ኢየሱስ ስለ ነጠላነት ሲናገር የነበረውን ሁኔታ እንመልከት። ኢየሱስ፣ ፈሪሳውያን ወደ እሱ መጥተው ከፍቺ ጋር የተያያዘ ጥያቄ ሲያቀርቡለት ይሖዋ ስለ ትዳር ያለውን አመለካከት በግልጽ ነገራቸው። ሕጉ አንድ ወንድ በሚስቱ ላይ “አሳፋሪ ነገር” ካገኘባት የፍቺ ወረቀት ጽፎ እንዲሰጣት ይፈቅድ የነበረ ቢሆንም ይህ ከመጀመሪያው አንስቶ የተፈቀደ ነገር አልነበረም። (ዘዳ. 24:1, 2) በመሆኑም ኢየሱስ “በዝሙት ምክንያት ካልሆነ በስተቀር ሚስቱን ፈቶ ሌላ የሚያገባ ሁሉ ምንዝር ይፈጽማል” ሲል ተናገረ።—ማቴ. 19:3-9

ደቀ መዛሙርቱ ይህን ሲሰሙ “በባልና በሚስት መካከል ያለው ሁኔታ እንዲህ ከሆነስ አለማግባት ይመረጣል” አሉ። ኢየሱስም መልሶ እንዲህ አላቸው፦ “ስጦታው ያላቸው ካልሆኑ በስተቀር ይህን ሁሉም ሰው ሊቀበለው አይችልም። ምክንያቱም ገና ከእናታቸው ማህፀን ጀምሮ ጃንደረባ ሆነው የሚወለዱ አሉ፤ ሰው የሰለባቸው ጃንደረቦችም አሉ፤ እንዲሁም ለመንግሥተ ሰማያት ሲሉ ራሳቸውን ጃንደረባ ያደረጉ ጃንደረቦችም አሉ። ይህን ሊቀበለው የሚችል ይቀበለው።”—ማቴ. 19:10-12

ሰዎች ቃል በቃል ጃንደረባ የሚሆኑት እክል ኖሮባቸው በመወለዳቸው ወይም በአደጋ ሳቢያ አሊያም ተሰልበው ሊሆን ይችላል። ይሁንና በራሳቸው ምርጫ ጃንደረባ የሆኑም አሉ። እነዚህ ሰዎች ማግባት የሚችሉ ቢሆንም “ለመንግሥተ ሰማያት ሲሉ” ራሳቸውን ገዝተው ነጠላ ሆነው ይኖራሉ። እንደ ኢየሱስ ነጠላ ሆነው ለመኖር የመረጡት በመንግሥቱ አገልግሎት ሙሉ በሙሉ ለመካፈል ሲሉ ነው። እነዚህ ሰዎች የነጠላነት ስጦታን ይዘው አልተወለዱም፤ ወይም እንዲህ ያለ ስጦታ አልተሰጣቸውም። ከዚህ ይልቅ ነጠላ ሆኖ መኖርን እንደ ስጦታ አድርገው ተቀብለውታል፤ በሌላ አባባል ነጠላ ሆነው ለመኖር መርጠዋል።

ሐዋርያው ጳውሎስ ኢየሱስ በተናገረው ሐሳብ ላይ ተመሥርቶ ነጠላ የሆኑትም ሆኑ ያገቡ ክርስቲያኖች በሙሉ አምላክን ተቀባይነት ባለው መንገድ ማገልገል እንደሚችሉ ገልጿል፤ አክሎም ነጠላ ሆነው ለመኖር ‘በልባቸው የቆረጡ’ ሰዎች ‘የተሻለ እንደሚያደርጉ’ ተናግሯል። እንዴት? ያገቡ ሰዎች ለጌታ አገልግሎት ከሚያውሉት ጊዜና ኃይል ከፍለው የትዳር ጓደኛቸውን ለማስደሰትና ለመንከባከብ ማዋል ይጠበቅባቸዋል። በሌላ በኩል ነጠላ ክርስቲያኖች እንዲህ ያለ ኃላፊነት ስለሌለባቸው ራሳቸውን ሙሉ በሙሉ ለጌታ አገልግሎት ማዋል ይችላሉ። በመሆኑም ይህን አጋጣሚ ከአምላክ እንዳገኙት “ስጦታ” አድርገው ይቆጥሩታል።—1 ቆሮ. 7:7, 32-38

ቅዱሳን መጻሕፍት እንደሚናገሩት አንድ ክርስቲያን የነጠላነት ስጦታን ተአምራዊ በሆነ መንገድ አያገኝም። ከዚህ ይልቅ ነጠላነት ትኩረቱ ሳይከፋፈል ከመንግሥቱ ጋር የተያያዙ ጉዳዮችን ማስቀደም እንዲችል ሳያገባ በመኖር የሚያዳብረው ነገር ነው። በዛሬው ጊዜ የሚገኙ በርካታ ሰዎች ለመንግሥቱ ሲሉ ነጠላ ሆነው ለመኖር በልባቸው ቆርጠዋል፤ ሌሎች ደግሞ ለእነሱ የብርታት ምንጭ ሊሆኑላቸው ይገባል።