Amepusho Ukufuma ku Babelenga

Bushe amashiwi Yesu alandile pali Mateo 19:10-12, yalola mu kuti abasalapo ukuba abashimbe balapokelela ubu bupe mu nshila ya kuti na bene tabeshibe bwino bwino?

▪ Umfweni ifyo cali pa kuti Yesu alande pa bushimbe. AbaFarise baile kuli ena no kumwipusha nga calisuminishiwa ukulekana. Yesu alibalondolwelele bwino bwino ifyo amafunde ya kwa Yehova yalanda pa cupo. Nangu ca kuti Amafunde yalisuminishe umwaume ukulemba kalata ya kulekelapo umukashi wakwe nga ca kuti asangamo “icishawama muli ena,” ifi te fyo cali pa kutendeka. (Amala. 24:1, 2) Yesu atile: “Onse uwaleka umukashi wakwe, apashili umulandu wa bulalelale, aupa na umbi, ninshi acita ubucende.”—Mat. 19:3-9.

Ilyo abasambi baumfwile ifi batile: “Kanshi nga e fyo caba ifi ku mwaume no mukashi wakwe, cawamapo ukukanaupa.” Lelo Yesu abebele ukuti: “Te bantu bonse abengekala ukwabula ukuupa, kano fye abakwata ici cine ica bupe. Pantu kwaba abantu abashaba na maka ya kuupa ukufuma fye pa kufyalwa, kabili kwaba bamo abatungulwa fye ku bantu, e lyo kwaba na basalapo ukukanaupa pa mulandu wa bufumu bwa mu muulu. Uwingekala ukwabula ukuupa, naekale ifyo fine.”—Mat. 19:10-12.

Bamo abaleba bamutungwi balefyalwa ifyo fine, nelyo baletungulwa fye, e lyo bambi ni pa mulandu wa busanso. Lelo kwali na bamo abalesalapo fye abene ukuba kwati ni bamutungwi. Nangu ca kutila balikwete amaka ya kuupa, baleilama no kutwalilila abashimbe “pa mulandu wa bufumu bwa mu muulu.” Nga filya Yesu acitile, nabo basalilepo ukuba abashimbe pa kuti balebombesha mu mulimo wa Bufumu. Tabapeelwe ubupe bwa kuba abashimbe nelyo ukufyalwa ukuti bakaba abashimbe. Lelo abene e basalilepo ukukanaupa nelyo ukuupwa, e kutila bali-itemenwe ukupokelela ubu bupe.

Umutumwa Paulo na o alandile pa mashiwi ya kwa Yesu ilyo alondolwele ukuti Abena Kristu bonse, abaupa no kuupwa nangu abashimbe kuti babombela Lesa bwino, lelo abashimbe ‘abashipa mu mitima yabo,’ bena ‘bawamya ukucilapo.’ Mulandu nshi? Pantu abaupa no kuupwa balakabila inshita na maka pa kuti basekeshe no kusakamana abena mwabo. Lelo Abena Kristu abashimbe balaipeelesha ukubomba umulimo wa kwa Shikulu ukwabula ukupumfyanishiwa. Bamona ubushimbe ukuti “bupe” ubwafuma kuli Lesa.—1 Kor. 7:7, 32-38.

Kanshi Amalembo tayalanda ukuti Abena Kristu abashimbe balapokelela ubu bupe mu nshila ya kuti na bene tabeshibe bwino bwino. Lelo abene e basalapo ukuba abashimbe pa kuti balebombesha mu mulimo wa Bufumu ukwabula ifya kubapumfyanya. Pa mulandu wa kufwaisha ukubombesha mu mulimo wa kwa Lesa, abengi balisalapo ukuba abashimbe, kabili bambi bafwile ukubakoselesha ukutwalilila ifyo fine.