Kʼáatchiʼob ku beetaʼal
Kʼáatchiʼob ku beetaʼal
Le ka tu yaʼalaj Jesús le baʼax ku chíikpajal tiʼ Mateo 19:10 tak 12, ¿tu yóotaj wa u yaʼaleʼ le máaxoʼob ku chʼaʼtuklik maʼ u tsʼoʼokol u beeloʼoboʼ ku beetkoʼob tumen tsʼaʼantiʼob u páajtalil?
▪ Koʼoneʼex ilik baʼaxten tʼaanaj Jesús yoʼolal le máaxoʼob maʼ tsʼokaʼan u beeloʼoboʼ. Le ka tu kʼáataj jujuntúul fariseo tiʼ Jesús baʼaloʼob yoʼolal le divorciooʼ, letiʼeʼ tu jach eʼesaj baʼax ku kʼáatik Dios tiʼ le tsʼokaʼan u beeloʼoboʼ. Kex le Ley ku yaʼalik jeʼel u páajtal u divorciarkuba juntúul íichamtsil tiʼ u yatan wa ku yilik «yaan baʼax tiʼ maʼ unaj[e]ʼ», u jaajileʼ kaʼacheʼ maʼ beyoʼ (Deu. 24:1, 2). Ka tsʼoʼokeʼ Jesuseʼ tu yaʼalaj: «Le máax ku pʼatik u yatan, wa maʼ tu yoʼolal núupkʼebaneʼ, yéetel ku tsʼoʼokol u beel yéetel uláakʼ koʼolel[eʼ]», «ku núupkʼebantal» (Mat. 19:3-9).
Le ka tu yuʼubaj le disipuloʼoboʼ, tu yaʼaloʼob: «Wa bey yanil juntúul máak yéetel u yataneʼ, maʼ unaj túun u tsʼoʼokol u beel[iʼ]». Jesús túuneʼ tu yaʼalaj: «Maʼ tuláakal máak jeʼel u beetik le baʼax ta waʼaleʼexoʼ, baʼaleʼ chéen le máaxoʼob tsʼaʼantiʼob u páajtaliloʼ. Yaan máakoʼobeʼ maʼ tu páajtal u tsʼoʼokol u beeloʼob tumen desde ka síijoʼobeʼ yaan baʼax uchaʼan tiʼ u xiibiloʼob, yaan xaneʼ maʼ tu páajtal u tsʼoʼokol u beeloʼob tumen xotʼaʼan u xiibiloʼob, uláakʼ máakoʼob xaneʼ tu juunaloʼob ku chʼaʼtuklik maʼ u tsʼoʼokol u beeloʼob tu yoʼolal u Reinoil kaʼan. Le máax jeʼel u páajtal u beetik beyoʼ, ka u beete» (Mat. 19:10-12, NM).
Yaan máak kaʼacheʼ maʼ tu páajtal u tsʼoʼokol u beel tumen desde ka síijeʼ yaan baʼax uchaʼan tiʼ u xiibil, yaan xaneʼ tumen uchaʼan loob tiʼ u xiibil wa xotʼaʼan. Baʼaleʼ yaneʼ tu juunal ku chʼaʼtuklik maʼ u tsʼoʼokol u beel «tu yoʼolal u Reinoil kaʼan», tumen ku controlartik u tsʼíibolaloʼob. Letiʼobeʼ ku tsʼáaikoʼob táanil le Reino jeʼex tu beetil Jesuseʼ. Letiʼobeʼ maʼ sijnáaloʼob yéetel le tuukul beyoʼ, mix xan tsʼaabil beetaʼabiktiʼobiʼ. U jaajileʼ tu juunaloʼob tu chʼaʼtuklaj u beetkoʼob beyoʼ.
Apóstol Pablo xaneʼ tu yaʼaleʼ kex jeʼel u páajtal u meyajtaʼal Dios tumen juntúul máax tsʼokaʼan u beel wa maʼeʼ, tu yaʼaleʼ le máax «u tsʼaamaj tu puksiʼikʼal» maʼ u tsʼoʼokol u beeloʼ «[maas] maʼalob baʼax ku beetik». ¿Baʼaxten? Tumen le tsʼokaʼan u beeloʼ kʼaʼabéet u jóoʼsik u tiempo utiaʼal u kiʼimakkúuntik u yóol u núup bey xan utiaʼal u kanáantik, baʼaleʼ le maʼ tsʼokaʼan u beeloʼ jeʼel u páajtal u maas kʼubikuba u meyajt Yuumtsileʼ, tumen maʼ kʼaʼabéet u beetik beyoʼ. Le máaxoʼob yaantiʼob u páajtalil u maas kʼubikubaʼob u meyajtoʼob Diosoʼ ku yilkoʼob junpʼéel «páajtalil» Dios tsʼaamiltiʼob (1 Cor. 7:7, 32-38).
Jeʼex k-ilkoʼ le Bibliaoʼ ku kaʼansikeʼ le u chʼaʼtuklik máak maʼ u tsʼoʼokol u beel, wa u kiʼimaktal u yóol kex maʼ tsʼokaʼan u beeleʼ, maʼ junpʼéel baʼal ku tsʼaʼabal tiʼ máakiʼ, baʼaxeʼ junpʼéel baʼal tu juunal ku chʼaʼtuklik utiaʼal u maas tsʼáaik táanil le Reinooʼ. Utiaʼal u beetkoʼob beyoʼ yaʼab máaxoʼob meyajtik Dioseʼ tsʼoʼok u chʼaʼtuklik maʼ u tsʼoʼokol u beeloʼob, jach maʼalob ka áantaʼakoʼob tumen u maasil.