Cabanga ngesimo lebesikhona ngesikhatsi Jesu asho lamavi lamayelana nekungashadi. Ngesikhatsi baFarisi beta kuye futsi bakhuluma ngendzaba yedivosi, Jesu wasenta sacaca simiso saJehova semshado. Nanobe uMtsetfo wawuyivumela indvodza kutsi imbhalele incwadzi yekumdivosa umfati wayo nangabe itfole ‘sici lesitsite’ kuye, kodvwa bekungesinjalo kusukela ekucaleni. (Dut. 24:1, 2) Jesu wase utsi: “Wonkhe umuntfu lodivosa umkakhe ngaphandle kwanakaphingile, bese ushada lomunye umfati, uyaphinga.”—Mat. 19:3-9.

Ngesikhatsi bafundzi beva loku batsi: “Nangabe injalo kantsi indzaba yendvodza nemfati, kuncono kungashadi.” Nakabaphendvula, Jesu watsi: “Akusibo bonkhe labangalemukela lelivi, ngaphandle kwalabo labakuphiwe. Ngobe kukhona batsenwa labatalwa banjalo kwasetiswini tabonina; kukhona nebatsenwa labatsenwa bantfu; kukhona futsi nebatsenwa labatitsena bona ngenca yembuso welizulu. Lowo longakhona kukwemukela loko, akakwemukele!”—Mat. 19:10-12.

Batsenwa mbamba bekuba ngulabo labatalwa banekukhubateka lokutsite nobe baba njalo ngemuva kwekuvelelwa yingoti nobe kulimala lokutsite. Nobe kunjalo, bakhona labanye labatikhetsela kuba batsenwa. Ngisho nobe bebangashada, basebentisa kutibamba futsi bahlala bangakashadi “ngenca yembuso welizulu.” NjengaJesu, bakhetsa kungashadi kute batinikele emsebentini weMbuso. Abazange batalwe banalesipho sekungashadi nobe basiphiwe. Bamane bakwemukela kungashadi, lokusho kutsi, batikhetsela kuba njalo.

Ngesikhatsi akhuluma ngaloko lokwashiwo nguJesu, umphostoli Pawula wachaza kutsi nanobe onkhe emaKhristu—langakashadi nalashadile—angakhonta Nkulunkulu ngendlela layemukelako, lawo langakashadi ‘leme acinile enhlitiyweni’ yawo ngesimo lakuso ‘enta kahle.’ Akwenta njani loko? Bantfu labashadile kudzingeka basebentise sikhatsi nemandla abo kute banakekele futsi bajabulise labo labashade nabo. Ngakulolunye luhlangotsi, emaKhristu langakashadi awadzingi kukwenta loko, ayakhona kutinikela emsebentini weNkhosi. Atsatsa simo sawo ‘njengesipho’ lesivela kuNkulunkulu.—1 Khor. 7:7, 32-38.

Ngako-ke, imiBhalo isitjela kutsi umKhristu akasemukeli ngendlela lesimangaliso sipho sekungashadi. Esikhundleni saloko, uba naso ngekuhlala angakashadi kute atfutfukise imisebenti yeMbuso ngaphandle kwekuphatamiseka. Bantfu labanyenti lamuhla batikhetsele etinhlitiyweni tabo kutsi bahlale bangakashadi kute bente lemisebenti, futsi labanye benta kahle ngekubakhutsata.