: ‘Iha mane naʼin-rua neʼebé hela iha sidade ida, mane ida riku, no ida seluk kiak. 2 Mane neʼebé riku iha bibi no karau barak; 3 maibé mane neʼebé kiak iha deʼit bibi-oan inan ida, neʼebé nia sosa. No nia tau matan didiʼak ba bibi neʼe, no bibi neʼe sai boot hamutuk ho nia no ninia oan sira. Bibi neʼe han husi mane neʼe nia hahán, no hemu husi ninia kopu, no toba iha ninia hirus-matan, no bibi neʼe sai hanesan oan-feto ba nia. 4 Depois tempu balu, bainaka ida mai vizita mane riku. Maibé, duké foti ninia bibi ka karau rasik atu prepara ba ninia bainaka, nia foti mak mane kiak nia bibi-oan no prepara ida-neʼe ba ninia bainaka neʼebé mai vizita nia.’”
^ par. 9 Salmo 32:5: “Ikusmai haʼu dehan sai haʼu-nia sala ba Ita, no haʼu la subar haʼu-nia sala. Haʼu hatete: ‘Haʼu sei dehan sai haʼu-nia sala ba Jeová.’ No Ita rasik perdua haʼu-nia sala.”
^ par. 10 Apostolu 3:19: “Tan neʼe, hakribi sala bá, no fila fali ba Maromak, atu nuneʼe Jeová bele hamoos tiha imi-nia sala sira no fó kmaan ba imi.”
^ par. 15 Neemias 9:30: “Maibé durante tinan barak Ita hatudu pasiénsia ba sira no fó sasin ba sira hodi Ita-nia espíritu liuhusi profeta sira, maibé sira la see tilun. Ikusmai Ita entrega sira ba povu husi rai seluk nia liman.”
^ par. 18 Isaías 1:18: “‘Mai, agora, imi hotu, mai ita halo loos problema entre ita,’ Jeová dehan. ‘Maski imi-nia sala mak hanesan mean lakan, sira sei sai mutin hanesan jelu-rahun; maski imi-nia sala mean hanesan hena mean, sira sei sai mutin hanesan bibi-malae nia fulun.’”
