Majannaq këpaq Jesus imanöpa parlanqanta rikärishun. Divorciakïpaq farisëokuna tapuyaptinmi Jesusqa claro rikätsirqan casädokunapaq Diosnintsik imakunata mandakunqanta. ‘Ima mana allitapis’ warminchö tarir papelta rurëkur juk nuna divorciakunampaq Moises qellqanqan Leychö nikaptimpis, tsëqa manam unëpitatsu tsënö karqan (Deut. 24:1, 2). Tsënam Jesus kënö nirqan: “Pipis warmin juc ollquwan mana yachecaptin jaqirir [“divorciakurir”, NM], juc warmiwan casacorqa jutsamanmi ishquirin” (Mat. 19:3-9).

Tsëta wiyarirnam discïpulonkuna kënö niyarqan: “Tsaynö caycaptinga mas alli[chi] canman ollgowan warmi mana casarayaptin”. Tsënam Jesus kënö contestarqan: “Llapan runacunapis manam tsaynö caytaga puediyantsu. Sinöga quiquin Dios Yaya yanapangan runacunallam tsaynö cawayta puediyan. Waquincag runacunagam yuriyanganpitana japallancuna cawacuyänanpag cayan. Pero waquincagnam capashga car ni imaypis casaracuyantsu. Waquinnam ‘Dios Yayata mas allish servinäpag’ nir, casaracuyantsu. Tsaynö japallan cawayta puedigcagga tsaynö japallan cacutsun” (Mat. 19:10-12, NTCN).

Juk nunaqa majannaq quedakïta puëdeq, warmiyoq këta mana munëyoq yurishqa karnin o kapashqa karnin o ima desgraciachöpis partenta oqrashqa karninmi. Pero wakinkunaqa majannaq këta puëdiyaq kikinkuna churapakarninmi, casakïta puëdirnimpis munëninkunata alli tsararnin y “Dios Yayata mas allish servinäpag” nirmi. Jesusnöpis Diosta alli sirwiyänanrëkurmi majannaq këta akrayaq. Manam tsë qarëyoq yurikushqa kartsu ni imanöpapis chaskishqa kartsu. Rasumpa kaqchöqa, kikinkuna munarmi majannaq këta churapakäyarqan, o juk parlakïchöqa, munëninkunapitam tsë qarëta chaskiyarqan.

Jesus parlanqampaq parlarninmi, cristiänokuna casado kar o majannaq kar Diosta alli sirwiyaptimpis, “shongonchö alli yarpayyog” karnin majannaq quedakoq kaqqa ‘mas allita’ rurëkanqanta apóstol Pablu entiendetsikurqan. ¿Imanir? Porque casado kaqqa tiemponta y kallpantam rakinan majanta kushitsinampaq y cuidanampaq, pero majannaq kaqkunaqa tsë rurëyoq mana karmi llapan tiemponkunawan Diosta sirwita puëdiyan. Pëkunaqa Diospa qarënin kanqantam majannaq këta rikäyan (1 Cor. 7:7, 32-38).

Awmi, Biblia yachatsikunqannöpis, juk cristiänoqa majannaq kawakun, manam tsënö kanampaq yurikushqa kartsu, sinöqa, Diospa Gobiernompaq kaqkunachö más yanapakunanrëkurmi. Tsërëkurmi mëtsikaq cristiänokuna majannaq kayänampaq churapakäyashqa, y tsënö kawakoqkunata yanapaqkunaqa allitam rurayan.