Ta wĩcirie ũrĩa maũndũ maahanaga rĩrĩa Jesu aaririe ciugo icio. Rĩrĩa Afarisai mookire kũrĩ we makĩmũũria ũhoro wĩgiĩ ndigano, Jesu nĩ aataarĩirie wega ithimi cia Jehova ciĩgiĩ kĩhiko. O na gũtuĩka Watho nĩ wetĩkĩrĩtie mũthuri kwandĩkĩra mũtumia wake marũa ma ndigano angĩonire ‘ũndũ ũtaagĩrĩire’ thĩinĩ wake-rĩ, ũguo tiguo kwarĩ kuuma kĩambĩrĩria. (Gũcok. 24:1, 2) Jesu agĩcoka akiuga ũũ: “Mũndũ o wothe ũngĩte mũtumia, tiga o ũndũ wa ũtharia, na ahikie ũngĩ, gũtharia nĩatharĩtie.”—Mat. 19:3-9.

Maigua ũguo, arutwo ake makiuga: “Ũhoro wa mũndũ na mũtumia wake ũngĩkorũo ũtariĩ ũguo, kaĩ gũtikĩagĩrĩire kũhikania-ĩ.” Jesu akĩmacokeria akĩmera atĩrĩ: “Ti othe mangĩhota gwĩtĩkĩra ũhoro ũcio, no arĩa . . . [marĩ na kĩheo, NW]. Amu-rĩ, kũrĩ andũ amwe maaciarirũo nĩ manyina matariĩ ta andũ ahakũre: na nĩkũrĩ angĩ mahakũrĩtwo nĩ andũ: na ningĩ, nĩkũrĩ angĩ metuĩte ta marĩ ahakũre o ene nĩ ũndũ wa ũthamaki wa Igũrũ. Ũrĩa ũkũhota gwĩtĩkĩra ũhoro ũcio, nĩawĩtĩkĩre.”—Mat. 19:10-12.

Andũ acio ahakũre nĩ arĩa maaciaragwo marĩ na wathe ũcio kana arĩa maahanaga ũguo nĩ ũndũ wa aksidenti kana gũthũkio ciĩga. No nĩ kwarĩ na arĩa metuaga ũguo na kwĩyendera. O na gũtuĩka nĩ mangĩahotire kũingĩra thĩinĩ wa kĩhiko, nĩ meegiragĩrĩria na magaikara ũguo ‘nĩ ũndũ wa ũthamaki wa igũrũ.’ O ta Jesu, maathuuraga gũikara matarĩ thĩinĩ wa kĩhiko nĩguo merutĩre harĩ ũtungata wa Ũthamaki. Ti gũciarũo maaciaragwo marĩ na kĩheo kĩu kana makaheo kĩheo ta kĩu. Nĩ kũhe maaheaga kĩheo kĩu kaanya. Ũguo nĩ kuuga, maagĩaga nakĩo nĩ ũndũ wa kwĩyendera.

Agĩtĩtĩrithia ũrĩa Jesu oigire-rĩ, mũtũmwo Paulo aatarĩirie atĩ o na gũtuĩka Akristiano othe—marĩ kana matarĩ thĩinĩ wa kĩhiko—no matungatĩre Ngai na njĩra ĩretĩkĩrĩka, arĩa matahikanĩtie kana kũhika na ‘matirĩ na njiriri ngoro’ ũhoro-inĩ wĩgiĩ ũguo matariĩ, ‘nĩ mekaga wega makĩria.’ Na njĩra ĩrĩkũ? Arĩa marĩ thĩinĩ wa kĩhiko no mũhaka magayanie mahinda na hinya wao nĩguo makenie na marũmbũiye arĩa mahikanĩtie nao. Ĩndĩ, Akristiano arĩa matarĩ thĩinĩ wa kĩhiko no mahote kwĩrutĩra ũtungata-inĩ wa Mwathani matekuohwo nĩ maũndũ macio. Monaga gũikara ũguo arĩ “kĩheo” kuuma kwĩ Ngai.—1 Kor. 7:7, 32-38.

Kwoguo, Maandĩko matwĩraga atĩ Mũkristiano ndagĩaga na kĩheo kĩu gĩa gũikara atarĩ thĩinĩ wa kĩhiko na njĩra ya kĩama. Ithenya rĩa ũguo-rĩ, akũragia kĩheo kĩu na njĩra ya gũikara ũguo nĩgetha atwarithie maũndũ ma Ũthamaki mbere atarĩ na ihĩngĩca. Andũ aingĩ ũmũthĩ nĩ matuĩte itua ngoro-inĩ ciao rĩa gũikara matarĩ thĩinĩ wa kĩhiko nĩ ũndũ wa gĩtũmi kĩu, na nĩ wega arĩa angĩ mamekagĩre ngoro.