Fesili Mai le ʻAufaitau

Pe e faaalia i upu a Iesu o loo i le Mataio 19:10-12, e faavavega ona maua e i latou ua filifili e lē faaipoipo le meaalofa o le nofofua?

▪ Seʻi mātau le māfuaaga na māfua ai ona fetalai Iesu e faatatau i le nofofua. Ina ua lāgā e le ʻau Faresaio le mataupu e faatatau i le talagā faaipoipoga, na taʻua ma le manino e Iesu le silafaga a Ieova i le faaipoipoga. I lalo o le Tulafono, pe afai ua iloa e se tane na faia e lana avā ʻse mea leaga,’ e mafai ona ia faia se tusi e faamaonia ai ua tatala le la faaipoipoga ma lana avā. Peitaʻi, e lē o le tulaga lenā sa iai i le amataga. (Teu. 24:1, 2) O lea, na fetalai ai Iesu: “Ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.”—Mata. 19:3-9.

Ina ua faalogo soo o Iesu i na upu, ona latou faapea mai lea: “Afai o le tulaga lea o le tane ma lana avā, e sili la pe a aua le faaipoipo se tasi.” Ona faapea atu lea o Iesu, e lē o tagata uma e mafai ona taliaina na upu, ae e na o i latou ua iai le meaalofa o le nofofua. “Auā e iai tane e lē faaipoipo ona o ni faalētonu i o latou tino ina ua fananau mai, o isi ua lē faaipoipo ona na faaleagaina e tagata, a o isi ua lē faaipoipo ona o le malo o le lagi. O lē ua lotomalie e lē faaipoipo, ia nofofua pea o ia.”—Mata. 19:10-12.

O eunuka o i latou ia na fananau mai e iai faalētonu i o latou totogasā, po o le faaleagaina foʻi o o latou totogasā ona o se faalavelave, pe ona o se gaoioiga na faia ma le loto iai. Peitaʻi, e iai foʻi nisi ua filifili e ola i ni olaga e pei o ni eunuka. E ui e mafai ona latou faaipoipo, ae ua latou faaalia le pulea totino ma tumau ona nofofua “ona o le malo o le lagi.” I le pei o Iesu, ua latou filifili e nofofua ina ia faamuamua ai manaʻoga o le Malo i o latou olaga. E leʻi faavavega ona latou mauaina lenei meaalofa, pe faapea foʻi na latou fananau mai ma i latou. Peitaʻi, na latou faia ni faataulaga ina ia faia ai faapea. O lona uiga, na latou mauaina le meaalofa o le nofofua.

Na faalautele e Paulo le fetalaiga a Iesu ina ua ia faapea mai, e mafai e Kerisiano uma ona auauna i le Atua ma le lotomalie, e tusa pe nofofua pe faaipoipo. Peitaʻi, o i latou ua ʻtonu i o latou loto’ e tumau ona nofofua, ʻe sili atu lo latou manuia.’ I le ā le itu? E tatau i ē ua faaipoipo ona faaalu le taimi ma le malosi, e tausia ma faamalie ai manaʻoga o a latou paaga faaipoipo. Peitaʻi, e faaalu le taimi ma le malosi o Kerisiano nofofua i le auaunaga iā Ieova, e aunoa ma le popole i na tulaga. E latou te manatu i lo latou tulaga nofofua, o se “meaalofa” mai le Atua.—1 Kori. 7:7, 32-38.

E manino lava la le manatu o le Tusi Paia. E lē faavavega ona maua e se Kerisiano le meaalofa o le nofofua. Peitaʻi, e tatau ona faia taumafaiga e nofofua ai pea, ina ia mafai ai ona uaʻi atoatoa atu i le faaauilumaina o manaʻoga o le Malo. O le māfuaaga lenā ua filifili ai le toʻatele i aso nei e nofofua. E tatau ona avatu le faamālō ma faalaeiauga iā i latou.