Tukonkonone tshivua Yezu wakuila pavuaye mulue kuamba malu adi atangila bujike. Pavua bafalese balue kudi Yezu ne tshilumbu tshia dishipa dia dibaka, Yezu wakumvuija bimpe mukenji wa Yehowa udi utangila dibaka. Nansha muvua mikenji ya Mose itabila mulume bua kufundilaye mukajende mukanda wa kushipa nawu dibaka pavuaye umusangana ne ‘malu adi kaayi mimpe,’ kabivua nanku ku ntuadijilu to. (Dut. 24:1, 2) Ke bua tshinyi Yezu wakamba ne: “Muntu yonso udi ushipa dibaka ne mukajende kabuyi bua masandi, yeye musele mukaji mukuabu udi wenda masandi.”​—Mat. 19:3-9.

Pakumvuabu bualu ebu, bayidi ba Yezu bakamba ne: “Bikala nsombelu wa mulume ne mukajende muikale nanku, ki mbimpe kusela to.” Yezu wakabandamuna ne: “Bantu bonso kabena bitaba dîyi adi, anu badi ne tshipedi atshi. Bualu kudi bantu badi baledibue batungu, bakuabu mbavuija batungu kudi bantu, ne banga mbadivuije batungu bua Bukalenge bua mu diulu. Udi mua kuitaba bualu ebu, abuitabe.”​—Mat. 19:10-12.

Bantu bavua batungu bena dîna ngaba bavua baledibue nunku bua bubi buledibua nabu anyi balue batungu bua njiwu kampanda anyi babavuije nanku. Kadi, kudi bantu bakuabu bavua badivuije nkayabu batungu. Nansha muvuabu bakumbane bua kusela, bavua badikanda, bashala bajike “bua Bukalenge bua mu diulu.” Anu bu Yezu, mbasungule bujike bua kudifila bikole menemene mu mudimu wa Bukalenge. Kabavua babalele ne tshipedi tshia bujike anyi babapeshatshi to. Mbitabe nkayabu bujike, mbuena kuamba ne: mbadipetele tshipedi etshi ku budisuile.

Mu diumvuangana ne mêyi a Yezu, mupostolo Paulo wakumvuija ne: nansha mudi bena Kristo bonso, basele anyi bajike mua kuenzela Nzambi mudimu bimpe, bajike badi ‘bapangadije mu muoyo wabu’ bua tshidibu, badi ‘batambe kuenza bimpe.’ Mushindu kayi? Mulume ne mukaji badi baselangane badi ne bua kufila dîba diabu ne bukole buabu bua kusankishangana ne kutabalelangana. Kadi bena Kristo bajike badi mua kudifila bobu mu mudimu wa Mukalenge kabayi ne mukenji udibu belele bena dibaka eu. Badi bangata bujike buabu bu “tshipedi” tshia kudi Nzambi.​—1 Kol. 7:7, 32-38.

Nunku, Bible udi utuambila ne: muena Kristo katu upeta tshipedi tshia bujike mu tshishima to. Kadi udi udipetelatshi padiye kayi ubuela mu dibaka bua kutumaye malu a Bukalenge kumpala kakuyi ditanaji. Bantu ba bungi lelu, mbangate dipangadika dia kushala bajike bua bualu ebu, ne bakuabu badi ne bua kubatua nyama ku mikolo bua dipangadika diabu edi.