Mbampin Mba Mbaôron Takerada Ne Ve Pin la

Mkaanem ma Yesu ma i nger ken Mateu 19:10-12 mara tese ér mba ve tsough u lun kwav la, i na ve iyua i lun kwav la sha ivandee?

▪ Nenge ase er yange hii ve Yesu ôr kwagh sha kwagh u lun kwav la yô. Zum u Mbafarishi va hen a na, va hii u lamen a na sha kwagh u ivaa paven la, Yesu pase ve tindi u Yehova a we sha kwagh u ivesegh la wang. Tindi u Mose yange tese ér aluer nom ‘zua a kwagh u doon ga’ hen kwase u nan yô, nana nger kwase u nan la takerada u paven ivaa a nan. Nahan kpa, sha hiihii la, lu awashima u Aôndo la ga. (Dut. 24:1, 2) Ka nahan ve Yesu ôr kwagh ne ye, ér: “Hanma or u nana pav a kwase u nan, kpa a lu sha ci u idya ga man nana gema á er kwase ugen yô, ka idya je nan er ye.”—Mat. 19:3-9.

Mbahenen nav mba ongo nahan yô, ve kaa ér: “Aluer kape kwagh u nom a kwase a lu la yô, guda u lun kwav.” Yesu gema kaa a ve ér: “Ka ior cii man vea fatyô u lumun kwagh ne ga, saa mba i ne ve yô. Gadia mbagenev ka u vea er kwase ga, i mar ve a mar nahan je; shi mbagenev ka u vea er kwase ga, ka ior ve gem ve ve hingir nahan ye; man shi mbagenev di yô, ka u vea er kwase ga, ve er nahan ayol a ve je sha ci u tartor u Sha. U nan fetyô u lumun kwagh ne yô, nana̱ lumun.”—Mat. 19:10-12.

Ior mba yange lu u vea fatyô u eren kasev ga kuaa la, lu mba i mar ve ve due a iwan sha ilyeegh vev ki ken myer shin i cagh ve ake, shin ve lu nahan sha ci u aikyôr yô. Nahan kpa, ior mbagenev gema lu, mba ve er ayol a ve nahan yô. Lu ior mba yange vea soo kpa ma ve er kasev ma ve mar ônov yô, kpa ve kôr ayol a ve tsaha, nahan ve za hemen u lun kwav “sha ci u tartor u Sha.” Yange ve tsua a ishima ve u lun kwav sha er vea hemba zuan a shighe u eren tom u Tartor yô. Yange i mar ve a mar a iyua i lun kwav la ga, shi i na ve a na iyua la kpaa ga. Yange ve soo u lun kwav jighilii. Inja na yô, ve kange ishima u lun a iyua la.

Apostoli Paulu ngur tan iwanger sha kwagh u Yesu ôr ne yô, a pase ér, Mbakristu mba ve er kasev shin mba ve lu kwav la cii vea fatyô u civir Aôndo sha gbenda u a soo la. Kpa or u lun kwav u nan “til ken ishima i nan jighilii” ér nana lu kwav la nan “er doo kpishi.” Sha ci u nyi? Sha ci u ka i gba u mba ve zough ivaa la vea tôô shighe shi vea na agee a ve sha u nengen sha or u ve vese la, shi eren kwagh u una doo nan la kpaa. Kpa Mbakristu mba ve lu kwav yô, mba a tom la ga, nahan ka ve na shighe ve man agee a ve cii sha u eren tom u Ter. Ka ve nenge mlu ve la ér ka “iyua” i Aôndo a ne ve yô.—1 Kor. 7:7, 32-38.

Sha nahan yô, Bibilo kaa a vese ér Orkristu nan zough a iyua i lun kwav la sha ivande ga. Kpa ka nan kange ishima u lun kwav, nahan nan lu a iyua la sha er nana za hemen u eren tom u Tartor a kwagh u danen nan shio yô. Nyian ne, ior kpishi tsua a ishima ve u lun kwav sha ci u ityôkyaa ne, nahan doo u mbagenev vea taver ve asema.