Ni rinabadiidxaʼ cani ruundaʼ

Ora guníʼ Jesús ca diidxaʼ ni zeeda lu Mateo 19:10-12, ñee caniʼbe maca gudixhe Dios tuu nga guiaana sin guichaganáʼ la?

▪ Guidúʼyanu xi cayaca ora guníʼ Jesús ca diidxaʼ riʼ. Ora gunabadiidxaʼ caadxi fariseu Jesús pa zanda gaca divorciar binni, bicabi Jesús laacabe xi ley gudixhe Dios para guendaxheelaʼ. Ley que na zanda guni tuuxa hombre ti guiʼchiʼ ra gucaa cayaca divorciar de xheelaʼ, purtiʼ biiyaʼ «xiixa ni cadi jneza de laabe», peru cadi zaqué diʼ nga gudixhe Dios gácani (Deut. 24:1, 2). Yanna guidúʼyanu xi guníʼ Jesús: «Tutiica gaca divorciar né xheela ne ichaganá stobi, neca qué nuchee xheela la? ma enda rapa jnadxii ngue» (Mat. 19:3-9).

Ora binadiaga ca discípulo que ni guníʼ Jesús, bicábicaʼ sicaríʼ: «Pa zacá nouʼ guni hombre ne xheela la? jma nagueenda guiaana cabe sin ichaganá cabe». Óraque gúdxibe laacaʼ: «Cadi irá zanda guiaana sin ichaganáʼ, sínuque cani ma nexhe ni para laa. Purti nuu hombre riale maca para cadi ichaganáʼ, ne nuu xcaadxi ni nuu pe tu runi ni laa para cadi ichaganáʼ. Peru laca nuu ni riale ni de laa si guiaana sin ichaganáʼ, purti jma cá ique guni xhiiña Dios ni nuu ibáʼ. Cani zanda guiaana sin ichaganá la? cadi ichaganáʼ» (Mat. 19:10-12).

Dxi guníʼ Jesús ca diidxaʼ zeeda lu textu riʼ biquiiñebe diidxaʼ eunuco, ne guniʼbe nuu binni dede ora gale maca eunuco laa, nuu tu laa riaana zacá pur bizaaca xiixa accidente ne nuu tu runi binni laa eunuco. Peru laaca guyuu binni ni biʼniʼ laa eunuco, o riguixhe guiaana sin guichaganáʼ, «purti jma cá ique guni xhiiña Dios ni nuu ibáʼ». Cásica Jesús, rúnicabe ni para ganda gápacabe jma tiempu para gúnicabe xhiiñaʼ Reinu. Qué ñalenécabe ti gracia ne laaca qué ñaca ti milagru para ñápacabe ni, sínuque de laacabe nga biale guiaanacabe sin guichaganácabe.

Ne cásica guníʼ Jesús nga ca diidxaʼ guníʼ Pablu. Apóstol riʼ bisiene zanda guni guiráʼ ca xpinni Cristu ni na Dios —cani maʼ bichaganáʼ ne cani caʼruʼ guichaganáʼ—, peru pa nuu «stobi na jma jneza [guiaana] sin ichaganáʼ» la? «jma rusi jneza cayuni». Xiñee yaʼ. Purtiʼ riquiiñeʼ cani maʼ bichaganáʼ tiempu ne stipa para gúʼyacaʼ ne gápacaʼ xheelacaʼ, peru cani caʼruʼ guichaganáʼ zanda gúnicaʼ jma lu xhiiñaʼ Señor purtiʼ cadi nuucaʼ xizaa pur cani bizéʼtenu riʼ. Nga runi, ruuyacabe ni casi ti «gracia bidii» Dios laacabe (1 Cor. 7:7, 32-38).

Nga runi, ora riníʼ Stiidxaʼ Dios de cani rale «maca para cadi ichaganáʼ» la? caniʼni de ca binni ni caʼruʼ guichaganáʼ, peru nuucaʼ nayecheʼ. Qué ñuni Dios xiixa milagru para nucaa laacabe niníʼ íquecabe zacá, sínuque de laacabe biáleni ti ganda gúnicabe jma lu xhiiñaʼ Reinu. Stale xpinni Cristu maʼ gudixhe ique guiaana sin guichaganáʼ ti ganda guni jma lu xhiiñaʼ Dios, ne galán guni xcaadxi pa gacanecaʼ laacabe ne uguucaʼ gana laacabe.