Yumi ken skelim ol samting i kamap taim Jisas i toktok long pasin bilong stap singel. Taim ol Farisi i kam long Jisas na askim long pasin bilong katim marit, Jisas i tokaut klia long lo bilong Jehova long marit. Em tru olsem Lo i orait long man i ken raitim pepa long katim marit sapos em i “painim wanpela rong” long meri bilong em, tasol dispela em i no laik bilong God long pastaim. (Lo 24:1, 2) Orait Jisas i tok: “Sapos meri i no mekim pasin pamuk na man i katim marit na maritim narapela meri, orait dispela man i mekim pasin adaltri.”—Mat. 19:3-9.

Taim ol disaipel i harim dispela, ol i tok: “Sapos marit i olsem, ating i no gutpela long marit.” Na Jisas i tok: “I no olgeta man i save bihainim dispela tok, nogat. Em bilong ol man i kisim dispela presen. Sampela i no marit, long wanem, ol i gat bagarap long bodi taim mama i karim ol. Na sampela i no marit, long wanem, ol man i katim ol. Tasol i gat sampela i no marit, long wanem, ol i tingim Kingdom bilong heven. Man husat inap mekim olsem, gutpela em i mekim olsem.”—Mat. 19:10-12.

Ol lain husat i gat bagarap long bodi, sampela bilong ol i bin kamap olsem taim mama i karim ol, sampela i bin kisim eksiden, o ol man i bin katim ol. Tasol sampela i stap singel long laik bilong ol yet. Maski ol inap marit, ol i bosim bel na stap singel, long wanem, ol i tingim “Kingdom bilong heven.” Olsem Jisas, ol i stap singel bambai ol inap givim ol yet long mekim wok bilong Kingdom. I no olsem ol i bin bon wantaim presen bilong stap singel o wanpela i bin givim dispela presen long ol, nogat. Ol yet i makim olsem ol bai stap singel, i olsem ol yet i kisim dispela presen.

Aposel Pol i kamapim sampela tok moa long tok Jisas i bin mekim na em i tok, olgeta Kristen, singel o marit, inap mekim gut wok bilong God, tasol ol singel Kristen husat i “pasim tok long bel” long stap singel ol bai mekim wok “i gutpela moa.” Bilong wanem? Long wanem, ol marit i mas lusim sampela haptaim na strong bilong ol long amamasim na tingim poroman marit bilong ol. Tasol ol singel Kristen i no gat dispela wok, olsem na ol inap givim ol yet long mekim wok bilong Bikpela. Ol i stap singel na ol i tingim dispela olsem “wanpela presen” i kam long God.—1 Kor. 7:7, 32-38.

Olsem na Baibel i kamapim klia olsem, Kristen i no kisim presen bilong stap singel long sampela narapela kain rot, nogat. Em i kisim dispela presen long rot bilong stap singel bambai em inap mekim bikpela wok moa bilong Kingdom na i no gat wanpela samting i pulim tingting bilong em. Long dispela as, planti long nau ol i pasim tok long bel long stap singel, na ol narapela i mas mekim gutpela tok bilong strongim ol.