Qhawarisun soltero kaymanta imaynapi Jesús rimasqanmanta. Fariseokuna t’aqanakuymanta tapuqtinkun Jesusqa sut’ita rimarqan casarasqakunapaq Diospa churasqan kamachikuymanta. Kamachikuy Simipin nirqan warmiq “mana allin ruwayninta” tarispaqa t’aqanakuy qelqata warmiman qonankupaq, ichaqa manan chayraykullachu paykunaqa t’aqakurqanku (Deu. 24:1, 2). Chaymi Jesusqa nirqan: “Pipas warminmanta ima hawallapas t’aqakunman wak qhariwan mana wasanchashaqtin, hinaspa wak warmiwan casarakapunman chayqa, wasanchay huchatan ruwan”, nispa (Mat. 19:3-9).

Chayta uyarispan qatikuqninkuna nirqanku: “Warminwan qhariq chay hina kawsaynin kanan kaqtinqa, mana casarakuyllañan allin”, nispa. Chaymi Jesusqa paykunata nirqan: “Manan llapa runachu kay yachachikuytaqa umapi hap’inku, aswanpas pikunamanchus Diosqa yachachin chaykunallan entiendenku. Kanmi nacesqanmantapacha mana warminayachikuqkuna, mana qharinayachikuqkuna. Kallantaqmi runakunaq kapasqanpas, wakintaqmi mana munankuchu warmiyoq qhariyoq kayta Hanaq pacha qhapaqsuyurayku. Pipas chay hina kayta atiqqa kallachun”, nispa (Mat. 19:10-12).

Wakinqa manan casarakuqkuchu qhari-kayninkuta hukkuna kuchusqanrayku otaq accidentakusqankurayku otaq hina nacesqankurayku. Ichaqa kallarqantaqmi paykuna kikinkumanta mana casarakuy munaqkuna, hinan aychaq munasqanwan mana atipachikuspa “hanaq pacha qhapaqsuyurayku” solterolla kanku. Paykunaqa Jesús hinan Diosta servinankurayku mana casarakurqankuchu. Ichaqa manan ima atiytachu chaskirqanku nitaq chaypaqchu nacerqanku. Aswanmi paykuna kikinkumanta chayta decidikurqanku.

Apóstol Pablopas nirqanmi casadokunapas solterokunapas Diosta serviy atisqankuta, ichaqa mana casarakunanpaq ‘sonqonpi allinta yuyaykukuqmi’ ‘aswan allintaqa ruwan’. ¿Imarayku? Casadokunaqa tiemponkuta kallpankutan qonanku esposankuta otaq qosankuta kusichinankupaq, cuidanankupaqpas, solterokunan ichaqa Diospa munaynin ruwayllapi yuyaykunku. Chay ruwaymi paykunapaqqa Diospa qosqan ‘atiy’ hina (1 Cor. 7:7, 32-38).

Solterolla kanapaq atiyniyoq kayqa soltero kashaspa kusisqa kawsaymi, yachasqanchis hina, Bibliaqa manan ninchu huk cristiano solterolla kananpaq ima atiytapas chaskisqanta, aswanmi payllamanta chaytaqa decidikun chhaynapi Diospa munayninta tukuy yuyaywan ruwananpaq. Chaymi askha cristianokuna solterolla kashanku, chayraykun kallpachananchis chay ruwasqankumanta.