Tagda an kahimtang han nagkomento hi Jesus mahitungod ha pagin solo. Han an mga Pariseo dinaop ha iya ngan nagpakiana may kalabotan ha pakigdiborsyo, ginklaro ni Jesus kon ano an suruklan ni Jehova ha pag-asawa. Bisan kon igintugot han Balaud nga an lalaki maghimo hin “surat ha pagbulag” kon may mahibaroan hiya nga “bagay nga diri angay” ha iya asawa, diri sugad hito an kahimtang ha tinikangan. (Deut. 24:1, 2) Katapos hi Jesus nagsiring: “Bisan hin-o an mabulag ha iya asawa nga babaye kon diri tungod la ha pakighilawas, ngan mangasawa hin iba, nakakagbuhat hin panlibog.”—Mat. 19:3-9.

Han nabatian ini han mga disipulo, hira nagsiring: “Kon sugad hito it kahimtang hit lalaki ngan hit iya asawa, diri maopay nga mag-arog hin asawa.” Hi Jesus binaton: “Diri an ngatanan nakakarawat hini nga yakan, kondi an mga tinagan. Kay may mga lalaki nga mga kapon nga daan han ira pagkatawo tikang ha tiyan han iroy niya; ngan may mga lalaki nga mga kapon nga ginkaponan han mga tawo; ngan may mga kapon nga nagkapon ha ira la ngahaw tungod han ginhadian han langit. An makahimo pagkarawat hini, kumarawat hiya.”—Mat. 19:10-12.

An literal nga mga kapon amo adton igin-anak nga kapon na tungod han depekto tikang ha katawo o adton nasugad hito tungod kay naaksidente o tinuyo nga ginkapon. Kondi an iba kinaburut-on nga nagpili nga magkinabuhi nga sugad hin kinapon bisan kon diri hira literal nga ginkapon. Bisan kon puydi hira mag-asawa, ginpugngan nira an ira kalugaringon ngan nagpabilin nga solo “tungod han ginhadian han langit.” Pariho kan Jesus, ginpili nira nga magpabilin nga solo basi makag-alagad ha Dios hin bug-os-panahon. Waray hira matawo nga may regalo ha pagin solo, ngan waray liwat hira tagi hito nga regalo. Ha pagkatinuod, ira ito ginpili. Karuyag sidngon, gintuyo nira nga magkaada hito nga regalo.

Basado ha ginsiring ni Jesus, hi apostol Pablo nagsaysay nga bisan kon an ngatanan nga Kristiano—solo man o inasaw-an—mahimo makag-alagad ha Dios ha paagi nga Iya kinakarawat, an mga solo nga ‘marig-on ha ira kasingkasing’ mahitungod ha ira pagin solo “nagbubuhat hin maoroopay.” Kay ano? An mga inasaw-an kinahanglan magbatagbatag han ira panahon ngan kusog basi mapalipay ngan maataman an ira padis. Ha luyo nga bahin, an solo nga mga Kristiano makakapokus ha pag-alagad ha Ginoo nga waray sugad hito nga obligasyon. Ira gintatagad an ira kahimtang nga “hatag,” o regalo, tikang ha Dios.—1 Kor. 7:7, 32-38.

Salit an Kasuratan nagsusumat ha aton nga an usa nga Kristiano diri nakakakarawat ha misteryoso nga paagi han regalo ha pagin solo. Lugod, nagkakaada hiya hito pinaagi ha pagpabilin nga solo basi makag-alagad ha Dios nga waray kaulangan. Damu yana an kinaburut-on nga nagdesisyon nga magpabilin nga solo tungod hini nga hinungdan, ngan sadang hira suportahan hito nga ira desisyon.