Aka revista liytʼirinakan jisktʼäwinakapa

Jesusan arunakapajj Mateo 19:10-12 qellqatan jikjjataski ukarjamajja, ¿khitinakatï solteröñatak amtapki ukanakajj jan amuytʼkaywa ukhamäñatak mä churäwi katoqapjje sañti munpachäna?

▪ Kunatsa Jesusajj solteröñat parlaskäna uk amuytʼañäni. Kunapachatï fariseonakajj divorciasiñat jupar jisktʼapkäna ukhajja, Jehová Diosan kamachinakapajj chacha warmi jakañat kamsisa uk qhanwa Jesusajj qhanañchtʼäna. Leyinakarjamajja, mä chachajj warmipan “qʼañu sarnaqatapa” jikjjatasin divorciasiñapatak mä certificadsa churañapäkchïnjja, ukajj janiw ukhamapunïkänti (Deu. 24:1, 2). Ukat Jesusajj akham sänwa: “Khititejj warmiparu jan wachoqa juch lurkipana apanukojja, ukat yaqhampi casarasirakejja, uka jaqejj wachoqa juchwa luri” sasa (Mat. 19:3-9).

Uk istʼasajja, arkirinakapajj akham sapjjänwa: “Ukhamajj mä jaqetejj warmipampi ukham utjañapächi ukajja, janiw wakiskiti casarasiñajja” sasa. Jesusasti sarakïnwa: “Janiw taqenis suma amuytʼapkaspati, jan ukasti taqe [‘khitinakatejj churäwi katoqapki’, NM] ukanakakiwa. Kunayman amuyunakarakiw utji jaqen jan casarasiñapatakejja. Yaqhepanakajja jan casarasiñatakiw [jan ukajj eunucow] naci, mayninakasti jaqe masipan ukham jan casaraskiri tukuyatarakiwa, mayninakasti Diosan reinop laykuw jan casarasipkarakiti. Khititejj ukham tukurjamächi ukajj ukham tukpan” sasa (Mat. 19:10-12).

Mä jaqejj nasïwitpachaw eunucöspäna jan ukajj jan waltʼäwin usuchjasisaw ukhamar tukuspäna. Ukampis yaqhepajj janis eunucöpkchïnjja, jupanakaw ukham jakañatak amtapjjäna. Ukat casarasipkchispänsa, janiw munañanakapampi atipayasipkänti ukat “Diosan reinop laykuw jan casarasipk[än]ti”. Ukham lurasajj Jesusjamarakiw Diosarojj jukʼampi loqtapjjäna. Ukhamasti janiw jupanakajj ukhamäpjjañapatak nasipkänti ni khititsa katoqapkarakïnti. Jupanak pachpaw ukhamäñatak chʼamachasipjjäna.

Kuntï Jesusajj siskäna ukarjamajja, apóstol Pablojj akhamwa qhanañchtʼäna: solterökasinsa jan ukajj casadökasinsa taqeniw Diosarojj sum servipjjaspa, ukampis khiti solterotï jan casarasiñ “chuymapanjja amtchi” ukajj “jukʼamp askwa lurarakejja” sasa. ¿Kunatsa? Kunattejj casadonakajj warmiparu jan ukajj chachaparu uñjañatakiw tiempsa chʼamsa apsusi. Ukampis soltero cristianojja, jan kunat llakisisaw Jehová Diosar yupaychaspa. Ukat ukhamäskañjja Diosan churäwiparjamaw uñjapjje (1 Cor. 7:7, 32-38).

Ukhamasti solterösipki ukanakajj janiw jan amuytʼkayak ukhamäñatak mä churäwi katoqapkiti, ukwa Bibliajj amuytʼayistu. Jan ukasti, Jehová Diosar jan kunat llakisisa serviñ laykuw sapäskakiñatak amtapjje, ukat mayninakajj ukhamäsipkakiñapatakiw chʼamachtʼapjjañapa.