Mafumbo Ghakufumira ku Ŵaŵazgi

Kasi mazgu gha Yesu gha pa Mateyu 19:10-12 ghakung’anamura kuti awo ŵakusankha kuleka kutora panji kutengwa ŵali kupokera cawanangwa ici mwamunthondwe?

▪ Wonani ivyo vikapangiska Yesu kuti wayowoye vya kuleka kutora panji kutengwa. Apo Ŵafarisi ŵakiza kwa iyo na kwambiska nkhani ya kupatana, Yesu wakayowoya mwakupulikikwa makora dango la Yehova lakukhwaskana na nthengwa. Nangauli Dango likazomerezganga kuti mwanalume walembenge kalata yakupatira muwoli wake para wasanga “kanthu ka cifipizgo” mwa iyo, kweni pakwambilira ndimo vikaŵira yayi. (Dute. 24:1, 2) Pamanyuma Yesu wakati: “Yose uyo wakupata muwoli wake, kwambura cifukwa ca uzaghali, na kutora munyake wakucita uleŵi.”—Mat. 19:3-9.

Pakupulika ici, ŵasambiri ŵakati: “Usange ndimo viliri kwa mwanalume na muwoli wake, mbwenu nchiwemi cara kutora.” Pakuzgora, Yesu wakati: “Mbanthu wose cara ŵakumanya kupokelera mazgu agha, kweni ŵekha awo ŵali na cawanangwa. Pakuti kuli nthunguli izo zikababika ntheura kufuma mu nthumbo za ŵanyinawo, ndipo kuli nthunguli izo zikazgoleka nthunguli na ŵanthu, ndipo kuli nthunguli izo zajizgora zekha nthunguli cifukwa ca ufumu wa kucanya. Uyo wangakwaniska kucipokelera, wacipokelere.”—Mat. 19:10-12.

Ŵanji ŵakaŵanga nthunguli cifukwa cakuti ndimo ŵakababikira, ŵanji cifukwa ca ngozi, panji cifukwa cakuti ŵanthu ŵakaŵapweteka. Ndipouli pakaŵangaso ŵanji awo ŵakasankhanga ŵekha kuŵa nthunguli. Nangauli ŵakaŵa ŵakuti ŵanganjira mu nthengwa, kweni ŵakajikoranga na kuŵa ŵambura kutora panji kutengwa “cifukwa ca ufumu wa kucanya.” Nga ni Yesu, ŵakasankha kuleka kunjira mu nthengwa mwakuti ŵaŵe na nyengo yinandi yakucitira vinthu vya Ufumu. Iwo kuti ŵakababika na cawanangwa ca kuleka kutora panji kutengwa yayi nesi kuti ŵakacita kupika cawanangwa ici. Kweni ŵakacipokelera, panji kuti ŵakafwilirapo kuti ŵasange cawanangwa ici.

Kufuma pa ivyo wakayowoya Yesu, mpositole Paulosi wakalongosora kuti nangauli Ŵakhristu wose, kwali ŵali mu nthengwa kwali yayi, ŵangateŵetera Ciuta mwakuzomerezgeka, kweni awo ŵandanjire mu nthengwa, ŵeneawo ‘ŵakukaka mu mtima wawo’ kuti ŵaŵe nthena ‘ŵakucita makora kwakuluska.’ Mwawuli? Ŵanthu ŵakutora panji kutengwa ŵakwenera kugaŵa nyengo na nkhongono zawo kuti ŵakondweske na kupwelelera munyawo wa mu nthengwa. Kweni Ŵakhristu ŵambura kutora panji kutengwa ŵangacita mulimo wa Fumu kwambura nthimbanizgo iyi. Iwo ŵakuwona kuti ici ‘nchawanangwa’ cakufuma kwa Ciuta.—1 Kor. 7:7, 32-38.

Ntheura, Malemba ghakutiphalira kuti Mkhristu wakucita kupokera mwamunthondwe yayi cawanangwa ca kuleka kutora panji kutengwa. Kweni, wakuŵa naco mwa kulutilira kuŵa wambura kutora panji kutengwa mwakuti wacite vinthu vinandi vya Ufumu kwambura kutimbanizgika. Ŵanandi mazuŵa ghano ŵasankha kuleka kutora panji kutengwa pa cifukwa ici, ndipo ŵanji ŵakwenera kuŵakhozga.

[Cithuzithuzi pa peji 20]