Mibuzyo Yabasikubala

Sena majwi aa Jesu aajanika mulugwalo lwa Matayo 19:10-12 apa muzeezo wakuti aabo ibasala kutakwata naa kutakwatwa bakatambula cipego eeci munzila iigambya?

▪ Amubone bukkale mbobwakabede ciindi Jesu naakaamba makani aajatikizya kutakwata. Ciindi ba Farisi nibakaboola kulinguwe akumubuzya kujatikizya kulekana, Jesu cakusalazya wakaamba ceelelo ca Jehova cijatikizya cikwati. Nokuba kuti Mulawo wakali kuzumizya mulumi kulemba lugwalo lwakulekana amukaintu wakwe ikuti wajana “cintu cuusya insoni” mulinguwe, oobu tabusyi mbocakabede kuzwa kumatalikilo. (Dt. 24:1, 2) Kumane, Jesu wakaamba kuti: “Kufwumbwa uuleka mukaintu wakwe iwatacita bwaamu, amane wakwata umbi, wacita bumambe.”—Mt. 19:3-9.

Nibakamvwa boobo, basikwiiya bakaamba kuti: “Ikuti oobo mbwaabede makani aamwaalumi amukaintu wakwe, nkokuti tacili cibotu kukwata.” Kubaingula, Jesu wakaamba kuti: “Tabali boonse bakonzya kucita boobo pe, ccita buyo aabo bajisi cipego. Nkaambo kuli baalumi bamwi batakonzyi kukwata akaambo kakuti mbobakazyalwa oobo, alimwi kuli bamwi batakonzyi kukwata nkaambo bakacitwa boobo abantu, alimwi nkobali bakalilesya kukwata akaambo ka Bwami bwakujulu. Ooyo uukonzya kuzumanana kakunyina kukwata, akkale mbubonya oobo.”—Mt. 19:10-12.

Bazibe beni-beni bakali baabo bakazyalwa boobo akaambo kabulema mbobakazyalwa ambubo naa aabo bakazibwa akaambo kantenda imwi. Alimwi kuli baabo ibakaba bazibe cakuliyandila. Nokuba kuti balakonzya kukwata, balalilesya akuzumanana kukkala kabatakwete “akaambo ka Bwami bwakujulu.” Mbubwenya mbuli Jesu, bakasala kutakwata kutegwa bacikonzye kubikkila maano kumulimo wa Bwami. Kunyina nibakazyalwa acipego cakutakwata naa kuba acipego eeci. Mubwini, bakaliyandila buya. Nkokuti bakasala kuba acipego eeci.

Kuyungizya aamajwi ngaakaamba Jesu, mwaapostolo Paulo wakapandulula kuti Banakristo boonse—batakwete abakwete—balakonzya kubelekela Leza munzila njayanda, pele aabo batakwete ‘ibasinizyide mumoyo wabo’ kujatikizya kutakwata, “[ba]cita kabotu kwiinda.” Munzila nzi? Bantu bakwete beelede kwaaba ciindi alimwi anguzu kutegwa bakkomanisye alimwi akulanganya ngobakwetenelimwi. Kulubazu lumwi, Banakristo batakwete balakonzya kubikkila maano kumulimo wa Mwami kabatajisi mukuli ooyo. Babona ciimo cabo kuti “[n]cipego” cizwa kuli Leza.—1 Ko. 7:7, 32-38.

Aboobo, Magwalo kunyina naatwaambila kuti Munakristo ulatambula cipego cakutakwata naa cakutakwatwa munzila iigambya. Muciindi caboobo, ulasala kutakwata naa kutakwatwa kutegwa atole ambele ziyandika zya Bwami kakunyina zyintu zimunyonganya. Mazuba aano, banji basala kutakwata naa kutakwatwa kutegwa batole ambele ziyandika zya Bwami alimwi bamwi inga bacita kabotu kubakulwaizya.