Manamanatu ke he tuaga he magaaho ne talahau e Iesu hagaao ke he nofo tokotaha. Mogo ne o mai e tau Farasaio ki a ia mo e talahau e matakupu ke he tau vevehe po ke tiaki hoana, ne tala age fakamahino e Iesu e tuaga ha Iehova hagaao ke he fakamauaga. Kua fakaatā he Fakatufono e tagata taane ke taute e tohi vevehe mai he hoana haana kaeke kua iloa e ia “ha mena kelea” ke he hoana, ka kua nakai pihia e tuaga he kamataaga. (Teu. 24:1, 2) Ti pehē a Iesu: “Ko ia kua tiaki hana hoana, ka e nakai faivao a ia, ti hoana ke he taha, kua faivao a ia; ko ia foki ka fai hoana kia ia kua tiaki kua faivao a ia.”—Mata. 19:3-9.

He logona e talahauaga nei, ne pehē e tau tutaki: “Kaeke ke pihia e mahani he tane mo e fifine, laukauka he nakai fai hoana.” Ne tali atu e Iesu: “Nakai maeke ke talia he tau tagata oti e mena na, hoko lautolu kua foaki atu ki ai; Ha ko e ha ha i ai e falu a eunuka, mena pihia he fanau mai; ha ha i ai foki e falu a eunuka kua fakaeunuka a lautolu he tau tagata; ha ha i ai foki e falu a eunuka ne fakaeunuka a lautolu e lautolu ha ko e kautu he lagi; ko ia kua maeke ke talia, kia talia ai e ia.”—Mata. 19:10-12.

Ko e tau eunuka ke he tino, ko lautolu haia ne fanau mai kua fai matematekelea po ke pihia he pakia po ke helehele. Ka ko e falu kua fakaeunuka ni e lautolu a lautolu. Pete he maeke a lautolu ke mau, kua eketaha a lautolu ke manako fakalatalata mo e fakatumau ke nofo tokotaha “ha ko e kautu he lagi.” Ke tuga a Iesu, ne fifili a lautolu ke nofo tokotaha ke maeke ia lautolu ke tukulele a lautolu ke fekafekau ke he Kautu. Ne nakai fanau mai a lautolu mo e fitā he moua e mena fakaalofa he nofo tokotaha po ke foaki age e mena fakaalofa pihia. Ne eketaha pauaki a lautolu ke talia e tuaga ia. Kakano ai, kua taute ni e lautolu ke moua e mena fakaalofa ia.

He lafi atu ke he talahauaga ia ha Iesu, ne fakamaama he aposetolo ko Paulo ko e tau Kerisiano oti—nofo tokotaha po ke mau—kua maeke ke fekafekau fakamitaki ke he Atua, ka ko lautolu kua nofo tokotaha ‘kua mau ha lautolu a tau loto’ ke he tuaga ia kua “mua e mitaki.” He puhala fe? Ko e tau tagata kua mau nukua vehevehe e magaaho mo e malolō ha lautolu ke fakafiafia mo e leveki e hoa ha lautolu. Ka ko e tau Kerisiano nofo tokotaha kua maeke ia lautolu ke fekafekau ke he Iki mo e nakai fai matagahua pihia. Ne manamanatu ai ke he tuaga ha lautolu ko e “mena fakaalofa” mai he Atua.—1 Kori. 7:7, 32-38.

Ati kua tala mai e tau Tohiaga Tapu ki a tautolu kua nakai moua he Kerisiano e mena fakaalofa he nofo tokotaha he puhala fakagalogalo. Ka kua feaki ai e ia he fakatumau ke nakai mau ke maeke ke fakalaulahi atu e tau mena he Kautu mo e nakai fakatauhele. Tokologa he vahā nei kua mauokafua ke he tau loto ha lautolu ke nofo tokotaha ma e kakano nei, ti eke e falu mo punaaga he fakamafanaaga ki a lautolu.